1. Kon Éfézyen 6:10-13 ka èspliké, ka Jéova ka fè pou pran swen an nou ? Bay on ti èsplikasyon.

ON MANNYÈ Jéova ka pran swen an nou, sé lè i ka édé-nou pou lènmi an nou pa pran lanmen asi nou. Sa ka touché-nou toubònman ! Satan é sé démon-la sé pli gwo lènmi kè nou tini. Jéova ka di-nou kè fò-nou fè atansyon an nou èvè yo. É i ka ban-nou tousa nou bizwen pou gangné konba-la kont yo (li Éfézyen 6:10-13). Si nou lésé Jéova édé-nou é si nou ka mèt tout konfyans an nou adan-y, nou ké réyisi rété doubout douvan Satan. Nou osi, nou pé ni menm konfyans ki lapòt Pòl ki maké : « Si Bondyé èvè nou, kimoun ké pé gangné-nou ? » (Wom. 8:31).

2. Ka nou kay vwè adan awtik-lasa ?

² Konm nou sé dé krétyen, nou pa ka pran plézi adan sa Satan é sé démon-la ka fè. Nou plito ka chèché konnèt plis biten asi Jéova é nou ka fè tousa nou pé pou sèvi-y plibyen (Sòm 25:5). Men apapousa nou pa bizwen ni sèwten enfòwmasyon asi jan Satan ka aji. Poukisa ? Pou nou pa lésé-y kouyonné-nou (2 Kor. 2:11 ; nòt). Adan awtik-lasa, nou ké palé dè yonn adan sé pli gwo zatrap-la Satan é sé démon-la ka itilizé la. É nou ké vwè osi ka nou pé fè pou yo pa pran lanmen asi nou.

3-4. a) Ki kwayans é ki mès ki ni on rapò èvè sé lèspri-la ? b) Ès ni onlo moun ka kwè kè sé lèspri-la pé édé-yo oben fè-yo ditò ?

³ Satan é sé démon-la ka itilizé tousa ki ni on rapò èvè sé lèspri-la pou kouyonné moun. Sé yonn adan pli gwo zatrap a yo. Ni moun ki ka travay èvè lèspri é yo ka di kè  yo kapab fè pliski sa on nonm nòwmal pé fè. Pa ègzanp, ni sa ka di kè yo ka rivé konnèt ka ki ké fèt dèmen grasa zétwal oben grasa dòt mwayen ankò. Ni sa ka fè moun kwè kè yo pé palé èvè lémò. Ni dòt ankò ka pratiké lamaji oben ka fè sòsyé *.

⁴ Ès ni onlo moun ki ka kwè kè sé lèspri-la pé édé-yo oben fè-yo ditò ? Dapré on ankèt yo menné adan 18 péyi a Lamérik latin é adan Lakarayib, asi 3 moun tin yonn ka kwè adan lamaji é adan sòsyé. É menm kantité-la ka pansé kè ni mwayen kominiké èvè sé lèspri-la. Sèlon ondòt ankèt yo menné adan 18 péyi an Afrik, ni apépré pliski lanmwatyé a sé moun-la ki ka kwè adan sòsyé. On biten ki sèten, sé kè kèlkèswa koté-la nou ka rété la, fò-nou fè atansyon a tousa ki pé fè-nou antré an kontak èvè sé démon-la. Sa klè, Satan ka chèché a « kouyonné lèmondantyé » (Rév. 12:9).

5. Lè moun ka antré an kontak èvè mové-lèspri, ka Jéova ka pansé dè sa ?

⁵ Jéova sé « Dyé a vérité-la » (Sòm 31:5). Lè moun ka antré an kontak èvè mové-lèspri, ka i ka pansé dè sa ? I hay sa menm ! Jéova té ba sé Izraélit-la on lòd, i té di-yo : « Fò pa yo touvé akaz a-w ponmoun ki ka brilé gason a-y oben fi a-y an difé, ponmoun ki ka chèché sav alavans sa ki ké fèt dèmen, ponmoun ki ka fè lamaji, ponmoun ki ka gadé zafè, ponmoun ki ka fè sòsyé, ponmoun ki ka maré moun, ponmoun ki kay owa gadèdzafè oben ki kay vwè moun ka chèché konnèt sa ki ké fèt dèmen, ni ponmoun ki ka chèché a palé èvè moun-mò. Pas Jéova hay sila ki ka fè sé biten-lasa » (Dét. 18:10-12). Sé krétyen-la pa anba Lwa-la kè Jéova té ba sé Izraélit-la ankò. Men sa Jéova ka pansé dè kominikasyon èvè mové-lèspri pa chanjé (Mal. 3:6).

