1. Ka ki té ka montré kè Jézi té ka ba Lézékriti onlo valè ?

 IMAJINÉ ou té’é an tan a Jézi é kè ou té ka tann-li ka anségné moun. Sèten ou té’é touvé sa bèl. I té ka di sa ki maké adan Lézékriti é a pa onsèl fwa i ni lokazyon fè sa. Anplisdisa, souvantfwa sé té dé pasaj i té konnèt pa tchè ! An réyalité, pawmi sé prèmyé biten-la i di la avan i té pran lèbatèm é pawmi sé dènyé biten-la i di la avan i té mò, i di sa ki té maké adan plizyè pasaj a Lézékriti b (Dét. 8:3 ; Sòm 31:5 ; Lik 4:4 ; 23:46). É apré i pran lèbatèm, i rété 3 an é dèmi asi latè é pannan tout tan-lasa, i ni lokazyon li Pawòl a Bondyé douvan toutmoun. Souvantfwa, i té ka di sa ki té maké adan Lézékriti é i té ka èspliké sa i té ka li (Mat. 5:17, 18, 21, 22, 27, 28 ; Lik 4:16-20).

2. Toupannan Jézi té ka grandi, i vin konnèt Lézékriti byen toubònman. Ka ki édé-y fè sa ? (gadé imaj-la ki anlè po a jounal-la).

² Avan Jézi té koumansé préché, i li Pawòl a Bondyé é i tann-yo li-y onlo onlo fwa pannan plizyè lanné. Mari é Jozèf té ka di sa ki té maké adan Lézékriti adan ti kozé a yo, é sèten Jézi ni lokazyon tann sa c (Dét. 6:6, 7). É nou pé sèten osi kè, chak saba, i té k’ay an sinagòg-la èvè fanmi a-y (Lik 4:16). Lè yo té ka li Lézékriti, i dwèt té ka wouvè zòrèy a-y gran pou i té pé sa kouté byen. É on jou, i rivé li Lézékriti tousèl a-y. Sé konsa, non sèlman i fin pa konnèt Lézékriti byen, men i vin enmé-yo é i té ka mèt-yo an pratik adan vi a-y. Pa ègzanp, sonjé sa ki  pasé adan Tanp-la lèwvwè Jézi té sòti ni 12 an. Sé anségnan-la ki té la la é ki té konnèt Lwa a Moyiz pa tchè, « rété bouch gran wouvè lè yo té ka vwè jan i té entélijan é jan i té ka réponn-yo » (Lik 2:46, 47, 52).

3. Ka nou ké vwè adan awtik-lasa ?

³ Si nou ka pran labitid li Labib, nou osi, nou pé rivé a konnèt Pawòl a Bondyé é a enmé-y osi. Men ka nou pé fè pou lè nou ka li Labib, sa pé pi itil pou nou ? Sa Jézi di sèwten èspésyalis a Lwa-la, kon sé iskrib-la, sé farizyen-la oben sé sadiséen-la pé aprann-nou onlo biten. Sé vré, sé chèf a rèlijyon lasa té ni labitid li Lézékriti men sa pa té ka rapòté-yo ayen. Jézi palé dè 3 biten kè yo té dwèt fè pou sa yo té ka li té pé sa pi itil pou yo. Sa Jézi di-yo la pé fè kò an nou vin pibon adan 3 domenn : 1) konprann sa nou ka li, 2) touvé dé bèl ti trézò ki kaché é 3) lésé Pawòl a Bondyé aji asi nou.

4. Ka Lik 10:25-29 ka aprann-nou asi jan pou nou li Pawòl a Bondyé ?

⁴ Lè nou ka li Pawòl a Bondyé, nou anvi konprann sa nou ka li pas sé enki a moman-lasa sa ké vréman itil pou nou. Pou nou byen konprann sa, an-nou gadé on ti kozé Jézi té ni èvè on èspésyalis a Lwa-la (li Lik 10:25-29). Misyé-la té mandé Jézi ka pou i té fè pou i té pé sa ni lavi étèwnèl. Alò pou édé-y touvé répons-la limenm a-y adan Pawòl a Bondyé, Jézi pozé-y on ti kèsyon. I mandé-y : « Ka ki maké adan Lwa-la ? Kijan ou ka konprann sa ou ka li ? » Misyé-la palé dè sèwten pasaj a Labib ki té ka di kè fò ou enmé Bondyé é kè fò ou enmé pwochen a-w, é sé té bon répons-la (Lév. 19:18 ; Dét. 6:5). Men aprésa misyé-la mandé Jézi : « Men kimoun ki pwochen an mwen ojis ? » Kèsyon-lasa té ka montré kè i pa té byen konprann sa i té li la. Kifè, i pa té sav kijan pou mèt sa i té li la an pratik.

