1. Lèwvwè Jézi palé èvè disip a-y dè moman-la lafen té’é vin, ka i di-yo asi sa é ka i ankourajé-yo fè ?

 DÉOTWA jou avan Jézi té mò, ni 4 adan disip a-y ki mandé-y : « Ki sign ki ké montré [...] kè mond-la kay bout ? » (Mat. 24:3). Pétèt kè sé disip-la té ka mandé-yo kijan yo té’é fè pou sav a ki moman yo té’é détwi Jérizalèm é tanp a-y. Alò lèwvwè Jézi réponn-yo, i palé dè sa men i palé osi dè biten ki té’é montré kè ‘mond-la té’é bout’ é nou ka viv pannan péryòd-lasa jòdijou. Lèwvwè i palé dè moman-la lafen té’é vin, mi sa Jézi di : « Kanta jou-lasa é kanta lè-lasa, ponmoun pa konnèt-yo, ni sé zanj-la ki an syèl-la ni Gason-la, men sé enki Papa-la ki konnèt-yo » (Mawk 13:32-37). Aprésa i ankourajé sé disip-la rété véyatif.

2. O 1^é syèk, poukwa sa té enpòwtan kè sé krétyen-la rété véyatif ?

² O 1^é syèk, fò sé krétyen-la ki té juif la té kontinyé rété véyatif pou yo té sové vi a yo. Jézi té di disip a-y ki biten pou yo té gadé pou sav kitan moun té’é détwi Jérizalèm. Mi sa i di yo : « Lè zò ké vwè sé lawmé-la ka lantouré Jérizalèm, fò-zò sav kè yo kay détwi-y talè. » Lèwvwè sa Jézi di-yo té’é fèt, fò sé krétyen-la té’é « pran pyé a kouri a yo pou ay adan sé montangn-la » (Lik 21:20, 21). Sé sé krétyen-la ki kouté sa Jézi té di ki sové vi a yo lèwvwè sé Women-la détwi Jérizalèm.

3. Ka nou ké vwè adan awtik-lasa ?

 ³ Talè mond méchan lasa kay bout é jistèman nou ka viv pannan péryòd-lasa. Sé pousa, fò-nou kontinyé ni bon jijman é fò-nou kontinyé rété véyatif. Adan awtik-lasa, nou ké vwè kijan nou pé kontinyé ni bon jijman toupannan nou ka vwè tousa ki ka fèt adan mond-lasa. Nou ké vwè osi kijan pou nou fè atansyon a noumenm é kijan nou pé sèvi èvè tan-la ki ka rété la méyè fason ki tini.

4. Fò-nou fè atansyon pou vwè kijan sé biten-la ki ka fèt adan mond-lasa ka réyalizé sé pwofési-la ki an Bib-la. Poukwa fò-nou fè sa ?

⁴ Fò nou rété véyatif pou vwè kijan sèwten biten ki ka pasé an mond-lasa ka réyalizé sèwten pwofési ki adan Labib, é nou ni onlo bon rézon pou nou fè sa. Pa ègzanp, Jézi palé dè biten ki té’é fèt pou édé-nou sav a ki péryòd mond a Satan té’é bout (Mat. 24:3-14). Pou nou pé sa kontinyé ni on fwa ki solid, lapòt Pyè ankourajé-nou pou nou pé sa fè atansyon a jan sé pwofési-la ka réyalizé (2 Pyè 1:19-21). É mi kijan dènyé liv a Labib ka koumansé : « Révélasyon Bondyé ba Jézikri pou i montré èsklav a-y sa ki pou rivé byento » (Rév. 1:1). Sé pousa, sa ki ka fèt adan mond-la konnyéla la ka entérésé-nou toubònman é a pa ti anvi nou anvi sav si sé biten-lasa ka réyalizé sé pwofési-la ki an Bib-la é pli souvan ki rarman, nou ka anvi palé dè sa èvè frè é sè an nou.

5. Ka pou nou pa fè, men ki biten pou nou fè ? (gadé sé imaj-la).

⁵ Délè sa pé rivé kè nou palé èvè frè é sè an nou dè sé pwofési-la ki an Bib-la, men fò pa nou pran asi nou pou nou di kijan sé pwofési-lasa ké réyalizé. Poukwa fò pa nou fè sa ? Paskè si nou pa’a fè atansyon, lasanblé-la pé’é soudé ankò akòz dè sa nou ké di. Pa ègzanp, pétèt kè nou pé tann kè sé gouvènman-la ka palé ansanm pou vwè kijan pou yo réglé on pwoblèm é kè yo ka éséyé mèt lapé é lasékirité asi latè. Men olyé nou di kè sé dé biten konsa ki ka réyalizé pwofési a 1 Tésalonisyen 5:3, vométan nou chèché a sav tout sé dènyé enfòwmasyon-la òwganizasyon a Jéova ban-nou la. Alò siwvwè nou ka bazé sa nou ka di asi piblikasyon an nou, lasanblé-la ké ni « menm lidé-la » é i ké rété soudé (1 Kor. 1:10 ; 4:6).

