1-2. Poukwa Jézi té boulvèsé ?

DÈNYÉ jou Jézi pasé asi latè antankè nonm, i té boulvèsé toubònman. Yo té kay fè-y sibi bon abominasyon é i té kay soufè onlo avan i mò. Men a pa té sa tousèl ki té ka angwasé-y. I té enmé Papa-y onlo toubònman é i té vlé fè-y plézi. Jézi té sav kè fò i té rété fidèl lè i té ka jwenn éprèv pou pé sa défann non a Jéova. Anplisdisa, Jézi té enmé lézòm. I té sav kè sé yenki si i té rété fidèl jiska lanmò lézòm té’é pé ni lavi étèwnèl.

² Magré Jézi té ni on gwo istrès asi-y, i pa pèd kalm a-y. Jézi di apòt a-y : « An ka ba-zòt pé-la an ni la » (Jan 14:27). I té ni « lapé ki ka vin dè Bondyé », kalm-la on moun ka rèsanti la lè i ni on bèl lanmityé èvè Jéova. Kalm-lasa trankilizé lèspri a Jézi (Filip. 4:6, 7).

3. Ka nou kay vwè adan awtik-lasa ?

³ Ponyonn adan nou pé ké janmen touvé-y anba menm présyon ki Jézi, men tout disip a-y ké pasé gwo éprèv (Mat. 16:24, 25 ; Jan 15:20). É kon Jézi, sa pé rivé kè on biten chouboulé-nou. Alò, ka nou pé fè pou istrès-la pa pran lanmen asi nou é fè-nou pèd trankilité an nou ? An-nou vwè twa biten Jézi fè é ki trankilizé-y pannan ministè a-y asi latè. Nou ké vwè osi kijan nou pé imité-y lè nou anba éprèv.

4. Sonjé sa nou sòti li an 1 Tésalonisyen 5:17 é bay déotwa ègzanp pou montré kè Jézi priyé onlo toubònman pannan dènyé jou a vi a-y asi latè ?

⁴ (Li 1 Tésalonisyen 5:17.) Pannan dènyé jou-la i pasé asi latè, Jézi priyé onlo fwa menm. Lè i montré disip a-y  kijan pou yo té fè mémoryal-la, i priyé asi pen-la é asi diven-la (1 Kor. 11:23-25). Avan yo té lésé koté-la yo sélébré Pak-la, i priyé èvè disip a-y (Jan 17:1-26). Lannuit-lasa, lè li èvè disip a-y rivé asi on mòn yo té ka kriyé Mòn a sé Pyé-Zoliv la, Jézi priyé plizyè fwa (Mat. 26:36-39, 42, 44). É dènyé-dènyé pawòl i di avan i mò, sété on priyè (Lik 23:46). Grasa lapriyè, Jézi fè ansòt pou Jéova la èvè-y pannan chak étap a jou enpòwtan lasa.

5. Poukwa té ka manké sé apòt-la kouraj ?

⁵ Prèmyèwman, si Jézi rivé andiré éprèv-la i jwenn la, sé paskè i priyé Papa-y pou Papa-y té édé-y. Men sé apòt-la, yo, yo pa kontinyé priyé lannuit-lasa. Kifè, té ka manké-yo kouraj lè éprèv-la rivé (Mat. 26:40, 41, 43, 45, 56). Lè nou ka jwenn difikilté, nou ké rété fidèl a kondisyon kè nou pran ègzanp asi Jézi é kè nou pa ka ‘arété priyé’. Ka nou pé mandé lè nou ka priyé ?

