1. Kijan sé moun-la ka vwè zafè a travay-la ?

 LA OU ka rété la kijan sé moun-la ka vwè zafè a travay-la ? Adan onlo péyi, sé moun-la ka travay twòp é yo ka lasi kò a yo an travay la. Tèlman yo okipé, yo pa ni on tan ni pou pozé kò a yo, ni pou pasé on ti moman èvè fanmi a yo, ni pou fè lanmityé a yo èvè Bondyé grandi (Ékl. 2:23). Men fò-nou di osi, kè ni dé moun ki fennyan bon fennyan la é ki ka chèché èskiz pou yo pa travay (Pwov. 26:13, 14).

2-3. Ki ègzanp Jéova é Jézi ka ban-nou an zafè a travay-la ?

² An mond-lasa, ni moun swa yo ka travay twòp swa yo pa’a travay asé. Men an-nou vwè ki valè Jéova é Jézi ka ba travay. Pa ni pon dout asi sa, Jéova sé on travayè. An Jan 5:17 Jézi di sa on mannyè ki klè : « Pap’an mwen kontinyé travay jis alajouné jòdi, é mwen an ka kontinyé travay » (Jan 5:17). Réfléchi asi tout travay-la Bondyé fè la pou i té kréyé on linivè èstraòwdinè konsa é tout pakèt kréyati èspirityèl la ki an syèl-la. Anplisdisa, nou ka vwè kè Bondyé travay onlo pou i té kréyé Tè-la é tousa ki asi-y. Sé on bèl koté toubònman ! Mi sa nou ka li adan on Sòm : « A pa tibwen biten ou fè, O Jéova ! Ou fè-yotout èvè sajès. Tè-la plen èvè tousa ou fè » (Sòm 104:24).

³ Jézi toujou imité Papa-y. I ba papa-y on pal lè i té ka ‘préparé syèl-la’ (Pwov. 8:27-31). Lontan plita, lè Jézi té asi latè, i fè on travay èstraòwdinè osi. Jézi di kè travay-la Jéova té ba-y fè la té kon nouriti pou-y. É tousa i fè asi latè té ka montré kè sé Bondyé ki té voyé-y (Jan 4:34 ; 5:36 ; 14:10).

4. Ka Jéova é Jézi ka aprann-nou anrapò èvè rèpo ?

⁴ Kon nou sòti vwè, Jéova é Jézi ka travay rèd. Men ès sa vé di kè nou pa bizwen pozé kò an nou ? Awa. Jéova  pa’a jen las, kifè i pa bizwen pozé kò a-y. É poutan, Labib ka di kè lè Bondyé fin kréyé syèl-la é tè-la, « i arété travay é i rèpozé-y » (Ègz. 31:17). Sa vlé di kè Jéova fè on pòz pou i té pran tan aprésyé sa i fè. É magré Jézi té ka travay rèd lè i té si latè, i toujou té ka pran on tan pou pozé kò a-y é pou manjé on bon ti manjé èvè zanmi a-y (Mat. 14:13 ; Lik 7:34).

5. Ki difikilté onlo sèwvitè a Bondyé ka jwenn ?

⁵ Labib ka ankourajé sèwvitè a Bondyé a travay rèd. Fò pa yo fè fennyan (Pwov. 15:19). Pétèt kè fò ou travay pou nouri fanmi a-w. É fò tout disip a Jézi préché bon nouvèl a Wayòm-la. Men nou bizwen pran tan pou pozé kò an nou osi. Ès défwa ou ni dimal a montré-w rézonab parapòt a tan ou ka pasé ka travay, ka préché é ka pozé kò a-w ? Si nou vé sav konmen tan pou nou travay é konmen tan pou nou pozé kò an nou, kijan nou pé fè ?

