Winston, kijan ou aprann konnèt Bondyé ? Di-nou sa tibwen.

An grandi adan on fanmi a agrikiltè o Kwinsland, an Òstrali. Fanmi an mwen pa té adan pon rèlijyon. Konm nou té ka viv on ti koté on jan apa, sé près yenki fanmi an mwen an té ka frékanté. Lè an té ni apépré 12 an, an koumansé chèché kimoun Bondyé yé. An priyé-y pou mandé-y édé-mwen konnèt lavérité asi-y. Détwa tan apré, an pran pawtikilyé an mwen é an touvé on travay a Adélaid, adan pawti Sid a Lòstrali. Lè an té ni 21 an, an té vin fè dé ti jou vakans a Sidné, é sé la an fè konésans èvè Pamela. I palé-mwen dè on rèlijyon yo ka kriyé « anglo-izraélizm ». Adan rèlijyon-lasa, sé moun-la ka kwè kè sé anglé-la sé désandan a sa yo ka kriyé « tribi a Izrayèl ki pèd ». Sèlon yo, sé tribi-lasa ka korèsponn èvè sé dis tribi a wayòm di Nò la, kè yo té chayé pa fòs o 8^èm syèk avan épòk an nou. Lè an ritouné a Adélaid, an palé dè sa èvè on kolèg-travay an mwen ki té ka étidyé Labib èvè sé Témwen a Jéova la. An rété ka palé èvè-y pannan déotwa zèdtan tousèl, siwtou dè kwayans a sé Témwen-la, é an rann-mwen kont kè an té sòti jwenn répons a priyè-la an té fè la lè an té timoun. An té ka dékouvè lavérité asi Kréyatè an mwen é asi wayòm a-y ! An té touvé ‘pèwl-la ki ni onlo valè la’ (Mat. 13:45, 46).

Pamela, vou osi ou koumansé chèché pèwl-lasa lè ou té toujenn. Kijan ou fè touvé-y ?

An grandi adan on fanmi ki té ka kwè an Bondyé onlo. An lévé a Kòfs Awbour, on ti vil ki ka touvé-y an Nouvo-Gal di Sid. Pap’an mwen, manm’an mwen é gran-paran an mwen osi rantré adan rèlijyon  anglo-izraélizm la. Tifrè an mwen, gransè an mwen, mwen-menm, é bon enpé kouzen an mwen, aprann kè tout pèp ki sé désandan a sé anglé-la ni favè a Bondyé. Men an pa té ka rivé kwè sa, é an pa té ka santi-mwen toupré Bondyé. Lè an té ni 14 an, an ay adan tout kalté légliz ki tini, batis, advantis, é dòt ankò. Men sa pa gè édé-mwen.

Plita, fanmi an mwen vin rété Sidné, é sé la an fè konésans èvè Winston, ki té vin fè dé ti jou vakans. Kon i sòti di, apré nou palé ansanm, i koumansé étidyé èvè sé Témwen-la. Dépi sa, chakfwa i té ka voyé on lèt ban mwen, té ni onpakèt vèwsé a Labib adan ! An pé’é manti ba-w, odépa, an té on jan enkyèt, sa té ka jous énèwvé-mwen. Men piti-a-piti, an rann-mwen kont kè sa i té ka di la té ka sanm sa sé vérité.

An 1962, an ay rété Adélaid pou an té pé pli pré Winston. I té òwganizé-y pou an ay rété aka on fanmi ki té Témwen, Thomas é Janice Sloman, ki té misyonè onlè an Papwazi-Nouvèl-Giné. A pa ti janti yo té janti èvè mwen ; an té ni 18 an sèlman, é yo édé-mwen toubònman pou an té aprann konnèt Jéova plibyen. Sé konsa mwen osi an koumansé étidyé Labib, é an pa tadé a konprann kè sété lavérité. Apenn nou mayé, Winston é mwen ataké on vi èstraòwdinè ka sèvi Jéova. Nou jwenn éprèv, men lanmou an nou pou bèl pèwl-la nou té touvé la pa jen fin grandi.

