Évanjil a Mawk 7:1-37
7 Ni déotwa farizyen é déotwa iskrib ki sòti Jérizalèm, é ki sanblé alantou a Jézi.
2 Yo vwè déotwa disip a-y ka manjé alòskè men a yo té sal*, kivédi, yo pa té lavé men a yo.
3 (Sé farizyen-la é tout sélézòt Juif-la pa té ka manjé toutotan yo pa té lavé men a yo pou rivé jous an koud a yo. Yo té vlé suiv tradisyon a zansèt a yo.
4 É lè yo sòti asi mawché, yo pa’a manjé toutotan yo pa lavé-yo èvè dlo. É yo ka suiv onlo dòt tradisyon ankò, kon batèm a sé koup-la, batèm a sé potich-la, é ta sé bòl an kuiv la.)
5 Kifè, sé farizyen-la é sé iskrib-la mandé Jézi : « Poukwa disip a-w pa’a suiv tradisyon a zansèt an nou ? Poukwa yo ka manjé èvè men a yo tou sal ? »
6 I réponn-yo : « Ipokrit ! Pwofèt Izayi té palé dè zòt, é sa i té anonsé la, sé té sa menm ! Mi sa i té maké : “Pèp-lasa ka di an bouch a-y kè i ka rèspèkté-mwen, men i pa enmé-mwen.
7 Yo ka kontinyé adoré-mwen, men sa pa’a sèvi ayen, pas sa yo ka anségné sé komandman a lézòm.”
8 Zò ka mèt komandman a Bondyé akoté é zò ka suiv tradisyon a lézòm. »
9 Aprésa i di-yo : « Lè sé pou mèt komandman a Bondyé akoté pou zò suiv tradisyon a zòt, zò fò adan sa.
10 Pa ègzanp, Moyiz di : “Rèspèkté pap’a-w é manman-w, é si on moun jiré pap’a-y oben manman-y, fò-yo tchouyé-y.”
11 Men zòt, zò ka di : “On nonm pé di pap’a-y oben manman-y : ‘Tousa ki té’é pé pèwmèt-mwen soutyenn-zòt, sé kòwban (kivédi on ofrann yo pwomèt Bondyé).’”
12 Kifè, zò pa’a lésé-y fè ayen ankò pou pap’a-y é manman-y.
13 Lè zò ka fè sa, zò ka mèt pawòl a Bondyé akoté akòz dè tradisyon-la yo anségné-zòt la, é kè zòmenm a zòt ka anségné osi. É zò ka fè onlo dòt biten ki ka sanm séla. »
14 Aprésa i woukriyé foul-la ankò, é i di-yo : « Zòtout ki la, kouté-mwen, é chèché a konprann sa an ka di-zòt.
15 A pa sa ki ka rantré andidan on moun ki ka sali-y men sé sa ki ka sòti andidan a-y ki ka sali-y. »
16 ——*
17 Lè Jézi kité foulmoun-la, i rantré adan on kaz é disip a-y koumansé pozé-y kèsyon. Yo mandé-y ka ègzanp-la i té pran la té vé di.
18 I réponn-yo : « Alò zòt osi, zò menm biten ki yo ? Ou té’é di zò pa’a konprann ayen ! A pa sa ki ka rantré an bouch a on moun ki ka sali-y ;
19 paskè a pa an tchè a-y sa k’ay, men sa k’ay an lèstonmak a-y é sa ka viré sòti apré. Zò pa sav sa alò ? » Lè Jézi di sa, i montré kè yo té pé manjé tout manjé Bondyé ka pèwmèt moun manjé.
20 Mi sa i di-yo ankò : « Sé sa ki ka sòti andidan on moun ki ka sali-y.
21 Pas sé andidan on moun, andidan tchè a-y, mové rézònman ka sòti : péché sèksyèl*, volé, tchouyé,
22 adiltè, anvi ni plis, aji èvè méchansté, kouyonné moun, aji san pon rèspé é èvè fon-é-toupé*, anvi sa lézòt tini, jiré, òwgèy, é konduit ki sòt.
23 Tout sé mové biten-lasa, sé andidan yo ka sòti, é sé yo ki ka sali on moun. »
24 Aprésa i pati pou i ay adan réjyon a Ti é a Sidon. Lè i rivé la, i rantré adan on kaz pas i pa té vé ponmoun sav kè i té la, men ni moun ki vin sav sa kanmenm.
25 Rivé i rivé, on madanm tann palé dè-y. I vin vwè-y é i tonbé ajounou douvan a-y. Fi a madanm-lasa té ni on mové lèspri anlè-y.
26 Madanm-lasa té grèk. I té fèt an Fénisi, on réjyon ki té ka touvé-y an Siri. A plizyè rèpriz, i mandé Jézi woté démon-la anlè fi a-y.
27 Jézi di-y : « Lésé sé timoun-la manjé vant a yo plen avan, pas lè yo ka pran pen a sé timoun-la pou ba sé ti chyen-la li, a pa on bon biten. »
28 Men madanm-la réponn-li : « Ou ni rézon a-w, Ségnè. Men sé ti chyen-la ka manjé sé myèt-la sé timoun-la ka lagé anba tab-la. »
29 Alò i di-y : « Ou pé rantré akaz a-w. Konm sé sa ou di, démon-la sòti anlè fi a-w. »
30 Alò madanm-la rantré akaz a-y é i touvé timoun-la kouché anlè kabann-la. É démon-la pa té anlè-y ankò.
31 Lè Jézi sòti adan réjyon a Ti, i pasé pa Sidon é pa Dékapòl-la* pou i té rètouné owa lanmè Galilé.
32 Lè i rivé la, yo menné on boug soud ba-y, é boug-lasa té ni dimal a palé osi. Yo sipliyé-y pou i té géri misyé-la*.
33 Alò Jézi menné-y on ti koté apa, lwen a foul-la. I mèt dwèt a-y an zòrèy a boug-la, i kraché é i touché lang a-y.
34 Aprésa, i lévé zyé a-y an syèl, i pran on gran souf é i di : « Éfata », kivédi : « Ouvè-w. »
35 Alò zòrèy a boug-la wouvè, é i pa té ni pon difikilté pou i té palé ankò. Kifè i mété-y ka palé nòwmalman.
36 Jézi ba sé moun-la on lòd ; i di-yo pa rakonté ponmoun sa i fè. Men pi i té ka di-yo sa, pi yo té ka rakonté sa.
37 Sé moun-la té èstèbèkwè menm ! Tèlman yo té èstèbèkwè, yo té ka di : « Tousa i ka fè èstraòwdinè toubònman ! I jous ka fè moun-soud tann é moun ki pa té pé palé, i jous ka fè-yo palé. »
Noté sa
^ An réyalité, men a yo pa té sal, men yo pa té lavé-yo kon tradisyon a sé Juif-la té ka mandé.
^ Ay gadé nòt-la ki k’ay èvè Matyé 17:21.
^ An grèk, pòwnéya o pliryèl. Ay adan Èsplikasyon a sé mo-la (Péché sèksyèl).
^ Grèk asélgéya. Ay adan Èsplikasyon a sé mo-la (Aji san pon rèspé é èvè fon-é-toupé).
^ Oben « réjyon a sé 10 vil-la ».
^ Pi ègzaktèman « mèt men a-y anlè-y ».
