1-2. Dapré sa nou vwè èvè ègzanp a Angelito, ka nouchak dwètèt fè ?

 ÈS FANMI a-w Témwen a Jéova ? Si sé sa, pa jen oubliyé kè lanmityé a-w èvè Jéova, a pa on biten ou ka érité dè fanmi a-w. Ki paran an nou ka sèvi Bondyé, ki yo pa’a sèvi-y, sé a nouchak dè konstwi lanmityé an nou èvè Jéova.

² An-nou vwè ègzanp a on frè non a-y sé Angelito. I lévé adan on fanmi Témwen a Jéova. Men lè i té jenn tiboug, i pa té ka santi kè li é Jéova té bon zanmi. Mi sa i ka di : « An té ka sèvi Jéova yenki pas an té vlé suiv fanmi an mwen. » Men rivé on lè, Angelito désidé pasé plis tan ka li pawòl a Bondyé é ka réfléchi asi-y. I mété-y ka priyé Jéova pli souvan osi. Ka sa pèwmèt-li konprann ? Angelito di konsa : « An konprann kè si an vlé rapwoché-mwen dè bon Pap’an mwen Jéova, fò-mwen aprann konnèt-li mwenmenm an mwen. » Ègzanp a Angelito ka pousé-nou mandé-nou : Ki diférans ki ni ant konnèt déotwa biten asi Jéova é konnèt-li byen ? Kijan nou pé aprann konnèt-li ?

3. Ki diférans ki ni ant konnèt déotwa biten asi Jéova é konnèt-li byen ?

³ Nou pé konpranndèdi nou konnèt Jéova pas nou konnèt non a-y, oben pas nou ja tann palé dè biten i fè oben dè biten i di. Men pou konnèt Jéova byen, a pa yenki sa. Fò-nou pran on tan pou nou aprann konnèt plis biten asi  Jéova é asi kalité èstraòwdinè kè i ni. Sé yenki konsa nou ké pé rivé konprann poukwa i ka di oben poukwa i ka fè tèl ou tèl biten. Sa ké édé-nou sav si sa nou ka pansé é sa nou ka fè ka fè Jéova plézi. É dépi nou rivé konprann ka Jéova vlé nou fè, fò-nou fè-y.

4. Ka sèwten ègzanp ki adan Labib pé aprann-nou ?

⁴ Difètkè nou vlé sèvi Jéova, délè ni moun ki ka fè jé èvè nou, oben ki ka jous éséyé mèt baton an wou an nou lè nou ka koumansé adoré-y ansanm èvè sèwvitè a-y. Men si nou ka fè Jéova konfyans, i pé ké jen lagé-nou. Nou ké vin zanmi a-y, é sé ké pou touttan ! Men ou ka di ni mwayen ni on bèl lanmityé konsa èvè Jéova ? Asiré pa pétèt ! Ègzanp a déotwa nonm enpawfè kon Moyiz, oben David, ka montré-nou kè sa posib. Toupannan nou ké ègzaminé sa yo toulédé fè, nou ké réponn a sé 2 kèsyon-lasa : Kijan yo rivé konnèt Jéova ? Ka ègzanp a yo ka aprann-nou ?

5. Ka Moyiz désidé fè ?

⁵ Moyiz désidé sèvi Bondyé. Lè i té ni apépré 40 an, i té préféré ay jwenn pèp a Bondyé, kivédi sé Izraélit-la, olyé yo té di i sé « gason a fi a Faraon » (Ébr. 11:24). Moyiz sé té on granjan dè moun an Éjipt. Men i mèt tousa dèyè do a-y. Difètkè i pran pou sé Ébré-la ki té èsklav an péyi-lasa, Faraon té pé rivé a pa pran sa an men a-y. Anplis, wa-lasa té puisan é pou pèp a-y sé té on dyé. Sèlman, Moyiz aji èvè onlo fwa toubònman ! Moyiz té ka fè Jéova konfyans a san pou san. Sé lè on moun ni on konfyans kon ta Moyiz i pé rété zanmi a Bondyé pou touttan (Pwov. 3:5).

6. Ka ègzanp a Moyiz ka aprann-nou ?

⁶ Ka sa ka aprann-nou ? Menmjan ki Moyiz, noutout ni on désizyon a pran : ès nou ké sèvi Bondyé ansanm èvè pèp a-y ? Pétèt si nou pran désizyon-lasa, sa ké mandé-nou fè sakrifis. Pétèt kè moun ki pa konnèt Jéova ké jous rivé a éséyé anpéché-nou sèvi-y. Men si nou ka fè Pap’an nou ki an syèl-la konfyans a san pou san, asirésèten, i ké la pou soutyenn-nou !