Winston, kijan sa pasé lè ou koumansé sèvi Jéova ?

Tibwen tan apré nou mayé, Jéova wouvè on prèmyé « gran pòt » douvan an nou, pou nou té pé sèvi-y plis (1 Kor. 16:9). A moman-lasa, sété frè Jack Porter, ki té rèsponsab a siwkonskripsyon an nou. Jòdijou, i ka sèvi adan Komité a filyal a Lòstralazi. Li é madanm a-y, Roslyn, ankourajé-nou a pran sèwvis pyonyé pèwmanan, é nou rété pyonyé pannan senk lanné. Lè an té ni 29 an, yo mandé-nou sèvi adan siwkonskripsyon-la. Fò nou té pasé vwè sé frè-la adan sèwten lilèt o Pasifik Sid, kè filyal a lé Fidji té ka jéré. Té ni Samoa Amériken, Samoa, Kiribati, Naourou, Niwé, Tokélaou, Tonga, Touvalou, é Vanouatou.

An tan-lasa, asi sèwten lilèt ki té lwen a tout biten, ni moun ki pa gè té ka fè sé Témwen-la konfyans, kifè fò-nou té fè atansyon (Mat. 10:16). Pa té ni onlo pwoklamatè adan sé lasanblé-la, é dépawfwa ponmoun pa té pé ban-nou on koté pou nou rété. Adan ka-lasa, fò nou té mandé moun adan sé vilaj-la si nou té pé dòmi akaz a yo. Yo té toujou byen janti èvè nou.

Winston, travay a tradiksyon la ka entérésé-w toubònman. Poukwa ?

Onlè, sé frè-la ki té ka viv o Tonga-la té ni yenki déotwa trak é déotwa bwochi an tonjyen, on lang yo ka palé an Polinézi. Yo té ka sèvi èvè on liv an anglé, La vérité qui conduit à la vie éternelle, pou yo té kondui on étid biblik. Lèwgadé, twa frè ki té vin pou on lékòl yo té òwganizé pou sé ansyen-la, té dakò pou tradui liv-lasa an tonjyen, magré anglé a yo pa gè té ka monté mòn. Pamela tapé tèks-la alamachin, é nou voyé-y ba Bétèl a Lézétazini pou yo té enprimé-y. Sa pran uit simenn apépré pou yo rivé an bout a projé-lasa. Menmsi tradiksyon-la pa té otòp, sé grasa piblikasyon-lasa onlo moun ki ka palé tonjyen vin konnèt lavérité. Pamela é mwen, nou pa tradiktè, men istwa-lasa fè-nou aprésyé travay a yo.

Pamela, ki diférans ou ka fè antrè lavi asi sé lilèt-la é lavi an Òstrali ?

Sa pa té ni ayen a vwè ! Tin dé koté, fò-nou té jéré on lawmé a moustik, on gwo chalè ka toufé-w, rat, maladi, é dépawfwa, manjé-la té fyè menm. Men pawkont, tou lé swa, a pa ti enmé nou té enmé gadé lanmè-la, adan fale an nou (an samoan, sé konsa yo ka kriyé kaz a moun Polinézi, ki pa ni masonn é ki ni on twa an pay).  Délè, lannuit, tèlman lalin-la té ka kléré, nou té ka vwè-y an lanmè-la é nou té ka rivé vwè sé pyé-koko la. Adan dé bèl moman konsa nou té ka anvi réfléchi é priyé, kifè nou té ka konsantré lèspri an nou asi sa ki té pozitif.

Nou vin enmé sé timoun-la onlo. Lè yo té ka vwè-nou, nou ki té blan é anplis ki té moun-vini, sa té ka étoné-yo. Sa té komik toubònman ! Lè nou té a Niwé, on tigason pasé men a-y asi bra a Winston é i di-y konsa : « An byen enmé plim a-w. » Sé dwèt prèmyé fwa i té ka vwè tousa pwèl asi bra a on moun, kifè i pa té menm sav kijan pou i té kriyé sa !

