Évanjil a Matyé 28:1-20
28 Prèmyé jou a simenn-la, apré saba-la, lè jou té ka koumansé wouvè, Mari Magdaléèn-la é lòt Mari-la ay gadé tonm-la.
2 On gwo trannmandtè té fèt pas on zanj a Jéova té sòti an syèl é i té désann asi latè. I té fè wòch-la woulé é i té sizé anlè-y.
3 I té ka kléré kon zéklè é lenj a-y té blan kon nèj.
4 Tèlman sé gad-la té pè-y, yo mèt-yo ka tranblé é yo rété sézi.
5 Men zanj-la di sé madanm-la : « Pa pè ! An sav sé Jézi zò ka chèché, sila yo tchouyé asi poto-la.
6 A pa la zò ké touvé-y pas i résisité, kon i té di. Vin vwè la kò a-y té yé.
7 Aprésa, pòté mannèv pou ay di disip a-y : “Jézi résisité, é i anchimen pou ay an Galilé. Sé la zò ké vwè-y.” Mi sé sa an té ni a di-zòt. »
8 Kifè, yo pa tadé pou sòti owa tonm-la — yo té pè men yo té kontan toubònman osi — é yo kouri ay di sé disip-la sa.
9 Lèwgadé, Jézi vin jwenn-yo é i di-yo : « Byenbonjou ! » Yo vin owa a-y, yo mèt-yo ajounou douvan-y é yo kenbé pyé a-y.
10 Alò Jézi di-yo : « Pa pè ! Ay di frè an mwen sa, pou yo vin an Galilé. Sé la yo ké vwè-mwen. »
11 Pannan sé madanm-la té anchimen, déotwa gad rantré an vil-la é yo rakonté sé prèt pi enpòwtan la tousa ki té pasé.
12 Sé prèt pi enpòwtan la é sé ansyen-la réini-yo pou yo té diskité antrè yo, é aprésa sé prèt pi enpòwtan la ba sé sòlda-la onpakèt pyès annawjan
13 é yo di-yo : « Mi sa pou zò di : “Disip a-y vin pannan lannuit é yo volé kò a-y pannan nou té ka dòmi.”
14 É si sa vin tonbé an zòrèy a gouvènè-la, nou ké èspliké-y* sa ki pasé, konsa, ponmoun pé’é fè-zòt ayen. »
15 Kifè, yo pran sé pyès annawjan la é yo fè sa yo té di-yo fè. É jous alajouné jòdi, onlo Juif ka di kè sé konsa sa pasé.
16 Pannansitan sé 11 disip-la ay an Galilé, asi montangn-la, la Jézi té ba-yo randévou la.
17 Lè yo vwè-y, yo mèt jounou atè douvan-y. Men ni déotwa adan yo ki té ni dimal a kwè kè sé té Jézi.
18 Jézi ay owa yo é i di-yo : « Yo ban-mwen tout pouvwa an syèl-la é asi latè.
19 Kifè, alé é fè disip pawmi moun a tout kalté nasyon. Batizé-yo an non a Papa-la, an non a Gason-la é an non a lèspri sen.
20 Aprann-yo fè tousa an mandé-zòt fè. É mi, gadé ! An ké èvè zòt touléjou, joustan lè-la rivé pou mond-lasa* bout. »