6. a) Satan vlé moun kominiké èvè sé démon-la pou fè-yo ditò. Kijansa ? b) Ki vérité asi sitiyasyon a on moun-mò nou ka touvé adan Éklézyas 9:5 ?

⁶ Jéova ka di-nou fè atansyon pou nou pa kominiké èvè sé démon-la pas i sav kè Satan ka itilizé sa pou fè moun ditò. Satan ka itilizé métòd-lasa pou simé onpakèt mansonj. Pa ègzanp, i ka fè moun kwè kè moun-mò ka kontinyé viv ondòt koté (li Éklézyas 9:5). I ka sèvi èvè métòd-lasa osi pou kontinyé fè sé moun-la pè é pou yo pa pwoché owa Jéova. Satan vlé kè moun ki ka kominiké èvè mové-lèspri ni plis konfyans adan lédémon ki adan Bondyé.

7. Ka Jéova ka ban-nou ?

⁷ Kon nou vwè an koumansman a awtik-lasa, Jéova ka ban-nou sé enfòwmasyon-la nou bizwen la pou nou pa lésé Satan é sé démon-la kouyonné-nou. An-nou vwè plizyè biten nou pé fè pou nou lité èvè lènmi an nou.

8. a) Ki méyè mwayen nou ni pou sé mové-lèspri-la pa pran lanmen asi nou ? b) Kijan Sòm 146:4 ka mèt mansonj a Satan déwò ?

⁸ Li Bib-la é pran tan réfléchi asi-y.  Sé méyè mwayen nou ni pou débarasé-nou dè mansonj kè sé mové-lèspri-la ka simé toupatou. Pawòl a Bondyé kon on épé byen filé ki ka mèt mansonj a Satan déwò (Éféz. 6:17). Pa ègzanp, Labib ka montré-nou on mannyè ki klè kè moun-mò pé pa antré an kontak èvè lévivan (li Sòm 146:4). I ka fè-nou sonjé osi kè sé Jéova tousèl ki pé di-nou ègzaktèman ka ki ké fèt dèmen (Iz. 45:21 ; 46:10). Si nou ka li Pawòl a Bondyé é si nou ka pran tan réfléchi anlè-y jou apré jou, nou ké hay mansonj a sé mové-lèspri-la é nou ké débarasé-nou dè yo pli fasilman.

9. Ki kalté mès nou ka rèfizé ?

⁹ Rèfizé fè tousa ki ni on rapò èvè sé démon-la. Antankè vré krétyen, nou pa’a fè ayen ki ka mété-nou an kontak èvè mové-lèspri. Pa ègzanp, nou pa ka éséyé kominiké èvè moun-mò, ki sé èvè on gadèdzafè ki sé èvè ondòt mwayen ankò. Kon nou vwè adan awtik-la ki avan la, nou pa ka pawtisipé adan koutim ki ka fè moun kwè kè lémò ni on nanm imòwtèl. Nou pa ka gadé zétwal é nou pa kay owa gadèdzafè nonplis pou konnèt ka ki ké fèt dèmen (Iz. 8:19). Nou sav kè sé mès-lasa danjéré toubònman é kè yo pé mèt-nou dirèktèman an kontak èvè Satan é sé démon-la.

10-11. a) O prèmyé syèk, ka sèwten moun fè lè yo dékouvè lavérité ? b) Sèlon 1 Korentyen 10:21, poukwa fò-nou imité sé prèmyé krétyen-la, é kijan nou pé fè sa ?