7-8. Ka Moyiz toujou chèché a konnèt plibyen ?

⁷ Moyiz toujou chèché a konnèt bèl kalité a Jéova plibyen, é i toujou fè éfò pou fè volonté a-y. Pa ègzanp, lè Jéova mandé Moyiz fè sé Izraélit sòti anba jouk a sé Éjipsyen-la, pou Moyiz, i pa té alahotè. Plizyè fwa, i di Jéova kè i pa té ka santi-y kapab dè fè sa. Mannyè Jéova réponn-li montré tout konpasyon i té ni pou-y : i konprann sa Moyiz té ka rèsanti é i édé-y (Ègz. 4:10-16). Ki rézilta sa bay ? Moyiz réyisi ay douvan Faraon, pou ba-y mésaj a kondannasyon a Jéova, ki té rèd toubònman. Aprésa Jéova sové sé Izraélit-la é i fè Faraon disparèt èvè tout lawmé a-y adan lanmè Wouj la. Konsa, Moyiz vwè puisans a Jéova an dé zyé a-y (Ègz. 14:26-31 ; Sòm 136:15).

⁸ Apré Moyiz té fè-yo sòti an Éjipt, sé Izraélit-la toujou té ka plenn-yo. Kifè, Moyiz ni lokazyon vwè kijan Jéova aji èvè onlo pasyans èvè pèp-la apré i libéré-y (Sòm 78:40-43). Moyiz ni lokazyon vwè ondòt bèl kalité a Jéova ankò : imilité a-y. Jéova té ni lidé détwi sé Izraélit-la, men konm Moyiz di-y pa fè sa, i chanjé lidé (Ègz. 32:9-14).

9. Sèlon Ébré 11:27, ki jan dè lanmityé Moyiz èvè Jéova té ni ?

 ⁹ Apré Lègzòd, tèlman Moyiz té vin zanmi èvè Jéova, sé té konsidiré i té ka vwè Papa-y ki an syèl-la an dé zyé a-y (li Ébré 11:27). Pou montré kijan yo té kon 2 zanmi-frè, Bib-la ka di : « Jéova té ka palé èvè Moyiz fas a fas, menmjan on nonm ka palé èvè ondòt nonm » (Ègz. 33:11).

10. Si nou vlé konnèt Jéova byen, ka pou nou fè ?

¹⁰ Ka sa ka aprann-nou ? Si nou vlé konnèt Jéova byen, apatoudi konnèt bèl kalité a-y. Fò-nou fè volonté a-y osi. É ka i vlé jòdijou ? I « vlé tout kalté moun sové é kè yotout rivé ni on konésans ègzak a lavérité » (1 Tim. 2:3, 4). Donk, on mannyè nou pé fè volonté a Jéova, sé lè nou ka aprann lézòt konnèt-li.

11. Poukwa nou ka di kè sé lè nou ka aprann moun konnèt Jéova nou ka aprann konnèt-li plibyen ?

¹¹ Byensouvan, sé lè nou ka aprann moun konnèt Jéova, nou ka aprann konnèt-li plibyen. Pa ègzanp, chakfwa Jéova ka édé-nou touvé moun ki vlé vin zanmi èvè-y, nou ka vwè tout konpasyon a-y (Jan 6:44 ; Akt 13:48). Nou ka vwè kijan i puisan lè moun ki ka étidyé Labib èvè nou ka réyisi lagé vyé mès é labitid yo té ni é lè yo ka koumansé mèt nouvo pèwsonalité-la asi yo (Kol. 3:9, 10). Anplisdisa, nou ka vwè pasyans a-y lè nou ka konstaté kè i ka voyé-nou vwè sé moun-la ki an téritwa-la akontinyé pou nou pé sa édé-yo konnèt-li pou yo pé sa sové (Wom. 10:13-15).

12. Dapré sa nou ka li an Ègzòd 33:13, ka Moyiz mandé Jéova, é poukwa i mandé-y sa ?

¹² Moyiz té ka ba lanmityé a-y èvè Jéova onlo valè. Menm apré i té fè mirak èstraòwdinè an non a Bondyé, èvè onlo rèspé, Moyiz mandé Jéova édé-y konnèt-li plibyen (li Ègzòd 33:13). Lè i mandé-y sa, Moyiz té ja ni pliski 80 lanné. Men i té sav byen kè i té ni onlo biten ankò pou i té aprann asi Pap’a-y plen lanmou ki an syèl-la.

