1. Poukwa ou ni rèkonésans pou Jéova davwa i ban-nou Bib-la ?

 NOU ni onlo rèkonésans pou Jéova, davwa i ban-nou Labib ! Adan Labib nou ka touvé onlo konsèy ki plen sajès. É sé konsèy-lasa ka édé-nou sav ka pou nou fè lèwvwè nou ka jwenn pwoblèm. Anplisdisa, Labib ka ban-nou on bèl èspwa pou dèmen. É on biten ki pli enpòwtan ankò sé kè Jéova ka sèvi èvè Bib-la pou di-nou ki jan dè moun i yé. Lèwvwè nou ka pran tan réfléchi asi kalité a Bondyé, sa ka touché tchè an nou toubònman é sa ka ban-nou anvi vin bon bon zanmi èvè-y (Sòm 25:14).

2. Ki diféran mwayen Jéova itilizé pou fè moun konnèt-li ?

² Jéova vlé kè limanité konnèt-li. An tan lontan i sèvi èvè rèv, èvè vizyon é i jou voyé zanj pòté mésaj ba moun pou sé moun-la té pé sa konnèt-li (Nonb 12:6 ; Akt 10:3, 4). Men siwvwè i pa té fè-yo maké tout sé biten-lasa, kijan nou té’é pé étidyé-yo ? Sé pousa Jéova fè ansòt pou enpé nonm ‘maké sa i té vlé kè nou konnèt adan on liv’ (Jér. 30:2). Jéova chwazi palé èvè nou konsa é konm i ka aji « on mannyè ki pawfè », jan-la i chwazi palé ban-nou la sé on bon biten toubònman é sa ka édé-nou (Sòm 18:30).

3. Kijan Jéova fè ansòt pou Pawòl a-y pa jen disparèt ? (Izayi 40:8).

³ (Li Izayi 40:8.) Dépi plizyè milyé lanné, Bondyé ka sèvi èvè Pawòl a-y pou ba misyé é madanm ki fidèl onlo konsèy ki plen sajès. Men kijan i ka rivé fè sa ? Sé on bon ti kèsyon pas a pa yè maten yo maké prèmyé maniskri a Labib. Yo ékri-y asi woulo oben asi po a bèt é sé dé biten ki pé fin pa disparèt. Kifè nou pa ni sé prèmyé maniskri-la. Men Jéova fè ansòt pou yo  kopyé é rèkopyé tèks-lasa ki sakré toubònman. Menmsi sé moun-la ki té ka kopyé Bib-la té enpawfè, yo té ka pran tout ti tan a yo pou yo té fè sa byen menm. Mi sa on èspésyalis a Labib ka di anrapò èvè Lézékriti ébrayik : « Nou pé sèten kè pa ni pondòt liv yo maké an tan lontan, yo kopyé on mannyè ki ègzak konsa b. » Alò menmsi sa ja ka fè lanné é lanné kè yo maké Labib, kè sé biten-la kè yo itilizé la pou maké liv-lasa sé dé biten ki pé disparèt oben kè sé moun-la ki maké-y la sé dé moun ki enpawfè, nou pé sèten kè tousa nou ka li adan Bib an nou jòdijou sé sa Jéova, moun-la ki fè-nou kado-lasa, ka pansé.

4. Ka nou ké vwè adan awtik-lasa ?

⁴ « Tout bèl don é tout kado pawfè » ka vin dè Jéova (Jak 1:17). É Labib sé yonn adan sé pli bèl kado-la Jéova ban-nou la. Lè on moun ka ban-nou on kado, kado-lasa ka montré-nou kè i konnèt-nou byen é kè moun-lasa konnèt sa nou bizwen osi. Ében sé menm biten èvè Labib. Lèwvwè nou ka pran tan ègzaminé kado-lasa, nou ka aprann onlo biten asi Jéova. Nou ka vin sav jan i konnèt-nou é jan i konnèt sa nou bizwen. Lè nou ka gadé Labib nou ka vwè bèl kalité a Jéova. Adan awtik-lasa, nou ké palé dè 3 adan yo : sajès a-y, jistis a-y é lanmou a-y. Men pou nou koumansé, an-nou palé dè sajès a-y.

