1, 2. Pou désidé sa ou ké fè adan lavi, poukwa sa saj dè kouté Kréyatè a-w ? (gadé prèmyé imaj a awtik-la).

SI OU jenn, sèten ou ka risivwè onpakèt konsèy asi sa ou dwètèt fè plita. Pétèt kè pwofésè a-w, moun ki ka édé-w chwazi on métyé, oben dòt moun ankò ka ankourajé-w fè onlo étid. Pétèt osi, yo vlé ou fè on travay ki ké fè-w gangné onlo lajan. Li Jéova, i ka konséyé-w ondòt biten. Sé vré, i vlé ou aprann lékòl pou ou pé sa ni on dèkwa dèmen (Kol. 3:23). Men, i sav osi kè tout désizyon ou ka pran jòdijou ké ni konsékans plita. Sé pousa, adan pawòl a-y, i ka ba-w onlo prensip pou gidé-w adan dènyé jou a mond-lasa é pou édé-w viv on jan ki ka fè-y plézi (Mat. 24:14).

² Fò ou sonjé kè Jéova sav tout biten. I sav sa ki ké fèt dèmen, é kitan lafen ké vin (Iz. 46:10 ; Mat. 24:3, 36). Anplisdisa, i konnèt-vou byen, é i sav ka ki pé rann-vou kontan ou tris. Menmsi konsèy a lézòm pé ka sanm sa yo saj, si yo pa ka vin dè Pawòl a Bondyé, sa pa ni ayen a vwè èvè vré sajès-la (Pwov. 19:21).

3, 4. Lè Adan é Èv chwazi kouté on mové konsèy, ki rézilta sa bay pou yo é pou tout timoun a yo ?

³ A pa jòdla mové konsèy vin lanmòd. Prèmyé-la, sé Satan ki bay li, lè i di Adan é Èv kè yo té ké ni lakontantman si yo té ka désidé yomenm dè sa yo té kay fè dè vi a yo, san tchenn kont dè Bondyé (Jén. 3:1-6). Men an réyalité, sé limenm tousèl i té ka sonjé lè i di-yo sa. Satan té vlé kè Adan é Èv é tout timoun a yo adoré-y li olyé yo adoré Jéova. Men ès i té ja fè on biten ba yo ? Awa ! Tousa yo té ni, sé Jéova ki té ba-yo-y : i mayé-yo, yo té ka viv adan on bèl jaden é anplis yo té ni on kò pawfè ki té ké pèwmèt-yo viv pou touttan.

⁴ Malérèzman, Adan é Èv pa kouté Bondyé, kifè yo koupé tout rèlasyon yo té ni èvè-y. Sa menné onpakèt pwoblèm. Menmjan lè ou koupé on flè, i ka fanné é i ka fin pa mò, sé konsa Adan é Èv koumansé vyéyi é yo fin pa mò. Chwa-la yo fè la vin ni konsékans asi désandan a yo osi (Wom. 5:12). Jòdila ankò, onlo moun ka rèfizé kouté Bondyé, é yo ka fè yenki sa yo vlé, kon Adan é Èv (Éféz. 2:1-3). Ka konpòwtèman-lasa ka pòté ? Moun ki pa ka kouté Jéova pé pa fè pon chwa ki saj (Pwov. 21:30).

5. Ka Jéova té toujou sèten anrapò èvè lézimen, é ès i té ni rézon ?

⁵ Ni on biten Jéova té toujou sèten, sé kè té’é ni moun ki té’é vlé konnèt-li é sèvi-y, é kè pawmi yo, té’é ni jennmoun (Sòm 103:17, 18 ; 110:3). Sé jenn-lasa ni tèlman valè pou-y ! Ès ou sé yonn adan yo ? Si sé wi, sèten Jéova ka ba-w onpakèt « bon biten » ki ka rann-vou kontan (li Sòm 103:5 ; Pwov. 10:22). Nou kay vwè kat adan sé biten-lasa : nouriti èspirityèl la, méyè zanmi ki ni, dé òbjèktif ki vo lapenn, é vré libèté-la.

6. Poukwa ou dwètèt pran swen a èspirityalité a-w, é ka Jéova ka ba-w pou fè sa ?

⁶ Ou pa kon zannimo. Ou bizwen èspirityalité, sa vlé di ou ka santi ou bizwen konnèt Kréyatè a-w é ou bizwen adoré-y (Mat. 4:4). Lè ou ka kouté-y, ou ka vin ni entélijans é sajès, é sa ka ba-w tchè-kontan. Mi sa Jézi di : « Tchè-kontan pou séla ki ka rann-yo kont ka manké-yo èspirityalité » (Mat. 5:3). Jéova ka ban-nou nouriti èspirityèl nou bizwen. Pousa, i ka sèvi èvè Labib é èvè piblikasyon « èsklav fidèl é prévwayan la » ka préparé (Mat. 24:45). Sé piblikasyon-lasa ka ba fwa an nou plis fòs é yo ka rann lanmityé an nou èvè Jéova pli fò. Sé pousa nou pé di kè sé on nouriti èspirityèl. Dayè, nou kontan toubònman paskè nouriti-lasa ni bon vitamin adan-y, é a pa toujou menm biten-la nou ka manjé ! (Iz. 65:13, 14).

