Évanjil a Mawk 5:1-43
5 Aprésa, yo rivé lòt koté a lanmè-la, adan réjyon a sé Jérazényen-la.
2 Désann Jézi désann òbò bato-la, on misyé ki té ni on mové lèspri asi-y sòti an simityè-la é i vin owa-y.
3 Sé an simityè-la misyé-lasa té ka rété. É ponmoun poto’o jen rivé maré-y pou i pa chapé, menmsi sé èvè on chenn yo té maré-y.
4 Byensouvan, yo té ka maré men a-y é pyé a-y èvè chenn, men i té ka kasé sa. Ponmoun pa té ni asé fòs pou rivé kenbé-y.
5 Toutlè, lajouné kon lannuit, i pa té ka las hélé an simityè-la é an montangn-la, é i té ka flangé kò a-y èvè wòch.
6 I vwè Jézi dépi olwen. Alò i kouri ay jwenn-li, é i mété-y ajounou douvan a-y.
7 Aprésa, i hélé byen fò. I di : « Jézi, Gason a Bondyé-la ki pi ho la, ka ou vin fè la ? Pwomèt-mwen douvan Bondyé kè ou pé’é pèwsékité-mwen. »
8 I di Jézi sa pas Jézi té di mové lèspri-la : « Sòti-w asi boug-la ! »
9 Jézi mandé-y : « Ki non a-w ? » I réponn : « Non an mwen sé Lawmé, pas nou onlo menm. »
10 É i sipliyé Jézi plizyè fwa pou Jézi pa té voyé sé mové lèspri-la adan ondòt péyi.
11 Té ni on gwo twoupo kochon ki té ka manjé an montangn-la.
12 Alò sé mové lèspri-la mété-yo ka sipliyé Jézi, yo di-y : « Souplé, lésé-nou rantré adan sé kochon-la. »
13 I di-yo yo pé alé. Kifè sé mové lèspri-la sòti asi boug-la é yo rantré adan sé kochon-la. Lèwgadé, twoupo-la — 2000 kochon apépré — pran balan, yo ay anho a falèz-la, yo lagé kò a yo an lanmè-la é yo néyé.
14 Men sé moun-la ki té ka véyé twoupo kochon la chapé kò a yo é yo ay rakonté sé moun-la ki té ka rété an vil-la é alantou a vil-la tousa ki té pasé. Alò sé moun-la vin vwè ka ki fèt.
15 Yo vin owa Jézi é yo vwè boug-la ki té ni lawmé démon la anlè-y la : i té sizé, i té ni on lenj asi-y, é i té ni tout tèt a-y. Alò yo pran pè.
16 Anplisdisa, moun ki vwè sa ki pasé èspliké-yo sa ki rivé boug-la ki té ni démon anlè-y la, é sa ki rivé sé kochon-la.
17 Alò, yo mèt-yo ka sipliyé Jézi pou i pa té rété koté-la yo té ka rété la.
18 Lè Jézi té ka monté òbò bato-la, misyé-la ki té ni sé démon-la anlè-y la sipliyé-y pou i té lésé-y vin èvè-y.
19 Men i pa lésé-y vin èvè-y. I di-y : « Viré akaz a-w owa fanmi a-w, é rakonté-yo tousa Jéova fè ba-w é kijan i aji èvè konpasyon* épi-w. »
20 Alò misyé-la pati, i ay an Dékapòl-la* é i koumansé rakonté tousa Jézi té fè ba-y. É tout sé moun-la té èstèbèkwè.
21 Jézi woumonté òbò on bato pou i té ay lòt koté a lanmè-la. Lè i rivé anlè plaj-la, on gran foulmoun enn sanblé owa a-y.
22 Lèwgadé, yonn adan sé prézidan a sinagòg-la rivé. Non a-y sé té Jayir, é lè i vwè Jézi, i tonbé ajounou douvan a-y.
23 I sipliyé Jézi a plizyè rèpriz. I di-y : « Tifi an mwen alagoni*. Souplé, vin mèt men a-w anlè-y pou i géri é pou i pa mò. »
24 Alò, Jézi pati èvè-y. Té ni on gran foulmoun ki té ka suiv Jézi, é ni moun ki té ka bouré asi-y.
25 Lèwgadé té ni on madanm la, é sa té ja ka fè 12 lanné i té ka pèd san.
26 I té ja pasé anba men a onpakèt mèdsen, men sé trètman-la yo ba-y la fè-y soufè toubònman é tout lajan a-y pasé adan sa. Sa pa té k’ay myé ba-y ; okontrè, i té pi malad ankò.
27 Lè i tann sa yo té ka di asi Jézi, i fofilé kò a-y an foul-la pou i té rivé dèyè do a Jézi é i mannyé lenj a-y.
28 Pas i té ka di an tchè a-y : « Menm sé lenj a-y tousèl an rivé mannyé, an ké géri. »
29 É lamenm-la i arété pèd san, é i santi kè maladi-la ki té ka fè-y soufè la disparèt.
30 Tousuit, Jézi rann-li kont kè ni on puisans ki sòti adan-y. Pannan i té anmitan foul-la, i viré gadé dèyè, é i mandé : « Kimoun ki mannyé lenj an mwen ? »
31 Disip a-y réponn-li : « Gay tousa moun ki ka bouré asi-w, é ou ka mandé kimoun ki mannyé lenj a-w ? »
32 Men i té ka gadé alantou a-y pou i vwè kimoun ki té fè sa.
33 Konm madanm-la té sav kè i té géri, i touvé-y pè, é i mété-y ka tranblé. I tonbé ajounou douvan Jézi é i di-y tousa ki pasé.
34 Jézi di-y : « Fi an mwen, si ou géri, sé pas ou ni fwa. Pa pran tèt a-w, rantré akaz a-w. Maladi-la ki té ka fè-w soufè la géri. »
35 Ni déotwa boug ki rivé pannan Jézi té ka palé toujou. Yo té sòti aka Jayir é yo di : « Fi a-w mò ! Pa anbété Anségnan-la èvè sa ankò ! »
36 Men Jézi tann sa yo té ka di, é i di Jayir : « Pa pè ! Enki montré kè ou ni fwa. »
37 É i pa lésé pondòt moun suiv-li, dòt ki Pyè, Jak, é Jan, frè a Jak.
38 Alò yo ay aka Jayir, é lè yo rivé, yo touvé moun ka pléré é ka hélé fò toubònman.
39 Lèwvwè Jézi antré an kaz-la, i di-yo : « Poukwa zò ka pléré é poukwa zò ka hélé fò konsa ? Timoun-la pa mò. Dòmi i ka dòmi. »
40 Alò yo mèt-yo ka fè jé èvè tèt a-y. Men i fè-yotout sòti, é i antré la timoun-la té yé la èvè papa-la, manman-la é sé disip-la ki té èvè-y la.
41 I pran men a timoun-la é i di-y : « Talita koumi », kivédi : « Tifi an mwen, lévé-w ! »
42 Timoun-la lévé onfwamenm, é i mété-y ka maché (i té ni 12 an). Vwè yo vwè sa, a pa ti kontan yo té kontan ! Yo pa té sav ka pou yo té fè é kò a yo.
43 Men a plizyè rèpriz, i di-yo* pa ay rakonté ponmoun sa, é i di-yo ba timoun-la manjé.
Noté sa
^ Pi ègzaktèman « mizérikòd ».
^ Oben « réjyon a sé 10 vil-la ».
^ Oben « toupré mò ».
^ Oben « i ba-yo on lòd, i di-yo ».