5. Labib ka montré kè Bondyé ni sajès toubònman. Kijansa ? Bay on ègzanp.

⁵ Jéova sav kè nou bizwen konsèy a-y ki plen sajès. É Labib, bèl kado-la i fè-nou la, sé on sous a sajès. Sé konsèy-la nou ka touvé adan Bib-la ka fè sé moun-la dibyen. Bib-la ka chanjé vi a moun. Lèwvwè Moyiz maké sé prèmyé liv a Bib-la, mi sa i di sé Izraélit-la, pèp a Bondyé : « Sé pawòl-lasa, a pa pawòl ki pa ni valè. Yo ké fè-zòt ni lavi » (Dét. 32:47). Sé moun-la ki té ka fè sa ki té maké adan Lézékriti, té pé réyisi vi a yo é ni tchè-kontan (Sòm 1:2, 3). Menmsi sa ka fè lontan yo maké sa ki adan Labib, i pa pèd fòs, i ka kontinyé chanjé vi a moun. Adan ribrik a jw.org « Labib ka chanjé vi a moun », nou ka touvé onlo ègzanp a moun ki rivé fè dé gwo chanjman adan vi a yo é vi a yo pli bèl aprézan pas yo koumansé mèt sé konsèy-la ki an Bib-la an pratik (1 Tés. 2:13).

6. Pa ni 2 liv kon Labib. Poukwa nou ka di sa ?

⁶ Pa ni 2 liv kon Pawòl a Bondyé. Poukwa nou ka di sa ? Pas Moun-la ki fè-yo maké liv-lasa sé Jéova é i toupuisan, i étèwnèl é ponmoun pa ni plis sajès ki-y. Ni onlo liv nou ka kontinyé li magré sé moun-la ki maké-yo la ja mò. Men menmsi nou ka touvé konsèy adan yo, rivé onlè sé konsèy-lasa ka pasé dimòd. Pawkont, sé prensip-la ki an Bib-la plen sajès é yo pa’a jen pasé dimòd. Okontrè, yo ka édé moun jous a épòk an nou. Pli nou ké li liv-lasa ki sakré toubònman é kè nou ké pran tan réfléchi asi-y, é pli Moun-la ki fè-yo maké-y la ké sèvi èvè lèspri sen a-y pou édé-nou vwè kijan pou nou mèt sé konsèy-la ki adan-y la an pratik (Sòm 119:27 ; Mal. 3:16 ; Ébr. 4:12). Wi, Moun-la ki fè-yo maké Bib-la byen vivan é i anvi gidonné-nou. Lèfètkè nou sav sa, sa ka ban-nou anvi li Bib-la touléjou !

7. An tan lontan, grasa Labib pèp a Bondyé té soudé. Kijansa ?

⁷ Bib-la ka montré jan Bondyé ni sajès ondòt jan ankò. Bib-la ka édé pèp a Bondyé rété soudé. Lè sé Izraélit-la rantré adan péyi-la Bondyé té pwomèt-yo la, yochak pran bò a yo. Ni sa ki vin maren-péchè, ni dòt ki té ka lévé bèt é ni dòt ankò ki vin agrikiltè. Sé Izraélit-la ki té ka viv on koté adan péyi-la té pé rivé a oubliyé  sé Izraélit-la ki té ka viv ondòt koté adan menm péyi-la pas péyi-la té gran toubònman. Men Jéova té prévwa plizyè lokazyon pou tout sé Izraélit-la té pé sa sanblé pou kouté Pawòl a-y. Fò-yo té li-y ba yo é fò-yo té èspliké-yo-y (Dét. 31:10-13 ; Néém. 8:2, 8, 18). Imajiné sa on Izraélit té ka rèsanti lèwvwè i té ka rivé Jérizalèm é kè i té ka vwè moun ki ka adoré Bondyé kon limenm ki sòti toupatou an péyi-la. Pétèt kè té ni milyon é milyon moun ki té la. Grasa sé évènman-lasa, Jéova fè ansòt pou pèp a-y rété soudé. Plita yo fòwmé lasanblé krétyèn la. Adan lasanblé-la, ou té ka touvé misyé é madanm ki pa té ka palé menm lang-la, ki pa té sòti menm koté-la é ki pa té ni menm sitiyasyon-la. Men yo té soudé é yo té ka adoré Bondyé ansanm pas yo té enmé Lézékriti. É sé moun-la ki té ka mèt-yo ka kwè adan Bondyé pa té pé konprann Pawòl a Bondyé siwvwè ondòt moun adan lasanblé-la pa té ka édé-yo é siwvwè yo pa té ka sanblé èvè sélézòt moun-la ki adan lasanblé-la (Akt 2:42 ; 8:30, 31).

