Ès ou byen li sé dènyé niméwo a Tou dè Gad la ? Ében, gadé si ou pé réponn a sé kèsyon-lasa :

Adan Labib, ka i ka montré kè Bondyé ni konpasyon pou nou ?

Lè sé Izraélit-la té èsklav an Éjipt, Bondyé té sav byen jan sitiyasyon-la té rèd pou yo é i té ka pran penn a yo lè yo té ka soufè (Ègz. 3:7 ; Iz. 63:9). Bondyé kréyé-nou pòtré a-y, kifè nou pé ni konpasyon. I ni konpasyon pou nou, menm lè nou ka santi kè nou pa mérité lanmou a-y (wp18.3-F, p. 8-9).

Kijan sa Jézi anségné édé moun lité kont mové lidé yo té ni asi dòt moun ?

Onlo Juif an tan a Jézi té ni mové lidé asi dòt moun. Jézikri montré kijan sa té enpòwtan dè ni imilité. I kondanné lèfètkè moun ka pòté ras a yo anlè. I di disip a-y kè fò yonn konsidéré lòt kon frè (w18.06-F, p. 9-10).

Bondyé pa lésé Moyiz rantré adan péyi-la i té pwomèt la. Ka sa ka aprann-nou ?

Moyiz té ni on bèl lanmityé èvè Jéova (Dét. 34:10). Alòskè sé 40 lanné-la pèp-la té pasé an dézè-la té kay bout, yo pòté Moyiz plent on dézyèm fwa pas té ka manké dlo. Bondyé di Moyiz palé ba gwo wòch-la. Men olyé i té fè sa, Moyiz kongné wòch-la èvè on baton. Jéova té kòlè èvè Moyiz, swa pas i pa té suiv enstriksyon i té ba-y, swa pas Moyiz pa ba Bondyé glwa pou mirak-la i té fè la (Nonb 20:6-12). Sa ka aprann-nou kijan sa enpòwtan dè obéyi Jéova é dè ba-y glwa-la i mérité la. (w18.07-F, p. 13-14).

Kijan nou fasil a tronpé-nou si nou ka bazé-nou asi sa zyé an nou ka vwè ?

Onlo moun ka fè-yo on lidé asi on moun parapòt a twa biten : ras a-y oben la i sòti, kantité lajan i ni, é laj a-y. Bondyé pa ka fè préférans, é sa enpòwtan toubònman pou nou vwè lézòt menmjan ki-y ! (Akt 10:34, 35) (w18.08-F, p. 8-12).

Kijan sé frè-la ki ni èkspéryans la pé pòté on èd ?

On frè ki ni on laj, é ki lésé désèrten rèsponsabilité ké i té ni, toujou pé kontinyé kolaboré avè Jéova é fè onlo biten pou édé lézòt. Pa ègzanp, ni dé krétyen ki mayé èvè dé moun ki pa Témwen. I pé édé sé moun-lasa. I pé édé frè é sè ki arété préché. I pé étidyé Labib èvè moun. Anplisdisa, i pé préché plizyè fason diféran (w18.09, p. 8-11).

Sé krétyen-la ni on bwèt a zouti pou anségné. Ka ki adan-y ?

Tini sa nou ka kriyé kat jw.org é envitasyon. Tini uit trak ki byen fèt é sé jounal la, Tou dè Gad la é Réveillez-vous !. Adan bwèt a zouti-lasa ou ké touvé osi déotwa bwochi, dé liv nou ka itilizé pou étidyé Labib avè moun, é kat vidéo ki byen itil, kon pa ègzanp Étidyé Labib, poukisa ? (w18.10, p. 16).

An Pwovèb 23:23, yo ka di-nou « achté lavérité ». Kijan on krétyen pé fè sa ?

Nou pa ka péyé pon lajan pou ni lavérité. Men sèlman, sa ka mandé onlo tan é onlo éfò pou rivé a ni-y (w18.11, p. 4).

Lè nou ka gadé jan Ozé fè èvè Gomè, madanm-ay, ka sa ka aprann-nou ?

Gomè tronpé mari-ay bon enpé fwa, men magrésa Ozé padonné-y, é i rété mayé avè-y. Si on krétyen ki mayé fè on péché sèksyèl, moun-la ki mayé avè-y la pé désidé padonné-y. Si krétyen inosan la ka rikoumansé kouché èvè madanm a-y oben mari a-y, dapré sa Labib ka di, i pa andwa divòsé ankò (w18.12, p. 13).