1, 2. Ka Ébré 13:4 ka ankourajé-nou a fè ?

NOUTOUT vlé onoré Jéova, pa vré ? I mérité nou pòté-y anlè, é si nou ka fè sa, i ka pwomèt-nou kè i ké onoré-nou anrètou (1 Sam. 2:30 ; Pwov. 3:9 ; Rév. 4:11). I ka mandé-nou onoré lézòt osi, kon pa ègzanp moun ki ka rèprézanté Léta (Wom. 12:10 ; 13:7). Men a pa moun tousèl pou nou onoré. Ni on biten an pawtikilyé fò-nou ba onlo valè. Biten-lasa, sé mayé.

² Lapòt Pòl maké : « Fò toutmoun ba mayé onlo valè, é fò pa ni pon malpwòpté asi kouch a mayé la » (Ébr. 13:4). Pòl pa enn di sa konsa. Sa i té vlé di pa la, sé kè sa té enpòwtan toubònman kè chak sé krétyen-la ba mayé onlo valè. Fò yochak té konswa kè mayé, sé on trézò. Ès sé konsa voumenm ka konswa mayé ? É si ou mayé, ès sé konsa ou ka konsidéré pwòp mayé a-w ?

3. Ki biten enpòwtan Jézi di anrapò èvè mayé ? (gadé prèmyé imaj a awtik-la).

³ Si pou-w, mayé sé on biten ki ni onlo valè, ou ka imité Jézi. Lè sé farizyen-la pozé Jézi kèsyon asi divòs, i réponn-yo sa Bondyé té di lè i sélébré prèmyé mayé-la : « On nonm  ké kité manman-y é papa-y, é yo toulédé ké fè onsèl chè ». Aprésa, Jézi di : « Fò pa lòm séparé sa Bondyé mété anba menm jouk-la » (li Mawk 10:2-12 ; Jén. 2:24).

4. Ka Jéova té prévwa odépa lè i mèt mayé an plas ?

⁴ Konsa, Jézi fè moun sonjé kè sé Bondyé ki mèt mayé an plas é kè lè dé moun ka mayé, sé pou touttan. Bondyé pa jen di Adan é Èv kè yo té’é pé divòsé on jou. Byen okontrè, sa i té prévwa pou yo, sété kè « yo toulédé » rété mayé ansanm pou touttan.

5. Ka i ka rivé lè dé moun mayé é kè yonn mò ?

⁵ Men lè Adan péché, ni onlo biten ki chanjé. Lézòm koumansé ka mò, é mayé pran plon adan sa. Lapòt Pòl èspliké sé krétyen-la kè lè dé moun mayé, si yonn mò, sé moun-la pa mayé ankò, é kè sila ki rété vivan la andwa woumayé (Wom. 7:1-3).

6. Kijan Lwa a Moyiz ka édé-nou konprann kè pou Jéova, mayé ni on gran gran valè ?

⁶ Adan Lwa-la Bondyé té ba Izrayèl la, ou ka touvé prensip asi mayé. Pa ègzanp, on Izraélit té andwa ni plizyè madanm. Koutim-lasa té ja ka ègzisté avan menm Bondyé té ba pèp a-y Lwa-la. Men Lwa-la té ka pwotéjé sé madanm-la é sé timoun-la, pou sé misyé-la pa té pwofité asi yo. Sé konsa, si on Izraélit té ka mayé èvè on èsklav é kè aprésa i té ka mayé èvè ondòt madanm, fò i té kontinyé pran swen a prèmyé madanm a-y kon i té ja ka fè avan. Bondyé té ka mandé kè i kontinyé pwotéjé-y é kè i kontinyé okipé dè-y (Ègz. 21:9, 10). Sé vré nou pa anba Lwa a Moyiz ankò, men jousalè lwa-lasa ka fè-nou konprann kè pou Jéova, mayé ni on gran gran valè. Sa pa ka ba-w anvi ba mayé on gran valè osi ?

7, 8. a) Ka Lalwa té ka di anrapò èvè divòs ? b) Lè dé moun ka divòsé, kijan Jéova ka vwè sa ?

