Évanjil a Matyé 4:1-25
4 Aprésa, lèspri a Bondyé menné Jézi an dézè-la pou Dyab-la té pé sa tanté-y.
2 Konm i rété san manjé pannan 40 jou é 40 lannuit, i touvé-y fen.
3 Dyab-la vin owa a-y pou tanté-y é i di-y : « Si ou sé on gason a Bondyé, di sé wòch-lasa touné an pen. »
4 Men i réponn : « Mi sa ki maké : “A pa enki pen on moun bizwen pou i viv, men i bizwen tout pawòl ki ka sòti an bouch a Jéova.” »
5 Alò Dyab-la menné-y an vil-la ki sen la, i mété Jézi doubout anlè masonn-la ki pi ho la an Tanp-la
6 é i di-y : « Si ou sé on gason a Bondyé, jété kò a-w anba, pas mi sa ki maké : “I ké mandé zanj a-y pòté-w an men a yo, pou pyé a-w pa varé anlè pon wòch.” »
7 Jézi di-y : « Mi sa ki maké osi : “Fò pa ou mèt Jéova, Bondyé a-w, a léprèv.” »
8 Aprésa, Dyab-la menné-y anlè on montangn ki té ho toubònman é i fè-y vwè tout sé wayòm-la ki an mond-la èvè glwa a yo.
9 I di-y : « An ké ba-w tout sé biten-lasa si ou mété-w ajounou douvan mwen é si ou adoré-mwen onsèl fwa tousèl. »
10 Jézi réponn-li : « Sòti-w la Satan ! Pas mi sa ki maké : “Sé Jéova, Dyé a-w, pou-w adoré, é sé li tousèl pou-w sèvi.” »
11 Alò Dyab-la pati, é ni zanj ki vin é ki koumansé pran swen a Jézi.
12 Lè Jézi vin sav kè yo té arété Jan, i pati an Galilé.
13 Aprésa, i kité Nazarèt é i ay rété Kafawnaòm, òbò lanmè-la, adan téritwa a Zabilon é a Nèftali.
14 Sé té pou pawòl-la pwofèt Izayi té di la té pé réyalizé. Mi sa pwofèt-la té di :
15 « Vou Galilé, la onlo moun ki sòti adan dòt nasyon ka viv, téritwa a Zabilon é téritwa a Nèftali, zòt ki lòt koté a Jouden-la, òbò chimen-la ki ka menné an lanmè-la !
16 Moun ki sizé an nwèsè vwè on gran limyè é limyè-la kléré moun ki sizé adan on téritwa ki anba lonbraj a lanmò. »
17 Dépi a moman-lasa, Jézi koumansé préché é i té ka di : « Rèpanti-zòt, pas wayòm-la ki an syèl-la pi pré. »
18 Pannan i té ka maché òbò lanmè Galilé, i vwè 2 frè : Simon, kè yo té ka kriyé Pyè, é André frè a-y. Yo té ka voyé filèt a yo an dlo-la, pas yo té maren-péchè.
19 É i di-yo : « Vin èvè mwen, é sé moun an ké fè-zòt péché. »
20 Yo lagé filèt a yo onfwamenm é yo suiv-li.
21 Jézi kontinyé maché maché a-y é toupannan i té anchimen, i vwè dézòt boug ki té frè : Jak, gason a Zébédé, é Jan, frè a-y. Yo té adan on bato èvè pap’a yo é yo té ka réparé filèt a yo. Lèwgadé, Jézi kriyé-yo.
22 Onfwamenm, yo lésé ki bato-la, ki pap’a yo, é yo suiv-li.
23 Aprésa, Jézi mété-y ka pasé toupatou an Galilé : i té ka anségné adan sé sinagòg-la, i té ka préché bon nouvèl a Wayòm-la é i té ka géri tout kalté maladi é tout kalté moun-enfim.
24 Moun té ka palé dè-y toupatou an Siri. Yo menné onlo moun pou-y : moun ki té ka soufè èvè tout kalté maladi é èvè tout kalté doulè, moun ki té ni démon asi yo, moun ki té ka trapé malkadik* é moun ki té paralizé. É i géri-yo.
25 Alò, onpakèt moun mèt-yo ka suiv-li. Sé moun-lasa té ka sòti an Galilé, an Dékapòl*, a Jérizalèm, an Jidé é lòt koté a Jouden-la.