8. Kijan Labib ka édé sèwvitè a Bondyé rété soudé jòdijou ?

⁸ Bondyé an nou ki plen sajès ka sèvi èvè Bib-la pou kontinyé anségné pèp a-y é pou fè ansòt pou yo rété soudé. Adan Bib-la, nou ka touvé tousa nou bizwen pou nou konnèt Jéova. Anplisdisa, nou ni labitid réini-nou èvè frè é sè an nou lèwvwè nou k’ay réinyon, lèwvwè nou k’ay adan sé lasanblé a siwkonskripsyon  la oben lèwvwè nou k’ay adan sé lasanblé réjyonal la. É a moman-lasa, yo ka li Pawòl a Bondyé pou nou, yo ka èspliké-y é yo k’ay an nannan a-y. Donk, Bib-la sé on zouti ki vréman enpòwtan pou Jéova pas i ka itilizé-y pou sèwvitè a-y pé sa « sèvi-y ansanm-ansanm » (Sof. 3:9).

9. Si nou bizwen konprann Labib, ki kalité pou nou ni ? (Lik 10:21).

⁹ An-nou vwè ondòt biten ki ka montré kè Bondyé ni sajès. Lè Jéova fè-yo maké sèwten pawti a Labib, i fè ansòt pou sé enki moun ki ni imilité ki konprann sa ki maké adan-y (li Lik 10:21). Ni onlo moun ki ka li Labib. On èspésyalis a Labib di konsa kè « ni plis moun ki ka li Labib ki sélézòt liv-la é lè yo ka li sélézòt liv-la, yo pa ka pran tan a yo pou ègzaminé-y kon yo ka fè-y pou Bib-la c ». Men sé enki moun ki ni imilité ki ka konprann sa i ka di vréman é ki ka apliké sa i ka anségné poudèbon (2 Kor. 3:15, 16).

10. Ki dòt biten ki pé édé-nou vwè sajès a Jéova adan Bib-la ?

¹⁰ Adan Labib ni ondòt biten ki ka édé-nou vwè jan Jéova ni sajès. Jéova ka sèvi èvè Pawòl a-y pou anségné toutmoun. Men i ka sèvi èvè Pawòl-lasa osi pou anségné-nouchak é pou konsolé-nouchak. Lèwvwè nou ka li-y, nou pé santi jan i ka enkyété-y pou nouchak (Iz. 30:21). Lè ou ka jwenn on difikilté é kè ou ka chèché on pasaj pou édé-w, souvantfwa lè ou ka li pasaj-lasa, ou ni lenprésyon kè sé pou vou yo té maké sa. Sèten sa ja rivé-w. Poutan Bib-la ka touché tchè a milyon é milyon moun. Alò kijanfè sé konsèy-la ki adan-y la lanmòd toujou ? Kijanfè sé ègzaktèman sa ou bizwen ? Ében tousa posib, pas sé Moun-la ki ni plis sajès adan linivè ki fè-yo maké Bib-la (2 Tim. 3:16, 17).

