Évanjil a Lik 8:1-56
-
Sé madanm-la ki té ka suiv Jézi la (1-3)
-
Ègzanp a misyé-la ki ay simé grenn (4-8)
-
Rézon ki fè si Jézi ka sèvi èvè ègzanp (9, 10)
-
Jézi ka èspliké ka ègzanp a misyé-la ki ay simé la vlé di (11-15)
-
Fò pa yo kouvè on lanp èvè ayen (16-18)
-
Manman Jézi é frè a-y (19-21)
-
Jézi ka kalmé on tanpèt (22-25)
-
Jézi ka voyé déotwa démon anlè enpé kochon (26-39)
-
Fi a Jayi ; on madanm ka mannyé lenj a Jézi (40-56)
8 Tibwen tan apré, i pasé adan chak vil é adan chak vilaj yonn apré lòt pou i té préché, é pou i té anonsé bon nouvèl a wayòm a Bondyé. Sé 12 apòt-la té èvè-y.
2 Té ni kèlkè madanm osi. Jézi ni lokazyon woté démon asi déotwa adan yo, é ni dòt kè i ni lokazyon géri pas yo té malad. Té ni Mari kè yo té ka kriyé Magdaléèn-la ; 7 démon té sòti asi madanm-lasa.
3 Té ni Jàn, madanm a Chouza, on misyé ki té ka okipé-y dè kaz a Éwòd. Té ni Sizàn é onlo dòt madanm ki té ka sèvi èvè sa yo té ni pou pran swen a Jézi, é pou pran swen a sé apòt-la.
4 Onpakèt moun sanblé, é èvè yo, té ni dòt moun ki té ka vin owa Jézi é ki té sòti adan plizyè vil diféran. Alò i ba-yo on ègzanp. I di-yo :
5 « On moun sòti pou ay simé grenn. Toupannan i té ka simé, déotwa grenn tonbé òbò chimen-la. Ni moun ki maché asi yo, é sé zozyo-la manjé-yo.
6 Ni dòt grenn ki tonbé asi wòch. Yo koumansé pousé, men konm yo pa té ni dlo, yo séché.
7 Ni dòt osi ki tonbé anmitan pyé-pikan. Sé pyé-pikan-la grandi ansanm èvè yo, é yo anpéché-yo pousé.
8 Men ni dòt grenn ankò ki tonbé anlè on bon kalité tè. Yo pousé, é yochak bay 100 grenn. » Lè Jézi fin di sé biten-lasa, i hélé byen fò. I di : « Moun ki ni zòrèy, kouté pou tann ! »
9 Men disip a-y mandé-y ka ègzanp-lasa té vlé di.
10 I réponn-yo : « Zòt, yo pèwmèt-zòt konprann sèkré* a wayòm a Bondyé. Men lèwvwè sélézòt moun-la ka tann sé ègzanp-la an ka pran la, sé konsi sé an parabòl an ka palé. Kifè, yo ka gadé, men toutjan yo gadé, yo pa’a vwè ayen. Menmsi yo ka tann, yo pé pa konprann ayen.
11 Mi sa ègzanp-lasa vlé di : Sé grenn-la sé pawòl a Bondyé.
12 Sé grenn-la ki tonbé òbò chimen-la sé sé moun-la ki ka tann pawòl-la, men Dyab-la ka vin, é i ka woté pawòl-la an tchè a yo pou yo pa kwè é pou yo pa sové.
13 Sé grenn-la ki tonbé adan sé wòch-la, sé sé moun-la ki ka tann pawòl a Bondyé, é ki ka aksèpté-y tousuit èvè jwa. Men konm yo pa ni rasin, yo ka kwè pannan on tan, men dépi yo ka jwenn éprèv, yo ka lagé.
14 Sé grenn-la ki tonbé anmitan sé pyé-pikan-la, sé sé moun-la ki ka tann pawòl-la, men konm yo ka lésé traka a lavi, larichès, é plézi ki ni adan vi-lasa pran tèt a yo, sa ka toufé pawòl-la, é tout fwi yo ka pòté pa’a jen bon.
15 Sé grenn-la ki tonbé asi bon tè-la, sé moun ki ni on tchè ki bon é ki sensè. Yo ka tann pawòl-la, é aprésa yo ka séré-y an tchè a yo, é yo ka pòté fwi toupannan yo ka andiré.
