1-2. a) Satan ka kouyonné moun. Ki mannyè i ka fè sa ? b) Dè ki biten nou kay palé adan awtik-lasa ?

SATAN, « papa a mansonj-la », ka kouyonné lézòm dépi an tan a Adan é Èv (Jan 8:44). Pa ègzanp, i ka di onpakèt biten ki pa vré asi lanmò, é asi sa ki ka pasé apré. Onpakèt koutim é kwayans ka vin dè sé fo-ansègnman-lasa. É akòz dè sa, sèwten frè é sè oblijé menné « on gwo konba pou lafwa » lèwvwè on fanmi a yo oben on moun a lantouraj a yo mò (Jid 3).

² Si yo ka mandé-w pawtisipé adan on koutim kon séla, ka ki pé édé-w rété fidèl a sa Labib ka anségné ? (Éféz. 6:11). Si sé asi on frè oben on sè a-w yo ka fè présyon, ka ou pé fè pou ankourajé-y ? Adan awtik-lasa, nou ké vwè ki konsèy Jéova ka bay anrapò èvè sa. Men pou komansé, an-nou vwè ka Labib ka di asi lanmò.

3. Ka prèmyé mansonj-la pòté ban nou ?

³ Bondyé pa té vlé kè lézòm mò. Men pou Adan é Èv té viv étèwnèlman, fò-yo té obéyi a on komandman tousenp Jéova té ba-yo : « Ou pa ni dwa manjé adan fwi a pyébwa a konésans a sa ki byen é a sa ki mal, pas jou-la ou ké manjé adan-y la, ou ké mò » (Jén. 2:16, 17). Sé la Satan vin mété grenn sèl a-y. I sèvi èvè on sèpan pou i té di Èv : « Zò pé ké pon mò. » Malérèzman, Èv kwè mansonj-lasa é i manjé adan fwi-la. Plita, mari a-y manjé adan osi (Jén. 3:4, 6). Sé konsa péché-la é lanmò vin ka ègzisté (Wom. 5:12).

4-5. Kijan Satan fè pou i kontinyé kouyonné lézòm ?

⁴ Kon Bondyé té di-yo, Adan é Èv mò. Men Satan kontinyé simé onpakèt mansonj asi lanmò. Pa ègzanp, i ka fè moun kwè kè lè on moun ka mò, sé yenki kò a-y ki ka mò, men konsi ni on biten adan moun-la ki ka kontinyé viv  antankè lèspri. Toutolon a listwa, mansonj-lasa é dòt mansonj kon sila kouyonné onlo moun (1 Tim. 4:1).

⁵ Kijan Satan fè pou i kouyonné tousa moun ? Konm i sav sa lézòm ka rèsanti parapòt a lanmò, i ka sèvi èvè sé santiman-lasa pou i fè moun kwè mansonj a-y. Bondyé kréyé-nou pou nou viv étèwnèlman, sé pousa nou pa anvi mò (Ékl. 3:11). Pou nou, lanmò sé on lènmi (1 Kor. 15:26).

6-7. a) Ès Satan rivé kaché lavérité asi sitiyasyon a moun ki mò ? Èspliké. b) Kijan vérité-la ki an Bib-la ka édé-nou pa pè ?

⁶ Men magré tout mannèv Satan pòté, lavérité asi lanmò pa rété kaché. An réyalité, sé alè ni plis moun ki konnèt é ki ka préché lavérité asi sitiyasyon a moun-mò é ki ka fè-w sav ki èspwa ki ni pou yo (Ékl. 9:5, 10 ; Akt 24:15). Sé vérité-lasa ka konsolé-nou pas yo ka anpéché lakrent é dout rantré an tèt an nou initilman. Pa ègzanp, nou pa pè moun-mò. Nou pa pè pou yo nonplis. Nou sav kè yo pa vivan é kè yo pé pa fè ponmoun ayen nonplis. Sé konsi yo té adan on pwofon sonmèy (Jan 11:11-14). Nou sav osi kè moun-mò pa’a rann-yo kont kè tan-la ka pasé. Sé pousa, lè larézirèksyon ké fèt, menm sa ki mò dépi plizyè syèk ké ni lenprésyon kè sé on ti tak tan ki pasé.

⁷ Ès ou dakò pou di kè lavérité asi sitiyasyon a on moun-mò senp, klè é lojik ? Sa pa ni ayen a vwè èvè mansonj a Satan ! É èvè sé mansonj-lasa, non sèlman Satan ka kouyonné moun, men anplisdisa i ka sali répitasyon a Kréyatè an nou. Pou nou byen konprann ki déga Satan fè, nou ké ègzaminé sé kèsyon-lasa : An ki sans mansonj a Satan sali répitasyon a Jéova ? Poukwa sé mansonj-lasa pousé onlo moun a kwè kè yo pa oblijé ba ranson-la Jézi péyé la pon valè ? Kijan sé mansonj-lasa fè lézòm soufè plis ankò ?

