Nou té’é pito réponn, non. Dyab-la pa di Èv kè si i manjé an fwi-la Bondyé di pa manjé la i pé’é mò poudèbon, konsi, on biten andidan a-y (sa sèwten moun ka kriyé nanm imòwtèl) té’é kontinyé viv ondòt koté. Satan sèvi èvè on sèwpan pou i té palé ba Èv é i di-y kè si i manjé fwi a pyébwa-la, i ‘pé’é pon mò’. Lè i di sa, i té vlé fè-y kwè kè i té’é kontinyé viv ti viv a-y asi latè, é kè i té’é pi alèz a-y davwa i pa té’é bizwen Bondyé ankò (Jén. 2:17 ; 3:3-5).

Men si a pa dépi an Jadendédèn-la moun koumansé kwè kè nanm-la pa’a mò, kitan mansonj-lasa parèt ? Nou pé pa di ègzaktèman kitan mansonj-lasa vin lanmòd. Men sa nou sav, sé kè lèwvwè délij-la fèt an tan a Noé, tout sé fo rèlijyon-la disparèt. Pa té ka rété pon tras a yo ankò. É tout pakèt mansonj-la yo té ka rakonté la disparèt ansanm èvè yo osi piskè sé yenki Noé é fanmi a-y ki rété vivan é sé Bondyé yo té ka adoré.

Kifè, sé dwèt apré Délij-la, moun koumansé di kè nou ni on nanm ki pa’a mò. A Babèl, Bondyé fè ansòt pou lézòm palé an plizyè lang diféran, kifè yonn pa té ka rivé konprann-lòt. Alò, yochak pran on bò é yo ay « toupatou asi latè » (Jén. 11:8, 9). Yo dwèt chayé kwayans a yo èvè yo osi é yo kontinyé rakonté kè nanm-la pa’a mò. Dè tout fason, menmsi nou pa sav kitan lidé-lasa parèt, on biten ki sèten sé kè sé Satan, « papa a mansonj-la » ki dèyè do a sa é i byen kontan lè i ka vwè kè toupatou asi latè moun ka kwè adan mansonj-lasa (Jan 8:44).