1-2. a) Ka ki on Jibilé ? (gadé ti karé-la «  Jibilé-la, ka sa té yé ? ») b) Dè ki biten Jézi ka palé adan Lik 4:16-18 ?

ADAN sèwten péyi, lèwvwè on wa oben on rèn ka gouvèné dépi 50 an, yo ka fè on fèt èspésyal pou sélébré sa. Lè 50 lanné-lasa rivé, yo ka kriyé sa jibilé a moun-la ki ka gouvèné la. Sé moun-la ka sélébré anivèwsè-lasa swa pannan on jouné, pannan on simenn oben pannan pli lontan ki sa. Men rivé onlè, fèt-la ka fin é kon i fini kon sé moun-la ja oubliyé sa osi.

² An tan lontan, an Izrayèl, yo té ka fété Jibilé-la pannan on lanné, tou lé 50 an. Jibilé-lasa té ka libéré sé Izraélit-la. Men alèla, nou kay ègzaminé ondòt Jibilé ki lontan méyè ki tala yo té ka sélébré la. Men poukwa Jibilé-lasa ni on sans ban nou jòdila ? Sé paskè sa ka fè-nou sonjé on dispozisyon èspésyal Jéova pran ban nou. Dispozisyon-lasa ké pòté on libèté étèwnèl ban nou. Dayè, nou pé pwofité dè libèté-la Jibilé-la ka pwokiré la dépi alè. An-nou vwè ka Jézi di anrapò èvè libèté-lasa (li Lik 4:16-18).

3. Dapré sa Lévitik 25:8-12 ka di, kijan Jibilé-la édé sé Izraélit-la ?

³ Nou pé konprann plibyen sa Jézi di anrapò èvè libèté-lasa, si nou ka pran tan ègzaminé Jibilé-la Jéova té mèt anplas pou sé Izraélit-la. Mi sa Jéova té di sé Izraélit la : « Fò 50^èm lanné-la vin sen pou zòt é fò-zòt ké fè toutmoun ki ka rété an péyi-la sav kè lè a libérasyon-la rivé. Lanné-lasa, sé ké on JibiIé pou zòt. Yo ké woumèt chakmoun tè a-y é zò chak ké rètouné an fanmi a zòt » (li Lévitik 25:8-12). Adan awtik a simenn pasé, nou vwè kijan sé Izraélit-la té ka bénéfisyé dè saba-la chak simenn. Men kijan sé Izraélit-la té ka bénéfisyé dè Jibilé-la ? Pa ègzanp, imajiné kè on Izraélit té ni onlo dèt si do a-y é kè  i té ka touvé-y oblijé vann tout sé tè-la i té ni la pou péyé sé dèt-lasa. Ében pannan lanné a Jibilé-la, fò-yo té woumèt-li tè a-y. Yo té ka woumèt nonm-la tè a-y, konsa, timoun a-y té ka pé érité dè sé byen-lasa plita. Oben pétèt osi on nonm touvé-y oblijé vann swa on timoun a-y, swa limenm a-y pou i té vin èsklav pou péyé dèt a-y. Pannan Jibilé-la, fò èsklav-la té « rètouné an fanmi a-y ». Sé té pou ponmoun pa rété èsklav tout vi a-y san pon èspwa. Dispozisyon-lasa té ka montré kè Jéova té ka sousyé-y dè pèp a-y vréman !

4-5. Poukwa sa enpòwtan kè nou chèché a konnèt sèwten biten anrapò èvè Jibilé-la ?

⁴ Ki dòt bon biten Jibilé-la té ka pòté ba yo ankò ? Mi sa Jéova ka èspliké : « Fo pa ponmoun akaz a-w vin pòv, pas asirésèten, Jéova ké béni-w adan péyi-la Jéova Dyé a-w ka ba-w an éritaj » (Dét. 15:4). Sa pa ni ayen a vwè èvè sa ki ka fèt jòdila ! Byensouvan, nou ka rann-nou kont kè moun ki rich ka vin pli rich é kè séla ki ja pòv la ka vin pli pòv ankò.