16 « Ponmoun pa ka limé on lanp pou i kouvè-y èvè on bòl oben pou mété-y anba on kabann. Men i ka mété-y on koté ki byen ho, pou sé moun-la ki ka rantré an kaz-la vwè limyè-la.
17 Pas pa ni ayen ki kaché kè yo pé’é fin pa dékouvè, é pa ni ayen ki byen kaché kè yo pé’é fin pa sav é kè yo pé’é fin pa mèt déwò.
18 Alò fè atansyon a jan zò ka kouté. Pas on moun ki ja ni, yo ké ba-y plis ankò. Men on moun ki pa ni ayen, jous sa i ka konpranndèdi i ni la, yo ké pran-y an men a-y. »
19 Lèwgadé, manman Jézi é frè a-y vin vwè-y, men konm té ni onpakèt moun la, yo pa té pé rivé jous owa a-y.
20 Alò sé moun-la vin di-y : « Manman-w é frè a-w déwò la. Yo bizwen vwè-w. »
21 I réponn-yo : « Manman-mwen é frè an mwen, sé sé moun-la ki ka tann pawòl a Bondyé é ki ka mété-y an pratik. »
22 On jou, Jézi é disip a-y monté adan on bato, é i di-yo : « An-nou ay lòt koté a lak-la. » Alò yo pati.
23 Pannan yo té òbò bato-la, Jézi pran sonmèy. Alò on van byen fò mété-y ka souflé asi lak-la, é bato a yo koumansé pran dlo. Yo té andanjé.
24 Alò yo ay lévé-y é yo di-y : « Anségnan, Anségnan ! Mi nou k’ay pran mò an nou la ! » Alò i lévé, i palé rèd pou van-la é pou sé gwo vag-la. Tanpèt-la pasé, é tout biten vin kalm.
25 Aprésa i di-yo : « Poukwa zò pa’a fè Bondyé konfyans ? » Men yo té pè toubònman, é yo té èstèbèkwè. Yonn té ka di lòt : « Aki misyé-lasa menm ? Jous van-la é lanmè-la ka kouté-y ! »
26 Aprésa, yo rivé lòt koté a lanmè Galilé, adan réjyon a sé Jérazényen-la. Sé la yo akòsté.
27 Pannan Jézi té k’ay désann òbò bato-la, on boug an vil-la ki té ni démon asi-y vin jwenn-li. Lontan i pa té ka mèt lenj anlè-y ankò. I pa té ka viv adan on kaz nonplis, men sé an simityè-la i té ka rété.
28 Lè i vwè Jézi, i mété-y ka hélé é i tonbé ajounou douvan a-y. Aprésa, i hélé byen fò. Mi sa i di : « Jézi, Gason a Bondyé-la ki Pli Ho la, ka ou vin fè la ? Tanprisouplé, pa pèwsékité-mwen. »
29 (Pas Jézi té mandé mové lèspri-la sòti asi boug-la. Mové lèspri-la té ja ni lokazyon rantré asi-y plizyè fwa*. Souvantfwa, yo té ka maré men a boug-la é pyé a-y èvè chenn, é toujou té ni on moun pou véyé-y. Men i té ka kasé sé chenn-la, é démon-la té ka menné-y dé koté pa té ni ponmoun.)
30 Jézi mandé-y : « Ki non a-w ? » I réponn-li : « Non an mwen, sé Lawmé », pas onpakèt démon té rantré asi-y.
31 É sé démon-la té ka sipliyé Jézi pou i pa oblijé-yo ay adan tou-la ki pa ni fon la.
32 Lèwgadé, té ni on gran twoupo kochon ki té ka manjé asi montangn-la. Sé démon-la mèt-yo ka sipliyé Jézi pou i pèwmèt-yo rantré adan sé kochon-la. É Jézi pèwmèt-yo fè sa.
33 Alò sé démon-la sòti asi boug-la, é yo rantré adan sé kochon-la. Aprésa, twoupo-la pran balan, sé kochon-la ay anho a falèz-la, yo lagé kò a yo an lak-la, é yo néyé.
