Ès ou ka sonjé ?
Ès zò pé réponn a sé kèsyon-lasa ki bazé asi Tou dè Gad a 2019 ?
Bondyé ka fè pwomès-lasa : « kèlkèswa zàm yo fè kont vou, ponyonn pé ké sèvi ayen » (Iz. 54:17). Ka pwomès-lasa vé di ?
Nou pé sèten kè Bondyé ké pwotéjé-nou si yo vé détwi-nou menmsi sé dé ‘moun ki san pityé’ (Iz. 25:4, 5). Lènmi an nou pé ké janmen réyisi fè-nou ditò pou touttan (w19.01, p. 6-7).
Lè nou ka gadé jan Bondyé aji èvè sé Kananéyen-la é èvè sé Izraélit rèbèl la, kijan sa ka montré kè i sé on Bondyé ki jis ?
Bondyé té ka pini séla ki té ka fè biten sèksyèl ki pa pwòp oben ki té ka malmenné on madanm oben on timoun. Lè pèp-la té fidèl a Jéova é kè yonn té ka aji èvè lòt on mannyè ki jis, Jéova té ka béni-yo (w19.02, p. 22-23).
Ka pou nou fè si on moun ki pa kwayan ka priyé é kè nou la ?
Nou pé rété san di ayen é aji èvè rèspé men nou pé ké di « amèn », é nou pé ké tchenbé men a ponmoun nonplis pannan priyè-la. Pétèt kè nou ké désidé dè fè on priyè an tchè an nou (w19.03, p. 31).
Lè on granmoun ka fè malpwòpté èvè on timoun, ès sa grav ?
Lè on granmoun ka fè malpwòpté èvè on timoun, i ka péché kont timoun-la, kont frè é sè a lasanblé-la, kont sé gouvènman-la é kont Bondyé. Si sé sa lalwa ka mandé, lè sé ansyen-la tann kè on moun fè malpwòpté èvè on timoun, yo ka fè lalwa sav sa (w19.05, p. 9-10).
Kijan nou pé chanjé mantalité-la ki ka dirijé-nou la ?
Sa enpòwtan kè nou priyé Jéova é kè nou pran tan réfléchi pou vwè kijan dè moun nou yé. Sa enpòwtan kè nou byen chwazi zanmi an nou osi (w19.06, p. 11).
Ka nou pé fè dépi konnyéla pou nou paré pou pèwsékisyon-la ?
Fò-nou vin pi bon zanmi èvè Jéova ankò. Fò-nou sèten osi kè Jéova enmé-nou é kè i pé’é jen abandoné-nou. Fò-nou pran labitid li Labib é priyé touléjou. Fò-nou sèten osi kè Bondyé ké fè sa i pwomèt grasa a wayòm a-y é fò-nou aprann pakè sé vèwsé-la nou pi enmé la èvè sé kantik-la é sé chanson-la ki ka ba Bondyé louwanj (w19.07, p. 2-4).
Ka nou pé fè pou édé fanmi an nou sové vi a yo ?
Sa enpòwtan kè nou mété-nou an plas a yo, kè nou lésé konpòwtèman an nou palé an plas an nou, kè nou pran pasyans é kè nou montré-nou janti èvè yo (w19.08, p. 15-17).
An Matyé 11:28, Jézi pwomèt-nou i ké konsolé-nou. Kijan i ka fè sa ?
Nou ni sé méyè rèsponsab-la, méyè zanmi ki ni, é méyè travay ki ni (w19.09, p. 23).
Kijan Bondyé ka ban-nou anvi-la é fòs-la pou nou aji ? (Filip. 2:13).
Lè nou ka li Pawòl a Bondyé é kè nou ka pran tan réfléchi asi-y, Jéova pé ban-nou on balan, i pé ban-nou anvi fè volonté a-y é fòs-la pou nou aji. Lèspri sen a-y pé ban-nou plis kapasité (w19.10, p. 21).
Ki biten ki saj nou pé fè avan nou pran on désizyon enpòwtan ?
Nou pé fè sé 5 biten-lasa : Fouyé byen lè nou ka fè rèchèch. Priyé pou nou ni sajès. Chèché a vwè poukwa nou vlé pran désizyon-lasa. Fò-nou ni òbjèktif ki byen prési. Pa pann chapo an nou two ho (w19.11, p. 27-29).
Ès sé dépi Satan té palé ba Èv nou ka tann palé dè zafè a nanm imòwtèl la ?
Ou té’é di sé non ! Lè Satan palé ba Èv i pa di-y kè i pé’é mò poudèbon, i di-y kè i pé’é pon mò. Anplisdisa, tout fo-ansègnman ki té ka ègzisté a lépòk disparèt apré délij-la ! Pétèt kè moun koumansé kwè adan on nanm imòwtèl avan Jéova té fè sé moun-la ki té ka konstwi tou a Babèl la ay diféran koté asi latè (w19.12, p. 15).