8. Dapré sa nou ka li adan Jérémi 19:5, kijan mansonj a Satan sali répitasyon a Jéova ?

⁸ Mansonj a Satan asi lanmò sali répitasyon a Jéova. Pa ègzanp, Satan ka fè moun kwè kè ni moun-mò ki ka soufè adan on lanfè plen difé. Ou ka rann-vou kont : sé mansonj-lasa ka fè Jéova,  on Dyé ki plen lanmou, pasé pou on moun ki ni otan méchansté ki Satan ! (1 Jan 4:8). Lè ou ka tann sa, kijan ou ka santi-w ? Men mi on kèsyon pli enpòwtan ankò : kijan Jéova ka santi-y ? Pa oubliyé kè Jéova hay tout kalté méchansté (li Jérémi 19:5).

9. Ka mansonj a Satan ka pousé onlo moun kwè anrapò èvè ranson-la yo ka palé dè-y la an Jan 3:16 é 15:13 ?

⁹ Mansonj a Satan fè onlo moun kwè kè yo pa oblijé ba ranson-la Jézi péyé la pon valè (Mat. 20:28). Satan manti osi lè i di kè lézòm ni on nanm imòwtèl. Si sa té vré, sa té’é vlé di kè toutmoun ja ni lavi étèwnèl é kè Jézi pa té bizwen bay vi a-y an ranson pou nou viv pou touttan. Men pa oubliyé kè sakrifis a Jézi sé on jès plen lanmou. Ponmoun poko jen fè on jès konsa an favè a limanité (li Jan 3:16 ; 15:13). Alò éséyé imajiné kijan Jéova é Gason a-y ka santi-yo, lè yo ka tann mansonj ki ka fè kado-lasa pasé pou on bétiz !

10. Poukwa nou pé di kè mansonj a Satan ka fè moun soufè plis ankò ?

¹⁰ Mansonj a Satan ka fè lézòm soufè plis ankò. Lè dé paran pèd on timoun a yo, défwa yo ka di-yo kè sé Bondyé ki pran-y pou fè-y vin on zanj an syèl-la. Ès mansonj-lasa ka konsolé-yo oben i ka fè-yo plis lapenn ankò ? Mi ondòt biten ankò. Légliz fè moun kwè kè sé méchan-la ka brilé an lanfè. É Légliz sèvi èvè fo-ansègnman-lasa pou fè moun konprann kè i té ni rézon dè brilé moun ki pa té dakò èvè ansègnman a-y. Sèlon sa on liv asi Listwa ka di, pétèt kè pawmi séla ki fè sé abominasyon-lasa, ni sa ki té vlé ba moun ki té kont Légliz « on ti lidé » asi sa lanfè yé. Yo té ka ba-yo on chans swadizan pou yo rèpanti-yo avan yo mò é pou yo pa brilé an difé étèwnèlman. Anplisdisa, adan onlo péyi ni dé moun ki ka santi-yo oblijé onoré zansèt a yo oben ki ka chèché bénédisyon a yo. Ni dòt ki pè zansèt a yo pini-yo, alò yo ka chèché a kalmé-yo. Nou ka konstaté kè tout kwayans ki bazé si mansonj a Satan pa’a pòté pon rékonfò. Okontrè, sé soufrans yo ka menné é yo ka fè moun pè initilman.

11. Ankijan fanmi oben zanmi, menmsi yo pa ni pon mové lentansyon, pé ka fè présyon asi nou pou fè-nou dézobéyi Bondyé ?

¹¹ Délè, fanmi an nou oben zanmi an nou, menmsi ou vwè yo pa ni pon mové lentansyon, vlé fè-nou pawtisipé adan on koutim kè Labib ka kondanné. Men konm nou enmé Bondyé é nou enmé Pawòl a-y, sa ka ban-nou fòs pou nou obéyi. Pétèt kè, pou fè-nou wont, yo ké di-nou kè nou pa té enmé moun-la ki mò la é kè nou pa’a rèspèkté-y. Oben yo ké di-nou kè akòz dè nou, mò-la ké fè malè rivé on moun. Adan dé ka konsa, kijan pou nou défann sé vérité-la ki an Bib-la ? Gadé kijan ou pé apliké sé prensip-la nou kay vwè la.

