1-2. Ka Jézi té vé di lè i di sa nou ka touvé an Jan 4:35, 36 ?

JÉZI sòti travèsé déotwa jaden. Sé pétèt déotwa chan a séréal (Jan 4:3-6). Sé jenn ti plant-la piti toujou : ka rété 4 mwa apépré avan larékòlt koumansé. Lèwgadé, Jézi ka di dé biten ki ka étoné moun. Mi sa i ka di : « Lévé zyé a zòt anlè é gadé sé jaden-la : yo ja bon pou larékòlt » (li Jan 4:35, 36). Ka i té vlé di pa la ?

² Men lè Jézi palé dè rékòlt, a pa dè grenn a séréal i té ka palé, men sé dè moun i té ka palé. An-nou gadé sa ki sòti fèt. Nòwmalman, Juif pa té ka palé ba Samariten, men li Jézi, i préché ba on madanm samaritèn. É madanm-la kouté-y ! An réyalité, pannan Jézi ka di kè sé jaden-la « ja bon pou larékòlt », ni enpé samariten ki ka vin owa-y pou i anségné-yo pas madanm samaritèn-la té ja palé-yo dè-y (Jan 4:9, 39-42). Mi sa on èspésyalis a Labib di anrapò èvè istwa-lasa : « Lèfètkè sé moun-la té tèlman présé pou ay jwenn Jézi é pou ay kouté-y [...] sa ka montré kè yo té kon grenn a séréal ki té ja bon pou larékòlt. »

3. Si ou ka vwè sé moun-la kon Jézi té ka vwè-yo, ou ké préché pibyen. Poukwa nou ka di sa ?

³ Ou ka préché bon nouvèl la. Men ka ou ka pansé dè sé moun-la ou ka préché ba-yo la ? Èskè pou-w yo kon grenn a séréal ki ja bon pou larékòlt ? Ében si sé sa, mi sa ki ké rivé : Prèmyèwman, ou ké préché konsi lafen toupré. Dézyèmman, ou ké kontan davwa ou ka fè tousa ou pé adan travay a prédikasyon-la. Labib limenm ka di : « Nou ka kontan lè péryòd a larékòlt rivé » (Iz. 9:3). É twazyèmman, lè ou ké ay préché, ou pé’é oubliyé kè chakmoun ou jwenn pé rivé  a vin on disip a Jézi dèmen. Alò, ou ké tchenn kont dè sa ki ka entérésé-y.

4. Ka nou ké vwè adan awtik-lasa ?

⁴ Pétèt kè pou disip a Jézi, sé Samariten-la pa té’é jen vin disip a-y. Men, Jézi pa té ka vwè sa konsa. I té ja ka vwè-yo ka vin èvè-y. Nou osi, fò-nou sonjé kè moun an téritwa an nou pé vin disip a Jézi. Lapòt Pòl ban-nou on bèl ègzanp adan domenn-lasa. Ka ègzanp a-y ka aprann-nou ? Adan awtik-lasa nou ké vwè 1) kijan i fè pou sav adan ki biten sé moun-la i té ka préché ba-yo la té ka kwè, 2) kijan i fè pou sav ka ki té ka entérésé-yo, é 3) ka ki édé-y vwè-yo kon dé moun ki té’é pé vin disip a Jézi dèmen.

5. Poukwa Pòl té ka santi-y alèz lèwvwè i té ka préché ba moun ki té an sinagòg-la ?

⁵ Souvantfwa, Pòl té ka préché adan sé sinagòg-la. Pa ègzanp, adan sinagòg a Tésalonik, « i sèvi èvè Lézékriti pannan twa saba pou i té rézonné » èvè sé Juif-la (Akt 17:1, 2). I dwèt té an zafè a-y lè i té k’ay adan on sinagòg pas Pòl sé té on Juif (Akt 26:4, 5). Konm i té konnèt sé Juif-la pa tchè, i té sèten dè-y lè i té ka préché ba-yo (Filip. 3:4, 5).

