1, 2. Kijan ègzanp a Tony ka montré-nou kè on moun pé fè onlo chanjman an vi a-y ?

 TONY lévé san papa. Konm i pa té gè enmé lékòl, lè i té o lisé, i té vé arété. I té ka pasé tout wikenn a-y sinéma oben avè zanmi a-y. A pa on boug ki té brital é i pa té ka pran dwòg, men sèl biten, i pa té ni pon òbjèktif adan lavi. Anplisdisa, i pa té sèten kè Bondyé ka ègzisté. On jou, i kontré dé Témwen a Jéova é i di-yo kè i pa’a gè kwè Bondyé ka ègzisté. Yo ba-y dé bwochi : Cinq questions à se poser sur l’origine de la vie é La vie a-t-elle été créée ?.

² Lè sé Témwen-la viré vwè Tony, a pa té menm boug-la ankò. Atitid a-y chanjé bout-pou-bout. Tèlman i té li sé bwochi-la é i té wouli-yo, sé paj-la té chifonné é yo té byen kòné menm. Tony di-yo : « Pé pa pa ni on Bondyé ». I koumansé étidyé Labib avè yo é, piti-a-piti, i vin ka vwè lavi ondòt jan. Avan sa, kò a-y pa té gè bon lékòl, men i vin touvé-y pawmi sa ki té pi fò ! Menm rèsponsab a lékòl-la rété sézi. I di-y konsa : « Nòt a-w é konpòwtèman a-w lontan pli bon ki avan. Ès sé pas ou ka frékanté sé Témwen a Jéova la ? » Tony réponn kè sé sa menm é i palé-y dè sa i té ka aprann an Bib-la. Plita, i pran diplòm a-y é jòdijou i pyonyé pèwmanan é i sèwvitè adan on lasanblé lokal. Anplisdisa, i kontan toubònman pas, alèla, i ni on Papa plen lanmou, Jéova ! (Sòm 68:5).

3. Ki konsèy Jéova ka ba sé jenn-la ?

³ Sa ki rivé Tony ka fè-nou sonjé kè Jéova ka sousyé-y dè zòt toubònman, jenn, ki la ansanm èvè nou. I vlé zò réyisi vi a zòt. Sé pousa i ka ba zòchak konsèy-lasa : « Sonjé Gran Kréyatè a-w toupannan ou jenn » (Ékl. 12:1). A épòk-la nou ka viv la, sa pa toujou fasil. Men sa pa vlé di kè sa pa posib. Si Jéova ka édé-w, ou pé réyisi vi a-w dépi aprézan men osi lè ou ké pli gran. Pou nou konprann sa byen, an-nou gadé sa ki édé sé Izraélit-la pran péyi-la Jéova té pwomèt-yo la. Nou ké vwè osi sa ki ba David fòs pou rivé about a on jéan yo té ka kriyé Golyat.

4, 5. Jan sa pasé lè sé Izraélit-la pran Kanaan é lè David tchouyé Golyat, ka sa ka aprann-nou ? (gadé sé imaj-la ki antèt a awtik-la).

⁴ Lè sé Izraélit-la té toupré péyi-la Jéova té pwomèt-yo la, Jéova pa mandé-yo filé zam a yo é i pa di-yo aprann fè lagè nonplis (Dét. 28:1, 2). Olyé dè sa, i di-yo suiv komandman a-y é fè-y konfyans (Joz. 1:7-9). Pétèt kè pou on nonm, konsèy-lasa té ka sanm sa i pa ni pon sans ! Men sété méyè biten a fè a moman-lasa. Dayè, Jéova édé pèp a-y gangné konba si konba kont sé kananéyen-la (Joz. 24:11-13). Fò ou ni fwa pou fè sa Bondyé ka mandé, men lè ou ka aji èvè fwa, ou toujou ka réyisi. Tan ka pasé, men vérité-lasa pa ka chanjé. Jous aprézan, i valab toujou !