Sa té ka fè-nou lapenn dè vwè jan sé moun-la té maléré anba la. La yo té ka viv la té bèl toubònman, men pou yo té swangné-yo oben pou yo té touvé dlo potab, sété tout on bab. Magrésa, sa pa té ka pran tèt a sé frè-la. Pou yo, tousa té toutafè nòwmal. Yo té kontan ni fanmi a yo alantou a yo. Yo té kontan osi davwa yo té ni lonnè dè sèvi Jéova é dè ni on koté pou fè réinyon a yo. Ègzanp a yo édé-nou rété konsantré asi sa ki té pli enpòwtan, é sa édé-nou a kontinyé menné on vi senp.

Pamela, délè fò-w té ay chèché dlo é fò-w té kuit manjé ondòt jan. Kijan ou té ka fè ?

An pé di pap’an mwen mèsi. I aprann-mwen onlo biten, kon pa ègzanp fè on foyé-difé, kuit manjé asi-y é débouyé-mwen èvè sa ki ni. Onfwa, lè nou té a Kiribati, nou dòmi adan on toupiti kaz : twa a-y té an pay, atè-la té ni gravyé fèt èvè koray, é kaz-la limenm té fèt an banbou. Pou kuit manjé, fò an té fè on tou atè-la, é limé on boukan èvè pach a koko. Pou an té ni dlo, an té kay adan on pui é fò an té fè laké èvè sélézòt madanm-la ki té la la. Pou halé dlo-la monté, yo té ka sèvi èvè on èspès dè baton, kon lè ou kay lapèch. I té ka fè apépré 2 mèt longè, é yo té ka maré on kòd an bout a-y. Men olyé sé on zen yo té maré asi kòd-la, sé on bidon yo té ka mèt. Yonn apré lòt, chak sé madanm-la té ka jété kòd a yo an dlo-la, é o dènyé moman, yo té ka ba baton-la on ti koud pwagné pou bidon-la chalviré é pou i plen èvè dlo. An konpranndèdi sété ti afè, men lè tou an mwen rivé, an rann-mwen kont kè sa pa té fasil. An voyé kòd-la plizyè fwa, men ayen a fè : sé floté bidon-la té ka floté ! Toutmoun té oblijé ri sa, men aprésa, ni on madanm ki ban-mwen on pal. Toutmoun Kiribati té vréman janti é yo té enmé rann moun sèvis.

Zò toulédé té vréman enmé sèwvis a zòt asi sé lilèt-la. Ka zò ka sonjé é kè zò té’é swété pawtajé èvè nou ?

Winston : Sa pran tibwen tan pou nou rivé konprann mès é labitid a péyi-la. Pa ègzanp, lè sé frè-la té ka envité-nou manjé, yo té ni labitid mèt tout manjé-la yo té ni la douvan nou. Odépa, nou pa té sav kè fò-nou té lésé tibwen ba yo. Kifè nou té ka manjé tousa yo té ka mèt douvan an nou ! Ou ka tou konprann kè lè nou vin sav sa, nou koumansé lésé manjé ba yo osi. Nou té ka fè érè, men magrésa, sé frè-la pa té ka kòlè èvè nou. É a pa ti kontan yo té kontan vwè-nou près tou lé 6 mwa. Sèl Témwen yo té ka vwè anplis dè moun ki té an lasanblé lokal a yo, sété nou.

Anplisdisa, vizit an nou pèwmèt sé moun-la vwè sé témwen-la ondòt jan. Onlo adan yo té ka kwè kè sé frè-la té envanté on nouvo rèlijyon. Alò lè on rèsponsab èvè madanm a-y té ka sòti adan ondòt péyi pou vin vwè sé frè-la, nonsèlman moun a péyi-la té ka rann-yo kont kè Témwen a Jéova sé on vré rèlijyon, men anplisdisa, yo té ka touvé sa fò.

Pamela : Pawmi lé pli bèl biten an ka sonjé, sé lè nou té Kiribati. Té ni on toupiti lasanblé èvè onsèl ansyen, non a-y sété Itinikai Matera. I té ka fè tousa i té pé pou okipé-y dè nou byen konm i fo. Onjou, i vin owa an nou èvè on pannyé ki té ni onsèl zé adan-y. I di-nou : « Mi ba zòt. » Nou  pa té gè ni lokazyon manjé zé a poul anba-la. Tijès-lasa ka montré jan i té donan, é sa touché tchè an nou toubònman.