7. Ka nouriti èspirityèl-la pé pòté dè bon ba-w ?

⁷ Grasa nouriti èspirityèl-la, ou pé vin on moun saj é grasa-y ou pé réfléchi byen avan ou aji. Sa pé évité-w trapé onpakèt pwoblèm (li Pwovèb 2:10-14). Pa ègzanp, si ou sé on moun ki saj é ki ka rézonné byen, ou ké sav sé manti yo ka manti ba-w lè yo ké di-w kè a pa ponmoun ki fè si nou ka ègzisté, oben ké sé sèlman lè ou ké ni lajan oben byen matéryèl kè vi a-w ké bèl. Si ou sé on moun ki saj é ki ka rézonné byen, sa ké édé-w mété akoté mové lanvi oben vyé labitid ki pé fè-w ditò. Alò fè tousa ou pé pou ni sajès é pou réfléchi byen avan ou aji. Konsa, voumenm a-w ké ni lokazyon  konstaté kè Jéova enmé-w é kè i vlé sa i ni dè méyè pou-w (Sòm 34:8 ; Iz. 48:17, 18).

8. Poukwa sé alè pou vin pli pré a Bondyé, é ka sa ké pòté dè bon ba-w dèmen ?

⁸ Talè, tout biten ki ka fè pati a mond a Satan ké disparèt. A moman-lasa, sèl moun ki ké pé pwotéjé-w é ki ké pé ba-w sa ou bizwen, sé Jéova. Pétèt, fò-w ké jous konté asi-y pou ni manjé ! (Abak. 3:2, 12-19). Asiré pa pétèt, sé aprézan pou-w vin pli pré a-y é pou-w konsolidé konfyans a-w adan-y (2 Pyè 2:9). Si ou fè sa, kèlkanswa sa ki pasé alantou a-w, ou ké santi-w kon David lè i di : « An toujou ka mèt Jéova douvan an mwen. Ayen pé’é soukwé-mwen, pas i adwat an mwen » (Sòm 16:8).

9. a) Dapré Jan 6:44, ka Jéova ka fè ? b) Ki biten èstraòwdinè ki ka pasé lè ou ka kontré ondòt Témwen ?

⁹ Prèmyé fwa ou ka kontré on moun ki pa adan lavérité, ka ou konnèt asi moun-lasa ? Pétèt ou konnèt non a-y, ka i ka sanm, men ou pa oblijé konnèt ayen dòt asi-y. Sa pa ni ayen a vwè èvè lè ou ka kontré on moun ki adan lavérité. Ou sav kè i enmé Jéova. Ou sav kè Jéova vwè sa ki bon adan-y é kè i fè-y vin on sèwvitè a-y (li Jan 6:44). Kèlkèswa koté-la moun-lasa sòti, kèlkèswa jan i lévé, ou ja konnèt onlo biten asi-y, é limenm konnèt onlo biten asi-w osi !

10, 11. Ka tout sèwvitè a Jéova ka fè, é vou, ka sa ka pòté dè bon ba-w ?

¹⁰ Lè ou ka kontré ondòt Témwen, ni on biten zò toulédé ka fè : zò ka palé « lang-la ki pwòp » la, lang a lavérité (Sof. 3:9). Kifè, zò toulédé ka kwè an Bondyé, zòchak ka rèspèkté sé prensip-la ki an Bib-la é zò ni menm èspérans-la pou dèmen. Grasa tout sé biten-lasa, yonn ka anvi fè lòt konfyans é sa ka pèwmèt-zòt konstwi on lanmityé ki solid é ki ka diré.

¹¹ Apapétèt, lè ou ka sèvi Bondyé, ou ka ni méyè zanmi ki tini. Ou pé répété sa ! É ou ni zanmi toupatou asi latè, menmsi zò pò’ò jen jwenn ! Franchman,  ki dòt koté ki adan pèp a Jéova ou ké touvé on bèl kado konsa ?