⁷ Ka Lalwa té ka di asi divòs ? Jéova pa jen té vlé kè on misyé é madanm a-y divòsé. Men dapré Lalwa, on Izraélit té andwa divòsé èvè madanm a-y si i « té ka dékouvè on biten ki pa té korèk anrapò èvè-y » (li Détéwonòm 24:1). Lè Lalwa té ka palé dè « on biten ki pa té korèk », i pa té ka di ka sa té yé ègzaktèman. Sé dwèt té on biten grav, on honté, a pa té on ti biten an kouyonnad (Dét. 23:14). Malérèzman, an tan a Jézi, onlo juif té ka mandé divòs « pou nenpòt ki rézon » (Mat. 19:3). Asirésèten, nou vé pa ni menm mantalité ki yo.

⁸ An tan a Pwofèt Malaki, sé misyé-la té ni labitid trayi madanm a yo. Yo té ka divòsé, pétèt pou pé sa mayé èvè ondòt madanm ki té pli jenn, é ki pa menm té ka sèvi Jéova. Jéova fè moun sav on mannyè ki klè kijan i té ka vwè sa, lè i di : « An hay divòs » (Mal. 2:14-16). Sa té annakò èvè sa Bondyé té di lè i sélébré prèmyé mayé-la : « On nonm ké rété èvè madanm a-y, é yo toulédé ké fè onsèl chè » (Jén. 2:24). Jézi apiyé sa Papa-y ka pansé dè mayé, lè i di : « Sa Bondyé mété anba menm jouk-la, fò pa pon nonm vin séparé-y » (Mat. 19:6).

9. Ka sa Jézi di an Mawk 10:11, 12 vlé di ?

⁹ On moun pé ka mandé-y : « Èskè ni on rézon valab ki ka pèwmèt on krétyen divòsé é woumayé ? » Ében, mi sa Jézi di : « Kèlkanswa moun-la ki divòsé èvè madanm a-y é ki ka mayé èvè ondòt, sé on adiltè i fè kont madanm a-y. É si janmen on madanm, ki divòsé èvè mari a-y,  ka mayé èvè ondòt nonm, sé on adiltè i ka fè » (Mawk 10:11, 12 ; Lik 16:18). Nou ka tou konprann kè Jézi té ka ba mayé onlo valè, é i té vlé kè lézòt fè menm biten-la. Si on nonm té ka divòsé èvè madanm a-y é té ka wouviré mayé, alòskè madanm a-y té fidèl, sé on adiltè i té’é fè kont li. Sété menm biten osi, si sété on madanm ki té ka fè sa kont mari a-y. É sé vré. A pa pas dé moun ka divòsé kè sa vlé di yo pa mayé ankò. Pou Bondyé, yo sé « onsèl chè » toujou. Anplisdisa, Jézi èspliké kè si on misyé té ka divòsé èvè madanm a-y san rézon valab, sa té pé pousé madanm-la fè on adiltè. Kijansa ? An tan-lasa, on madanm divòsé té pé santi kè i oblijé woumayé pou i rivé a ni on dèkwa. Men on mayé konsa, sé té ké on adiltè.

10. Pou ki rézon on krétyen pé divòsé é wouviré mayé ?

¹⁰ Men atansyon. Jézi bay on rézon ki ka pèwmèt on moun divòsé. I di : « An ka di-zòt kè kèlkanswa moun-la ka divòsé èvè madanm a-y, si a pa pou on péché sèksyèl [an grèk : pornéïa], é i ka mayé èvè ondòt, sé on adiltè i ka fè » (Mat. 19:9). I woudi sa ankò adan Sèwmon-la i fè anlè montangn-la (Mat. 5:31, 32). Adan toulédé ka-la, Jézi palé dè « péché sèksyèl ». Lè i sèvi èvè èsprésyon-lasa, i té ka palé dè tout on séri péché ki anrapò èvè sèks, kon lè moun ka fè adiltè, lè moun ka vann kò a yo, lè moun ki pa mayé ka kouché ansanm, lè dé moun ki menm sèks ka kouché ansanm, oben lè moun ka kouché èvè zannimo. Si, pa ègzanp, on nonm-mayé ka fè on péché sèksyèl, madanm a-y andwa désidé si i ka divòsé oben si i pa’a divòsé. Si i désidé divòsé, pou Jéova, sé moun-lasa pa mayé ankò.