⁵ Golyat sété on vayan sòlda. I té ka fè prèskè twa mèt hotè é pou zàm, boug-la té ni zàm (1 Sam. 17:4-7). Pawkont, li David, i té ni yenki dé biten : on sòt dè jèspòm é lafwa an Jéova. Sèten on moun ki pa ni lafwa té’é di : « Pa lapenn David ay goumé ! Lontan i ja pèd konba ! » Men an réyalité, sé Golyat ki té ja pèd konba ! (1 Sam. 17:48-51).

6. Ka nou ké vwè adan awtik-lasa ?

⁶ Adan awtik-la ki avan tala, nou palé dè kat biten ki pé édé-nou réyisi adan lavi é ki pé fè tchè an nou kontan : pran swen a lanmityé an nou èvè Bondyé, chwazi zanmi an nou pawmi sa ki enmé Jéova, kouri dèyè òbjèktif ki vo lapenn, é ba libèté-la Bondyé ban-nou la onlo valè. Adan awtik-lasa, nou ké palé dè dòt bénédisyon ankò nou pé pwokiré-nou si nou ka fè sé kat biten-lasa. Pou sa, an-nou ègzaminé déotwa prensip nou ka touvé adan Sòm 16 la.

7. a) Ka ki on moun èspirityèl ? b) An ki sans Jéova sété « pa » a David, é kijan sa té ka aji asi-y ?

⁷ On moun ki èspirityèl ni fwa an Bondyé é i ka fè éfò pou i rézonné menmjan ki Bondyé. Moun-lasa ka lésé Bondyé gidé-y é i byen désidé a kouté sa Bondyé ka di-y (1 Kor. 2:12, 13). David, sété on nonm èspirityèl. Mi sa i di adan on chanté : « Jéova, sé pa an mwen, pa-la yo ban-mwen la, é koup an mwen » (Sòm 16:5). Jéova sété « pa » a David, paskè li é Jéova yo té bon bon zanmi menm é sé owa Jéova David té ka kouri kaché (Sòm 16:1). Kijan sa té ka aji asi David ? I maké : « Tchè an mwen kontan. » Pa ni ayen ki té ka rann-li pli kontan ki lanmityé a-y èvè Jéova ! (li Sòm 16:9, 11).

8. Ka ou pé fè pou réyisi vi a-w ?

⁸ Moun ki ka pasé tout tan a yo ka kouri dèyè lajan é dèyè plézi pé pa rèsanti jwa-la David té ni la (1 Tim. 6:9, 10). On frè Kanada di : « Lè tchè a-w vréman kontan, a pa parapòt a sa lavi ka pòté ba-w, men sé parapòt a sa ou ka ba Lotè a tout bèl don, Jéova » (Jak 1:17). Si ou ka konsolidé fwa a-w an Jéova é si ou ka sèvi-y, ou ké kontan vi a-w é i ké ni plis sans.  Alò, ka ou pé fè pou konsolidé fwa a-w ? Pran on tan pou vou é Jéova. Pousa, li Pawòl a-y, pran tan gadé bèl biten i kréyé é réfléchi si bèl kalité i ni kon lanmou-la i ni pou-w la (Wom. 1:20 ; 5:8).

9. Ka ou pé fè pou lésé Pawòl a Bondyé fè on travay asi-w ?

⁹ Pawfwa, Bondyé ka montré-nou kè i enmé-nou lè i ka ban-nou on disiplin, kon on papa plen lanmou ka fè èvè timoun a-y. David té ka ba disiplin-lasa onlo valè. I di : « An ké ba Jéova louwanj, pas i ban-mwen konsèy. Menm pannan lannuit, santiman an mwen ki séré pli fon andidan an mwen ka korijé-mwen » (Sòm 16:7). I té ka pran tan réfléchi si sa Bondyé ka pansé pou i té aprann rézonné kon Jéova. I té ka lésé sa Bondyé ka pansé fè on travay asi-y pou i té vin on pi bon moun. Si ou ka fè menm biten-la, ou ké pi enmé Bondyé é ou ké pi anvi fè-y plézi. Sé konsa ou ké vin on krétyen ki mati. On sè non a-y sé Christine ka di kè lèwvwè i ka fè rèchèch é kè i ka réfléchi si sa i ka li, i ni lenprésyon kè sé pou-y dirèktèman Jéova fè-yo maké sa i ka li la.