6. Poukwa sé moun-la ki té anlè plas a mawché-la a Atèn té diféran dè séla ki té an sinagòg-la ?

⁶ Tèlman yo té ka pèwsékité Pòl a Tésalonik é a Béré, i té oblijé chapé kò a-y é i rivé a Atèn. La osi, « i mété-y ka rézonné adan sinagòg-la èvè sé Juif-la é èvè dòt moun ki té ka adoré Bondyé » (Akt 17:17). Pawkont, asi plas a mawché-la, i vin touvé-y douvan dòt jan dè moun. Pawmi sé moun-la ki té ka kouté-y la, té ni filozòf é moun ki pa té juif. Pou sé moun-lasa, sa i té ka anségné la té nouvo. Mi sa yo di-y : « Sa ou ka di nou la, sa on jan bizaw » (Akt 17:18-20).

7. Dapré sa Akt 17:22, 23 ka di, Pòl tchenn kont dè sé moun-la lè i té ka préché ba yo. Kijan i fè sa ?

⁷ (Li Akt 17:22, 23.) Lè Pòl té ka préché a Atèn, i palé ba moun ki pa té juif. Donk, i pa palé ba-yo kon i té abityé palé ba sé juif-la an sinagòg-la. Prèmyé kèsyon i dwèt pozé-y sé : « Adan ki biten moun ki ka rété a Atèn ka kwè ? » I pran tan gadé alantou a-y, é sa pèwmèt-li vwè sa yo té abityé fè adan rèlijyon a yo. Lè Pòl té ka anségné sé moun-la sé vérité-la nou ka touvé adan Lézékriti, i té ka koumansé èvè biten i sav kè yo té’é aksèpté. Mi sa on èspésyalis a Labib di : « Konm sé té on krétyen ki té juif, i rivé konprann kè  sé Grèk-la pa té ka kwè an menm Bondyé ki sé Juif-la é sé krétyen-la. Men, i té ka éséyé montré sé Atényen-la kè Bondyé-la i ka palé-yo la, sé on Bondyé yo konnèt an réyalité. » Pòl té ka tchenn kont dè kwayans a sé moun-la pou i té préché ba-yo. I èspliké sé Atényen-la kè mésaj-la i té ka pòté ba yo la, té ka vin dè ‘Bondyé-la yo pa té konnèt la’ é kè yo té ka éséyé adoré. Menmsi sé moun-la ki pa té juif la pa té konnèt Lézékriti, Pòl pa jen mèt an tèt a-y kè yo pa té’é vin krétyen. Okontrè, i té ka vwè-yo kon séréal ki té ja bon pou rékòlté. Kifè, i té ka tchenn kont dè sé moun-la é i té ka fè ansòt pou yo touvé bon nouvèl-la entérésan.

8. a) Kijan ou ka fè pou sav adan ki biten moun a téritwa a-w ka kwè ? b) Si on moun ka di-w kè i ja ni rèlijyon a-y, ka ou té’é pé réponn-li ?

⁸ Fè kon Pòl, pran tan gadé alantou a-w. Éséyé vwè adan ki biten moun a téritwa a-w ka kwè. Ka i ni asi kaz a yo oben anlè vwati a yo ki pé édé-w sav ka ki ka entérésé-yo ? Ès non a yo, jan-la yo ka abiyé la, istil a yo, é jan-la yo ka palé la ka pèwmèt-vou sav adan ki rèlijyon yo yé ? Pétèt kè on moun di-w kè i ja ni rèlijyon a-y. Lè Flutura, on sè ki pyonyé èspésyal, ka tonbé anlè on moun ki ka di-y sa, mi kijan i ka réponn : « An pa vin mwen fòsé-w kwè adan menm biten ki mwen, men an té’é vlé palé-w dè... »