12. Ki òbjèktif èspirityèl ou pé ni ?

¹² (Li Éklézyas 11:9–12:1.) Ès ou ni déotwa òbjèktif èspirityèl ? Pétèt ou ka éséyé li Labib touléjou, ou ka éséyé préparé-w pli byen pou réponn oben pou fè sijé a-w. Pétèt osi ou ka chèché a vin on zouti-filé lè ou ka sèvi èvè Labib an prédikasyon. Ka ou ka rèsanti lè ou ka konstaté ou fè pwogré oben lè dòt moun ka vin di-w sa ? Sa dwèt ka fè-w plézi, é sa toutafé nòwmal ! Poukwa nou pé di sa ? Pas lè ou ka fè éfò pou atenn òbjèktif èspirityèl a-w, ou ka fè Jéova plézi, kon Jézi fè (Sòm 40:8 ; Pwov. 27:11).

13. Poukwa nou ka pli kontan lè nou ka sèvi Bondyé ki lè nou ka konsantré-nou asi òbjèktif kè mond-lasa tini ?

¹³ Lè ou byen konsantré asi sa ou ka fè pou Jéova, ou ka fè dé biten ki itil, ki ka fè tchè a-w kontan é ki ka ba vi a-w on sans. Lapòt Pòl di : « Tchenbé fò san bigidi. Fò-zò toujou ni onlo biten a fè adan travay a Ségnè-la, paskè zò sav travay-la zò ka fè la anrapò èvè Ségnè-la pa initil » (1 Kor. 15:58). Pawkont, lè ou ka gadé moun ki ka konsantré-yo asi òbjèktif kè mond-lasa tini, kon gangné onpakèt lajan, vin on gran jan dè moun, ou ka konstaté sé moun-lasa pa vréman kontan. Menmsi yo rivé ni sa yo té vlé, byensouvan yo ka santi konsi ka manké-yo on biten (Lik 9:25). Sé sa ègzanp a wa Salomon ka aprann-nou (Wom. 15:4).

14. Ka ou pé aprann dè sa ki rivé Salomon ?

¹⁴ Salomon, ki té on boug rich é ki té puisan kon pa tini, désidé fè on èkspéryans. Salomon di an tchè a-y : « Ban’an tèsté plézi ki tini é ban’an vwè ki bon biten sa ka pòté » (Ékl. 2:1-10). I konstwi plizyè kaz, i planté jaden ki té plen flè, i fè tousa i té vlé. Men ès tousa i fè la rann vi a-y pi bèl ? Ès i té satisfè ? Mi sa limenm a-y di : « Lè an pran tan réfléchi asi tout travay-la an fè la èvè dé men an mwen [...], an vwè tousa pa ka sèvi ayen ; [...] pa té ni ayen ki té ni valè adan sa » (Ékl. 2:11). Ou ka rann-vou kont ! Èskè vou, ou ké tchenn kont dè sa ?

15. Poukwa lafwa sé on biten ki enpòwtan, é ka i ka pòté dè bon ba-w ?

¹⁵ Ni dé moun, fò-yo fè bétiz é fò-yo pléré pou yo pé sa konprann. Men a pa sa Jéova vlé pou-w. I vlé kè ou kouté-y é kè ou fè sa i ka mandé. Fò-w ni fwa pou-w pé fè sa. Fwa a-w ké pousé-w a fè sèwten chwa kè ou pé’é jen ni a règrété. Jéova pé’é jen oubliyé « lanmou-la [ou] montré la pou non a-y » (Ébr. 6:10). Alò, fè tousa ou pé pou rivé ni on fwa ki solid. Konsa, ou ké fè dé chwa ki bon é ou ké konstaté kè Papa-w ki an syèl-la vlé sa ki ni dè méyè pou-w (li Sòm 32:8).

16. Poukwa fò-nou ba libèté an nou onlo valè é sèvi èvè-y èvè sajès ?

¹⁶ Lapòt Pòl maké : « La lèspri a Jéova yé, sé la libèté-la yé » (2 Kor. 3:17). Libèté, sé on biten ki ni onlo valè pou Jéova. I enmé sa é i fè-nou on jan pou nou enmé libèté osi. Anmenmditan, i vlé nou sèvi èvè libèté an nou èvè sajès, pas i sav sa ké pwotéjé-nou. Pétèt ou ni déotwa kanmarad-lékòl ki ka gadé dé biten ki ni sèks adan, ni sa ki ni vis, ki ka fè dé péché sèksyèl, ni sa ki ka riské vi a yo adan dé ispò ki danjéré, ni  sa ki ka pran dwòg oben ki ka bwè a dépasé. Pétèt kè sa ka ba-yo onlo sansasyon oben sa ka ba-yo on ti moman-plézi, men pli souvan ki rarman sa ka pòté on bon enpé soufrans. Yo pé trapé onlo maladi, pétèt kè onlè yo pé ké rivé arété fè sa yo ka fè la, oben yo pé rivé a pèd vi a yo adan sa (Gal. 6:7, 8). Pétèt yo ka konpranndèdi yo lib, men an réyalité, yo pa lib ditou (Tit 3:3).

