Évanjil a Lik 5:1-39
5 On jou, Jézi té ka anségné pawòl a Bondyé òbò lak a Jénézarèt* é on foulmoun té ka kouté-y. Sé moun-la té toupré a-y.
2 I vwè 2 bato maré òbò lak-la, men sé maren-péchè-la pa té abò ankò ; yo té ka nétwayé filèt a yo.
3 Yonn adan sé bato-la, sé té ta Simon. Jézi monté adan-y é i di Simon ay tibwen pi lwen an dlo-la. Aprésa i sizé, é toupannan i té an bato-la, i mété-y ka anségné sé moun-la.
4 Lè i fin palé, i di Simon : « Ay la dlo-la fon la é lagé filèt a zòt pou zò péché. »
5 Simon réponn-li : « Anségnan, nou pasé tout lannuit ka travay rèd, é nou pa pran ayen. Men konm ou mandé-nou fè sa, an ké lagé sé filèt-la. »
6 Ében lè yo fè sa, yo pran* onpakèt pwason menm ! Filèt a yo jous té ka chiré.
7 Alò yo fè kolèg a yo sign pou di-yo vin édé-yo. Sé kolèg-la té anlè lòt bato-la. Yo vin, é toulédé bato-la touvé-yo plen. Tèlman yo té plen, yo koumansé koulé.
8 Lè Simon Pyè vwè sa, i mété-y ajounou douvan Jézi é i di : « Ségnè, sòti-w owa an mwen, pas an ka fè onlo péché. »
9 Li é tout sé moun-la ki té èvè-y la rété èstèbèkwè lè yo vwè kantité pwason yo té pran.
10 Jak é Jan, gason a Zébédé, rété èstèbèkwè osi. Yo té ka travay èvè Simon. Men Jézi di Simon : « Pa pè. Konnyéla, sé moun* an ké fè-zòt péché. »
11 Alò yo halé sé bato-la atè, yo lagé tout biten, é yo suiv-li.
12 Ondòt fwa, pannan Jézi té adan on vil, té ni on misyé ki té plen lèp asi-y. Lè i vwè Jézi, i mété-y ajounou douvan a-y, é figi a-y près té ka touché tè. I sipliyé Jézi, é i di-y : « Ségnè, an sav ou pé géri-mwen si ou vlé. »
13 Alò Jézi lonji men a-y, i touché-y, é i di-y : « Wi, an vlé. An ka géri-w tousuit. » É lèp-la disparèt onfwamenm.
14 Lèwgadé, i di boug-la : « Pa ay rakonté ponmoun sa an fè ba-w. Pawkont, ay vwè prèt-la pou montré-y kò a-w. É konm ou géri, fè ofrann-la Lwa a Moyiz ka mandé la adan on ka kon sila. Konsa, sé prèt-la ké pé vwè yomenm a yo kè ou géri. »
15 Men pi sa té k’ay, pi yo té ka palé dè Jézi. É ni onpakèt moun ki té ka sanblé pou yo té kouté-y é pou i té géri sé maladi-la yo té ni la.
16 Men souvantfwa, i té k’ay priyé dé koté pa té ni ponmoun.
17 On jou, pannan i té ka anségné adan on kaz, déotwa farizyen é déotwa moun ki té ka anségné Lwa-la té sizé la. Yo té sòti an Galilé, an Jidé, é a Jérizalèm. É Jéova té ba Jézi pouvwa* pou i té géri moun.
18 Lèwgadé, déotwa boug rivé. Yo té ka pòté on boug paralizé asi on branka. Yo éséyé fè-y rantré pou yo té mété-y douvan Jézi.
19 Men konm té ni plen moun la, yo pa rivé fè sa. Alò yo fè-y monté asi twa-la é yo fè-y pasé pa twati-la. Yo fè-y désann asi branka-la anmitan sé moun-la ki té douvan Jézi la.
