Évanjil a Lik 12:1-59
-
Lèvi a sé farizyen-la (1-3)
-
Pisimé nou krenn Bondyé olyé nou krenn lézòm (4-7)
-
Moun ki ka di douvan toutmoun kè yo sé disip a Kris (8-12)
-
Ègzanp a on boug rich ki té sòt (13-21)
-
« Arété pran tèt a zòt » (22-34)
-
Piti twoupo-la (32)
-
-
Kontinyé véyé (35-40)
-
Sèwvitè fidèl la é on sèwvitè ki pa fidèl (41-48)
-
A pa lapé men sé dézòd Jézi vin mèt (49-53)
-
Sa enpòwtan kè nou konprann ki épòk nou ka viv (54-56)
-
Réglé pwoblèm nou ni èvè dòt moun (57-59)
12 Pannansitan, ni plizyè milyé moun ki sanblé é yonn té ka maché asi lòt. Jézi koumansé palé ba disip a-y an prèmyé é i di-yo : « Tansyon a zòt èvè lèvi a sé farizyen-la, kivédi, véyé-zòt èvè ipokrizi a yo.
2 Men pa ni ayen ki byen kaché kè yo pé’é fin pa konnèt, é yo toujou ka dékouvè tout sèkré ki tini.
3 Sé pousa, tousa zò ka di an nwèsè, moun ké tann-li lè jou ké wouvè, é tousa zò ka di tou dousman adan chanm a zòt, moun ké ay répété sa anlè sé véranda-la ki anho a sé kaz-la pou fè toutmoun sav sa.
4 Anplisdisa, zanmi an mwen, mi sa an ka di-zòt : fò pa zò pè moun ki pé tchouyé-zòt* é ki pé pa fè-zòt pondòt biten aprésa.
5 An kay di-zòt kimoun pou zò pè. Fò-zò pè Sila ki ni pouvwa pou jété on moun adan jéenn-la apré i tchouyé moun-lasa. Wi, an ka di-zòt sa, sé li pou zò pè.
6 Yo ka vann 5 ti zozyo* pou 2 ti pyès-monné ki pa ni onlo valè*, pa vré ? Kanmenmsa, Bondyé pa ka oubliyé ponyonn adan yo.
7 É zò sav on biten, i jous konnèt konmen branch chivé zò ni asi tèt a zòt. Pa pè : zò ni plis valè ki onlo ti zozyo*.
8 « An ka di-zòt kè si on moun ka di douvan toutmoun kè i sé disip an mwen, Gason a lòm osi ké di douvan zanj a Bondyé kè moun-lasa sé disip a-y.
9 Men si on moun ka di douvan toutmoun kè i pa konnèt-mwen, Gason a lòm osi ké di douvan zanj a Bondyé kè i pa konnèt moun-lasa nonplis.
10 Si on moun ka di bétiz asi Gason a lòm, Bondyé ké padonné-y. Men si on moun ka di pawòl ki ka montré kè i pa ni pon rèspé pou lèspri sen, Bondyé pé’é padonné-y.
11 Lè yo ké pozé-zòt kèsyon douvan on foulmoun*, douvan sé fonksyonnè a gouvènman-la, oben douvan sé otorité-la, pa tèwbolizé lèspri a zòt pou sav kijan zò ké défann-zòt oben pou sav ka zò ké di,
12 pas a moman-lasa, lèspri sen ké fè-zòt sav* ka pou zò di. »
13 Alò on moun adan foul-la di Jézi : « Anségnan, di frè an mwen séparé éritaj-la èvè mwen. »
14 Jézi réponn-li : « Boug an mwen, ponmoun pa ban’an jijé-zòt é ponmoun pa ban’an séparé éritaj a zòt. »
15 Aprésa i di-yo : « Wouvè zyé a zòt : fò pa zò lésé pon kalté vorasité pran lanmen asi zòt*, pas menm lè on moun ni onlo byen, a pa sa i ni ki ka ba-y lavi. »
16 Aprésa, i ba-yo on ègzanp. I di-yo : « On boug rich rékòlté onlo biten toubònman adan jaden a-y.
17 Kifè, i mété-y ka réfléchi, é i té ka di an tchè a-y : “An pa ni plas ankò ! Ka an ké fè aprézan ? Ola an kay mèt sa an rékòlté la ?”
18 Alò i di : “Mi sa an kay fè : An ké krazé sé dépo-la an ni la, é an ké konstwi dòt ki pli gran. An ké mèt tout séréal an mwen é tousa an ni adan.