12. Ni onlo koutim ki pa annakò ditou èvè Labib. Kilès la ?

¹² Fò-w byen désidé a pa mélanjé-w adan pon kwayans é pon koutim ki pa annakò èvè Labib (2 Kor. 6:17). Adan on péyi an Karayib-la, ni onlo moun ki ka kwè kè lè on moun ka mò « lèspri » a-y ka rété asi latè pou i pini moun ki fè-y soufè. Sèlon sa on liv ka di, lèspri-la pé jous fè « gwo déga adan tout on popilasyon ». An Afrik, lè on moun mò, ni moun ka kouvè sé miwa-la ki an kaz-la é yo ka mèt  foto-la on jan pou i gadé masonn-la. Pou ki rézon ? Sèlon yo, fo pa on moun-mò vwè figi a-y ! Nou ki sé sèwvitè a Jéova, anponjan nou vlé pa pawtisipé adan sé kalté koutim-lasa ki bazé asi enpé mansonj a Satan ! (1 Kor. 10:21, 22).

13. Si ni on koutim ki ka parèt-vou on tijan dwòl, ka Jak 1:5 ka di-w fè ?

¹³ Si ou ni on dout asi sèwten mès-é-labitid, priyé Jéova pou mandé-y sajès a-y (li Jak 1:5). Aprésa, fouyé adan piblikasyon an nou. É si sa nésésè, mandé sé ansyen-la ki an menm lasanblé ki-w on konsèy. Yo pé’é pran pon désizyon an plas a-w, men yo ké édé-w touvé déotwa prensip kon séla nou sòti vwè la é ki ké vréman itil pou-w. Konsa, ou ké aprann sèvi èvè « kapasité ou ni pou-w jijé », é sa ké pèwmèt-vou « fè ladiférans ant sa ki byen é sa ki mal » (Ébr. 5:14).

14. Ki prékosyon fò-nou pran pou nou pa fè ponmoun tribiché ?

¹⁴ ‘Tousa ou ka fè, fè-y pou ba Bondyé glwa. Fè atansyon pou pa fè ponmoun tribiché’ (1 Kor. 10:31, 32). Avan nou désidé si nou ké pawtisipé adan on koutim oben on tradisyon, fò-nou réfléchi asi konsékans kè sa pé ni asi konsyans a lézòt é asi ta frè é sè an nou an pawtikilyé. Nou pa té’é vlé fè ponmoun tribiché ! (Mawk 9:42). Anplisdisa, nou vlé pa blésé ponmoun ki pa Témwen initilman. Lanmou ké fè-nou palé ba yo épi onlo rèspé, é sa ké ba Jéova glwa. Nou pé’é babyé èvè yo é nou pé’é fè jé èvè tradisyon a yo nonplis. Pa oubliyé kè lanmou puisan toubònman ! Lè nou ka aji èvè lanmou, lè nou ni konsidérasyon pou lézòt é lè nou ka rèspèkté-yo, nou pé jous rivé a fè moun ki kont nou vin pli dous.

15-16. a) Poukwa nou ka aji èvè sajès lè nou ka fè moun konnèt kwayans an nou ? Bay on ègzanp. b) Poukwa nou pé di kè sa Pòl maké an Women 1:16 itil pou nou ?

¹⁵ Fè moun ki alantou a-w sav kè ou sé on Témwen a Jéova (Iz. 43:10). Si fanmi a-w é vwazen a-w sav kè ou ka sèvi Jéova, ou ké pé jéré on sitiyasyon difisil pli fasilman. Mi sa Francisco, ki ka viv o Mozanbik ékri : « Lè mwen é Carolina, madanm an mwen, nou vin konnèt lavérité, nou èspliké fanmi an nou kè nou pé ké ay onoré moun-mò ankò. Men lè sè  a Carolina mò, pou nou té tchenn a mo an nou, sa pa té fasil. Sèlon koutim a péyi-la, lè on moun mò, yo ka fè on sérémoni é pannan sérémoni-lasa, yo ka plonjé kadav-la adan on ben. É yo ka fè tousa pou kalmé lèspri a mò-la. Aprésa, fò pi bon fanmi a-y pasé twa lannuit koté-la yo vidé dlo a ben-la. Pou fanmi a Carolina, sé-y ki té dwèt fè sa. »

¹⁶ Kijan Francisco é madanm a-y réyaji ? Mi sa Francisco di : « Konm nou enmé Jéova é nou vlé fè-y plézi, nou rèfizé pawtisipé adan koutim-lasa. A pa ti kòlè fanmi a Carolina té kòlè ! Yo tonbé an zo an nou é yo di-nou kè nou pa ni pon rèspé pou sé mò-la. Yo fè-nou sav kè yo pé’é vin vwè-nou ankò é kè yo pé’é édé-nou nonplis. Konm nou té ja èspliké-yo adan ki biten nou ka kwè é kè yo té ja kòlè, nou pa woupalé-yo dè sa ankò. Ni dé moun an fanmi-la ki pran ban nou é yo fè-yo sonjé kè nou té ja ba-yo pozisyon an nou. Apré kèktan, kòlè a fanmi a Carolina bésé, é nou wouvin byen èvè yo. Jous ni sa ki vin akaz mandé-nou piblikasyon. » Fo pa nou jen hont pozisyon an nou lè nou ka rété fidèl a sa Labib ka anségné asi lanmò ! (li Women 1:16).

