YOMARA é 2 frè a-y, Marcelo é Hiver, ka viv adan on toupiti vilaj o Gwatémala. Yomara koumansé étidyé Labib èvè sé Témwen a Jéova la é aprésa frè a-y koumansé étidyé osi. Men pwoblèm-la sé kè yo toulétwa té avèg é yo pa té sav li bray. Kifè, frè-la ki té ka fè étid a yo la té ka li sé paragraf-la é sé vèwsé-la ba yo.

Pou yo té pé sa ay an réinyon osi sa té rèd pas sal di Wayòm la ki té pi pré kaz a yo la té ka touvé-y a 40 minit. É yo pa té pé fè tout chimen-lasa tousèl a yo. Alò sé frè-la òwganizé-yo pou menné-yo réinyon. Lèwvwè Yomara é 2 frè a-y koumansé fè sijé réinyon, sé frè é sè la ki adan lasanblé-la édé-yo pou yo té pé sa woutyenn sa yo té ni lentansyon di.

An mé 2019, yo koumansé fè sé réinyon-la adan vilaj a yo. Kèlkètan avan, on frè é madanm a-y té vin rété adan vilaj-lasa é yo toulédé té pyonyé pèwmanan. Yo pa té sav kijan pou li bray oben kijan yo ka maké sa, men yo té vé aprann Yomara é frè a-y li é maké bray. Alò, yo ay adan on bibliyotèk gadé déotwa liv ki té ka palé dè bray é yo gadé pou vwè kijan yo té’é pé aprann Yomara é frè a-y li é ékri bray.

Kèlkè mwa apré, Yomara, Marcelo é Hiver té ka li bray-la byen menm. Grasa sa, yo vin bon bon zanmi èvè Jéova. Jòdijou, yo toulétwa pyonyé pèwmanan é Marcelo asistan. Chak simenn, yo ka pòté bon mannèv pou sèvi Jéova, é lè sé frè é sè la ka vwè tousa yo ka fè, sa ka ba-yo anvi fè menm biten.

Yomara, Marcelo é Hiver ni onlo rèkonésans pou frè é sè a yo davwa yo soutyenn-yo é yo fè sa èvè onlo lanmou. Mi sa Yomara ka èspliké : « Dépi prèmyé fwa-la nou jwenn sé Témwen a Jéova la, yo montré kè yo té ni on lanmou ki sensè é sé lanmou-lasa sé vré krétyen-la ni. » Mi sa Marcelo ka ajouté : « Adan lasanblé-la nou ni dé bon zanmi toubònman é nou ka fè pawti a on fanmi ki toupatou asi latè. Yonn enmé lòt, kifè, nou soudé. » Yomara é frè a-y présé vwè jou-la Jéova ké fè latè touné an paradi (Sòm 37:10, 11 ; Iz. 35:5).