6. Kijan lafwa pé édé-nou rété kalm ?

⁶ Nou pé priyé Jéova pou i ban-nou plis fwa (Lik 17:5 ; Jan 14:1). Nou bizwen fwa paskè Satan ka mèt tout moun ki ka suiv Jézi a léprèv (Lik 22:31). Kijan lafwa ka édé-nou rété kalm menm lè éprèv ka tonbé si nou yonn dèyè lòt ? Lè nou ja fè tousa nou té pé pou andiré on sitiyasyon, lafwa ké fè-nou lésé pwoblèm-la an men a Jéova. Padavwa nou sèten Jéova pé réglé pwoblèm-la lontan plibyen ki nou, nou ni lapé andidan tchè an nou é an lèspri an nou (1 Pyè 5:6, 7).

7. Ka sa Robert di ka aprann-vou ?

⁷ Lapriyè ka édé-nou trankilizé lèspri  an nou kèlkèswa éprèv-la nou ka jwenn la. An-nou pran ègzanp a Robert, on ansyen ki ni pliski 80 an. I ka di : « Konsèy a Filipyen 4:6, 7 édé-mwen tchenbé anba onlo éprèv. An té ni pwoblèm a lajan. É pannan on moman an pèd privilèj-la dè sèvi antankè ansyen. » Ka ki édé Robert pa pèd trankilité a-y ? Mi sa Robert ka èspliké : « Dépi an ka santi-mwen angwasé an ka priyé. Pli an ka priyé souvan é pli an ka fè-y èvè fòs, pli sa ka trankilizé lèspri an mwen. »

8. Sèlon Jan 8:29, pou ki dòt rézon ankò Jézi rivé rété kalm ?

⁸ (Li Jan 8:29.) Menm lèwvwè yo té ka pèwsékité-y, Jézi rété kalm paskè i té sav kè i té ka fè Papa-y plézi. I toujou té ka obéyi kèlkèswa difikilté i té ka jwenn. I té enmé Papa-y é sa ki té pli enpòwtan an vi a-y sété sèvi Jéova. Avan i té vin asi latè, i té on « zouti byen filé » adan travay-la i té ka fè la owa Bondyé (Pwov. 8:30). É lè i vin asi latè antankè nonm, i pòté bon mannèv pou fè lézòt konnèt Papa-y (Mat. 6:9 ; Jan 5:17). Aktivité-lasa té ka bay onlo jwa (Jan 4:34-36).

9. Poukwa lè nou byen okipé ka préché sa pé édé-nou rété kalm ?

⁹ Nou pé imité Jézi lè nou ka obéyi Jéova é lè nou « toujou ni onlo biten a fè adan travay a Ségnè-la » (1 Kor. 15:58). Lè nou byen byen okipé adan prédikasyon-la, sa pli fasil pou nou dè rété pozitif parapòt a sitiyasyon an nou  (Akt 18:5). Pa ègzanp, pli souvan ki rarman, sé moun-la nou ka jwenn la an prédikasyon ni pwoblèm ki pli mové ki tan nou. Men, lè yo ka aprann enmé Jéova é yo ka mèt konsèy a-y an pratik, vi a yo ka vin pli bèl é tchè a yo ka pli kontan. Chakfwa sa rivé, nou ka pli sèten ankò kè Jéova ké pran swen an nou. É sa ka édé-nou rété kalm. Sé sa on sè konstaté. I té ka fè déprésyon, é pou-y i pa té vo ayen, kifè tout vi a-y i té oblijé goumè èvè sa. I ka di : « Lè an byen okipé ka préché, an ka rivé métrizé santiman an mwen plibyen é an ka pli kontan. An ka pansé kè sé paskè lè an ka préché an ka santi-mwen pli pré Jéova. »