9. Lè on moun ja adan on rèlijyon, dè ki biten ou pé palé èvè-y pou ba-y anvi kouté-w ?

⁹ Dè ki biten ou pé palé èvè on moun ki ja adan on rèlijyon ? Palé-y dè biten ou ka kwè é kè li osi ka kwè. Pétèt kè sé onsèl Dyé i ka adoré, oben kè i dakò pou di kè sé Jézi ki sé sovè a limanité. Pétèt osi, i ka kwè kè tout pakèt méchansté-la ki ni aprézan la, Bondyé ké fè-y disparèt talè. Palé-y dè biten kè zòt toulédé ka kwè, konsa pétèt i ké anvi kouté mésaj a Labib.

10. Ka fò-nou chèché a fè, é poukwa ?

¹⁰ Pa oubliyé kè sé moun-la pa’a kwè adan tousa rèlijyon a yo ka anségné. Sé pousa, menmsi ou konnèt adan ki rèlijyon moun-la yé, fò ou chèché a sav adan ki biten i ka kwè vréman. Mi sa David, on pyonyé èspésyal ki ka viv an Òstrali ka di : « Ni onlo moun ki ka mélanjé sa filozòf ka di èvè sa rèlijyon a yo ka di. » Donalta, on sè ki ka viv an Albani, ka di : « Sèwten moun nou ka jwenn ka di kè yo ni rèlijyon a yo, men apré, yomenm a yo ka di kè yo pa’a kwè an Bondyé vréman. » É on frè ki misyonè é ki ka viv an Awjantin ka di kè ni dé moun ki ka di kè yo ka kwè adan Latrinité. Men yomenm a yo pa’a kwè kè Papa-la, Gason-la é  lèspri sen ka fòwmé onsèl Dyé. « Lè nou ni enfòwmasyon-lasa, sa pi fasil dè palé dè on biten kè nou toulédé ka kwè. » Alò, fò ou chèché a sav adan ki biten moun-la ka kwè vréman. Konsa, kon Pòl, ou ké pé ‘vin tout kalté biten pou tout kalté moun’ (1 Kor. 9:19-23).

11. Sèlon Akt 14:14-17, lè Pòl té ka préché a Lis, ka i fè pou moun té touvé mésaj-la entérésan ?

¹¹ (Li Akt 14:14-17.) Pòl té ka chèché a sav ka ki té ka entérésé sé moun-la é apré, i té ka bazé-y asi sa pou i té préché ba-yo. Pa ègzanp, lè i té a Lis, i palé ba on foulmoun ki pa té konnèt granzafè adan Lézékriti men ni sa osi ki pa té konnèt ayen menm. Kifè, i palé-yo dè biten yo té konnèt pou i té fè-yo réfléchi. Pa ègzanp, i palé dè jan latè ka pwodui onlo manjé é dè jan lézimen pé pwofité dè lavi. Lè i préché ba yo, i sèvi èvè dé mo ki senp é i pran déotwa ègzanp kè toutmoun té pé konprann fasilman.

12. Kijan ou pé vwè ka ki ka entérésé on moun é kijan ou pé itilizé sa lè ou ka préché ba-y ?

¹² Vou osi, chèché a sav ka ki ka entérésé moun a téritwa a-w, é apré, tchenn kont dè sa lè ou ka préché ba yo. Ka ki pé édé-w sav ka i ka entérésé on moun lè ou k’ay akaz a-y oben lè ou ka jwenn-li ? La ankò, pran tan gadé alantou a-w. Pétèt kè moun-la an jaden a-y, i pé ka li on liv, i pé ka réparé on vwati oben i pé ka fè ondòt biten. Alò, adan on ka kon sila, ou pé palé-y dè sa i ka fè, pou koumansé konvèwsasyon-la (Jan 4:7). Jis lenj a moun-la pé aprann-nou on biten asi-y ; pa ègzanp, sa pé édé-w sav ola i sòti, ki travay i ka fè, oben ki ékip i ka sipòté. Mi sa Gustavo ka di : « On tiboug a 19 an té ni foto a on chantè kè toutmoun konnèt asi triko a-y. An sèvi èvè sa pou koumansé palé èvè-y é i èspliké-mwen poukwa i té enmé chantè-lasa. Grasa ti kozé-lasa, nou koumansé on étid biblik, é aprézan, misyé sé frè an nou. »