5. Si ou ka priyé é si ou ka pran tan a-w pou ou pé sa li Pawòl a Bondyé, kijan sa pé édé-w konprann-li pibyen ?

⁵ Nou pé rivé konprann Pawòl a Bondyé pibyen, lèwvwè nou ka pran dé bon labitid lè nou ka li Labib. Mi déotwa ti biten ou pé fè : Avan ou koumansé li Labib, priyé. Pou nou konprann Lézékriti, nou bizwen Jéova édé-nou. Alò, mandé-y ba-w lèspri sen a-y pou édé-w konsantré-w asi sa ou ka li. Aprésa, pran tan a-w pou ou pé sa li. Métòd-lasa ké édé-w konprann sa ou ka li pi fasilman. Lè ou ka li Bib a-w, olyé ou li touba, li-y fò. Oben éséyé li toupannan ou ka kouté anrèjistrèman a Labib si yo disponib adan lang a-w. Pétèt ou ké touvé yonn adan sé métòd-lasa entérésan. Si ou fè sa, ou ké fè Pawòl a Bondyé rantré fon an tèt a-w é fon a tchè a-w (Joz. 1:8). Lèwvwè ou fin li, priyé ankò. Di Jéova mèsi pou Pawòl a-y pas sé on bèl kado toubònman é mandé-y édé-w mèt sa ou li an pratik.

6. Lè nou ka li Labib, nou pé pozé-nou déotwa kèsyon é maké sèwten biten anrapò èvè sa nou ka li. Poukwa sé on bon biten ? (gadé imaj-la osi).

⁶ Mi dézòt biten ki ké édé-w konprann Labib pibyen : Pozé-w déotwa kèsyon asi sa ou ka li. Pannan ou ka li on istwa ki an Bib-la, mi sa pou ou mandé-w : « Kimoun ki adan istwa-lasa ? Kimoun ki ka palé ? Pou kimoun i ka palé, é poukwa i ka palé ba-y ? Ola istwa-lasa pasé é kitan sa fèt ? » Si ou ka pozé-w sé kèsyon-lasa, sa ké édé-w réfléchi asi sé lidé-la ki pi enpòwtan la é ou ké konprann pibyen kijan istwa-la ka déwoulé. Ondòt biten ou pé fè sé maké déotwa ti biten asi sa ou ka li. Lèwvwè  nou ka fè sa, sa ka édé-nou réfléchi plis asi sa nou ka li é sa ka édé-nou konprann sa nou ka li pibyen osi. Anplisdisa, sa ka édé-nou woutyenn sa nou li. Ou pé maké déotwa kèsyon ou té’é pé ni é sa ou touvé lèwvwè ou fè rèchèch a-w. Ou pé maké osi sé lidé-la ki pi enpòwtan la é vwè kijan ou té’é pé itilizé sé lidé-lasa. Anplis, ou pé maké sa ou rèsanti lèwvwè ou li sé lidé-lasa. Si ou ka fè sa, sèten sa ké édé-w vwè jan Pawòl a Bondyé sé on mésaj kè Jéova ékri pou vou pèwsonèlman.

7. Ka pou nou fè lèwvwè nou ka li Bib an nou é poukwa fò-nou fè sa ? (Matyé 24:15).

⁷ Jézi palé dè on kalité ki enpòwtan pou nou konprann Pawòl a Bondyé : sé bon jijman (li Matyé 24:15). Lèwvwè ou ni bon jijman, sa ka édé-w konprann kijan on lidé lyanné èvè ondòt lidé. Men sa ka édé-w vwè osi ki diférans ki ni antrè lidé-lasa é ondòt lidé, é sa ka édé-w konprann dé biten nou pa’a rivé konprann fasilman. Anplisdisa, Jézi montré osi kè fò-nou konprann byen sa nou ka li pou nou pé sa vwè kijan sé pwofési-la ki an Bib-la ka réyalizé. Lè nou ka li Labib, sa enpòwtan kè nou réfléchi asi sa nou ka li pou sa fè-nou dibyen.

8. Fò-nou ni bon jijman lèwvwè nou ka li Labib. Kijan nou pé fè sa ?

⁸ Jéova ka ba sèwvitè a-y bon jijman. Alò priyé-y pou mandé-y édé-w ni kalité-lasa (Pwov. 2:6). Ka pou ou fè pou aji annakò èvè priyè a-w ? Pran tan ègzaminé sé lidé-la ou ka li la é chèché a vwè ki rapò yo ni èvè dé biten ou ja konnèt. Pou édé-w fè sa, ay gadé piblikasyon nou ka itilizé pou étidyé. Pa ègzanp, ou pé ay gadé adan Zouti pou Témwen a Jéova fè rèchèch. Lè ou bizwen ay an nannan a on vèwsé a Labib pou konprann-li byen, sé zouti-lasa ké édé-w fè sa. Konsa ou ké vwè kijan ou pé apliké vèwsé-lasa adan vi a-w (Ébr. 5:14). Lè ou ka li é kè ou ni bon jijman, sa ka édé-w konprann Lézékriti pibyen.