10. Ka ègzanp a Brenda ka aprann-vou ?

¹⁰ An-nou vwè osi ègzanp a on sè non a-y sé Brenda. Li é fi a-y, yo toulédé ka soufè èvè on maladi grav ki ka fè-w pèd ékilib a-w, ki pé rann-vou avèg oben fè-w pèd lapawòl piti-a-piti. Brenda adan on fotèy-woulan é i pa gè ni fòs. Lè i pé, i ka préché dè kaz-an-kaz. Men sé plito lèt i ka voyé ba moun pou i préché ba yo. Mi sa i ka di : « Sé lè an aksèpté an tèt an mwen é an tchè an mwen kè a pa adan sistèm-lasa an ké géri, an rivé konsantré-mwen afon asi prédikasyon an mwen. Lè an ka préché, sa ka pèwmèt kè an pa rété réfléchi asi sa ki ka angwasé-mwen. Sa ka oblijé-mwen konsantré-mwen asi sa an pé fè pou édé moun ki an téritwa-la. É toutlè, sa ka fè-mwen sonjé kè an ni on bèl espwa pou dèmen. »

11-13. a) Kijan sé apòt-la é dòt moun ankò montré kè yo té dé véritab zanmi pou Jézi ? b) Jézi té ni dé vré zanmi. Ka sa pòté ba-y ?

¹¹ Pannan tout tan-la Jézi préché la, sé apòt fidèl la montré kè yo té dé véritab zanmi pou-y. An ka a yo, ou té pé konstaté sa pwovèb-lasa ka di : « Ni on zanmi ki pli fidèl ki on frè » (Pwov. 18:24). Sé zanmi-lasa té ni onlo valè pou Jézi. Nou pé konprann sa piskè, pannan ministè a-y, ponyonn adan sé frè a-y la pa té ni fwa adan-y (Jan 7:3-5). Onlè, fanmi a-y jous konprann kè sé fou i vin fou (Mawk 3:21). Pawkont, lèswa avan i mò, Jézi ni lokazyon di fidèl apòt a-y : « Sé zòt ki toujou rété èvè mwen adan éprèv an mwen » (Lik 22:28).

¹² Sa rivé kè sé apòt-la désèvwa Jézi. Men i pa rété gadé défo a yo. Sa i vwè, sé kè yo té ni fwa adan-y (Mat. 26:40 ; Mawk 10:13, 14 ; Jan 6:66-69). Dènyé lannuit i pasé èvè yo avan yo tchouyé-y, mi sa i di sé nonm fidèl lasa : « An kriyé-zòt zanmi, pas an fè-zòt konnèt tousa an tann Pap’an mwen di » (Jan 15:15). Asiré sèten, zanmi a Jézi ankourajé-y onlo. Jézi té ni onlo jwa an tchè a-y grasa tousa yo fè pou édé-y adan travay a-y antankè minis a Bondyé (Lik 10:17, 21).

¹³ Anplis dè sé apòt-la, Jézi té ni dòt zanmi, ki nonm ki madanm, ki édé-y adan prédikasyon-la é adan dòt domenn ankò. Ni sa ki té ka envité-y manjé akaz a yo (Lik 10:38-42 ; Jan 12:1, 2). Ni dòt ki té ka maché toupatou ansanm èvè-y é yo té ka pawtajé sa yo té ni èvè-y (Lik 8:3). Jézi té ni dé bon zanmi pas limenm sété on véritab zanmi pou yo. I té ka fè-yo dibyen é i pa té ka mandé-yo fè dé biten ki té two fò ba yo. Jézi té pawfè men i té ka aprésyé sa zanmi a-y té ka fè ba-y magré yo té enpawfè. On biten ki sèten, sé kè yo édé-y pa pèd kalm-la i té ni an tchè a-y la.

14-15. Kijan nou pé ni dé bon zanmi, é kijan yo pé édé-nou ?