20 Lè Jézi vwè jan yo té ni fwa, i di boug-la : « An padonné péché a-w. »
21 Sé iskrib-la é sé farizyen-la koumansé palé antrè yo. Yonn té ka di lòt : « A ki misyé ? Misyé pa ni pon rèspé pou Bondyé ! Ponmoun pé pa padonné péché a moun. Sé enki Bondyé ki pé fè sa. »
22 Men Jézi té sav byen kijan yo té ka rézonné. Kifè i di-yo : « Poukwa sé konsa zò ka rézonné ?
23 Ka ki pi fasil a di : “An padonné péché a-w”, oben “Lévé-w é maché” ?
24 Men pou zò sav kè Bondyé ba Gason a lòm pouvwa pou padonné sé péché-la asi latè... » I di boug paralizé la : « An ka di-w lévé, pran branka a-w é rantré akaz a-w. »
25 Alò boug-la lévé douvan yo, i pran branka a-y é i rantré akaz a-y. É toupannan i té ka rantré, i té ka ba Bondyé glwa.
26 Alò tout sé moun-la rété sézi tèlman yo touvé sa fò, é yo mèt-yo ka ba Bondyé glwa. Konm yo té pè toubònman, yo té ka di : « Jòdila, nou vwè biten ki èstraòwdinè menm ! »
27 Aprésa, Jézi sòti la i té yé la é i vwè on misyé sizé an biwo a enpo-la. Non a-y sé té Lévi é travay a-y sé té ranmasé lajan a enpo. Jézi di-y : « Suiv-mwen. »
28 Alò Lévi mété-y doubout, i lésé tout biten dèyè do a-y é i mété-y ka suiv Jézi.
29 Aprésa, Lévi fè on gran banké akaz a-y pou Jézi. Té ni onpakèt moun ki té ka manjé èvè yo, é pawmi sé moun-lasa, té ni onlo moun travay a yo sé té ranmasé lajan a enpo.
30 Alò sé farizyen-la é sé iskrib-la mèt-yo ka kritiké sé disip-la é yo té ka di sé disip-la : « Poukwa zò ka manjé é poukwa zò ka bwè èvè moun ki ka ranmasé lajan a enpo é èvè moun ki ka menné on vyé vi ? »
31 Jézi réponn-yo : « A pa moun ki byen pòtan ki bizwen dòktè, men sé moun ki malad ki bizwen dòktè.
32 An pa vin mandé moun ki jis rèpanti-yo, men an vin mandé moun ki ka menné on vyé vi rèpanti-yo. »
33 Yo di-y konsa : « Souvantfwa, disip a Jan é disip a sé farizyen-la ka rété san manjé pannan on tan é yo ka sipliyé Bondyé. Men disip a-w ka manjé é ka bwè. »
34 Jézi di-yo : « Toutotan misyé-la ki sòti mayé la èvè yo, zò pé pa oblijé zanmi a-y rété san manjé, pa vré ?
35 Men on jou, misyé-la ki sòti mayé la pé’é èvè yo ankò, é a moman-lasa, yo ké rété san manjé pannan on tan. »
36 I ba-yo ègzanp-lasa osi : « Ponmoun pa’a koupé on mòso adan on lenj nèf pou i koud-li asi on vyé lenj. Si i fè sa, mòso twèl nèf la ka chiré vyé lenj-la é i pa k’ay èvè vyé lenj-la.
37 Anplisdisa, ponmoun pa’a mèt diven ki sòti fèt adan vyé bidon*. Si on moun fè sa, diven-la ki sòti fèt la ké pété sé bidon-la, i ké koulé, é sé bidon-la pé’é bon ankò.
38 Men fò-yo mèt diven-la ki sòti fèt la adan bidon ki tou nèf.
39 Pa ni ponmoun ki anvi bwè on diven ki sòti fèt apré i bwè on diven ki ja ni on bèl laj, pas i ka di : “Vyé diven-la bon.” »
Noté sa
^ « Lak a Jénézarèt », sé ondòt jan yo té ka kriyé « lanmè Galilé ».
^ Pi ègzaktèman « fèmé ».
^ Pi ègzaktèman « nonm ».
^ Pi ègzaktèman « puisans a Jéova té ka aji asi Jézi ».
^ Oben « bidon ki fèt èvè po a bèt ».