11. Poukisa on krétyen pé chwazi dè pa divosè, alòskè moun-la i mayé èvè-y la fè on péché sèksyèl ?

¹¹ Si ou byen gadé, Jézi pa di kè on krétyen oblijé divòsé, sianka moun-la i mayé èvè-y la fè on péché sèksyèl. An-nou pran ka a on sè mari a-y  tronpé-y. Kanmenmsa, i pé désidé pa divòsé èvè-y. Pétèt i enmé-y toujou. Pétèt osi i anvi padonné-y é i paré a fè éfò pou mayé a yo maché pli byen. Fò ou admèt kè si i divòsé, é kè i pa woumayé, i pé rivé a jwenn difikilté. Pa ègzanp, ès i ké rivé ni on dèkwa ? É si i bizwen afèksyon a on mari ? Ès i pé’é rivé a santi-y tousèl ? É sé timoun-la, kijan yo ké viv sa ? Èskè si i divòsé, sa pé’é pli rèd pou-y dè lévé-yo adan lavérité ? (1 Kor. 7:14). Asirésèten, moun-la ki inosan adan tousa é ki divòsé pé rivé a jwenn bon enpé pwoblèm.

12, 13. a) Ka ki pasé antrè Ozé é madanm a-y ? b) Poukwa Ozé viré èvè Gomè, é ka sa ka aprann-nou ?

¹² Sa ki pasé adan vi a pwofèt Ozé ka édé-nou konprann pli byen ankò kijan Jéova ka vwè mayé. Bondyé di Ozé mayé èvè on dénonmé Gomè, ki té ké divini on madanm ka vann kò a-y é ki té ké ni timoun ki ka vin dè mové konduit a-y. Gomè « tonbé ansent é i ba Ozé on tigason » (Ozé 1:2, 3). Aprésa, Gomè fè on tifi é on tigason, men kou-lasa, i ka sanmsa sé té timoun a ondòt nonm. Menmsi Gomè tronpé mari a-y plizyè fwa, Ozé pa jen divòsé èvè-y. Anfinaldikont, i kité Ozé é i vin èsklav. Men lèwgadé, Ozé péyé pou rékipéré madanm a-y (Ozé 3:1, 2). Jéova sèvi èvè Ozé pou montré kijan i padonné Izrayèl on bon enpé fwa, magré pèp-la té ka touné-y do pou adoré fo dyé. Ka sa ka aprann-nou ?

¹³ Si on krétyen ki mayé ka fè on péché sèksyèl, moun-la ki mayé èvè-y la ni on désizyon a pran. Jézi èspliké kè i andwa divòsé é woumayé. Men si i chwazi padonné, a pa péché i péché. Ozé viré èvè Gomè. Sèl biten, fò pa i té jen tronpé-y ankò. Rivé onlè, Ozé dwèt rikoumansé kouché èvè-y. Sa té ka montré kè Bondyé té dakò pou viré èvè pèp a-y é pou i té rètouvé on bèl lanmityé èvè-y kon avan (Ozé 1:11 ; 3:3-5). Ka sa ka aprann-nou asi mayé jòdijou ? Si krétyen inosan la ka rikoumansé kouché èvè madanm a-y oben èvè mari a-y, sa vlé di i ka padonné-y (1 Kor. 7:3, 5). Kivlédi i pa andwa divòsé ankò. Konnyéla, fò sé dé moun-la travay ansanm-ansanm, pou yo toulédé vwè mayé menmjan ki Jéova.

14. Dapré sa 1 Korentyen 7:10, 11 ka di, ka ki pé rivé adan on mayé ?

¹⁴ Tout sé krétyen-la dwèt rèspèkté mayé, kon Jéova é Jézi ka fè. Men pas nou enpawfè, sèwten ni dimal a fè sa (Wom. 7:18-23). Sé pousa fò pa nou touvé sa fò si, o prèmyé syèk, té ni krétyen ki té ka jwenn pwoblèm adan mayé a yo. Lapòt Pòl maké : « Fò pa on madanm séparé èvè mari a-y ». Magrésa, ni moun ki séparé kanmenm (li 1 Korentyen 7:10, 11).

15, 16. a) Menmsi dé moun-mayé ka jwenn pwoblèm antrè yo, ki òbjèktif yo dwèt ni, é poukwa ? b) Sianka krétyen-la mayé èvè on moun ki pa ka kwè an Bondyé, ès ni mwayen apliké prensip-lasa ?