⁵ Konm nou sé dé krétyen, nou pa anba Lwa a Moyiz ankò. Kivédi, nou pa ka suiv lwa-la anrapò èvè Jibilé-la. On lwa ki té ka libéré sé èsklav-la, ki té ka fè tout dèt disparèt, é ki té ka pèwmèt sé moun-la woubénéfisyé dè tè a fanmi a-yo (Wom. 7:4 ; 10:4 ; Éféz. 2:15). Men sa enpòwtan kanmenm kè nou konnèt sèwten biten anrapò èvè Jibilé-la. Poukisa ? Paskè nou pé pwofité dè on libèté ki ka fè-nou sonjé sila sé Izraélit-la té ni la grasa Jibilé-la.

6. Dè ki biten nou bizwen yo libéré-nou ?

⁶ Onlo adan nou bizwen on libérasyon paskè nou anba jouk a péché-la, é sé on èsklavaj ki vréman rèd a sipòté. Piskè nou sé dé péchè, nou ka vyéyi, nou ka tonbé malad, é nou ka mò. É sé vré, paskè onlo moun ka vwè jan péché-la ka aji asi yo lè yo ka gadé-yo adan on miwa  oben lè yo kay aka dòktè pas yo malad. Pétèt osi kè nou dékourajé pas nou ka péché. Lapòt Pòl konstaté kè i té prizonyé a ‘lwa a péché-la ki andidan kò a-y la’. Mi sa i ka ajouté : « Pòv boug ki an yé ! Kimoun ki ké libéré-mwen dè kò-lasa ki ka menné-mwen a lanmò » ? (Wom. 7:23, 24).

7. Ka Izayi té anonsé ?

⁷ Men érèzman Jéova mèt on dispozisyon anplas pou sové-nou oben pou libéré-nou anba jouk a péché-la. Sé grasa Jézi libérasyon-lasa posib. Plis ki 700 an avan Jézi té vin si latè, pwofèt Izayi té ja anonsé kè plita, té’é ni on libérasyon èstraòwdinè ki té’é fèt. Pwofèt-la té ka palé dè on libèté ki té’é lontan méyè ki libèté-la sé Izraélit-la té ka ni la pannan lanné a Jibilé-la. Mi sa i maké : « Lèspri a Jéova, Pli Gran Ségnè-la, asi mwen paskè Jéova chwazi-mwen pou pòté bon nouvèl ba moun ki ni imilité. I voyé-mwen pou mèt pansman asi bobo a moun tchè a yo fann, pou di moun ki lajòl kè yo ké libéré » (Iz. 61:1). Kimoun ki té’é akonpli pwofési-lasa ?

8. Kimoun ki akonpli pwofési a Izayi ?

⁸ Pwofési enpòwtan lasa koumansé réyalizé apré Jézi koumansé préché si latè. Lè i alé a Nazarèt, la i grandi la, i li menm pwofési-lasa pou sé Juif-la ki té an sinagòg-la. Jézi li sé pawòl-lasa on mannyè ki té ka montré kè sé dè limenm i té ka palé. Mi konsa i li sa : « Lèspri a Jéova asi mwen, paskè i chwazi-mwen pou anonsé bon nouvèl pou sé pòv-la. I voyé-mwen pou di moun ki lajòl kè yo ké libéré, pou di moun ki avèg kè zyé a yo ké wouvè, pou libéré moun ki frajil, é pou an fè moun konnèt lanné-la Jéova ka bay favè a-y » (Lik 4:16-19). Kijan Jézi akonpli pwofési-lasa ?