11. Kijan Bondyé montré kè i pa té ka fè préférans lè yo maké Bib-la ?

¹¹ Ondòt kalité Jéova ni sé kè i jis (Dét. 32:4). Souvantfwa, lè on moun jis i pa ka fè préférans (Akt 10:34, 35 ; Wom. 2:11). É Jéova, sé konsa i yé, i pa ka fè préférans. Nou ka vwè sa byen lè nou ka gadé adan ki lang Jéova fè-yo maké Pawòl a-y. Lè nou ka gadé sé 39 prèmyé liv-la ki an Bib-la, lamajorité adan yo maké an ébré. A épòk-lasa, moun ki té ka adoré Bondyé té ka konprann lang-lasa fasilman. Men o 1^é syèk, sé grèk prèstout moun té ka palé. Alò Jéova fè ansòt pou yo maké lamajorité a sé 27 dènyé liv-la ki adan Bib-la adan lang-lasa. Jéova pa té vlé kè yo maké Pawòl a-y enki adan onsèl lang. Jòdila, ni prèskè 8 milya moun asi latè é yo ka palé tout kalité lang. Alò kijan tousa moun pé rivé aprann konnèt Jéova ?

12. Kijan Danyèl 12:4 ka réyalizé pannan sé dènyé jou-la ? Bay on ègzanp.

¹² Jéova té ja anonsé kè pannan sé dènyé jou-la, té’é ni « vré konésans-la pou tann-é-konprann » é i sèvi èvè Danyèl pou anonsé sa. Wi, onlo moun té’é konprann Labib (li Danyèl 12:4). On biten ki édé onlo moun konprann Pawòl a Bondyé sé kè yo tradui-y, yo pibliyé-y é yo distribiyé-y toupatou si latè. Adan mond-lasa, pou ou pé sa ni on Bib fò ou ni lajan an pòch a-w. Men jousalè, òwganizasyon a Jéova ja tradui Bib-la an plis ki 240 lang. Délè sé tout Bib-la yo tradui é délè sé on pawti a-y. É pli bèl la sé kè moun pa bizwen péyé pou yo pé sa ni on Bib. Grasa sa, moun a tout kalté nasyon ka aksèpté « bon nouvèl a Wayòm-la » avan lafen rivé (Mat. 24:14). Bondyé an nou ki jis anvi kè on maksimòm dè moun li Pawòl a-y pou yo aprann konnèt-li. I ka fè sa pas i enmé-nouchak.

13. Poukwa nou pé di kè Labib ka montré kè Jéova enmé-nou ? (Jan 21:25).

¹³ Bib-la ka édé-nou vwè kè lanmou sé pli bèl kalité a Jéova (1 Jan 4:8). Pran on ti tan pou sonjé sa : ni onlo biten Jéova fè-yo maké adan Bib-la men ni onlo biten osi i pa fè-yo maké adan-y. Anplisdisa, adan Bib-la nou ka touvé sa nou bizwen pou nou pé sa vin bon zanmi èvè Bondyé. Nou ka touvé osi sa nou bizwen pou nou ni tchè-kontan dépi aprézan é pou nou viv pou touttan dèmen. Men konm Jéova enmé-nou, i fè ansòt pou i pa té ban-nou twòp enfòwmasyon. I pa ban-nou plis ki sa nou té pé pran (li Jan 21:25).

14. Adan Labib ni ondòt biten ki ka montré kè Bondyé enmé-nou. Ki biten ésa ?

¹⁴ Ondòt biten ki ka montré kè Jéova enmé-nou sé jan-la i ka palé ban nou la : i ka montré-nou kè nou ni valè. I pa ban-nou on lis ki ni onpakèt lwa adan pou di-nou ka pou nou fè é ka pou nou pa fè adan tout domenn a vi an nou. I préféré sèvi èvè istwa a vi a moun ki viv an tan a Labib, èvè pwofési ki entérésan toubònman oben èvè konsèy ki itil pou édé-nou pran dé bon désizyon. Sé biten-lasa ka fè-nou enmé Jéova pli fò é sa ka ban-nou anvi obéyi-y èvè tout tchè an nou.