6. Kijan Mawk 6:30-34 ka montré kè Jézi té sav ki plas pou i té ba travay é ki plas pou i té ba rèpo ?

⁶ Sa enpòwtan kè nou ba travay-la plas-la ki fo la. Mi sa Bondyé pousé Wa Salomon maké : « Ni on tan ki fiksé [...] pou chak biten ». I di kè ni on tan pou planté, konstwi, pléré, ri, dansé é pou dòt biten ankò (Ékl. 3:1-8). On biten ki klè sé kè, adan lavi, travay é rèpo sé 2 biten ki vréman enpòwtan. Labib ka montré kè Jézi té konnèt byen ki plas pou i té ba travay é ki plas pou i té ba rèpo. Ni onfwa, sé apòt-la té sòti anba on bon jouné prédikasyon é tèlman yo té ni travay « yo poto’o menm ni tan manjé ». Alò Jézi di-yo : « Vini-zòt, mèt-zòt on ti koté apa pou zò tousèl a zòt, pou zò pozé kò a zòt tibwen » (li Mawk 6:30-34). Menmsi Jézi é disip a-y pa toujou té ka rivé pozé kò a yo kon yo té’é vlé, Jézi té sav kè yotout té bizwen fè on ti rèpo kanmenm.

7. Nou kay palé dè saba. Ka sa ké pòté ban nou ?

⁷ Pawfwa, nou ka vréman bizwen pran tibwen rèpo oben nou ka bizwen fè dé ti chanjman adan labitid an nou. Nou ka vwè sa lè nou ka pran tan ègzaminé on dispozisyon enpòwtan toubònman kè Bondyé té mèt an plas pou Izrayèl té fè chak simenn : lèsaba. Sé vré kè nou pa anba Lwa a Moyiz ankò ; men jousalè, sa i ka di anrapò èvè lèsaba itil pou nou. Sa nou ké aprann ké édé-nou vwè ki valè nou ka ba travay é ki valè nou ka ba rèpo.

8. Sèlon Ègzòd 31:12-15, poukwa Bondyé té mèt lèsaba ?

⁸ Labib ka di kè apré Bondyé pasé sis « jou » ka kréyé, i arété kréyé biten asi latè (Jén. 2:2). Men konm Jéova enmé travay, i « kontinyé travay » adan dòt domenn (Jan 5:17). Menmjan Jéova pozé kò a-y sétyèm « jou-la », menmjan-la osi, fò sé Izraélit-la té pozé kò a yo sétyèm jou a chak simenn. Dayè pou yonn, Bondyé té di kè lèsaba sé té on sign antrè li é Izrayèl. Sé té on jou pou pran « on rèpo total », « on biten ki té sakré pou Jéova » (li Ègzòd 31:12-15). Pon Izraélit pa té ni dwa travay, ni timoun, ni èsklav, pa menm sé bèt-la (Ègz. 20:10). Sa té ka pèwmèt sé moun-la konsantré-yo asi biten èspirityèl.

9. An tan a Jézi sèwten moun pa té ka vwè lèsaba kon pou yo té vwè-y. Poukwa nou pé di sa ?

⁹ Si Bondyé mandé sèwvitè a-y fè  lèsaba sé té pou byen a yo. Malérèzman, an tan a Jézi onlo moun ki té antèt a rèlijyon juif la té ka fè moun vwè lèsaba kon on biten ki té plen règ ki té difisil a rèspèkté. Yo té ka di kè lè sé jou a saba, on moun pa ni dwa tchui ayen pou i manjé, pa menm on ti-grenn. É i pa ni dwa swangné on moun ki malad nonplis (Mawk 2:23-27 ; 3:2-5). Men a pa sa Bondyé té ka mandé. É Jézi fè sé moun-la ki té ka kouté-y la konprann sa on mannyè ki klè.