9. Ki kalté libérasyon sé moun-la té vlé ni a épòk a Jézi ?

⁹ An tan a Jézi, moun koumansé bénéfisyé dè libérasyon-la Izayi té anonsé la é kè Jézi té li adan sinagòg-la. Nou pé sèten sa, piskè mi sa Jézi di : « Jòdila, pasaj-lasa ki sòti adan Lézékriti é kè zò sòti tann la, mi i akonpli » (Lik 4:21). Pétèt kè pawmi séla ki tann sa Jézi li la, onlo adan yo té ja anvi sòti anba gouvènman a sé women-la. Pétèt kè a moman-lasa, yo rèsanti menm biten ki sé 2 nonm-la ki di : « Nou té ka èspéré  kè nonm-lasa té’é libéré Izrayèl » (Lik 24:13, 21). Men nou sav byen kè Jézi pa jen di disip a-y lité kont dominasyon a sé women-la menmsi sa té rèd. Okontrè, i di-yo konsa rèmèt « Séza sa ki ta Séza » (Mat. 22:21). Alò, kijan Jézi libéré sé moun-la a épòk-lasa ?

10. Dè ki biten Jézi libéré sé moun-la ?

¹⁰ Gason a Bondyé vin pou i té libéré sé moun-la dè 2 biten. Prèmyé biten i fè, i édé moun a libéré-yo dè sé mansonj-la sé chèf a rèlijyon juif la té ka anségné-yo. A épòk-lasa, yo té ka fòsé onlo Juif suiv dé ansègnman ki pa té bon é dé tradisyon kè nonm kon yo té mèt anplas (Mat. 5:31-37 ; 15:1-11). Ni moun ki té ka di kè yo ka édé moun sèvi Bondyé swadizan, men yomenm a yo pa té ka sèvi-y kon i fo. Sé konsi yo té avèg. É konm yo pa aksèpté ni Mési-la ni sa i anségné, yo pa jen rivé a konnèt Bondyé. Sé konsi yo rété avèg, é Bondyé pa padonné-yo (Jan 9:1, 14-16, 35-41). Men piskè Jézi anségné lavérité é kè i bay on bèl ègzanp, i montré moun ki ni imilité kijan yo té pé libéré-yo dè sé fo ansègnman-la (Mawk 1:22 ; 2:23–3:5).

11. Dè ki dézyèm biten Jézi ka libéré-nou ?

¹¹ Dézyèm biten Jézi fè, sé kè i woté limanité anba jouk a péché-la. Difètkè Jézi bay vi a-y an ranson, Jéova pé padonné péché a moun ki vréman ni fwa adan ranson-la é ki ka fè dé biten ki ka montré kè yo ni lafwa (Ébr. 10:12-18). Mi sa Jézi di : « si Gason-la ka libéré-zòt, zò ké lib poudèbon » (Jan 8:36). Asirésèten, libèté-lasa ni plis valè ki sila on Izraélit té pé ni pannan lanné a Jibilé-la ! Pa ègzanp, on nonm ki té vin lib pannan Jibilé-la té pé wouvin èsklav ankò. Anplisdisa, i té’é fin pa mò on jou, alòskè libèté-la Jézi ka bay la sé pou touttan.

12. Ki prèmyé moun ki bénéfisyé dè libèté-la Jézi té anonsé la ?

¹² An 33, jou a Lapannkòt, Jéova voyé lèspri sen a-y asi sé apòt-la é asi dé nonm é dé madanm fidèl é yo vin wen. I adòpté-yo konm gason pou yo résisité an syèl-la plita é pou yo gouvèné èvè Jézi (Wom. 8:2, 15-17). Sé yo prèmyé ki bénéfisyé dè libèté-la Jézi té anonsé adan sinagòg-la a Nazarèt. Sé nonm-lasa é sé madanm-lasa pa té èsklav a fo ansègnman a sé chèf a rèlijyon juif-la ankò. É yo pa té èsklav a koutim ki pa té annakò èvè Labib nonplis. Pou  Bondyé, yo pa té anba jouk a péché-la ki ka menné a lanmò. I koumansé libéré sé moun-la lè i fè disip a Jézi vin wen an 33, é libérasyon-lasa ké bout apré sé 1000 an la lè Jézi ké fin gouvèné. Ki bèl biten ki ké ni tan fèt avan Jézi fin gouvèné ?