17, 18. a) Poukwa nou pé di kè lè nou ka obéyi Bondyé, sa ka libéré-nou ? b) An ki sans nou pé di kè lè Bondyé kréyé-yo, Adan é Èv té lontan pi lib ki nou jòdla ?

¹⁷ Lè ou ka gadé, konmen moun alantou a-w ki ja tonbé malad pas yo té ka obéyi Jéova ? Sé on vérité, lè ou ka kouté Bondyé, sa bon pou santé a-w é sa ka libéré-w dè onlo biten (Sòm 19:7-11). Anplisdisa, lè ou ka sèvi èvè libèté a-w èvè sajès, sétadi lè ou ka chwazi obéyi lwa a Bondyé é suiv prensip a-y ki pawfè, ou ka fè Jéova é paran a-w vwè kè yo pé fè-w konfyans é yo ké ba-w plis libèté. Jéova ka pwomèt kè talè, i ké ba tout sèwvitè fidèl a-y on libèté ki pawfè. Labib ka kriyé libèté-lasa « libèté[-la] ki plen glwa a timoun a Bondyé » (Wom. 8:21).

¹⁸ Sé on libèté konsa Adan é Èv té ni. Adan Jadendédèn-la, Bondyé défann-yo fè onsèl biten : fò pa yo té manjé adan fwi a on pyébwa an pawtikilyé (Jén. 2:9, 17). Sèlon vou, ès sa i té ka mandé-yo la té two rèd oben ès sa té fòsan ? Lè ou ka sonjé kantité lwa lòm envanté é jan yo fòsé moun suiv sé lwa-lasa, ou ka tou konprann kè Jéova pa té ka mandé-yo twòp.

19. Poukwa nou pé di kè jan Jéova é Jézi ka anségné-nou la, sé pou édé-nou vin lib ?

¹⁹ Jéova ka aji èvè nou èvè onlo sajès. Olyé i ban-nou on séri lwa, i ka aprann-nou viv annakò èvè prensip a-y é a hay sa ki pa bon (Wom. 12:9). Adan Sèwmon-la i fè anlè montangn-la, Gason a-y ka édé-nou konprann ka ki ka pousé on moun a mal aji konsa (Mat. 5:27, 28). É antankè wa a Wayòm a Bondyé, i ké kontinyé édé-nou a vwè lèbyen é lèmal menmjan i ka vwè-yo (Ébr. 1:9). Non sèlman sa, men i ké édé-nou a ni on kò é on lentélijans ki pawfè. Ès ou ka imajiné-w : nou pé ké anvi fè sa ki mové, é nou pé ké soufè akòz dè péché-la. Wi, on jou, nou ké ni « libèté[-la] ki plen glwa » Jéova pwomèt-nou la.

20. a) Kijan Jéova ka sèvi èvè libèté a-y ? b) Kijan ou pé imité ègzanp a-y ?

²⁰ Adan mond nouvo la, libèté an nou ké ni on limit. Kijansa ? Fò-nou toujou ké lésé lanmou an nou pou Bondyé é lanmou an nou pou pwochen an nou gidé-nou. Lè nou ka lésé lanmou-la gidé-nou, nou ka fè kon Jéova. Magré i ni on libèté ki total, i ka chwazi dè lésé lanmou-la gidé-y adan tousa i ka fè, é jous adan jan i ka aji èvè nou (1 Jan 4:7, 8). Ou ka tou konprann kè si nou vlé ni on vré libèté, fò-nou imité-y.

21. a) Ka David té ka rèsanti pou Jéova ? b) Ka nou ké vwè adan pwochen awtik-la ?

²¹ Ès ou kontan tout sé bon biten-la Jéova ka ba-w la ? Sé grasa-y si ou ni nouriti èspirityèl la, méyè zanmi ki tini, òbjèktif ki vo lapenn, é si on jou ou ké pé ni on libèté ki pawfè (Sòm 103:5). Ou dwèt ka santi-w kon David. Adan Sòm 16:11, i di Jéova : « Ou ka fè-mwen konnèt chimen a lavi. Lè ou la, ni lajwa annabondans. A dwat a-w, ni lakontantman pou touttan. » Adan pwochen awtik-la, nou ké dékouvè ki dòt bèl vérité nou ka touvé adan Sòm 16 la. Yo ké édé-nou a vwè kijan nou pé ni méyè vi-la ki tini la.