10. Lè ou sé on moun èspirityèl kijan sa ka édé-w ?

¹⁰ Lè ou sé on moun èspirityèl, ou ka vwè mond-lasa é sa i ké divini menmjan ki Jéova. Jéova ka ba-w on konésans é on entélijans èstraòwdinè pou-w byen konprann sa. Poukwa ? Pas i vlé ou konprann ka ki vréman enpòwtan adan lavi. I vlé ou pran bon désizyon é i vé pa ou enkyèt parapòt a sa dèmen ké pòté ! (li Izayi 26:3). Joshua, on frè ki o Zétazini ka di kè lè ou ka rété toupré a Jéova, ou ka rivé sav ka ki vréman enpòwtan.

11. Kijan David té ka chwazi zanmi a-y ?

¹¹ (Li Sòm 16:3.) David té sav kijan pou i té chwazi zanmi a-y. I té ka chwazi-yo pawmi moun ki té enmé Jéova, é lè i té èvè yo, sa té ka mété « on gran jwa » an tchè a-y. I té ka di yo sé dé « moun ki sen » pas yo té ka fè éfò pou rèspèkté prensip a Bondyé. Adan ondòt Sòm, ni on moun ki di apépré menm biten-la : « An sé zanmi a toutmoun ki ka krenn-vou é ki ka suiv lòd a-w » (Sòm 119:63). Adan awtik-la ki avan tala nou vwè kè ou pé ni onpakèt zanmi pawmi moun ki enmé Jéova é ki ka fè sa i ka di. É kon ou sav, yo pa oblijé ni menm laj ki-w.

12. Poukwa David é Jonatan té bon zanmi ?

¹² Zanmi a David, a pa yenki moun ki té ni menm laj ki-y. Ès ou ka sonjé non a on bon zanmi a-y ? Pétèt, ou ka sonjé Jonatan. Adan Labib, pa gè ni pli bèl lanmityé ki ta David é Jonatan. Men ès ou té sav kè Jonatan té ni apépré 30 lanné anplis ki David ? Kijanfè yo té bon zanmi konsa ? Sé pas yo toulédé té ni fwa an Bondyé. Anplisdisa, yonn té ka rèspèkté lòt onlo é yonn té ka aprésyé kouraj-la lòt-la té ni la, lè i té ka goumé kont lènmi a Bondyé (1 Sam. 13:3 ; 14:13 ; 17:48-50 ; 18:1).

13. Ka pou-w fè pou-w ni plis zanmi ? Bay on ègzanp.

¹³ Kon David é Jonatan, nou ka rèsanti « on gran jwa » lè nou zanmi èvè moun ki enmé Jéova é ki ni fwa adan-y. Kiera, ki ka sèvi Jéova dépi plizyè lanné, ka di : « An vin zanmi èvè moun toupatou si latè, yochak ni kilti a yo é nasyonalité a yo. » Si ou fè menm biten, ou ké konstaté kè grasa Labib é lèspri sen, sèwvitè a Bondyé sé on fanmi entèwnasyonal.

14. a) Ka ki pé édé-w chwazi dé òbjèktif ki vo lapenn ? b) Ka sèwten jenn ka di anrapò èvè òbjèktif a yo ?