10. Sèlon Matyé 12:9-12, ki valè Jézi té ka ba lèsaba ?

¹⁰ Jézi é disip a-y té ka fè lèsaba b paskè yo té juif é yo té anba Lwa a Moyiz. Men lè nou ka gadé sa Jézi fè é sa i di, nou ka konstaté kè a pa té on péché lè ou té ka fè on bon biten pou édé pwochen a-w on jou a saba. Sé pousa i di : « On moun ni dwa fè on bèl aksyon on jou a saba » (li Matyé 12:9-12). Pou-y, a pa té on péché lè ou té ka montré-w janti é lè ou té ka édé on moun on jou a saba. Aksyon a Jézi ka montré kè i té byen konprann pou ki rézon Jéova té mandé pèp a-y fè lèsaba : konm sèwvitè a Bondyé té ka pran on tan pou pozé kò a yo, yo té ka pé konsantré-yo asi dé biten èspirityèl. Adan fanmi-la Jézi lévé la, yo té ka pwofité lè sé té saba pou rapwoché-yo dè Bondyé. Sé sa nou ka konstaté lè nou ka li sa Jézi fè lè i viré Nazarèt, la i lévé la :  « Kon i té abityé, jou a saba-la i rantré an sinagòg-la. Lè i lévé pou i té li, yo ba-y on woulo a pwofèt Izayi » (Lik 4:15-19).

11. Ki bèl ègzanp Jozèf ba Jézi ?

¹¹ Menmjan ki Bondyé, Jozèf té ka ba travay onlo valè. Alò, i aprann Jézi fè chawpant (Mat. 13:55, 56). Jézi dwèt vwè jan Jozèf té ka travay rèd, jou apré jou, pou pran swen a fanmi a-y. É sé té on gran fanmi ! Ondòt lidé ki entérésan, sé kè Jézi ni lokazyon di disip a-y : « Travayè-la mérité pèy a-y » (Lik 10:7). Wi, Jézi té konnèt ka sa vlé di travay rèd !

12. Bay déotwa vèwsé ki ka montré kè fò sé krétyen-la travay rèd.

¹² Lapòt Pòl osi sé té on travayè. Sa Pòl té ka fè pi souvan sé té préché pou fè moun konnèt Jézi é sa Jézi anségné. Men, Pòl té ka travay pou i gangné vi a-y osi. Sé Tésalonisyen-la té sav byen kè ‘i fòsé onlo é kè i swé onlo lè i té ka travay lajouné kon lannuit pou i pa té mèt pon chaj ki lou anlè do a ponmoun’ (2 Tés. 3:8 ; Akt 20:34, 35). Pòl té ka fè tant é nou ka sipozé kè adan vèwsé-lasa sé dè travay-lasa i té ka palé. Piskè lè i té a Korent, i rété aka Akilas é Prisil, é i travay èvè yo pas yo té ka fè tant osi. Sé vré kè Labib ka di kè Pòl travay ‘lajouné kon lannuit’ men sa pa vlé di kè i té ka travay toutlè. Délè, i pa té ka travay, kon lè sé té jou a saba pa ègzanp. É konm sé Juif-la pa té ka travay nonplis jou-lasa, Pòl té ka pwofité pou i té préché ba yo (Akt 13:14-16, 42-44 ; 16:13 ; 18:1-4).

13. Ka ègzanp a Pòl ka aprann-nou ?

¹³ Lapòt Pòl lésé on bèl ègzanp ban nou. I té oblijé travay pou gangné vi a-y, men i toujou fè ansòt pou i té « anonsé moun bon nouvèl-la » é pou-y sé té on travay sakré (Wom. 15:16 ; 2 Kor. 11:23). É i té ka ankourajé lézòt a fè menm biten ki-y. Kifè, non sèlman Akilas é Prisil travay èvè Pòl pou yo té fè tant, men anplisdisa yo té ka travay ansanm èvè-y an Kris Jézi (Wom. 12:11 ; 16:3). Pòl ankourajé sé krétyen Korent la a « toujou ni onlo biten a fè adan travay a Ségnè-la » (1 Kor. 15:58 ; 2 Kor. 9:8). Jéova jou ba Pòl lèspri sen a-y pou i té ékri : « Si on moun vé pa travay, fò pa i manjé nonplis » (2 Tés. 3:10).

14. An Jan 14:12, ka Jézi té vlé di ?

¹⁴ Nou adan dènyé jou a sistèm-lasa é travay-la ki pli enpòwtan la sé préché bon nouvèl-la é fè disip. Dayè, Jézi té anonsé kè disip a-y té’é fè ‘on pli gwo travay’ ki-y ! (li Jan 14:12). Lè i di sa, a pa té pou di kè yo té’é fè mirak menmjan ki-y. Sé disip-la té ké préché é té ké anségné adan plis koté ki-y, pou plis moun é pannan pli lontan ki-y.

