Malérèzman, lèwvwè an vin ni 13 an, an pa té bon zanmi èvè Jéova ankò. An té ni lenprésyon kè kanmarad-lékòl an mwen té ka bwè dlo a yo trankilman, é mwen, an té anvi fè menm biten ki yo. An té ka touvé kè fanmi an mwen té two karé é kè sé prensip-la ki an Bib-la té two rèd a suiv. É an té ka touvé kè pou adoré Jéova sa té ka mandé onlo travay menm. An pa jen arété kwè kè Bondyé ka ègzisté men an pa té bon zanmi èvè-y ankò.

An pa jen arété préché men an pa té ka fòsé kò an mwen nonplis. Lè an té k’ay préché an pa jen té ka préparé-mwen. Kifè, pou mwen té fè on ti kozé lè an té jwenn on moun, an té mélé kon sann é farin. Akòz dè sa, an pa té ni ponmoun mwen té viré vwè é an pa té ni pon étid biblik. Kifè, prédikasyon-la pa té ka mèt pon jwa an tchè an mwen é an pa té enmé sa ankò. An fin pa pozé-mwen kèsyon-lasa : « Kijan on moun ka fè pou ay préché chak simenn é chak mwa konsa ? »

Lè an vin ni 17 an, an santi kè fò an té ay viv vi an mwen tousèl an mwen. Kifè, an maré paké an mwen, an kité kaz a fanmi an mwen é an ay viv an Òstrali. Sa té rèd pou fanmi an mwen toubònman  ! Yo té enkyèt pou mwen, men yo té ka di-yo kè an té’é kontinyé sèvi Jéova byen konm i fo.

Lè an rivé an Òstrali, lanmityé an mwen èvè Jéova vin pi mové ankò. An koumansé ay réinyon tanzantan. An vin bon zanmi èvè déotwa jenn ki té enmé ay réinyon on fwa konsa men sa pa té ka pozé-yo pon pwoblèm dè ay bwè alkòl é dè ay dansé an bwat-dè-nui lèlandèmen-la. Lè an ka viré sonjé épòk-lasa, an ka rann-mwen kont kè an té ni on pyé adan lavérité é on pyé adan mond-la. Men, an pa té ka santi-mwen alèz ni adwat ni agòch !

Apépré 2 an apré, an fè konésans a on sè ki édé-mwen konprann ki sans mwen ba vi an mwen. I pa menm rann-li kont dè sa. An té ka rété èvè 5 sè sélibatè é nou akéyi rèsponsab a siwkonskripsyon la èvè madanm a-y pannan on simenn. Non a sè-la sé té Tamara. Pannan mari a-y té ka pòté bon mannèv pou édé lasanblé lokal la, Tamara té ka pasé tibwen tan èvè nou. A pa ti ri Tamara té ka fè-nou ri ! É an té enmé sa toubònman menm ! I té ka sousyé-y dè nou vréman é nou té ka santi-nou alèz èvè-y. Sé prèmyé fwa an té ka vwè on moun konsa. Sè-la té ka rantré an nannan a Bib-la é anmenmtan i té enmé fè chalè !

Lè Tamara té ka palé dè sé vérité-la ki an Bib-la é dè prédikasyon-la, i té ka mèt onlo chalè adan sa i té ka di. Tèlman i té enmé sa, sa ban-nou anvi fè kon-y. Tchè a-y té kontan pas i té ka ba Jéova sa i ni dè méyè, alòskè mwen, an té tris pas tousa an té ka fè pou Jéova an té ka fè-y ka ou vé fè. I té pozitif é i té ni tchè-kontan toubònman. É sa pousé-mwen chanjé vi an mwen bout pou bout. Ègzanp a-y fè-mwen sonjé on vérité ki vréman enpòwtan : Jéova vé kè nou sèvi-y èvè on tchè ki kontan é i vé kè nou vin douvan-y ka « kriyé tèlman nou kontan » (Sòm 100:2).

An té vé ni tchè-kontan kon Tamara men an té ni travay a fè. An pa chanjé tousuit men sa vin piti-a-piti. Aprézan, avan an té ay an prédikasyon, an té ka préparé-mwen é dè tanzantan an té ka pran sèwvis pyonyé an ranfò. Kifè an té ka santi-mwen pi alèz an prédikasyon é an pa té pè kon  avan ankò. An pran labitid sèvi èvè Bib-la an prédikasyon é sa té ka rann tchè an mwen kontan toubònman ! Tibwen tan apré an mèt-mwen ka pran sèwvis pyonyé an ranfò toulémwa.

An koumansé chwazi zanmi an mwen byen. An pa té ka frékanté yenki moun ki té ni menm laj ki mwen é an vin zanmi èvè moun ki té ka ba Jéova sa yo ni dè méyè é ki té kontan sèvi-y. Ègzanp a yo édé-mwen konprann ka pou mwen mèt prèmyé douvan an vi an mwen é an koumansé li Labib touléjou. Piti-a-piti, an vin enmé prédikasyon-la toubònman. Kifè, an vin pyonyé pèwmanan. Sa té ka fè plizyè lanné an po’o té santi-mwen byen konsa an lasanblé-la. Tchè an mwen té kontan é an té adoumanman.

On lanné apré, an jwenn Alex. Sé on frè ki té janti, ki pa té ka kaché kimoun i yé, ki té enmé Jéova é ki té enmé prédikasyon-la. I té asistan é sa té ka fè 6 an i té pyonyé pèwmanan. Anplisdisa, pannan 8 mwa apépré, Alex ay préché o Malawi pas sé té on koté pa té ni asé pwoklamatè. O Malawi, i ni lokazyon préché èvè plizyè misyonè é yo ankourajé-y kontinyé mèt Jéova prèmyé douvan an vi a-y.