¹⁴ (Li Sòm 16:8.) Pou David, pli enpòwtan-la sété sèvi Bondyé. Vou osi  ou ké pé réyisi vi a-w si, lè ou ka chwazi òbjèktif a-w, ou toujou ka sonjé sa Jéova ka atann dè-w. On frè, non a-y sé Steven di : « Lè an ka fè éfò pou atenn on òbjèktif é kè an ka réyisi, é kè aprésa an ka vwè jan an pwogrésé, an ka kontan toubònman. » On frè alman ki ka sèvi adan ondòt péyi konnyéla ka di : « An pa té’é vlé pou lèwvwè an pran on laj, é kè an viré gadé sa an fè an vi an mwen, an ka konstaté kè an viv yenki pou mwen. » Sé konsa ou ka vwè sa osi ? Alò, sèvi èvè tout kapasité a-w pou ba Jéova glwa é pou édé lézòt (Gal. 6:10). Chwazi dé òbjèktif ki èspirityèl é mandé Jéova édé-w pou atenn-yo. On biten ou pé sèten, sé kè Jéova ké réponn a priyè a-w ! (1 Jan 3:22 ; 5:14, 15).

15. Ki òbjèktif ou pé ni ? (gadé karé-la «  Déotwa òbjèktif an pé ni »).

¹⁵ Ki òbjèktif ou pé ni ? Sépé bay on komantè èvè mo a-w ki ta-w, vin pyonyé oben sèvi adan on Bétèl. Ou pé aprann palé ondòt lang pou préché ba plis moun. Barak, on jenn ki ka sèvi aplentan, ka di : « Lè ou ka lévé chak maten é kè ou sav kè ou kay ba Jéova tout fòs a-w, ou ka rèsanti on biten kè pondòt aktivité pé’é pé pwokiré-w. »

16. Ki valè David té ka ba lwa a Jéova é prensip a-y, é poukwa ?

¹⁶ (Li Sòm 16:2, 4.) Kon nou vwè adan awtik-la ki avan tala, lè nou ka fè sa Bondyé ka mandé-nou é lè nou ka suiv prensip a-y, nou ka vin lib. Sé vré, piskè nou ka aprann enmé sa ki byen é hay sa ki pa bon (Amòs 5:15). David ékri kè Jéova sé « sous a tout bon biten kè [i] ni ». Adan vèwsé-lasa, lè David ka palé dè « tout bon biten kè [Jéova ka ba-y] », sa lyanné èvè bonté. On moun ki ni bonté, sé on moun ki ka mèt sa ho lè i ka fè sa ki byen. Li Jéova, kèlkèswa sa i ka fè, i ka fè-y èvè bonté, é tout bon biten nou té’é pé ni, sé-y ki ka ban-nou-y. David té ka fè onlo éfò pou imité Bondyé é pou enmé sa i enmé. Men i té ka fè éfò osi pou i té hay sa ki pa bon. Pa ègzanp, i té hay sa yo ka kriyé idolatri, kivédi lè ou ka adoré on moun oben on biten olyé ou adoré Jéova. Idolatri ka fè lézòm tonbé ba menm  é i ka pran glwa-la Bondyé mérité la pou ba ondòt li (Iz. 2:8, 9 ; Rév. 4:11).

17, 18. a) Dapré sa David di, lè on moun pa ka adoré Bondyé kon i ka mandé, ola sa pé menné-y ? b) Poukwa jòdijou, sèwten moun ka ni « pwoblèm si pwoblèm » ?

¹⁷ Byensouvan, an tan a Labib, adan fo rèlijyon-la, ou té ka touvé péché sèksyèl (Ozé 4:13, 14). Onlo moun té enmé sé rèlijyon-lasa. Men ès sa té ka rann vi a yo pli bèl ? Byen okontrè ! David ékri : « Moun ki ka suiv dòt dyé ka ni pwoblèm si pwoblèm. » Anplisdisa, ni sa adan yo ki té ka fè pwòp timoun a yo soufè toubònman lè yo té ka sakrifyé-yo ba sé fo dyé la (Iz. 57:5). A pa ti hay Jéova té hay sé méchansté-lasa ! (Jér. 7:31). Si ou té ka viv a épòk-lasa, sèten ou té’é byen kontan si fanmi a-w sété dé moun ki té ka fè Jéova konfyans é ki té ka kouté-y !