Kèlkè lanné apré, Pamela, ou fè on fòskouch. Ka ki édé-w tchenbé ?

An tonbé ansent an 1973. A moman-lasa, Winston é mwen té o Sid a Lèpasifik. Nou désidé rètouné an Òstrali, men lèwgadé, kat mwa apré, nou pèd bébé-la. Winston osi té boulvèsé. Sété bébé a-y osi. Piti-a-piti, doulè-la ki té an tchè an mwen la fébli, men i pa jen disparèt, jiskatan nou rèsèvwa Tou dè Gad a 15 avril 2009. Adan « Questions des lecteurs » ou té ka touvé répons a kèsyon-lasa : « Si on tibébé mò an vant a manman-y, ès ni lèspwa kè i résisité ? » Awtik-la rasiré-nou toubònman. I té ka èspliké kè, adan dé ka konsa, sé Jéova ka désidé, é kè i toujou ka fè sa ki jis. Gason a-y kay « détwi travay a Dyab-la ». Grasa-y, Bondyé ké édé-nou géri tout bobo kè lavi fè-nou trapé adan mond méchan lasa (1 Jan 3:8). Awtik-lasa édé-nou konprann plibyen valè a « pèwl »-la nou ni la lè nou ka sèvi Jéova. Si nou pa té ni èspérans a Wayòm-la, an ki sitiyasyon nou té’é yé ?

Apré nou pèd bébé-la, nou rèkomansé sèvi Jéova aplentan. Nou rété plizyè mwa ka ba sé frè-la on pal an Bétèl a Lòstrali, é aprésa, nou rèkomansé vizité sé lasanblé lokal la. Nou pasé kat lanné a Sidné é dòt tikoté on jan apa ki ka touvé-yo an Nouvèl Gal di Sid. Anfinaldikont, an 1981, yo envité-nou wouvin sèvi adan Bétèl-la, é sé la nou yé jousalè.

Winston, ou ka di sa ou viv adan sé lilèt-la o Pasifik Sid édé-w sèvi adan Komité a filyal a Lòstralazi ?

Wi, antoutjan ! Adan on prèmyé tan, yo mandé Bétèl a Lòstrali jéré prédikasyon-la o Samoa é o Samoa Amériken la. Aprésa, Bétèl-lasa é ta Nouvèl-Zéland fè yonn. Aprézan, Bétèl a Lòstralazi ka jéré on gran téritwa. Adan-y, ni Lòstrali, lé Samoa é lé Samoa Amériken, sé lilèt Kouk la, Nouvèl Zéland, Niwé, Timòw-Oriyantal, Tokélaou, é lé Tonga. An ni lokazyon vizité onlo adan sé téritwa-lasa antankè rèprézantan a lafilyal. Tousa an viv èvè sé frè é sè-la adan sé lilèt-la ka édé-mwen toubònman, aprézan kè an ka travay pou yo an Bétèl-la.

Pou fin, sa an pé di, sé kè lanné apré lanné, Pamela é mwen rann-nou kont kè a pa enki granmoun ki ka chèché Bondyé. Ni jennmoun osi ki anvi touvé ‘pèwl-la ki ni onlo valè la’, menmsi sa pa ka entérésé fanmi a yo (2 Wa 5:2, 3 ; 2 Kron. 34:1-3). Asirésèten, Jéova sé on Bondyé ki plen lanmou, é ki vlé kè toutmoun, ki yo jenn, ki yo ja ni on laj, viv pou touttan !

Lè nou koumansé chèché Bondyé, ja ni pliski 50 lannè dè sa, nou pa té sav ègzaktèman ola sa té’é menné-nou. Pa ni pon dout asi sa : vérité-la asi Wayòm-la sé on pèwl ki ni onlo valè, on trézò menm ! Nou byen désidé a pa jen lagé bèl pèwl-lasa !