ÈS OU pé di kè ou sé on moun ki ka montré rèkonésans a-y ? Fò-nouchak pran on tan pou réfléchi asi kèsyon-lasa. Labib té ja anonsé kè pannan dènyé jou a sistèm-lasa onlo moun té’é « engra » (2 Tim. 3:2). Pétèt ou ja jwenn moun ki enmé atann si lézòt pou yo ni on biten oben ki ka konsidéré kè lézòt dwèt fè biten ba yo. Pou sé moun-lasa yo pa’a douwé ponmoun ayen é yo pa ni pon mèsi a di ponmoun nonplis. Ès ou enmé frékanté moun konsa ?

Pawkont, adan Labib yo ka ankourajé sèwvitè a Jéova a ‘montré kè yo ni rèkonésans’ é a ‘di mèsi pou toutbiten’ (Kol. 3:15 ; 1 Tés. 5:18). An réyalité, lè ou abityé di mèsi, sa ka édé-w santi-w byen. Poukwa nou pé di sa ?

On bon rézon nou ni dè toujou montré rèkonésans an nou sé kè, lèwvwè nou ka fè sa, nou ka vwè-nou on mannyè pli pozitif. An jénéral, lè on moun abityé di mèsi i ka fè limenm a-y dibyen. Anplisdisa, lè i ka di on moun mèsi, i ka fè moun-lasa dibyen osi. Poukwa lè ou ni rèkonésans, sa ka rann ki vou ki sélézòt moun-la kontan ? An-nou pran on ègzanp : Si on moun ka pran asi tan a-y pou i fè on biten ba-w, ou pa’a di sé pas ou ni valè pou-y ? I ka sousyé-y dè-w. É lè ou ka vwè jan i ka sousyé-y dè-w, sa ka mété onlo jwa an tchè a-w. Nou ka imajiné kè sé sa Rit rèsanti davwa Boaz montré-y donan èvè-y. Sèten sa fè Rit plézi dè vwè kè ni on moun ki ka sousyé-y dè-y konsa (Rit 2:10-13).

Si ni on moun ki byen mérité yo di-y mèsi sé Bondyé. Sèten sa ja rivé-w dè sonjé kantité kado Jéova ja ban-nou é kè i ka kontinyé ban-nou, ki sé an domenn èspirityèl, ki sé an domenn matéryèl (Dét. 8:17, 18 ; Akt 14:17). Men ès ou ka pran on tan pou byen réfléchi asi kantité bénédisyon Kréyatè a-w ja dévidé asi-w é asi fanmi a-w ? Si ou fè sa, ou ké ni plis rèkonésans ankò ba Jéova é ou ké vréman sèten kè i enmé-w é kè i ka aprésyé-w (1 Jan 4:9).

Men fò pa ou kontanté-w dè réfléchi asi sa Jéova ja ba-w é asi bénédisyon i ja vidé asi-w : fò ou di-y mèsi osi ! (Sòm 100:4, 5). Lè nou ka di lézòt mèsi, tchè an nou ka pi kontan.

Lè ou ni rèkonésans sa ka pwokiré-w dòt byenfé ankò : sa ka fè dé lanmityé vin pi solid. Noutout bizwen santi kè lézòt ka aprésyé-nou. Lè ou ka di on moun mèsi dètoukè padavwa i fè on biten ba-w, sa ka rapwoché-zòt (Wom. 16:3, 4). Anplisdisa, lè ou ni rèkonésans, sa ka pousé-w édé lézòt. On moun ki ni rèkonésans ka pran tan aprésyé sa lézòt ka fè ba-y, é li a tou a-y i ka anvi fè lézòt dibyen osi. Sé on réyalité : lè ou ka édé lézòt sa ka ba-w tchè-kontan. Kon Jézi ni lokazyon di : « On moun ka pli kontan lè i ka bay ki lè i ka rèsèvwa » (Akt 20:35).

Robert Emmons, sé on pwofésè adan on linivèwsité an Kalifòwni é i rèsponsab a on étid ki fèt asi rèkonésans. Mi sa i ka di : « Pou nou pé montré-nou rèkonésan, fò-nou admèt kè yonn bizwen lòt, é kè tanto sé nou ki ka ba-y é tanto sé nou ki ka risivwè. An réyalité, adan lavi, yonn bizwen lòt adan onlo domenn. Pa ègzanp, sa pé rivé kè nou pa annéta nouri-nou oben swangné-nou noumenm an nou. Kifè, nou bizwen ondòt  moun fè sa ban nou (1 Kor. 12:21). On moun ki ni rèkonésans ka pran tan aprésyé sa yo ka fè ba-y. É vou, ès ou ni labitid di mèsi lè on moun ka fè on biten ba-w ?

