Évanjil a Matyé 3:1-17
3 On jou, Jan Lèbatis vin préché adan dézè a Jidé.
2 I té ka di : « Rèpanti-zòt, pas wayòm-la ki an syèl-la pi pré. »
3 Sé dè-y pwofèt Izayi té ka palé lè i di : « Ni on moun ka hélé adan dézè-la : “Préparé chimen-la pou Jéova ! Ranjé chimen-la pou-y !” »
4 Lenj-la Jan té ni anlè-y la té fèt èvè pwèl a chamo, é ren a-y té maré èvè on senti an kui. I té ka manjé krikèt é siwo-myèl.
5 Moun ki té ka rété Jérizalèm, adan tout téritwa a Lajidé, é adan tout sé vil-la ki té alantou a Jouden-la té ka vin owa a-y.
6 I té ka batizé-yo* adan dlo a Jouden-la é yo té ka di franchman ki péché yo té fè.
7 Lè i vwè kè onlo farizyen é onlo sadiséyen té ka vin pran lèbatèm, i di-yo : « Pitit a vipè, kimoun ki di-zòt kè zò ké pé chapé kò a zòt lèwvwè Bondyé ké fè kòlè ?
8 Alò, montré kè zò ka rèpanti-zòt* !
9 Pa konpranndèdi Bondyé pé’é ba-zòt sa zò mérité, davwa zò ka di zò sé timoun a Abraam ! Pas mi sa an ka di-zòt : “Bondyé pé sèvi èvè sé wòch-lasa pou fè Abraam ni timoun.”
10 Hach-la ja tou paré pou koupé rasin a sé pyébwa-la. Tout pyébwa ki pa ka bay bèl fwi, yo ké koupé-y é yo ké jété-y an difé.
11 Mwen, an ka batizé-zòt èvè dlo pas zò ka rèpanti-zòt. Men moun-la ki ka vin apré mwen la pi fò ki mwen ; an pa menm mérité woté sandal a-y. É moun-lasa, i ké batizé-zòt èvè lèspri sen é èvè difé.
12 An men a-y, i ni on zouti pou woté pach, é koté-la yo ka bat gren-la, i ké nétwayé-y pwòp. I ké mèt blé a-y an dépo-la, men i ké brilé pach-la adan on difé pa ni mwayen étenn. »
13 Aprésa, Jézi sòti an Galilé é i ay owa Jouden-la pou Jan té batizé-y.
14 Men konm Jan pa té vlé fè sa, i di Jézi : « Sé mwen ki té’é byen bizwen ou batizé-mwen, é sé-w ki ka vin owa an mwen ? »
15 Jézi réponn-li : « Lésé sa fèt konsa, pas sé konsa pou nou fè tousa ki jis. » Alò Jan aksèpté, é i batizé Jézi.
16 Jan batizé Jézi é tousuit apré, Jézi koumansé sòti an dlo-la. Lèwgadé, syèl-la wouvè é i* vwè lèspri a Bondyé ka désann kon on kolonb é ka vin asi Jézi.
17 Anplisdisa, ni on vwa ki sòti an syèl-la é ki di : « Mi Gason an mwen, sila an enmé onlo la é ki ka mèt jwa an tchè an mwen. »
Noté sa
^ Oben « plonjé ».
^ Pi ègzaktèman « fò-zò pwodui fwi ki ka montré kè zò ka rèpanti-zòt ».
^ Pétèt sé Jan.