An 2003, Alex é mwen nou mayé, é nou kontinyé sèvi Jéova aplentan. Nou aprann onlo biten ki èstraòwdinè toubònman é Jéova béni-nou plizyè fason diféran.

An 2009, yo voyé-nou sèvi antankè misyonè o Timò oriyantal. Sé on piti péyi ki ka touvé-y an Endonézi. Lè yo di-nou sa, sa étoné-nou é nou té on ti jan pè. Men, anmenmditan, a pa ti kontan nou té kontan ! 5 mwa apré nou ay rété a Dili. Sé kapital a péyi-lasa.

A Dili, lavi pa té menm biten ki la nou té ka rété avan. Fò-nou té fè kò èvè on nouvo kilti é èvè on nouvo lang. Manjé-la pa té menm biten nonplis é jan-la sé moun-la té ka viv la té diféran osi. Lè nou té k’ay préché, nou té ka jwenn onlo moun  ki té maléré é yo té ka fè-yo vwè bon mizè osi. Sé timoun-la près pa té k’ay lékòl oben yo pa té k’ay ditou. Adan péyi-lasa, ni on lagè ki fèt é té ni onlo vyolans *. Akòz dè sa, ni onlo moun ki enfim é ni onlo ki ka fè déprésyon.

Prédikasyon-la té èstraòwdinè toubònman ! Pa ègzanp, on jou an jwenn on jennfi ki té tris toubònman. I té ni 13 an é non a-y sé té Maria *. Ni kèlkè lanné dè sa, manman-y mò é i pa té ka vwè pap’a-y souvan. Kon onlo jenn ki ni menm laj ki-y, Maria pa té sav ka i té anvi fè adan lavi. Ni on jou, Maria té ka èspliké-mwen kijan i té ka santi-y é i mété-y ka pléré gwo-dlo. Men an pé’é manti ba-zòt, an pa té ka konprann ayen adan sa i té ka di-mwen pas an po’o té ka palé lang-la. Alò, an priyé Jéova é an mandé-y édé-mwen touvé dé ti lidé ki ké ankourajé-y. Aprésa, an pran déotwa pasaj adan Bib-la èvè-y pou konsolé-y. Piti-a-piti, an vwè Maria chanjé. I pa té menm moun-la ankò. Konpòwtèman a-y, istil a-y é vi a-y té diféran konnyéla. Kifè, i pran lèbatèm é konnyéla, i ni plizyè étid biblik. Jòdijou, Maria rantré adan fanmi a Jéova, on fanmi entèwnasyonal é i ka santi kè yo enmé-y toubònman.

Jéova ka béni toubònman travay a prédikasyon la ki ka fèt o Timò oriyantal. Menmsi lamajorité a sé pwoklamatè-la pran lèbatèm apré 2010, ni onlo adan yo ki pyonyé, asistan oben ansyen. Ni sèwten ki ka travay adan antèn a tradiksyon la é yo ka jouwé on wòl pou fè moun trapé nouriti èspirityèl la adan lang-la yo ka palé la adan péyi-lasa. Lè an té ka tann sé frè é sè-la ka chanté pannan sé réinyon-la, lè an té ka vwè-yo ka souri é lè an té ka vwè kijan yo vin bon bon zanmi èvè Jéova, sa té ka mèt onlo jwa an tchè an mwen toubònman.

O Timò oriyantal, lavi pa té menm biten ki an Òstrali men an pa jen konpranndèdi lavi té’é bèl konsa. Dépawfwa, nou té ka vwayajé an kaw é nou té ka séré kon sardin pas té ka ni plen moun an kaw-la. Anplisdisa, sé moun-la té ka monté èvè onpakèt légim an kaw-la é onpakèt pwason séché kè yo té achté anba mawché la. Délè, nou té ka fè on étid adan on ti kaz, atè-la té fèt antè é té ni dé ti poul ki té ka pronmlé toupatou. Tèlman té ka fè cho an ti kaz-la, a pa ti swé nou té ka swé ! Men magré tout sé difikilté-lasa, an té ka touvé sa bèl toubònman !

Lè an ka viré gadé dèyè, an ni onlo rèkonésans pou fanmi an mwen pas yo fè tousa yo té pé pou aprann-mwen enmé Jéova. Menm lèwvwè an pa té ka fè granzafè pou Jéova, yo soutyenn-mwen. An pé di kè sa Pwovèb 22:6 ka di, sé sa ki fèt pou mwen. Lè manman-mwen é pap’a-mwen ka vwè jan mwen é Alex ka sèvi Jéova, yo fyèw dè nou. Dépi 2016, Alex rèsponsab a siwkonskripsyon é nou ka vizité lasanblé ki ka touvé-yo adan téritwa a filyal a Lòstralazi.

Siwvwè an di on moun konnyéla la kè onlè an té ni dimal a préché, i pé’é kwè-mwen. Konnyéla la an enmé préché ! An fin pa rann-mwen kont kè si ou ka sèvi Jéova èvè tout tchè a-w, ou ké ni tchè-kontan poubon kèlkèswa éprèv ou ka jwenn. Ja ka fè 18 lanné an ka sèvi Jéova èvè Alex é an pé di kè sé pi bèl lanné a vi an mwen. Konnyéla an ka rann-mwen kont kè sa David té di Jéova adan on Sòm sé té lavérité : « Men tout moun ki ka kouri kaché owa a-w ké ni tchè-kontan, yo ké kriyé toutlè tèlman yo kontan [...]. Grasa-w, moun ki enmé non a-w ké ni tchè-kontan » (Sòm 5:11).