Évanjil a Mawk 4:1-41
-
ÈGZANP ANRAPÒ ÈVÈ WAYÒM-LA (1-34)
-
Moun-la ki ay simé grenn la (1-9)
-
Rézon ki fè si Jézi ka sèvi èvè ègzanp (10-12)
-
Jézi ka èspliké ka ègzanp a misyé-la ki ay simé la vlé di (13-20)
-
Yo pa’a mèt on lanp anba on pannyé (21-23)
-
Jan-la zò ka miziré la (24, 25)
-
Misyé-la ki ka simé la ka dòmi (26-29)
-
Grenn a moutad la (30-32)
-
Jézi ka sèvi èvè ègzanp (33, 34)
-
-
Jézi ka kalmé on tanpèt (35-41)
4 Jézi woukoumansé anségné òbò lanmè-la, é onpakèt moun sanblé owa-y. Alò i monté òbò on bato é i sizé ; i ay tibwen pli lwen an lanmè-la, é foulmoun-la rété asi plaj-la.
2 É i mété-y ka anségné-yo onlo biten. Pou sa, i sèvi èvè ègzanp. I di-yo :
3 « Kouté ! On moun sòti pou ay simé grenn.
4 Toupannan i té ka simé sé grenn-la, déotwa adan yo tonbé òbò chimen-la, é sé zozyo-la vin é yo manjé-yo.
5 Ni dòt grenn ki tonbé on koté ki plen wòch é ki pa té ni onlo tè. Yo pousé tousuit davwa tè-la pa té fon.
6 Men lè solèy-la koumansé chofé, sé ti plant-la brilé é yo vin sèk pas yo pa té ni rasin.
7 Ni dòt grenn ki tonbé anmitan pyé-pikan. Sé pyé-pikan-la grandi, é yo anpéché sé ti plant-la pousé. Kifè, yo pa bay ayen.
8 Men ni dòt grenn ki tonbé asi on bon tè. Yo pousé, yo grandi, é yo koumansé pòté. Ni sèwten grenn ki bay 30 grenn, ni sa ki bay 60 é ni dòt ki bay 100. »
9 Aprésa, i di : « Moun ki ni zòrèy, kouté pou tann. »
10 Lè i touvé-y tousèl a-y, sé 12 apòt-la é déotwa disip mété-yo ka pozé-y kèsyon asi sé ègzanp-la i té pran la.
11 I réponn-yo : « Zòt, yo pèwmèt-zòt konprann sèkré a wayòm a Bondyé. Men sélézòt moun-la pa’a konprann sèkré-lasa pas lèwvwè an ka palé dè sa, sé enki èvè ègzanp an ka sèvi.
12 Kifè yo ka gadé, men toutjan yo gadé, yo pa’a vwè ayen. Menmsi yo ka tann, yo ka tann men yo pa’a konprann ayen. Sé pousa osi, yo pé’é jen chanjé* é Bondyé pé’é padonné-yo. »
13 Anplisdisa, i di-yo : « Si zò pa’a konprann ègzanp-lasa, kijan zò ké fè konprann tout sélézòt-la ?
14 « Misyé-la ki ka simé la, sé pawòl a Bondyé i ka simé.
15 Ni déotwa moun ki ka touvé-yo kon sé grenn-la ki tonbé òbò chimen-la : tann yo tann pawòl-la, Satan ka vin, é i ka woté pawòl-la yo té simé adan tchè a yo la.
16 Ni dòt moun ki ka touvé-yo kon sé grenn-la yo simé adan tè-la ki plen wòch la. Tann yo tann pawòl-la, yo ka aksèpté-y èvè jwa.
17 Men pawòl-la pa fè rasin andidan tchè a yo. Yo ka rivé kenbé pannan on moman, men dépi yo ka jwenn on éprèv oben dépi yo ka pèwsékité-yo akòz dè pawòl-la, yo ka lésé sa dékourajé-yo é yo ka lagé.
18 É ni dòt moun ankò ki ka touvé-yo kon sé grenn-la yo simé anmitan sé pyé-pikan-la. Yo, yo tann pawòl-la,
19 men yo ka lésé traka a lavi* pran tèt a yo, é yo ka lésé larichès kouyonné-yo. Anplisdisa, yo ka lésé tout kalté lanvi ki tini rantré an tchè a yo. Kifè, sa ka toufé pawòl-la, é yo pa’a pòté pon fwi.