15. a) Ka ki ka montré kè Jéova ka sousyé-y dè moun ki ka li Pawòl a-y ? b) Adan imaj-la, asi kimoun ki adan Bib-la tifi-la, jenn frè-la é sè-la ki ja ni on bèl laj la ka réfléchi ? (Jén. 39:1, 10-12 ; 2 Wa 5:1-3 ; Lik 2:25-38).

¹⁵ Labib ka montré kè Jéova ka sousyé-y dè nou toubònman. Kijansa ? Adan Labib nou ka touvé onlo istwa ki ka montré sa moun kon noumenm rèsanti. Nou pé mèt-nou anplas a sé moun-lasa ki an Bib-la fasilman pas sé té dé moun « ki té ni menm jan dè santiman ki nou »  (Jak 5:17). Men sa ki pli bèl ankò sé kè lè nou ka gadé jan Jéova té ka aji èvè dé moun kon noumenm, nou ka konprann plibyen kè « Jéova enmé-nou èvè tandrès é kè i plen mizérikòd » (Jak 5:11).

16. Lèwvwè nou ka li istwa a moun ki bétizé, ka sa ka aprann-nou asi Jéova ? (Izayi 55:7).

¹⁶ Adan Labib, ni ondòt biten ki ka montré kè Jéova enmé-nou. Pawòl a Bondyé ka ban-nou lagaranti kè siwvwè nou ka bétizé, Jéova pé’é ban-nou do. A pa ti péché sé Izraélit-la fè ! Men chakfwa yo té ka rèpanti-yo èvè tout tchè a yo, Jéova té ka padonné-yo (li Izayi 55:7). Sé 1^é krétyen-la té sav osi kè Jéova té enmé-yo fò toubònman. Pa ègzanp, on jou, lapòt Pòl ni lokazyon palé dè on misyé ki té ka fè on péché ki grav é ki té rèpanti-y. É Bondyé pousé-y di sé frè é sè la kè ‘sé padonné pou yo té padonné misyé-la volontyé’ é kè ‘fò-yo té konsolé-y’ (2 Kor. 2:6, 7 ; 1 Kor. 5:1-5). Sa vlé di kè lèwvwè sèwvitè a Jéova té ka fè érè, Jéova pa té ka ba-yo do. Olyé dè sa, i té ka édé-yo, i té ka korijé-yo é i té ka ankourajé-yo wouvin an 2 bra a-y. Sa pa bèl sa ? Jòdijou i ka pwomèt kè sé konsa i ké aji èvè on moun ki péché é ki ka rèpanti-y (Jak 4:8-10).

17. Labib sé on kado ki èstraòwdinè toubònman. Poukwa nou pé di sa ?

¹⁷ Lèwvwè Jéova ban-nou Labib, i ban-nou on bèl kado toubònman. Poukwa Pawòl a-y èstraòwdinè konsa ? Pas kon nou vwè, i ka montré kè Bondyé ni sajès, kè Bondyé jis é kè Bondyé plen lanmou. I ka ban-nou laprèv kè Jéova vlé kè nou konnèt-li é kè nou vin zanmi a-y.

18. Labib sé on ‘bèl kado’. Kijan nou pé montré Jéova kè nou ni rèkonésans pou bèl kado-lasa ?

¹⁸ Pawòl a Bondyé sé on ‘bèl kado’ toubònman é nou vlé pa oubliyé sa menm (Jak 1:17). Sé pousa nou vlé montré Jéova jan nou ni rèkonésans pou bèl kado-lasa. Men kijan nou pé fè sa ? Sé lèwvwè nou ka li-y é lèwvwè nou ka pran tan réfléchi asi-y. Si nou ka fè sa, nou pé sèten kè Sila ki fè-yo maké Bib-la ké béni tout sé éfò-la nou ka fè la é i ké édé-nou « touvé konésans a Bondyé » (Pwov. 2:5).