6. Ka 2 Pyè 3:11-13 ka aprann-nou ?

⁶ (Li 2 Pyè 3:11-13.) Lapòt Pyè ka édé-nou réfléchi pou vwè pou ki rézon nou ka ègzaminé sé pwofési-la ki an Bib-la. I ka ankourajé-nou pou nou atann jou a Jéova é pou nou toujou sonjé jou-lasa. Men poukwa ? A pa pou éséyé vwè a ki lè é ki jou Jéova ké mèt anwout asi mond-lasa èvè Awmagédon, men sé pou nou sèvi èvè tan-la ki ka rété la pou nou ni ‘on konpòwtèman ki sen é pou nou aji on mannyè ki ka montré kè nou enmé Bondyé’ (Mat. 24:36 ; Lik 12:40). Sa vlé di kè nou vé kontinyé aji on mannyè ki jis é kè nou vlé fè atansyon pou lésé lanmou-la nou ni pou Jéova dirijé tousa nou ka fè. Pou nou rété konsantré asi òbjèktif-lasa, fò-nou fè atansyon an nou.

7. Ka ki ké montré kè nou ka fè atansyon an nou ? (Lik 21:34).

⁷ Jézi té ja di disip a-y kè fò-yo té fè atansyon a biten ki té’é fèt adan mond-lasa  men kè fò-yo té fè atansyon a yomenm osi. Nou ka vwè sa on mannyè ki klè adan Lik 21:34 (li-y). Gadé sa Jézi di : « Fè atansyon a zòt. » On krétyen ki ka fè atansyon a-y ka gadé pou vwè ki biten ki té’é pé anpéché-y rété bon bon zanmi èvè Jéova é i ka ba sé biten-lasa gran lè a yo. Konsa, i ka « rété adan lanmou a Bondyé » (Pwov. 22:3 ; Jid 20, 21).

8. Lapòt Pòl avèti sé krétyen-la. Ka i di-yo ?

⁸ Lapòt Pòl di sé krétyen-la osi kè fò-yo fè atansyon a yo. Pa ègzanp, mi sa i di sé krétyen-la ki té ka rété Éfèz la : « Penga zò aji kon moun ki pa ni pon sajès, men aji plito kon moun ki saj » (Éféz. 5:15, 16). Nou zanmi èvè Jéova, men toutlè, Satan ka éséyé détwi lanmityé-lasa. Sé pousa Labib ka di kè fò nou kontinyé chèché a konprann sa Jéova vlé. Si nou fè sa, sa ké pwotéjé-nou dè tout kalté danjé (Éféz. 5:17).

9. Kijan nou pé sav ka Jéova vé kè nou fè ?

⁹ Labib pa’a di-nou tout ti biten ki té’é pé anpéché-nou rété bon bon zanmi èvè Jéova. Délè, nou ni sèwten désizyon a pran é Labib pa’a ban-nou détay asi sa. Pou nou pran dé désizyon ki saj, fò nou konprann ka ki « volonté a Jéova » oben fò nou ni bon jijman pou nou vwè ka ki volonté a-y. Nou ké rivé fè sa siwvwè nou ni labitid étidyé Pawòl a-y é siwvwè nou ka pran tan réfléchi asi sa nou ka li osi. Pli nou ké konprann ka ki volonté a Jéova é kè nou ké ni « mantalité a Kris », é pli nou ké « aji kon moun ki saj » menm lèwvwè Labib pa’a ban-nou pon lwa pou sav kijan pou nou aji (1 Kor. 2:14-16). Ni sèwten danjé kè nou ka vwè fasilman, men ni dòt ki anbafèy.

10. Ni déotwa danjé pou nou ba-y gran lè a yo. kilès ?

¹⁰ Fò nou ba sèwten danjé gran lè a yo. Pa ègzanp, fè moun zyédou, bwè é manjé a dépasé, di moun biten pou fè-yo mal, gadé anmizman ki ni vyolans adan, gadé biten pòwno é fè dòt biten konsa (Sòm 101:3). Satan ka chèché tout ti lokazyon pou fè-nou pèd lanmityé an nou èvè Jéova é i ka fè sa toutlè (1 Pyè 5:8). Si nou pa véyatif, Satan pé fè ansòt pou sèwten biten pran rasin an lèspri an nou é an tchè an nou. Sé pé lanvi, on manni malonnèt, lahenn, lòwgèy, larankin é lanvi dè toujou ni plis (Gal. 5:19-21). Odépa, pétèt nou ké pansé kè sé santiman-lasa pa danjéré. Men si nou pa ka pòté mannèv tousuit pou raché-yo an tchè an nou é an lèspri an nou, yo ké kon plant ki ni pwazon adan-y é ki ka kontinyé grandi é sa ké fè onlo déga (Jak 1:14, 15).