¹⁰ Débarasé-w dè tout kalté biten ki ni on rapò èvè sé démon-la. O prèmyé syèk, onlo moun ki té ka rété Éfèz té ka pratiké dé biten ki té ni on rapò èvè sé démon-la. Lè sèwten adan yo vin dékouvè lavérité, yo pòté mannèv toubònman. « Onlo moun pawmi séla ki té ka fè lamaji sanblé liv a yo é yo brilé-yo douvan toutmoun » (Akt 19:19). Yo té byen désidé a pa lésé sé mové-lèspri-la pran  lanmen asi yo. Liv a maji a yo té ka kouté chè toubònman. Men yo pa ba pondòt moun sé liv-la é yo pa vann-yo nonplis, yo détui-yo. Pou yo, a pa té valè a sé liv-la ki té pli enpòwtan, men sété fè Jéova plézi.

¹¹ Kijan nou pé imité ègzanp a sé krétyen-lasa ? Sa té ké saj dè débarasé-nou dè tout kalté biten ki ni on rapò èvè sé démon-la. Sé pé on biten pou ni chans, sé pé chawm oben dòt biten moun ka pòté si yo oben kè yo ni pou éséyé pwotéjé-yo kont mové-lèspri (li 1 Korentyen 10:21).

12. Ka fò-nou mandé-nou anrapò èvè anmizman an nou ?

¹² Pran tan ègzaminé anmizman a-w. Ou pé mandé-w : « Ès an ka li jounal, liv oben awtik anlè entèwnèt ki lyanné èvè dé biten mistik ? Ka an pé di dè mizik an ka kouté, fim oben émisyon an ka gadé, oben jé-vidéo an ka jouwé ? Ès ni dé biten adan yo ki ni on rapò èvè sé démon-la ? Ès ni moun ki ka sousé san a moun, zonbi oben dòt biten mistik adan anmizman an mwen ? Ès adan sé anmizman-lasa ni dé biten ka fè moun konprann kè lamaji, sòsyé oben malédisyon sé dé biten ki pa danjéré oben ki pé fè moun ri ? » On biten ki klè, a pa tout anmizman ki ni kont é istwa adan ki lyanné èvè mové-lèspri. Lè ou ka pran tan ègzaminé anmizman a-w, fò-w byen désidé a chwazi séla ki ké édé-w rété lwen a tousa Jéova hay. Nou vlé fè tousa nou pé pou konsyans an nou rété nèt douvan Dyé an nou * (Akt 24:16).

13. Ka nou ka rèfizé fè ?

 ¹³ Pa fè piblisité ba sé démon-la. Nou vlé suiv ègzanp a Jézi adan domenn-lasa (1 Pyè 2:21). Avan i vin si latè, sé an syèl-la i té ka viv. Kifè, i té konnèt onlo biten asi Satan é sé démon-la. Apapousa i palé dè sa sé mové-lèspri-la té fè. Jézi té vlé fè sé moun-la konnèt Jéova é i pa té vlé fè piblisité ba Satan. Nou ka imité Jézi lè nou ka rèfizé rakonté istwa ki ka palé dè sé démon-la. Okontrè, lè nou ka palé nou vlé montré kè « tchè an [nou] ka vibré parapòt a on bon biten », kivédi parapòt a lavérité (Sòm 45:1).

14-15. a) Poukwa nou pa ni a tranblé douvan sé mové-lèspri-la ? b) Poukwa nou sèten kè Jéova ka pwotéjé sèwvitè a-y jòdijou ?

¹⁴ Pa tranblé akòz dè sé mové-lèspri-la. Adan mond-la nou ka viv adan-y la, malè pé rivé-nou : sé pé on aksidan, on maladi oben menm lanmò. Men fò pa nou mèt an lèspri an nou kè tousa ki ka rivé-nou sé fòt a sé lèspri-la nou pé pa vwè la. Labib ka di kè « tan difisil é évènman nou pa té prévwa » pé rivé nenpòt ki moun (Ékl. 9:11). Anplisdisa, Jéova ja montré kè i lontan pli puisan ki sé démon-la. Pa ègzanp, i pa lésé Satan tchouyé Jòb (Jòb 2:6). An tan a Moyiz, Jéova montré toutmoun kè i té pli fò ki sé prèt-la ki té ka fè lamaji an Éjipt (Ègz. 8:18 ; 9:11). Apré, i ba Jézi pouvwa pou fè Satan é sé démon-la sòti an syèl-la é pou jété-yo asi latè. Byento, i ké jété-yo on koté pou yo rété trankil, on koté yo pé’é pé fè ponmoun ayen ankò (Rév. 12:9 ; 20:2, 3).