13. Kijan nou pé montré nou ka ba lanmityé an nou èvè Jéova onlo valè ?

¹³ Ka sa ka aprann-nou ? Ki nou sòti koumansé sèvi Jéova, ki sa ja ka fè bon détwa lanné nou ka sèvi-y, fò-nou toujou ba lanmityé an nou èvè-y onlo valè. On bèl mannyè nou ka montré sa, sé lè nou ka palé ba-y, kivédi lè nou ka priyé-y.

14. Poukwa lapriyè nésésè pou nou rivé konnèt Jéova plibyen ?

¹⁴ Si ou vlé vin bon bon zanmi èvè on moun, fò-w ka palé èvè-y toutlè. Alò pou vin pli bon zanmi èvè Jéova, priyé-y touttan. Fò pa ou jen pè di-y sa ou ka pansé, oben sa ou ka rèsanti (Éféz. 6:18). Krista, ki ka viv an Tirki, di konsa : « Chakfwa an ka di Jéova sa an ka pansé é an ka konstaté jan i ka soutyenn-mwen, an ka vin enmé-y plis, é an ka ni plis konfyans adan-y. Lè an ka vwè jan Jéova ka réponn a priyè an mwen, sa ka édé-mwen vwè-y kon Pap’an mwen é kon Zanmi an mwen. »

15. Ka Jéova di dè wa David ?

¹⁵ Lè David fèt, fanmi a-y é tout rèstan a nasyon-la té ka sèvi Jéova. Men a pa enki pas fanmi a-y té ka sèvi Jéova kè i mété-y ka sèvi-y osi. David konstwi on lanmityé pèwsonèl èvè Jéova, é Jéova té enmé-y toubònman. I di konsa, David sé té ‘on nonm ki té ka fè-y plézi’ (Akt 13:22, nòt). Kijan David fè vin bon zanmi konsa èvè Jéova ?

16. Ka David aprann asi Jéova lè i gadé sa Bondyé kréyé ?

 ¹⁶ David aprann onlo biten asi Jéova lè i té ka gadé sa i kréyé. Lè i té jennboug, David rété bon enpé tan déwò ka véyé mouton a papa-y. Pétèt sé konsa i pran labitid réfléchi asi sa Jéova kréyé. Pa ègzanp, lè i té ka lévé zyé a-y an syèl-la anmitan lannuit, i té ka vwè milyé é milyé zétwal. Men a pa enki zétwal i té ka vwè. I té ka vwè bèl kalité a kréyatè-la osi. Kifè, mi sa i maké : « Syèl-la ka ba Bondyé glwa ; syèl-la ka bay lavwa asi sa i fè èvè dé men a-y » (Sòm 19:1, 2). Lè David té ka réfléchi asi jan Bondyé fè lézimen, i té ka réyalizé kè Jéova ni on sajès èstraòwdinè (Sòm 139:14). Lè i té ka pran tan réfléchi konsa, sa té ka aprann-li montré-y toupiti (Sòm 139:6).

17. Si nou pran tan réfléchi asi sa Jéova kréyé, ka nou ké aprann ?

¹⁷ Ka sa ka aprann-nou ? Entérésé-w a sa Bondyé kréyé. Pa enki kontanté-w dè vwè sé biten èstraòwdinè la Jéova fè la. Pran tan aprésyé-yo ! Touléjou adan ti aktivité a-w, pran tan réfléchi asi sa Jéova kréyé. Gadé ka — sé plant-la, sé zannimo-la é sé moun-la — ka aprann-vou asi Jéova. Konsa, pa ni on jou ké pasé san ou dékouvè nouvo biten asi Pap’a-w, ki plen lanmou (Wom. 1:20). É jou an jou, lanmou ou ni pou-y ké vin pli fò.