13. Ka ou pé fè pou ba on moun anvi étidyé Labib ?

 ¹³ Lè ou ka pwopozé on moun étidyé Labib èvè-w, fò ou ba-y anvi aksèpté ; montré-y kijan sa i ké aprann ké édé-y (Jan 4:13-15). On jou, on sè non a-y sé Poppy, préché ba on madanm. I touvé sa Poppy di-y entérésan é i fè-y rantré. Lè Poppy rantré an kaz-la, i vwè kè anlè masonn-la, madanm-la té ni on diplòm a pwofésè a linivèwsité an syans a lédikasyon. Alò, i di madanm-la kè Témwen a Jéova osi ka fòwmé moun grasa on pwogram. É kè pwogram a ansègnman lasa bazé asi Labib. I palé-y dè sé réinyon-la osi. Madanm-la aksèpté on étid. Lèlandèmen menm i vin réinyon é on titak tan apré i vin adan on lasanblé a siwkonskripsyon. On lanné apré, i batizé. Pozé-w sé kèsyon-lasa : « Ki biten sé moun-la an ka viré vwè la ka touvé entérésan ? Konm nou ni on pwogram pou anségné Labib, ka an pé di-yo pou ba-yo anvi suiv-li ? »

14. Ka pou ou fè pou tchenn kont dè chak étidyan lè ou ka anségné-yo ?

¹⁴ Chakfwa ou k’ay fè étid a on moun, fò ou préparé-w byen. Pran tan sonjé fanmi a étidyan a-w, ka i enmé, jan yo lévé-y, ka i ja viv. Chwazi sé vèwsé-la ou ké li la, sé vidéo-la ou ké montré la é sé imaj-la ou ké itilizé la pou ou pé sa èspliké sé vérité-la ki an Bib-la. Pozé-w kèsyon-lasa : « Ka ki ké touché tchè a-y ? » (Pwov. 16:23). An Albani, on pyonyé yo ka kriyé Flora té ka étidyé èvè on madanm. Lèwgadé, madanm-la di-y franchman : « An pa dakò ditou èvè sa zò ka anségné asi larézirèksyon. » Flora pa ensisté. Mi sa i ka èspliké : « An rann-mwen kont kè avan madanm-la kwè adan larézirèksyon, fò i aprann konnèt Bondyé pas sé Bondyé-lasa ki pwomèt kè i ké résisité moun-mò. » Dépi sa, chakfwa Flora té ka fè étid a madanm-la i té ka palé-y dè lanmou a Jéova, dè sajès a-y é dè puisans a-y. Plita, madanm-la vin kwè tou natirèlman adan larézirèksyon. Jòdijou, i ka pòté bon mannèv an prédikasyon.

15. Sèlon Akt 17:16-18, sé Atényen-la té ka fè onlo mové biten kè Pòl pa té ka aprésyé. Ki biten ésa, é poukwa Pòl pa arété préché ba yo ?

¹⁵ (Li Akt 17:16-18.) A Atèn, té ni plen moun ki té ka adoré idòl. Onlo adan yo té ka fè péché sèksyèl é yo té dakò èvè sa sèwten filozòf ki pa té ka adoré Bondyé té ka di. Men Pòl pa arété préché pou yo é menm lè yo té ka fè jé èvè-y i pa té ka lésé sa dékourajé-y. Limenm a-y, avan i té vin krétyen ‘i té ka di bétiz asi Bondyé, i té ka pèwsékité sé krétyen-la é i té hadi’ (1 Tim. 1:13). Menmjan Jézi té sav kè Pòl té’é pé vin disip a-y, Pòl té sav kè sé Atényen-la té’é pé chanjé. É dayè pou yonn, plizyè adan yo mété-yo ka kwè ! (Akt 9:13-15 ; 17:34).