20 Pou fin, ni dòt moun ki ka touvé-yo kon sé grenn-la yo simé asi bon tè-la. Yo, yo ka tann pawòl-la, yo ka aksèpté-y dè-tou-kè é yo ka pòté fwi. Ni sa ki ka bay 30, ni sa ki ka bay 60 é ni sa ki ka bay 100. »
21 Anplisdisa, i di-yo : « Ponmoun pé’é kouvè on lanp èvè on pannyé* é i pé’é kaché-y anba on kouch nonplis. Antoutjan, fò i ké mété-y on koté ki byen ho.
22 Pas pa ni ayen ki kaché kè yo pé’é fin pa dékouvè, é pa ni ayen ki byen kaché kè yo pé’é fin pa mèt déwò.
23 Moun ki ni zòrèy, kouté pou tann. »
24 Mi ondòt biten i di-yo : « Kouté byen tousa an ka di. Sé sèlon jan zò ka miziré, yo ké miziré ba zòt, é yo jous ké ba-zòt anplis.
25 Pas on moun ki ja ni, yo ké ba-y plis ankò, men on moun ki pa ni ayen, jous sa i ni la yo ké pran-y an men a-y. »
26 Aprésa, i di : « Nou pé konparé wayòm a Bondyé èvè on misyé ki ka simé grenn anlè on mòso tè.
27 Lannuit, i ka dòmi é lèmaten, i ka lévé. Pannansitan sé grenn-la ka pété, yo ka pousé é i pa menm sav kijan.
28 Piti-a-piti tè-la ka pwodui tousèl a-y : prèmyé biten ki ka sòti sé tij-la, aprésa tèt a tij-la ka fè grenn, é pou fin sé grenn-la ka mi adan tèt a tij-la.
29 É dépi ou vwè sé grenn-la mi, i ka koupé sé tij-la pas lè a rékòlt-la rivé. »
30 Mi sa Jézi di ankò : « Èvè kibiten nou pé konparé wayòm a Bondyé, oben ki ègzanp nou pé pran pou èspliké ka sa yé ?
31 I ka touvé-y kon on grenn a moutad. Lèwvwè yo simé-y an tè-la, sé pi piti grenn ki tini asi latè.
32 Men lè yo fin simé-y, i ka pousé é i ka vin kon on pyébwa. Tèlman branch a-y ka vin gran, sé zozyo-la pé vin fè nich a yo adan-y pou yo rété anba lonbraj a-y. »
33 Jézi té ka sèvi èvè onlo ègzanp kon séla pou i té pé sa préché pawòl a Bondyé ba yo, é i té ka tchenn kont dè sa yo té pé konprann.
34 Sé vré, lè i té ka palé ba yo, i toujou té ka sèvi èvè ègzanp, men lè i té tousèl èvè disip a-y, i té ka èspliké-yo tout biten-la.
35 Jou-lasa, lè lannuit rivé, i di-yo : « An-nou ay lòt koté a lanmè-la. »
36 Yo fè foul-la pati, é aprésa, yo fè Jézi monté an bato-la kon i té yé la ; é té ni dòt bato la osi.
37 Lèwgadé, on kalté gwo van a tanpèt mété-y ka souflé. Tèlman sé vag-la té ka fwayé asi bato-la, i touvé-y près plen èvè dlo.
38 Men Jézi té kouché dèyè-la asi on zòyé* é i té ka dòmi. Alò yo lévé-y é yo di-y : « Anségnan, ou pa’a vwè nou kay pran mò an nou la ? É ou la mandé-w menm ! »
39 Alò i lévé, i palé rèd ba van-la é i di lanmè-la : « Asé ! Pé la ! » Van-la arété souflé, é tout biten vin kalm.
40 Aprésa i di-yo : « Poukwa zò pè konsa ? Jousalè zò pò’ò ni fwa alò ? »
41 Men a pa ti pè yo té pè ! Yonn té ka di lòt : « Aki misyé-lasa menm ? Jis van-la é lanmè-la ka kouté-y ! »
Noté sa
^ Pi ègzaktèman « wouvin owa Bondyé ».
^ Oben « traka a lavi adan sistèm-lasa ». Ay adan Èsplikasyon a sé mo-la.
^ Oben « pannyé ki fèt pou miziré on kantité grenn ».
^ Oben « on kousen ».
