Adan 2 Korentyen 12:2, 3, Pòl ka palé dè on « misyé » kè « [yo] menné jis o twazyèm syèl ». Sété kimoun ? Adan chapit-la ki avan la, Pòl té di kè Bondyé té ka itilizé-y kon apòt (2 Kor. 11:5, 23). Apré, i palé dè « vizyon » é dè « révélasyon a Sényè-la ». Kimoun ki vwè-yo ? Adan sa Pòl maké pli wo, i pa ka palé dè dòt frè. Nou ka tou konprann kè sé dè limenm i té ka palé (2 Kor. 12:1, 5).

Donk sé Pòl yo « menné jis o twazyèm syèl » é « adan paradi-la » (2 Kor. 12:2-4). I itilizé lèmo « révélasyon » pou montré kè yo té di-y sa ki té ké pasé dèmen.

Ka ki « twazyèm syèl[-la] » Pòl vwè la ?

Défwa, adan Labib, lèmo « syèl » sé syèl-la ki an wo a tèt an nou (Jén. 11:4 ; 27:28). Men ou pé touvé-y osi pou palé dè dòt biten kon dominasyon a lézòm (Dan. 4:20-22). Oben pou palé dè dominasyon a Bondyé, pa ègzanp dominasyon a Wayòm a-y an syèl-la (Rév. 21:1).

Men ka Pòl té vlé di lè i té ka palé dè « twazyèm syèl[-la] » ? Déparfwa yo ka répété on lidé twa fwa adan Labib pou yo vwè-y byen oben pou montré kijan lidé-lasa enpòwtan (Iz. 6:3 ; Ézék. 21:27 ; Rév. 4:8). Lè Pòl té ka palé dè « twazyèm syèl[-la] », i ka sanm sa i té ka palé dè méyè dominasyon ki tini : Wayòm-la Jézi é sé 144 000 moun la ka dirijé la (ou pé gadé adan Étude perspicace des Écritures, volim 1, p. 473, 476). Dapré sa lapòt Pyè maké, nou ka atann « nouvo syèl[-la] » kè Bondyé pwomèt-nou la (2 Pyè 3:13).

É ka nou pé di dè « paradi[-la] » Pòl té palé la ?

Yo ka itilizé lèmo « paradi » pou palé dè plizyè biten : 1) paradi-la ki ké asi latè ; 2) paradi èspirityèl la ki ké pèwmèt-nou viv anpé èvè Bondyé é èvè frè an nou adan mond nouvo la ; 3) « paradi a Bondyé » nou ka touvé adan Révélasyon 2:7, pou palé dè jan tout biten bèl toubònman an syèl-la (gadé niméwo a 15 juiyé 2015 a Tou dè Gad la an fwansé, p. 8 § 8).

« Paradi[-la] », koté-la yo menné Pòl la dapré 2 Korentyen 12:4, pé rèprézanté sé twa biten-lasa anmenmtan.

Pou rézimé :

« Syèl[-la] » yo ka palé la adan 2 Korentyen 12:2 sé pétèt Wayòm-la kè Jézikris é sé 144 000 la ka dirijé, kivédi « nouvo syèl[-la] » (2 Pyè 3:13).

Sé « twazyèm syèl[-la] » pas Wayòm-la sé méyè dominasyon ki tini.

« Paradi[-la] », koté-la yo « menné » Pòl la adan on vizyon, sé pétèt twa biten ki ké ègzisté anmenmtan adan mond nouvo la : 1) paradi-la ki ké asi latè, 2) paradi èspirityèl la, ki ké lontan pli bèl ki aprézan, é 3) « paradi a Bondyé » an syèl-la.

Konsa, nouvo syèl-la é nouvo tè-la ké fòwmé mond nouvo la. Sé ké on nouvo òwganizasyon é adan-y ké ni Wayòm-la ki an syèl-la é sèwvitè a Bondyé ki ké asi latè adan paradi-la.