9. Ki vérité ki enpòwtan adan Lézékriti sé sadiséen-la pa té konprann ?

⁹ Sé sadiséen-la té konnèt 5 prèmyé liv a Lézékriti ébrayik byen menm. Men yo pa té ka aksèpté sèwten vérité ki té adan Lézékriti alòskè sé vérité-lasa té enpòwtan toubònman. Pa ègzanp, an-nou vwè kijan Jézi réponn-yo lèwvwè yo pozé-y kèsyon asi larézirèksyon. Mi sa i di-yo : « Ès zò pa li adan liv a Moyiz, adan istwa a ti pyébwa-la ki plen pikan la, kè Bondyé té di Moyiz : “An sé Dyé a Abraam, Dyé a Izaak é Dyé a Jakòb” ? » (Mawk 12:18, 26). Sèten sé sadiséen-la té ja li pasaj-lasa a plizyè rèpriz. Men kèsyon-la Jézi pozé-yo la té ka montré kè yo pa té konprann on vérité enpòwtan ki adan Lézékriti. Yo pa té konprann ka ki té larézirèksyon d (Mawk 12:27 ; Lik 20:38).

10. Lèwvwè nou ka li, a ki biten pou nou fè atansyon ?

¹⁰ Ka sa ka aprann-nou ? Lèwvwè nou ka li Labib, fò-nou gadé pou vwè ka on vèwsé ka aprann-nou, é ka on istwa ka aprann-nou osi. Nou pa’a chèché a konprann yenki dé biten ki fasil, men nou vé ay an nannan a sa nou ka li pou nou touvé dòt biten adan Labib ki ni onlo valè é pou touvé dé prensip nou pé’é vwè si nou pa fè éfò.

11. Kijan 2 Timoté 3:16, 17 pé édé-w a touvé dé bèl ti trézò lè ou ka li Labib ?

¹¹ Lè ou ka li Labib, kijan ou pé touvé dé bèl ti trézò ? Ou pé sèvi èvè 2 Timoté 3:16, 17 (li-y). Adan pasaj-lasa nou ka li kè « tout Ékriti-la itil » 1) pou anségné, 2) pou korijé, 3) pou woumèt tout biten annòd é 4) pou fòwmé moun pou yo maché dwèt. Ou pé ni sé 4 byenfé-lasa menm lèwvwè ou ka li liv a Labib kè ou pa’a itilizé tèlman souvan. Pran tan analizé tèks-la pou ou pé sa vwè ka i ka aprann-vou asi Jéova, asi pwojé a-y oben asi prensip a-y. Chèché a vwè kijan sa pé édé-w korijé sa ki mérité korijé. Pa ègzanp, ou pé gadé kijan vèwsé-lasa pé édé-w vwè tout vyé manni é tout vyé mantalité ou té’é pé ni é mèt-yo akoté. Konsa ou ké rété fidèl a Jéova a san pou san. Ou pé chèché a vwè kijan vèwsé-lasa pé woumèt sèwten biten annòd oben pé korijé on mové rézònman. Sé pé on biten on moun di-w an prédikasyon. Pou fin, chèché a vwè kijan vèwsé-lasa pé fòwmé-w é pé édé-w rézonné kon Jéova ka rézonné. Si ou toujou ni sé 4 biten-lasa an lèspri a-w lèwvwè ou ka li Labib, ou ké touvé dé ti trézò, é lèkti a-w ké pi entérésan.

12. Poukwa Jézi mandé sé farizyen-la : « Ès zò pa li » ?

¹² Jézi mandé sé farizyen-la « Ès zò pa li ? » pou montré-yo osi kè yo pa té ka itilizé  Lézékriti byen konm i fo e (Mat. 12:1-7). Sé farizyen-la té ka di kè disip a Jézi pa té ka rèspèkté saba-la. Alò pou réponn-yo, Jézi sèvi èvè 2 ègzanp nou ka touvé adan Lézékriti é i sèvi osi èvè on vèwsé ki adan liv a Ozé. I fè sa pou montré kè sé farizyen-la pa té konprann poukwa Jéova té mèt saba-la anplas é kè yo pa té ka aji épi mizérikòd èvè lézòt. Lèwvwè yo té ka li Pawòl a Bondyé, poukwa sa pa té ka aji asi yo ? Pas lèwvwè yo té ka li-y, yo pa té ni bon mantalité-la. Yo té ni òwgèy é yo té ka kritiké lézòt. Konm yo té ka li Pawòl a Bondyé èvè mantalité-lasa, yo pa té ka rivé konprann sa yo té ka li (Mat. 23:23 ; Jan 5:39, 40).