17. Ka ki pé édé-nou montré kè nou sé « on véritab zanmi » pou on frè oben on sè ki pèd on moun i enmé ?

¹⁷ Lè on frè oben on sè pèd on moun i té enmé, fò-nou fè tousa nou pé pou nou sé ‘on véritab zanmi pou-y, on frè i pé konté asi-y lè malè ka rivé’ (Pwov. 17:17). Kijan nou ka montré kè nou sé « on véritab zanmi », siwtou lèwvwè yo ka fè présyon asi frè-la oben sè-la pou i pawtisipé adan on fèt ki pa annakò èvè Bib-la ? An-nou ègzaminé 2 prensip biblik ki pé édé-nou konsolé moun ki andèy.

18. Poukwa Jézi pléré, é ka istwa-lasa ka aprann-nou ?

¹⁸ « Fò-zòt pléré èvè moun ki ka pléré » (Wom. 12:15). Sé vré kè délè, nou pa toujou sav ka pou di on moun ki ni on gwo penn an tchè a-y. Pawfwa, nou pa oblijé di ayen, men lè moun-la ka vwè nou ka  pléré, i sav kè sa ka fè-nou lapenn pou-y. Lè Laza mò, Mari, Mawt é dòt moun ankò, mété pléré atè pas sa té ka fè-yo lapenn. Lè Jézi, zanmi a yo, rivé 4 jou plita, « dlo sòti an zyé a-y », magré i té sav kè i té kay résisité Laza (Jan 11:17, 33-35). Jézi pléré é sa montré sa Jéova limenm té ka rèsanti. Lè Mawt é Mari vwè Jézi pléré, sèten sa konsolé-yo é sa pèwmèt-yo konstaté kè Jézi té enmé-yo fò toubònman. Menmjan-la, lè frè é sè an nou ka vwè kè nou enmé-yo é kè nou ni konpasyon pou yo, yo ka santi kè yo pa tousèl, é kè yo ni dé zanmi ki plen bonté é ki ka soutyenn-yo.

19. Kijan nou pé apliké Éklézyas 3:7 lè nou bizwen konsolé on frè oben on sè ki andèy ?

¹⁹ « Ni on moman pou pé é ni on moman pou palé » (Ékl. 3:7). Ondòt fason tousenp nou pé konsolé on frè oben on sè ki andèy, sé lè nou ka pran tan kouté-y. Lésé frè a-w wouvè tchè a-y é pa touvé-w étoné si i ka « palé san réfléchi » (Jòb 6:2, 3). I ja tris, men anplisdisa fanmi a-y ki pa Témwen pé ka mété bon présyon asi-y. Alò priyé ansanm èvè-y. Mèt jounou atè douvan Jéova ‘ki ka tann priyè-la’ pou i ba frè-la fòs é pou i édé-y pou tout biten vin klè an tèt a-y (Sòm 65:2). Si ni mwayen, li Labib ansanm èvè-y. Oben li on awtik ki sòti adan piblikasyon an nou é ki pé fè-y dibyen. Pa ègzanp, zò pé li istwa a vi on moun ki vréman ankourajan.

20. Ka nou ké vwè adan awtik-la ki ka vin la ?

²⁰ Nou ni onlo rèkonésans davwa nou konnèt lavérité asi lanmò é davwa nou sav ké ni on bèl landèmen toubònman pou moun « ki adan sé tonm-la » ! (Jan 5:28, 29). Alò, ki sé èvè bouch an nou, ki sé èvè aksyon an nou, an-nou défann lavérité èvè onlo kouraj. É an-nou fè moun konnèt lavérité chakfwa lokazyon ka prézanté. Awtik a simenn-la ki ka vin la ké palé dè ondòt mwayen Satan ka itilizé pou i pé sa anpéché moun konnèt lavérité : i ka fè moun antré an kontak èvè mové-lèspri. Nou ké vwè poukwa fo pa nou mélanjé-nou adan ayen ki ni on rapò èvè pyèj dyabolik lasa.