18. Dapré Sòm 18 la, ka David té ka rèkonnèt ?

¹⁸ David té ka rèkonnèt kè Jéova té ka édé-y. Pa ègzanp, i té sav byen kè sé Jéova ki té ba-y fòs pou rivé about a on liyon é a on lous pou pwotéjé bèt a papa-y. I rann-li kont osi kè sé Jéova ki fè si i rivé gangné Golyat, jéan-la (1 Sam. 17:37). É lèwvwè i chapé anba men a wa Sayil, ki té jalou-y, i di Jéova mèsi (Sòm 18, sa ki maké antèt a sòm-la). On moun plen òwgèy té’é di sé fò i fò kifè si i rivé fè tout sé biten-lasa. Men konm David té plen imilité, i byen vwè ka Jéova té ka fè pou-y (Sòm 138:6).

19. Ka ègzanp a David ka aprann-nou ?

¹⁹ Ka sa ka aprann-nou ? Apatoudi mandé Jéova édé-nou. Fò-nou chèché a vwè a ki moman é kijan i ka réponn-nou osi. Si nou ni imilité é si nou ka rèkonnèt kè nou ni limit, nou ké konprann tousuit kè sé Jéova ki ka pèwmèt-nou fè sa nou pa té’é jen pé fè tousèl an nou. É chakfwa nou ké vwè-y ka édé-nou, lanmityé an nou èvè-y ké vin pli solid. Isaac, on frè ki sòti o Fidji, é ki ka sèvi Jéova dépi bon enpé tan, rann-li kont dè sa. Mi sa i ka èspliké : « Lè an ka réfléchi a tousa an viv, an ka rann-mwen kont kè Jéova ka édé-mwen dépi lè an koumansé étidyé Labib. Aprézan, i sé on zanmi pou mwen. »

20. David té ni on bèl lanmityé èvè Jéova. Ki byenfé sa pwokiré-y é ka sa ka aprann-nou ?

²⁰ David té ka imité kalité a Jéova. Jéova kréyé-nou on jan pou nou kapab imité kalité kè i ni (Jén. 1:26). Pi nou ké aprann konnèt kalité a Jéova, pi nou ké rivé imité-y byen. David aprann konnèt Pap’a-y ki an syèl-la byen, é sé sa ki fè i té ka rivé imité-y lè i té ka frékanté dòt moun. An-nou pran on ègzanp : Lè David kouché èvè Bètsabé é lè i fè moun tchouyé mari a-y, i péché kont Jéova (2 Sam. 11:1-4, 15). Men Jéova désidé padoné-y. Poukwa ? Pas David té ni labitid padoné lézòt. Anplisdisa, konm i té ni on bèl lanmityé èvè Jéova, i vin touvé-y pawmi wa a Izrayèl kè pèp-la té pi enmé. Sé jous li Jéova té ka pran  konm ègzanp pou palé dè sélézòt wa a Izrayèl la (1 Wa 15:11 ; 2 Wa 14:1-3).

21. Sèlon Éfézyen 4:24 é 5:1, ka sa ké pòté si nou ka imité Jéova ?

²¹ Ka sa ka aprann-nou ? Fò-nou « imité Bondyé ». Lè nou ka imité-y, sa ka pwokiré-nou byenfé, men anplisdisa, sé on bèl mannyè nou pé aprann konnèt-li plibyen. Lè nou ka fè éfò pou ni on pli bèl pèwsonalité pou nou rivé imité-y plibyen, nou ka montré kè nou sé timoun a-y (li Éfézyen 4:24 ; 5:1).

22-23. Ki bénédisyon nou ké trapé si nou ka mèt an pratik sa nou ka aprann asi Jéova ?

²² Kon nou sòti vwè, grasa sa i kréyé é grasa Pawòl a-y Labib, Jéova ka fè-nou sav kimoun i yé. Pa ni 2 liv kon sila. Adan-y ou ka touvé onpakèt sèwvitè a Bondyé ki té fidèl, kon Moyiz é David, é nou pé pran ègzanp asi yo. Li Jéova, i ja fè sa i té ni a fè. Alè, sé nou a wouvè dé zyé an nou, zòrèy an nou é tchè an nou, pou nou rivé konnèt-li.

²³ Nou pé ké jen fin aprann biten asi Jéova (Ékl. 3:11). Men a pa konnèt onpakèt biten asi-y ki pli enpòwtan ; sa ki ka konté, sé kijan nou ka sèvi èvè sa nou konnèt. Si nou ka mèt an pratik sa nou ka aprann, é si nou ka fè éfò pou rivé imité Pap’an nou ki enmé-nou, i ké kontinyé rapwoché-y dè nou (Jak 4:8). Pawòl a-y ka ban-nou on garanti : i pé ké jen lagé moun ki ka chèché-y.