11. Ni on danjé ki anbafèy é lè nou ka vwè-y, fò nou pran pyé a kouri an nou. Ki danjé ésa é poukwa fò nou aji konsa ?

¹¹ An-nou palé dè mové frékantasyon, ondòt danjé ki anbafèy. Imajiné ou ka travay èvè on moun ki pa Témwen a Jéova. Konm ou anvi kè moun-lasa vwè kè Témwen a Jéova sé dé bon moun, ou janti èvè-y é lè i bizwen on sèwvis ou toujou la pou-y. Dépawfwa i ka envité-w manjé é ou k’ay èvè-y. Men piti-a-piti, sa ka vin on labitid. Délè i ka palé dè biten ki pa pwòp é odépa ou pa’a mélé-w adan sé kalté pawòl-lasa. Men afòs ou tann-li di sé pawòl-lasa, rivé onlè, sa pa menm ka choké-w ankò. Ondòt kou kolèg-la ka envité-w bwè on biten apré travay-la é ou k’ay èvè-y. Piti-a-piti ou ka mèt-vou ka rézonné kon-y. Konm ou ja rivé jous la, ou ka di sa ké pran onlo tan pou ou pé sa aji kon-y ? Sé vré kè fò-nou janti  èvè toutmoun é kè fò-nou rèspèkté-yo, men on biten pou-w sonjé sé kè moun nou ka frékanté ka détenn asi nou (1 Kor. 15:33). Jézi ja di-nou kè fò-nou fè atansyon an nou. Alò si nou ka tchenn kont dè konsèy-lasa, nou pé ké frékanté moun ki pa ka rèspèkté prensip a Jéova si sa pa nésésè (2 Kor. 6:15). Konsa lèwvwè nou ké vwè danjé-la ka vin, nou ké ba-y gran lè a-y.

12. Ki travay Jézi té ba sé disip la fè toupannan yo té ka atann kè sé Women-la té détwi Jérizalèm èvè tanp a-y ?

¹² Jézi té vé kè disip a-y rété byen okipé toupannan yo té ka atann kè lafen rivé. Mi travay-la Jézi té ba-yo fè la : préché bon nouvèl a Wayòm la « a Jérizalèm, adan tout Lajidé é Lasamari, é jis koté-la ki pli lwen la asi latè » (Akt 1:6-8). Mi on gwo travay mi ! Sé disip-la sèvi èvè tan a yo méyè fason ki tini lèwvwè yo pòté bon mannèv pou fè travay-lasa.

13. Poukwa fò nou sèvi èvè tan an nou méyè fason ki tini ? (Kolosyen 4:5).

¹³ (Li Kolosyen 4:5.) Pou nou fè atansyon an nou, fò nou gadé pou vwè kijan nou ka sèvi èvè tan an nou. ‘Évènman nou pa té prévwa ka siwprann-noutout’ (Ékl. 9:11). Jòdla nou pé la é dèmen nou pa la ankò.

14-15. Ka nou pé fè pou nou sèvi èvè tan an nou méyè fason ki tini ? (Ébré 6:11, 12) (gadé imaj-la).

 ¹⁴ Lè on moun ka sèvi èvè tan a-y méyè fason ki tini, i ka sèvi èvè tan-lasa pou fè volonté a Jéova é pou i vin pli bon zanmi èvè-y (Jan 14:21). Fò-nou « tchenbé fò san bigidi » é fò-nou « toujou ni onlo biten a fè adan travay a Ségnè-la » (1 Kor. 15:58). Konsa, menmsi nou vin mò oben kè lafen rivé, nou pé’é règrété ayen (Mat. 24:13 ; Wom. 14:8).

¹⁵ Jòdijou osi, Jézi ka gidé disip a-y pou yo préché wayòm a Bondyé toupatou asi latè. Jézi ka tchenn a mo a-y. I ka sèvi èvè òwganizasyon a Jéova pou aprann-nou préché é i ka ban-nou zouti nou bizwen pou nou pé sa préché bon nouvèl-la (Mat. 28:18-20). Nou ka fè sa Jézi ka atann dè nou lèwvwè nou ka travay rèd pou préché ba sé moun-la é kè nou ka anségné-yo é lèwvwè nou ka rété véyatif toupannan nou ka atann Jéova mèt men a-y pou détwi mond-lasa. Lèwvwè nou ka mèt konsèy-la nou ka touvé an Ébré 6:11, 12 an pratik, nou ka mèt èspérans an nou fon an tèt an nou jiskatan « lafen rivé » (li-y).

16. Ka nou byen désidé a fè ?

¹⁶ Jéova ké fè mond a Satan fè pach é i ja sav ki jou é a ki lè i ké fè sa. Jou-lasa, tout sé pwofési-la kè i fè-yo maké adan Pawòl a-y ké réyalizé. Nou pa ni pon dout asi sa. Men délè, nou pé ni lenprésyon kè jou a Jéova ka pran tan pou rivé. Men nou pé sèten kè jou a-y « pé ké anrèta ! » (Abak. 2:3). Alò, an-nou « rété ka atann Jéova » é an-nou ‘atann Bondyé-la ki ka sové-nou la, èvè pasyans’ (Mich. 7:7).