34 Lè sé moun-la ki té ka véyé twoupo kochon la vwè sa ki pasé, yo pran pyé a kouri a yo, é yo rakonté moun ki té ka rété an vil é moun ki té ka rété lakanpagn tousa ki fèt.
35 Alò sé moun-la sòti pou yo té ay vwè sa ki rivé. Yo vin owa Jézi, é yo touvé boug-la ki té ni sé démon-la asi-y la sizé an pyé a Jézi. I té ni on lenj asi-y, é i té ni tout tèt a-y. Alò yo pran pè.
36 Moun ki vwè jan Jézi géri boug-la ki té ni démon asi-y la rakonté pèp-la tousa ki pasé.
37 Alò, onlo moun ki té ka rété adan réjyon a sé Jérazényen-la mandé Jézi pati, pas yo té pè toubònman menm. Kifè, i monté òbò bato-la pou i té pati.
38 Misyé-la ki té ni sé démon-la asi-y la mandé Jézi si i té pé ay èvè-y. Men Jézi pa pèwmèt-li ay èvè-y. I di-y :
39 « Rètouné akaz a-w é ay rakonté sa Bondyé fè pou-w. » Alò i pati, é i rakonté sa Jézi fè ba-y toupatou adan vil-la.
40 Lè Jézi rètouné, on foulmoun akéyi-y byen menm, pas toutmoun té ka atann-li.
41 Men lèwgadé, on misyé non a-y sé Jayir rivé ; sé té prézidan a sinagòg-la. I mété-y ajounou an pyé a Jézi é i koumansé sipliyé-y pou i vin akaz a-y,
42 pas sèl tifi-la i té ni la té alagoni. Timoun-la té ni 12 an apépré.
Pannan Jézi té ka vin, foulmoun-la té ka suiv-li é yo té kolé èvè-y.
43 Té ni on madanm la ; sa té ja ka fè 12 lanné i té ka pèd san, é ponmoun poto’o jen rivé géri-y.
44 I vin toupré Jézi, dèyè do a-y, é i mannyé bout a lenj a-y. I arété pèd san onfwamenm.
45 Alò Jézi mandé : « Kimoun ki mannyé-mwen ? » Pannan yotout té ka di kè a pa té yo, Pyè di konsa : « Anségnan, ni on foulmoun ki ka lantouré-w é yo ka bouré asi-w. »
46 Men Jézi di-y : « Ni on moun ki mannyé-mwen, pas an sav kè ni on puisans ki sòti adan mwen. »
47 Konm i rann-li kont kè i pa té pé kaché-y ankò, madanm-la vin, i té ka tranblé é i tonbé ajounou douvan Jézi. I di douvan toutmoun poukwa i té mannyé Jézi é kijan i touvé-y géri onfwamenm.
48 Men Jézi di-y : « Fi an mwen, si ou géri sé pas ou ni fwa. Pa pran tèt a-w, rantré akaz a-w. »
49 Pannan Jézi té ka palé toujou, on boug rivé. Boug-lasa té ka rèprézanté prézidan a sinagòg-la. Mi sa i di : « Fi a-w mò. Pa anbété Anségnan-la èvè sa ankò. »
50 Lè Jézi tann sa, i di Jayir : « Pa pè ! Enki ni fwa, é i ké sové. »
51 Lè i rivé an kaz-la, i pa lésé ponmoun rantré èvè-y, dòt ki Pyè, Jak, Jan, é papa é manman tifi-la.
52 Men tout sé moun-la té ka pléré é yo té ka frapé lèstonmak a yo tèlman yo té tris. Alò i di-yo : « Arété pléré, pas i pa mò. Sé dòmi i ka dòmi. »
53 É yo mèt-yo ka fè jé èvè tèt a-y, pas yo té sav kè tifi-la té mò.
54 Alò i pran men a-y é i palé ba-y byen fò. I di-y : « Timoun, lévé-w ! »
55 Timoun-la résisité* é i mété-y doubout onfwamenm. É Jézi mandé-yo ba tifi-la manjé.
56 A pa ti kontan papa é manman tifi-la té kontan ! Men Jézi défann-yo palé dè sa ki té pasé.
Noté sa
^ Oben « sèkré ki sakré ».
^ Oben pétèt « lèspri-la té mèt lanmen asi-y dépi lontan ».
^ Pi ègzaktèman « lèspri a-y viré adan-y ».