 ¹⁴ Si nou ni bon zanmi, yo ké édé-nou rété fidèl a Jéova. Pou nou touvé bon zanmi, méyè biten ki ni, sé kè fò noumenm nou sé on bon zanmi pou lézòt (Mat. 7:12). Pa ègzanp, Labib ka ankourajé-nou a ba lézòt tan an nou é fòs an nou, siwtou sa « ki bizwen èd » (Éféz. 4:28). Ès ou ka vwè on moun an lasanblé a-w kè ou té’é pé édé ? Ès ou pé ay fè konmisyon ba on pwoklamatè ki ja ni on bèl laj oben ki malad é ki pé pa sòti an kaz a-y ? Ès ou pé préparé on ti manjé ba on fanmi zafè a-y mélé ? Si ou konnèt sèvi èvè jw.org^® é aplikasyon-la JW Library^®, ès ou té’é pé édé sèwten frè é sè adan lasanblé a-w pou yo osi bénéfisyé dè bèl trézò ou ka touvé adan sé zouti-lasa ? Lè nou ka fè tousa nou pé pou édé lézòt, byensouvan nou ka pli kontan (Akt 20:35).

¹⁵ Zanmi an nou ka édé-nou andiré sé éprèv-la nou ka jwenn la, é sa ka édé-nou rété kalm. Menmjan Éliyou kouté Jòb lè i té ka palé-y dè soufrans a-y, zanmi an nou ka pran tan kouté-nou lè nou ka palé dè sa nou ka rèsanti (Jòb 32:4). Fò pa nou konprann kè yo ké pran désizyon an plas an nou. Men sa té ké saj dè kouté-yo lè yo ka ban-nou konsèy ki bazé asi Labib (Pwov. 15:22). Èvè imilité, wa David aksèpté kè zanmi a-y édé-y. Menmjan ki-y, lè nou an difikilté, fò pa nou akwè-nou é fè konsi nou pa bizwen èd a zanmi an nou (2 Sam. 17:27-29). Sé vré, lè nou ni  dé bon zanmi konsa, sé on bèl kado Jéova ka ban-nou ! (Jak 1:17).

16. Dapré Filipyen 4:6, 7, a ki kondisyon nou pé ni trankilité-la Bondyé ka bay la ? Bay on ti èsplikasyon.

¹⁶ (Li Filipyen 4:6, 7.) Poukwa Jéova ka di-nou kè sé « grasa Kris Jézi » nou pé risivwè trankilité-la i ka bay la ? Sé paskè, onsèl jan tchè an nou é lèspri an nou pé trankil, sé si nou ka konprann ka ki posib grasa Jézi, é si nou ni fwa adan wòl-la i ni la. Pa ègzanp, grasa sakrifis-la i fè la, Jéova pé padonné péché an nou (1 Jan 2:12). Lidé-lasa ka soulajé-nou toubònman ! Anplisdisa, konm Jézi Wa adan wayòm a Bondyé, i ké fè ansòt pou tout soufrans nou ka sibi akòz dè Satan é sistèm a-y disparèt (Iz. 65:17 ; 1 Jan 3:8 ; Rév. 21:3, 4). Mi on bèl lèspwa mi ! É menmsi misyon-la Jézi ban-nou la pa mòl, i ka pwomèt-nou kè i ké la ka soutyenn-nou touléjou jiskatan sistèm-lasa bout (Mat. 28:19, 20). Sa ka ban-nou onpakèt kouraj toubònman ! Ni twa biten fondal nou bizwen pou tchè an nou rété kalm. Nou bizwen soulajman, lèspwa é kouraj.

17. a) Ka on krétyen pé fè pou tchè a-y rété kalm ? b) Sèlon Jan 16:33, ki biten nou ké kapab fè ?

¹⁷ Alò ka pou-w fè pou tchè a-w rété kalm lè ou ka touvé-w anba on gwo éprèv ? Ou pé rivé fè sa si ou ka imité Jézi. On prèmyé biten fò-w fè, sé priyé é kontinyé priyé kèlkèswa sa ki rivé. Dézyèm biten, obéyi Jéova é pòté bon mannèv adan prédikasyon-la, menm lèwvwè sa difisil. É twazyèm biten fò-w fè, sé chèché èd owa zanmi a-w. Konsa lapé ki ka vin dè Bondyé ké pwotéjé tchè a-w é lèspri a-w. É kon Jézi, ou ké pé gangné konba-la douvan nenpòt ki difikilté (li Jan 16:33).