¹⁵ Pòl pa èspliké pou ki rézon sé moun-la té séparé. On biten nou pé sèten, sé kè yo pa té séparé akòz dè on péché sèksyèl, kè mari-la té fè pa ègzanp. Si sété sa, madanm-la té ké ni on bon rézon pou divòsé é i té ké pé woumayé. Pòl ékri kè si on madanm séparé èvè mari a-y, fò i « rété tousèl oben fò i rékonsilyé èvè mari a-y ». Kivédi, pou Bondyé, sé dé moun-la té mayé toujou. Pòl èspliké kè, dépi pa té ni péché sèksyèl, kèlkanswa sa ki té dèyè do a pwoblèm-la, òbjèktif-la té dwèt dè rékonsilyé é dè rété ansanm. Yo pé mandé sé ansyen-la èd a yo. Sé  ansyen-la pé ké pran pawti, é yo ké pé ba-yo konsèy bazé asi Labib.

¹⁶ É si krétyen-la mayé èvè on moun ki pa ka sèvi Jéova ? Si yo ka jwenn pwoblèm adan mayé a yo, èskè yo pé séparé ? Kon nou sòti èspliké, Labib ka di kè ou ni on rézon valab pou divòsé lè ni on péché sèksyèl. Pawkont, Labib pa ka di pou ki rézon dé moun pé séparé. Pòl maké : « Si on madanm ni on mari ki pa ka kwè an Bondyé é mari a-y dakò pou rété èvè-y, fò pa i kité mari a-y » (1 Kor. 7:12, 13). Jòdila, sa valab toujou.

17, 18. Poukwa sèwten krétyen désidé tchenn tchè menmsi mayé a yo ka jwenn bon pwoblèm ?

¹⁷ Men déparfwa, sé konpòwtèman a mari-la ki pa Témwen la ki ka fè-w santi kè i « pa dakò pou rété » èvè madanm a-y. Mari-la, sépé on moun ki ka simé bon kou asi madanm a-y. Pétèt osi, i ka rèfizé ba fanmi a-y on dèkwa pou yo viv, oben i ka mèt lanmityé a madanm a-y èvè Jéova an danjé toubònman. Adan sé ka-lasa, menmsi mari a yo té ka di lèkontrè, ni sèwten sè ki konsidéré kè mari a yo pa té « dakò pou rété » èvè yo, kifè fò yo té séparé. Men ni dòt sè ki té adan menm sitiyasyon-la, ki désidé rété èvè mari a yo, yo tchenn tchè, é yo fè tousa yo té pé pou mayé a yo jwenn on ti lanbéli. Poukwa yo fè chwa-lasa ?

¹⁸ Sé moun-la ka séparé la mayé toujou, é yo pé rivé a jwenn sé difikilté-la nou sòti palé la. Lapòt Pòl bay ondòt rézon ankò ki ka fè-nou konprann poukwa sé moun-mayé la pé désidé rété ansanm. I maké : « Mari-la ki pa ka kwè an Bondyé la sen grasa madanm a-y, é madanm-la ki pa ka kwè an Bondyé la sen grasa frè-la ; si a pa té sa, timoun a zòt pa té ké pwòp douvan Bondyé, men aprézan yo sen » (1 Kor. 7:14). Ni onlo frè é sè ki désidé rété èvè mari a yo oben èvè madanm a yo ki pa Témwen, menmsi sitiyasyon-la té rèd toubònman. A pa ti kontan yo kontan yo fè tousa éfò, pas détwa tan apré, mari a yo oben madanm a yo vin Témwen a Jéova (li 1 Korentyen 7:16 ; 1 Pyè 3:1, 2).

19. Poukwa ni tousa mayé ki ka réyisi aka sé vré krétyen la ?

¹⁹ Jézi bay déotwa prensip anrapò èvè divòs, é lapòt Pòl bay déotwa anrapò èvè moun ka séparé. Yo toulédé té vlé kè sèwvitè a Bondyé ba mayé onlo valè. Jòdijou, toupatou si latè, ni onlo krétyen ki ni tchè-kontan toubònman adan mayé a yo. Sèten ou konnèt bon enpé adan lasanblé lokal a-w. Ou ka jwenn dé frè fidèl ki enmé madanm a yo é dé sè plen lanmou ki ka rèspèkté mari a yo. Yotout ka ba-w laprèv kè ni mwayen ba mayé onlo valè é kè ni mwayen i diré, kon Jéova té di adan Jadendédèn-la : « On nonm ké kité manman-y é papa-y, é i ké rété èvè madanm a-y é yo toulédé ké fè onsèl chè » (Éféz. 5:31, 33).