19 Aprésa, an ké palé pou mwenmenm an mwen. An ké di : ‘Ou mèt onlo bon biten akoté pou bon enpé lanné. Alò pozé kò a-w, manjé, bwè, é fè sa ki ka fè-w plézi.’”
20 Men Bondyé di-y : “Boug sòt ki ou yé, oswè-la menm ou ké mò. Alò tousa ou sanblé, kimoun ki ké ni-y ?”
21 Mi sé sa ki ka rivé on moun ki ka sanblé on trézò pou-y menm, men ki pa rich douvan Bondyé. »
22 Aprésa i di disip a-y : « Mi sé pousa an ka di-zòt : Arété pran tèt a zòt pou vi* a zòt. Pa di : “Ka an ké manjé ?” É arété pran tèt a zòt parapòt a kò a zòt. Pa di : “Ka an ké mèt anlè mwen ?”
23 Pas lavi* ni plis valè ki manjé, é kò-la ni plis valè ki lenj-la.
24 Pran tan gadé sé kòwbo-la : yo pa’a simé, yo pa’a rékòlté é yo pa ni pon dépo, men Bondyé ka ba-yo manjé. Ès zò pa ni lontan plis valè ki sé zozyo-la ?
25 Kilès adan zòt ki pé di kè lè i ka chaléré kò a-y, i ka rivé mèt on jouné anplis asi longè a vi a-y* ?
26 Piskè zò pé pa fè pa menm on ti biten konsa, poukwa zò ka pran tèt a zòt pou sélézòt biten-la ?
27 Gadé kijan sé flè-la* ka pousé : yo pa’a ni fòsé, ni fè lenj. Men an ka di-zòt kè jous Salomon, adan tout glwa-la i té ni la, pa té sapé kon yo.
28 Si Bondyé ka abiyé sé plant-la ki an savann-la konsa, alòskè yo la jòdla é dèmen yo ké jété-yo an difé, zò pa bizwen mandé si i ké abiyé-zòt osi ! Sé yenki tikrazi fwa-lasa zò ni ?
29 Alò, arété pran tèt a zòt parapòt a sa zò ké manjé oben sa zò ké bwè, é arété tèwbolizé lèspri a zòt.
30 Pas sé dèyè sé biten-lasa sélézòt nasyon-la ki an mond-la ka kouri, men Pap’a zòt sav kè zò bizwen sé biten-lasa.
31 Olyé dè sa, kontinyé chèché wayòm a-y é i ké ba-zòt sé biten-lasa.
32 « Piti twoupo, pa pè, pas Pap’a zòt touvé kè sé té ké on bon biten si i té ka ba-zòt Wayòm-la.
33 Vann sa zò ni é édé moun ki andifikilté*. Pwokiré-zòt sak a lajan ki pa ka izé, kivédi chèché a ni on trézò an syèl-la, on trézò ki pé’é jen fin ; pa ni vòlè ka rantré an syèl-la, é pa ni mit ka détwi ayen nonplis.
34 Pas la trézò a zòt yé, sé la tchè a zòt ké yé osi.
35 « Abiyé-zòt, préparé-zòt*, é lésé lanp a zòt limé.
36 Fò-zò kon èsklav ki ka atann lè mèt a yo ké sòti an mayé-la. Konsa, dépi i ké rivé é dépi i ké kongné si pòt-la, yo ké pé wouvè ba-y.
37 Lè mèt-la ké rivé, si i touvé sé èsklav-lasa ka véyé, tchè a yo ké kontan. San manti ba zòt, i ké abiyé-y*, i ké sizé a tab èvè yo* é i ké vin sèvi-yo.
38 Siwvwè i rivé ant névè-d-swa é minui, é i touvé-yo paré, tchè a yo ké kontan. É menm i té’é rivé ant minui é twazè-d-maten, si i touvé-yo paré, tchè a yo ké kontan osi.
39 Men ni on biten pou zò byen konprann : si mèt a kaz-la té sav a ki lè vòlè-la té ké vin, i pa té’é lésé-y pété kaz a-y.
40 Zòt osi, fò-zò paré, pas Gason a lòm ké vin a on moman zò pa té’é jen imajiné. »
41 Aprésa Pyè mandé : « Ségnè, sé enki ban nou ou pran ègzanp-lasa oben ou pran-y pou toutmoun osi ? »
42 Ségnè-la réponn-li : « Kimoun ki sé sèwvitè* fidèl é prévwayan la* ? Mèt a-y mété-y rèsponsab asi tout sèwvitè a-y pou i ba-yo kantité manjé yo bizwen a bon moman-la. Men kimoun sèwvitè-lasa yé ?