13-14. Anplis dè sé wen-la, kimoun ki pé pwofité dè libèté-la Jézi té anonsé la ?

¹³ Jòdijou, ni milyon é milyon moun sensè ki ka fè pawti a « sélézòt mouton-la » (Jan 10:16). Jéova pa chwazi-yo pou gouvèné an syèl-la èvè Jézi. Men Labib ka di kè yo ké pé viv si latè pou touttan. Ès sé sa ou ka èspéré osi ?

¹⁴ Dépi konnyéla, ou pé pwofité dè bénédisyon sé wen-la ka risivwè. Konm ou ni fwa adan sakrifis a Jézi, ou pé mandé Jéova padonné péché a-w. Kifè, Jéova pé aprésyé-w, é ou pé ni on konsyans ki trankil (Éféz. 1:7 ; Rév. 7:14, 15). Sonjé osi tout bénédisyon ou ka risivwè difètkè ou libéré dè sé fo ansègnman-la. Mi sa Jézi di : « zò ké konnèt lavérité, é lavérité ké libéré-zòt » (Jan 8:32). A pa ti kontan nou kontan bénéfisyé dè libèté-lasa !

15. Dè ki biten nou ké libéré é ki bénédisyon nou ké ni talè ?

¹⁵ Ou pé èspéré vin pi lib ankò. Talè, Jézi ké détwi fo-rèlijyon-la é sé gouvènman  méchan la. Jéova ké pwotéjé « on gran foulmoun » ki ka fè volonté a-y. Aprésa, i ké vidé onpakèt bénédisyon asi yo pannan yo ké adan paradi-la asi latè (Rév. 7:9, 14). Onpakèt moun ké résisité é si yo vlé, Bondyé ké pé libéré-yo dè tout mové biten péché a Adan pòté (Akt 24:15).

16. Ki bèl libèté lézimen ké pé ni talè ?

¹⁶ Pannan règn a 1000 an la, Jézi é séla ki ké gouvèné èvè-y la ké édé lézimen a ni on santé pawfè é yo ké édé-yo ni on lanmityé ki pawfè èvè Jéova. Tout biten ké wouvin kon Bondyé vlé é onlo moun ké libéré, kon lè yo té ka fè Jibilé-la an tan a Izrayèl. Sa vlé di kè tout moun ki ké ka sèvi Jéova fidèlman ké pawfè é yo pé’é anba jouk a péché-la ankò.

17. Ka Izayi 65:21-23 ka di anrapò èvè sèwvitè a Bondyé ? (gadé imaj-la ki asi po a jounal-la).

¹⁷ Adan Izayi 65:21-23, nou ka touvé on pwofési ki ka èspliké kijan lavi ké yé asi latè (li-y). Adan vi-lasa, nou toujou ké ni on biten a fè é nou pé’é fè fennyan nonplis. Okontrè, Labib ka di kè a moman-lasa, pèp a Bondyé ké ka fè dé biten ki itil, é yo ké kontan sa yo ké ka fè la toubònman. Nou pé sèten kè lè péryòd-lasa ké bout, « kréyasyon-la pé ké anba jouk a péché-la é anba jouk a lanmò é i ké ni libèté ki plen glwa a timoun a Bondyé » (Wom. 8:21).

18. Poukwa nou pé sèten kè ni on bèl landèmen ki ka atann-nou ?

¹⁸ Menmjan Jéova fè sé Izraélit-la konprann kè té ni on tan pou travay é on tan pou pozé kò a yo, i ké fè menm biten-la pannan Jézi ké ka gouvèné. É nou ka tou konprann kè nou ké ni on tan pou adoré Jéova. Jòdijou, nou pé pa ni lakontantman si nou pa ka adoré Bondyé. É sa pé’é chanjé adan mond nouvo la. Dépi konnyéla, nou ja kontan lè nou ka sonjé tout sé bèl biten-la nou ké ni a fè la é tousa nou ké fè pou adoré Bondyé. Moun ki fidèl ké pé pwofité dè bèl vi-lasa toubònman !