16-17. Ka ki ka montré kè tout kalté moun pé vin disip a Kris ? Bay on ègzanp.

¹⁶ O 1^é syèk, tout kalté moun vin disip a Jézi. Adan on lèt i maké ba krétyen ki té ka viv adan on vil grèk yo té ka kriyé Korent, Pòl di kè sèwten moun a lasanblé-lasa té ja fè onlo ka é kè yo té ja fè péché sèksyèl ki té sal menm. Aprésa, mi sa i di : « Sé konsa déotwa adan zòt té yé. Men yo bengné-zòt » (1 Kor. 6:9-11). Ès ou té’é di sé moun-lasa té’é chanjé é kè yo té’é vin krétyen ?

¹⁷ Jòdijou, onlo moun paré a fè chanjman ki nésésè pou vin disip a Jézi. Pa ègzanp, an Òstrali on pyonyé èspésyal, non a-y sé Yukina rivé konprann kè tout kalté  moun pé aksèpté mésaj-la ki an Bib-la. On jou, adan on biwo yo ka vann kaz é tè, i vwè on jenn madanm. Fi-la té ni plen tatouwaj asi-y é lenj-la i té ni la pa té ka ba-w anvi palé ba-y. Sa té’é pé dékourajé Yukina. Men mi sa limenm ka di : « An té andélidé men an ay palé ba-y kanmenm ». An vin sav kè tèlman Labib té ka entérésé-y, i té fè-yo tatouwé déotwa Sòm asi kò a-y ! Madanm-la aksèpté étidyé Labib é i koumansé vin réinyon *.

18. Poukwa fò pa nou jijé sé moun-la ?

¹⁸ Lè Jézi di kè sé Jaden-la té ja « bon pou larékòlt », ès sa té vlé di kè i té ka pansé kè lamajorité a sé moun-la té’é suiv li ? Awa ! Adan Lézékriti, yo té ja anonsé kè a pa granzafè a moun ki té’é ni fwa adan-y (Jan 12:37, 38). Anplis, Jézi té pé li an tchè a moun (Mat. 9:4). Men i té ka sonjé tikrazi moun-la ki té’é kwè adan-y la, é i té ka pòté bon mannèv pou préché ba toutmoun. Men nou, konm nou pa’a rivé li an tchè a moun, nou ka tou konprann kè nou pé’é pèwmèt-nou jijé ponmoun ni pon téritwa. Okontrè, fò nou mèt byen fon an tèt an nou kè sé moun-la pé vin disip a Jézi dèmen. Mi sa Marc, on frè ki misyonè o Biwkina ka di : « Souvantfwa, pannan an ka konprann on étidyan kay pwogrésé, i ka enn arété étid-la. É lè an ka pansé kè on étidyan pé’é fè granzafè, sé lè i ka pwogrésé. Sa montré-mwen kè méyè biten ki ni a fè, sé lésé lèspri sen a Jéova gidé-w. »

19. Kijan pou nou vwè moun a téritwa an nou ?

¹⁹ Pétèt kè ou ni lenprésyon kè adan téritwa a-w, pa ni onlo moun ki kon grenn a séréal ki ja bon pou larékòlt. Men sonjé sa Jézi té di disip a-y. I di-yo sé jaden-la ja bon pou larékòlt. Sé moun-la pé chanjé é vin disip a Kris. Pou Jéova, sé moun-lasa ni ‘onlo valè’ (Ajé 2:7). Si nou ka vwè sé moun-la kon Jéova é Jézi ka vwè-yo, nou ké chèché a sav ki biten yo ka kwè é ka ki ka entérésé-yo. Nou pé’é jijé sé moun-la two vit, men nou ké mèt an tèt an nou kè yo pé vin frè é sè an nou dèmen.