43 Èsklav-lasa ké kontan si sé sa mèt a-y touvé-y ka fè lè i ké vin !
44 An ka di-zòt sa, é sé lavérité, i ké mété-y rèsponsab a tout byen a-y.
45 Men si èsklav-lasa ka di an tchè a-y : “Mèt an mwen pa’a vin menm !”, é kè i ka koumansé ba sé sèwvant-la é sé sèwvitè-la bon kou, i ka bwè, i ka manjé, é i ka bwasonné jiskatan i sou,
46 jou-la mèt a èsklav-lasa ké vin, sa ké siwprann-li. I ké vin a on lè èsklav-la pa konnèt. I ké pini-y rèd menm é i ké mété-y èvè moun ki pa fidèl a Bondyé.
47 Èsklav-lasa konprann byen ka mèt a-y té vlé, men konm i pa té paré oben i pa fè sa mèt a-y mandé-y*, i ké pran bon kou.
48 Men sila ki pa konprann la pé’é pran onlo kou, magré i fè biten ki té’é mérité yo ba-y kou. Siwvwè yo ba on moun onlo biten, yo ké mandé-y fè onlo biten osi. É siwvwè yo ba on moun onlo rèsponsabilité, yo ké mandé-y fè plis biten ki sa yo té abityé mandé-y.
49 « An vin limé on difé asi latè. Men si i ja limé, ka an bizwen ankò ?
50 An ni on batèm pou an pran, é toutotan i pa bout, sa ké chouboulé-mwen.
51 Ès zò ka di sé lapé an vin mèt asi latè ? Non ! Okontrè, an ka di-zòt kè sé dézòd an vin mèt.
52 Pas konnyéla la, si i ni 5 moun adan on kaz, yonn ké kòlè èvè lòt : 3 moun ké kòlè èvè sé dézòt moun-la é 2 moun ké kòlè èvè sé twazòt moun-la.
53 Yo ké an lagè : papa-la ké kont gason a-y é gason-la ké kont pap’a-y, manman-la ké kont fi a-y é fi-la ké kont manman-y, bèlmè-la ké kont bèlfi a-y é bèlfi-la ké kont bèlmè a-y. »
54 Aprésa, i palé ba foulmoun-la osi. I di-yo : « Lè zò ka vwè on niyaj ka parèt a lwès, tousuit zò ka di : “Ké ni on tanpèt”, é sé sa menm ki ka fèt.
55 É lè zò ka vwè kè van-la ka sòti o sid, zò ka di : “Ké ni chalè pou tann-é-konprann”, é sé sa menm ki ka fèt.
56 Ipokrit ! Lè zò ka gadé tè-la é syèl-la, zò ka rivé konprann kijan tan-la ké yé. Alò poukwa zò pa’a rivé konprann sans a sé biten-la ki ka fèt konnyéla la ?
57 Poukwa zò pa’a rivé konprann zòmenm a zòt ka zò dwètèt fè ?
58 Pa ègzanp, si on moun pòté plent kont vou, é zò k’ay vwè on chèf ansanm, fè éfò pou réglé pwoblèm-la èvè-y pannan zò anchimen. Konsa, i pé’é menné-w douvan jij-la, jij-la pé’é lagé-w an men a gad-la é gad-la pé’é mété-w lajòl.
59 An ka di-w kè ou pé’é sòti la toutotan ou pa péyé tout dèt a-w, jiska dènyé ti pyès-monné-la*.
Noté sa
^ Pi ègzaktèman « kò-la ».
^ Oben « mwano ».
^ Pi ègzaktèman « pou 2 asaryon ». A épòk-lasa, lè ou té ka travay 45 minit, ou té ka gangné 1 asaryon.
^ Oben « mwano ».
^ Oben « lè yo ké menné-zòt douvan sé sinagòg-la ».
^ Pi ègzaktèman « anségné-zòt ».
^ Oben « fò pa zò toujou anvi ni plis ».
^ Oben « nanm ».
^ Oben « nanm-la ».
^ Oben « i pé ajouté 1 koudé asi longè a vi a-y ».
^ Pi ègzaktèman « sé lis-la ».
^ Oben « ki maléré ».
^ Pi ègzaktèman « maré ren a zòt ».
^ Oben « i ké maré ren a-y ».
^ Pi ègzaktèman « i ké lonji owa tab-la èvè yo ».
^ On sèwvitè ki ka jéré on kaz.
^ Oben « é ki ni sajès la ».
^ Oben « i pa aji annakò èvè volonté a mèt-la ».
^ Pi ègzaktèman « dènyé lèpton-la ».