¹⁸ A épòk an nou osi, sé fo rèlijyon-la ka toléré lè moun ka fè péché sèksyèl, menm lè yo ka kouché èvè moun ki menm sèks ki yo. Alò, onlo moun ni lenprésyon kè yo lib, men sa toujou ka bay menm rézilta-la (1 Kor. 6:18, 19). Kon ou dwèt ja konstaté, sé moun-la ka ni « pwoblèm si pwoblèm ». Sé pousa, léjenn, fò-zòt kouté Papa-zòt ki an syèl-la ! Zò pé sèten kè lè zò ka kouté-y sé pou byen a zòt. Pran on tan pou réfléchi asi tout malè ki pé rivé on moun si i ka fè péché sèksyèl. É zò ké konprann kè ti plézi-la sa pé pwokiré-zòt la, sa pa vo lapenn (Gal. 6:8). Talè-la nou palé dè Joshua. I di : « Ni mwayen nou sèvi èvè libèté an nou kon nou vlé, men si nou ka mal sèvi èvè-y, sa pé ké pwokiré-nou pon satisfaksyon. »

19, 20. Si on jenn ka fè Jéova konfyans é i ka fè sa i ka di-y, ki bénédisyon i ké risivwè ?

¹⁹ Jézi di disip a-y : « Si zò ka rété kolé èvè sa an ka di, zò sé disip an mwen menm, é zò ké konnèt lavérité, é lavérité ké libéré-zòt » (Jan 8:31, 32). Grasa Jéova, konnyéla nou konnèt lavérité é nou sòti anba jouk a fo rèlijyon-la, é anba jouk a tout kalté sipèwstisyon. Men a pa yenki sa. Plita, nou ké ni « libèté ki plen glwa a timoun a Bondyé » (Wom. 8:21). É dépi aprézan, ou ja pé bénéfisyé dè on mòso adan libèté-lasa. Kijan ? Tousa ou vwè Jézi anségné, tchenn kont dè-y adan vi a-w. Konsa ou ké vin « konnèt lavérité ». É a pa yenki pas ou ké ka étidyé-y men osi pas ou ké ka mété-y an pratik.

²⁰ Léjenn, ba libèté-la Bondyé ka ba-zòt la onlo valè menm. Sèvi èvè-y byen. Konsa, dépi konnyéla zò ké pé pran dé bon désizyon ki ké édé-zòt ni on bèl vi toubònman plita. Mi sa on jenn frè ka di : « Si toupannan ou jenn ou ka sèvi èvè libèté a-w byen konm i fo, sa ké édé-w lè ou ké ni dé désizyon enpòwtan a pran, kon chwazi on travay, chwazi dè mayé oswa dè rété sélibatè pannan on tan. »

21. Ka ou pé fè pou rété si chimen-la ki ka menné a « vré vi-la » ?

²¹ Adan vyé mond-lasa, menmsi ou ka sanm sa ou « réyisi adan lavi », fò sa fin on jou. Pon nonm pa sav ka dèmen ké pòté (Jak 4:13, 14). Méyè biten ki ni a fè sé rété si chimen a « vré vi-la », kivédi lavi étèwnèl adan mond nouvo la Bondyé ka pwomèt nou la (1 Tim. 6:19). Sé vré, Jéova pa ka oblijé ponmoun sèvi-y. Sé a chakmoun dè désidé sa i ké fè. Alò, fè ansòt pou Jéova vin « pa » a-w. É pousa, pa jen arété rapwoché-w dè-y, é « tout [sé] bon biten[-la] » i ka ba-w la, ba-yo on gran valè (Sòm 103:5). Ou pé sèten kè i pé ba-w « lajwa [...] annabondans » é kè i pé ba-w « tchè-kontan pou touttan » ! (Sòm 16:11).