15. Ki kèsyon nou dwètèt pozé-nou, é poukwa ?

¹⁵ Si ou ka travay, pozé-w sé kèsyon-lasa : « Ès toutmoun pé di kè an sé on travayè ? Ès an ka fin fè travay-la yo ban’an fè la a lè ki fo ? Ès an ka fè lèmaksimòm pou fè travay an mwen byen ? Si ou ka rivé réponn wi pou chak sé kèsyon-lasa, patron a-w oblijé ka fè-w konfyans ! Anplisdisa, moun ki an travay a-w ké pi anvi kouté mésaj a Wayòm-la. Fò ou pozé-w sèwten kèsyon anrapò èvè prédikasyon a-w é ansègnman a-w. Pa ègzanp : « Ès toutmoun pé di kè an ka pran travay a prédikasyon-la oséryé ? Ès an ka préparé-mwen byen pou an sav ka mwen di sé moun-la lè an ka préché ? Lè on  moun montré kè lavérité ka entérésé-y, ès an ka viré vwè-y san tadé ? Ès an ni labitid itilizé tout kalté métòd ki ni pou préché ? Si répons a-w sé wi, ou ké vin on zouti-filé an prédikasyon, é travay-la ou ké fè la ké ba-w tchè-kontan.

16. Ki valè Jézi é apòt a-y té ka ba rèpo, é poukwa nou pé di kè yo pa té ka vwè sa kon onlo moun ka vwè-y jòdijou ?

¹⁶ Jézi té sav kè li é apòt a-y té bizwen pran on ti rèpo dè tanzantan. Men malérèzman, an tan a Jézi, ni onlo moun ki té ka sanm boug rich la ki adan on ègzanp Jézi té pran. Dayè, a épòk an nou, ni onlo moun ki ka sanm boug rich lasa osi. Pou misyé, i té ni on bon konpòwtèman é mi kijan i té ka rézonné : « Pozé kò a-w, manjé, bwè, fè-w plézi » (Lik 12:19 ; 2 Tim. 3:4). Pou misyé, sé rèpo é plézi ki té pi enpòwtan adan lavi. Pawkont, pou Jézi é apòt a-y a pa pwòp entéré a yo ki té pi enpòwtan adan vi a yo.

17. Jou nou pa’a travay, kijan nou ka itilizé tan an nou ?

¹⁷ Jòdijou, nou ka éséyé imité Jézi. Sé vré kè jou nou pa’a travay, nou ka pran on moman pou pozé kò an nou, men nou ka pwofité osi pou nou fè « bèl aksyon », kon préché é ay réinyon. An réyalité, sé 2 aktivité ki sakré é ki enpòwtan pou nou. Alò, nou ka fè tousa nou pé pou nou pa jen arété préché é ay réinyon (Ébr. 10:24, 25). Menm lè nou an vakans, nou pa’a pèd bon labitid an nou : kèlkèswa la nou yé, nou ka kontinyé ay réinyon, é nou ka chèché a palé dè lavérité èvè moun nou ka kontré (2 Tim. 4:2).

18. Ka Wa an nou, Jézikris, vlé-nou fè ?

¹⁸ Nou ni onlo rèkonésans pou Wa an nou, Jézikris, davwa i rézonab é davwa i ka édé-nou ba travay é rèpo valè-la pou nou ba-yo la (Ébr. 4:15). I vlé kè nou pran on tan pou pozé kò an nou byen konm i fo. Men an menm balan-la i vlé kè nou travay rèd pou gangné vi an nou é kè nou fè tousa nou pé an prédikasyon pas sé on aktivité ki ka fè-nou dibyen. Adan awtik-la ki ka vin la nou ké vwè ka Jézi fè pou i té woté-nou anba jouk a on èsklavaj ki rèd a sipòté toubònman.