Nou pé ni ondòt byenfè lè nou ni rèkonésans an tchè an nou : sa ka édé-nou rété konsantré asi sa ki pozitif olyé nou rété gadé sa ki négatif. Lèspri an nou ka aji kon on bayè ki ka gadé sèwten biten andidan é ki ka baré dòt biten. Sa pi fasil pou on moun ki ni rèkonésans dè vwè sa ki pozitif ki dè gadé sa ki négatif. Pi ou ké ni rèkonésans, pi ou ké vwè sa moun ka fè ki byen. É pi ou ké ou vwè sa yo ka fè, pi ou ké ni rèkonésans. Si ou ka konsantré-w asi dé biten ki ka fè-w ni rèkonésans, sa ké édé-w apliké konsèy a lapòt Pòl : « Fò tchè a zòt toujou kontan grasa Ségnè-la » (Filip. 4:4).

Ou ké vwè kè lè ou ni rèkonésans, sa ka anpéché biten ki négatif vin an lèspri a-w. É sé vré, ou pé pa ni rèkonésans an tchè a-w é anmenmditan ou ni rankyè, tristès oben jalouzi andidan a-y. Anplis, souvantfwa, moun ki ni rèkonésans ka ba byen matéryèl mwens valè. Yo kontan sa yo ni é yo pa’a kontinyé chèché a ni plis biten ki sa (Filip. 4:12).

Antankè krétyen, si ni on biten ou sav byen, sé kè Satan té’é vlé rann-vou tris é fè-w pèd kouraj osi akòz dè tout difikilté ou ka jwenn. I té’é kontan si ou té ka vin négatif, é si ou té ka plenn-vou toulè. É parapòt a sa, pétèt kè lè ou ké ka préché sa ké pli difisil pou sé moun-la kouté-w. An réyalité, lè ou ni rèkonésans, sa lyanné èvè fwi a lèspri a Jéova. Pa ègzanp, lè nou ka vwè bon biten Jéova ka ban-nou, sa ka ban-nou onlo jwa é nou ka ni fwa adan sé pwomès-la i ka fè-nou la (Gal. 5:22, 23).

Sèten ou dakò èvè sé lidé-la ou li adan awtik-lasa. Sèten ou sav osi kè sa ka mandé onlo éfò pou montré-w rèkonésan é pou rété pozitif. Men pa lésé sa dékourajé-w ! Rèkonésans, sé on kalité ou kapab ni andidan a-w é kè ou kapab kiltivé. Kijan ou pé fè sa ? Chakjou, pran on moman pou réfléchi asi sèwten biten ki ka ba-w anvi montré rèkonésans a-w. Plis ou ké fè sa, pli ou ké montré rèkonésans a-w natirèlman. Ou ké lontan pli kontan ki sé moun-la ki ka konsantré-yo yenki asi pwoblèm a yo. Konsantré-w asi bon biten Bondyé é lézòt moun ka fè ba-w. Sé biten-lasa ka ba-w kouraj é yo ka rann-vou kontan. Ou pé jous koumansé maké sé biten-lasa adan on ti-kayé é touléjou, ou pé maké 2 ou 3 biten ki ka fè-w ni rèkonésans.

Sèwten èspésyalis konstaté kè lè nou ni labitid di lézòt mèsi, sèwvo an nou ka mété-y ka aji ondòt mannyè. Kifè, nou ka santi-nou plibyen. On moun ki ka montré-y rèkonésan, sé on moun ki ka pli kontan. Alò, pran labitid sonjé tout bon biten ou ka rèsèvwa, pran tan aprésyé bèl biten ki ka rivé-w é toujou montré-w rèkonésan ! Lè ou ka rèsèvwa bénédisyon, olyé ou fè konsi sé doué yo ka doué-w, « di Jéova mèsi, pas i bon ». « Di mèsi pou tout biten » (1 Kron. 16:34 ; 1 Tés. 5:18).