¹⁵ Nou ni onlo prèv kè Jéova ka pwotéjé sèwvitè a-y jòdijou. Réfléchi asi sa : nou ka préché é nou ka anségné lavérité asi tout latè (Mat. 28:19, 20). Kifè, nou ka mèt mové biten Satan ka fè déwò. On biten ki sèten sé kè Satan té’é enmé arété aktivité an nou, men sé pé pa i pé pa. Donk nou pa ni a tranblé douvan sé mové-lèspri-la. Nou sav kè « zyé a Jéova ka pasé toupatou asi latè, pas i vlé itilizé fòs a-y an favè a tousa ki ka sèvi-y èvè tout tchè a yo » (2 Kron. 16:9). Si nou rété fidèl a Jéova, sé démon-la pé’é jen pé fè-nou on biten pa ni mwayen réparé.

16-17. Sèvi èvè on ègzanp pou montré kè fò-nou ni kouraj pou pa lésé sé mové-lèspri-la pran lanmen asi nou.

¹⁶ Fò-nou ni onlo kouraj pou nou pa lésé sé mové-lèspri-la pran lanmen asi nou. Sa vré, siwtou si zanmi an nou oben fanmi an nou pa dakò èvè kwayans an nou, menmsi yo pa ni mové lentansyon. Men Jéova ka béni tousa ki ni kouraj-lasa. An-nou pran ègzanp a Érika, on sè ki ka viv o Gana. Érika té ni 21 an lè i aksèpté étidyé Labib. Papa-y sété on prèt ki té ka fè lamaji é i té ni labitid fè sérémoni pou sé dyé a-y la. Sé pousa, onlo moun konpranndèdi kè Érika té’é manjé vyann-la yo té ka sakrifyé la pannan sé sérémoni-lasa, kon koutim-la té ka mandé. Men Érika rèfizé. Alò pou fanmi a-y sé konsi i té ka méprizé sé dyé-la. Dapré yo, sé dyé-la té’é rann-yo malad é té’é fè-yo pèd tèt a yo pou pini-yo.

¹⁷ Fanmi a Érika éséyé mèt présyon asi-y pou i té suiv koutim-la, men i rèfizé, menmsi sa té vlé di kè fò i té kité kaz-la. Sèwten Témwen a Jéova akéyi-y akaz a yo. Sé konsa Jéova bay on nouvo fanmi : i touvé dé zanmi krétyen ki vin kon frè é sè pou-y (Mawk 10:29, 30). Fanmi a-y ba-y do é yo jis brilé zéfé a-y. Magrésa Érika rété fidèl a Jéova, i pran lèbatèm é aprézan i pyonyé pèwmanan. I pa’a tranblé douvan sé démon-la. É lè i ka palé dè fanmi a-y, i ka di : « Touléjou, an ka priyé pou yo ni jwa-la ou ni la lè ou ka sèvi Jéova é pou yo rèsanti libèté-la ou ni la lè ou ka sèvi Bondyé an nou ki plen lanmou. »

18. Ki byenfé nou ka pwokiré-nou si nou ka fè Jéova konfyans ?

¹⁸ A pa noutout ki ké viv dé sitiyasyon ki ké mété fwa an nou a léprèv konsa. Sèlman, fò chakmoun lité pou i pa lésé sé mové-lèspri-la pran lanmen asi-y é sé nouchak osi ki dwètèt fè Jéova konfyans. Konsa nou pé ké lésé mansonj a Satan kouyonné-nou. Anplisdisa, nou pé ké tranblé douvan sé démon-la pou sa anpéché-nou sèvi Bondyé. On biten ki pli enpòwtan ankò, lanmityé an nou èvè Jéova ké vin pli solid. Mi sa disip Jak maké : « Doubout douvan Dyab-la, é i ké kouri lwen a zòt. Rapwoché-zòt dè Bondyé, é i ké rapwoché-y dè zòt » (Jak 4:7, 8).