13. Ki létadèspri pou nou ni lèwvwè nou ka li Labib, é poukwa fò-nou ni létadèspri-lasa ?

¹³ Sé pawòl-la Jézi di la ka montré-nou kè sa enpòwtan kè nou ni on bèl létadèspri lèwvwè nou ka li Labib. Olyé nou sanm sé farizyen-la, fò-nou ni imilité é fò-nou dakò pou nou lésé Jéova anségné-nou. Fò-nou aksèpté èvè dousè kè Pawòl-la rantré anfon a tchè an nou (Jak 1:21). Siwvwè nou sé on moun ki dous, nou ké lésé Pawòl a Jéova pran rasin an tchè an nou. Adan Labib, sa nou ka aprann asi lamizérikòd, asi lakonpasyon é asi lanmou ké fè on travay asi nou siwvwè nou ka mèt lòwgèy akoté é siwvwè nou pa on moun ki ka kritiké lézòt.

14. Ka nou pé fè pou sav si nou ka lésé Pawòl a Bondyé aji asi nou ? (gadé sé imaj-la osi).

¹⁴ Jan nou ka aji èvè lézòt pé montré si nou ka lésé Pawòl a Bondyé aji asi nou. Sé farizyen-la pa té ka lésé Lézékriti aji asi tchè a yo. Sé sa ki fè si yo té ka kondanné moun ki inosan (Mat. 12:7). Menmjan-la, jan nou ka vwè lézòt é jan-la nou ka aji èvè yo la ka montré si nou ka lésé Pawòl a Bondyé aji asi nou.  Pa ègzanp, ès nou ni labitid palé dè bèl kalité a on moun oben ès nou plis ka palé dè défo a-y ? Ès nou sé dé moun ki ni mizérikòd é ès nou paré a padonné lézòt ? Oben ès nou plito ka kritiké-yo é ès nou ka kontinyé ni yo asi tchè ? Lè nou ka pran tan ègzaminé-nou konsa, sa pé montré si nou ka lésé sa nou ka li aji asi sa nou ka pansé, asi sa nou ka rèsanti, é asi sa nou ka fè (1 Tim. 4:12, 15 ; Ébr. 4:12).

15. Ka Jézi té ka rèsanti pou Pawòl a Bondyé ?

¹⁵ Jézi té enmé Lézékriti toubònman. É sé pawòl-la nou ka touvé an Sòm 40:8 té ja anonsé ka Jézi té’é rèsanti pou Pawòl a Bondyé. Mi sa nou ka li adan vèwsé-lasa : « Bondyé an mwen, sé plézi an mwen fè volonté a-w, é lwa a-w anfon a tchè an mwen. » Konm Jézi té enmé Lézékriti, i té ni tchè-kontan é i té ka kontinyé sèvi Jéova. Nou osi, si nou ka fè tousa nou pé pou fè Pawòl a Bondyé rantré anfon a tchè an nou, nou ké ni tchè-kontan, é nou ké rété fidèl a Bondyé (Sòm 1:1-3).

16. Ka ou ka di ou pé fè pou sa ou ka li adan Labib pé sa pi itil pou-w ? (gadé ti karé-la «  Sa Jézi di pé édé-w konprann sa ou ka li »).

¹⁶ An-nou pwogrésé adan mannyè nou ka li Bib an nou. Pou sa, fò-nou lésé pawòl a Jézi é ègzanp a-y gidé-nou. Lèwvwè nou bizwen konprann on pasaj a Labib, an-nou priyé, an-nou pran tout ti tan an nou pou nou li-y, an-nou pran labitid pozé-nou déotwa kèsyon, é an-nou maké déotwa ti biten asi sa nou li. Lè nou ka sèvi èvè piblikasyon an nou pou analizé sa nou ka li byen konm i fo, nou ka aji èvè bon jijman. Nou ké pé aprann sèvi èvè Labib pibyen si nou ka chèché a vwè ki trézò ki kaché adan-y, é nou pé jous fè sa èvè dé pasaj kè nou pa byen konnèt. É pou fin, an-nou ni létadèspri-la ki fo la lèwvwè nou ka li Pawòl a Bondyé pou i pé sa fè on travay asi nou. Si nou ka fè on éfò pou fè sé biten-lasa, nou ké konprann Pawòl a Bondyé pibyen, sa ké pòté onlo bon biten pou nou, é pi tan ké ka pasé é pi nou ké vin bon zanmi èvè Jéova (Sòm 119:17, 18 ; Jak 4:8).