Sa nou ka touvé adan Détéwonòm 22:25-27 pa la pou montré kè misyé-la koupab, piskè antoutjan i ja koupab. Men lwa-lasa té la siwtou pou pwouvé kè fi-la inosan. An-nou gadé sé vèwsé-la ki avan pasaj-lasa.

Sé vèwsé-la ki avan la ka palé dè on misyé ki té ni rèlasyon sèksyèl èvè on fi ki té fiyansé, é sa fèt « adan on vil ». Yo té ka konsidéré kè sa i fè la sé té on adiltè pas lè on fi té fiyansé sé konsi i té ja mayé. É fi-la aprézan ? « I pa hélé anmwé adan vil-la ». Si i té fè sa, sèten dòt moun té’é tann-li é yo té’é vin sové-y. Men i pa hélé anmwé. Donk li osi, i fè adiltè ansanm é misyé-la. Yo té ka jijé-yo toulédé koupab (Dét. 22:23, 24).

Aprésa, menm lwa-lasa ka palé dè ondòt sitiyasyon : « Men si sé adan on savann misyé-la jwenn fi-la ki té fiyansé la, é kè i fòsé-y kouché èvè-y, sé misyé-la tousèl pou ou tchouyé, fò pa ou fè fi-la ayen. Fi-la pa péché é i pa mérité yo tchouyé-y. Pas sa ki rivé-y la sé menm biten ki lè on misyé ka ataké ondòt moun é kè i ka tchouyé-y. Konm sé adan on savann i jwenn fi-la ki fiyansé la, fi-la hélé anmwé men pa té ni ponmoun pou vin a sèkou a-y » (Dét. 22:25-27).

Adan ka-lasa, sé jij-la té ka fè fi-la konfyans. Poukwa ? Pas yo té ka èstimé kè i « hélé anmwé, men pa té ni ponmoun pou vin a sèkou a-y ». Donk i pa fè adiltè. Men misyé-la li, i koupab pas i vyolé fi-la davwa i « fòsé-y kouché èvè-y » é anplis i fè adiltè èvè-y paskè fi-la té fiyansé.

Donk, menmsi òbjèktif a lwa-lasa sé té dè montré kè fi-la té inosan, lwa-la té ka di kè dè tout fason misyé-la té koupab pou vyòl é pou adiltè. Nou pé séten kè sé jij-la té ka « pran tan ègzaminé tousa ki fèt » é kè yo té ka pran on désizyon ki annakò èvè dé prensip kè Bondyé té ja répété plizyè fwa (Dét. 13:14 ; 17:4 ; Ègz. 20:14).