AWTIK POU ÉTIDYÉ 14
« Suiv-li alatras »
« Jézikris [...] soufè pou zòt, é i lésé on modèl pou zòt, pou zò suiv-li alatras » (1 PYÈ 2:21).
KANTIK 13 Christ, notre modèle
ON TI LIDÉ ASI SA NOU KAY VWÈ *
Jézi lésé mak a pyé a-y dèyè do a-y. Fò-nou suiv-yo alatras (gadé sé paragraf 1 é 2 la).
1-2. Ki ègzanp ki pé édé-nou konprann sa 1 Pyè 2:21 vé di ?
IMAJINÉ zò a plizyè, é zò ay fè on maché an montangn. La zò ay la danjéré é sé on koté ki plen nèj. Men ni on moun ki konnèt koté-lasa byen é sé-y ki ka gidé-zòt. Toupannan i ka maché douvan zòt, i ka lésé mak a pyé a-y an nèj-la. Lèwgadé, onlè, ou ka konstaté kè ou pa’a vwè gid-la ankò, men ou pa’a pran pè. Poukwa ? Pas vou é zanmi a-w, zò ka vwè mak a pyé a-y an nèj-la. Kifè, zò ka pòté mannèv pou zò suiv-li alatras.
2 Antankè disip a Jézi, adan on sans, nou ka maché on koté ki danjéré. É koté-lasa sé mond méchan-la nou ka viv adan-y la. Men érèzman, Jéova ban-nou méyè gid ki tini, gason a-y Jézikris, é nou pé suiv-li alatras (1 Pyè 2:21). Adan on liv ki ka palé dè Labib, yo ka di kè adan vèwsé-lasa, Pyè ka konparé Jézi èvè on gid. Talè la, nou di kè gid-la lésé mak a pyé a-y atè-la. Men menmjan-la, Jézi lésé tras pou nou suiv-yo. An-nou réponn a 3 kèsyon : Ka sa vé di suiv Jézi alatras ? Poukwa fò-nou fè sa ? Kijan pou nou fè-y ?
SUIV JÉZI ALATRAS, KA SA VÉ DI ?
3. Suiv tras a on moun, ka sa vé di ?
3 Lè ou ka suiv tras a on moun, ka sa vé di ? Adan Labib, délè, yo ka sèvi èvè lèmo « maché » é lèmo « pyé » pou palé dè sa on moun fè an vi a-y (Jén. 6:9 ; Pwov. 4:26). Nou pé di kè sa on moun fè pannan vi a-y ka touvé-y kon tras kè i ka lésé dèyè do a-y lè i ka maché. Alò, lè ou ka suiv tras a on moun sa vé di kè ou ka chèché a imité ègzanp a-y.
4. Suiv Jézi alatras, ka sa vé di ?
4 Alò ka sa vé di suiv Jézi alatras ? Sa vé di suiv ègzanp-la i lésé ban-nou la. Adan 1 Pyè 2:21, lapòt Pyè ka di-nou kè Jézi lésé on bèl ègzanp pou nou pas magré tout soufrans i jwenn, i andiré. Men ni mwayen nou imité Jézi adan dòt domenn ankò (1 Pyè 2:18-25). An réyalité, lè Jézi té asi latè, tousa i di é tousa i fè té bon, é i mérité kè nou imité-y.
5. Jézi té pawfé. Alò, ès nou pé suiv ègzanp a-y magré nou enpawfè ? Bay on ti èsplikasyon.
5 Men noutout enpawfè, alò, ès nou ké pé rivé suiv ègzanp a Jézi ? Asiré sèten ! Men sonjé : lè Pyè di kè fò-nou suiv Jézi alatras, i pa di kè fò-nou fè-y on mannyè ki pawfé. I di-nou fò-nou suiv-li dè pré. Sé vré kè nou sé dé moun ki enpawfè men si nou ka fè tousa nou pé pou suiv Jézi alatras, nou ké tchenn kont dè sa lapòt Jan maké. Mi sa i di :« Kontinyé viv kon Jézi viv » (1 Jan 2:6).
POUKWA FÒ NOU SUIV JÉZI ALATRAS ?
6-7. Poukwa nou pé di kè lè nou ka suiv Jézi alatras, nou ka vin pibon zanmi èvè Jéova ?
6 Si nou ka suiv Jézi alatras, nou ké vin pibon zanmi èvè Jéova. Poukwa nou ka di sa ? Prèmyèwman, pou nou viv on mannyè ki ka fè Jéova plézi, méyè ègzanp ki tini sé ta Jézi (Jan 8:29). Kifè, fò-nou suiv Jézi alatras, pou nou fè Jéova plézi. É nou pé sèten kè Pap’an nou ki an syèl-la ké vin zanmi èvè moun ki ka fè éfò pou vin zanmi èvè-y (Jak 4:8).
7 Dézyèmman, Jézi imité Pap’a-y on mannyè ki pawfé. Sé pousa Jézi té pé di : « Sila ki vwè-mwen la vwè Papa-la osi » (Jan 14:9). Nou pé imité kalité a Jézi é mannyè i té ka aji èvè lézòt. Lè i té asi latè, on jou, i jwenn on boug ki té ni lalèp é i montré kè i té ni pityé pou nonm-la. Ondòt kou ankò, i jwenn èvè on madanm ki té malad grav, é i montré kè i té ka konprann malérèz-la. É i toujou montré kè i té ni konpasyon pou moun ki té pèd on moun yo té enmé. É si nou ka imité Jézi, an réyalité, sé Jéova nou ka imité (Mawk 1:40, 41 ; 5:25-34 ; Jan 11:33-35). Pi nou ka imité Jéova, é pi nou ka vin bon bon zanmi èvè-y.
8. Si nou ka suiv Jézi alatras, sa ké édé-nou gangné mond-la. Kijansa ?
8 Si nou ka suiv Jézi alatras, nou pé’é lésé ayen anpéché-nou mèt Jéova prèmyé douvan an vi an nou. Avan jou-la i mò la, lavèy oswa, mi sa Jézi di : « An gangné mond-la » (Jan 16:33). I té vé di kè i pa lésé mantalité a mond-la détenn asi-y. I pa kouri dèyè menm biten ki sé moun-la ki an mond-la é i pa fè menm biten ki yo nonplis. Jézi pa jen oubliyé pou ki rézon Jéova voyé-y asi latè. Sé té pou défann non a Pap’a-y. É nou aprézan ? Adan mond-lasa ni onlo biten ki té’é pé anpéché-nou mèt Jéova prèmyé douvan an vi an nou. Si kon Jézi, sa ki pi enpòwtan pou nou sé fè volonté a Jéova, nou ké gangné mond-la (1 Jan 5:5).
9. Ka pou nou fè si nou vé viv pou touttan ?
9 Si nou ka suiv Jézi alatras, nou ké viv pou touttan. Ni on jenn boug rich ki mandé Jézi ka pou i té fè pou i pé sa ni lavi étèwnèl. Jézi réponn-li : « Vin, suiv-mwen » (Mat. 19:16-21). Ni sèwten Juif ki pa té ka kwè kè Jézi sé té Lèkris. Mi sa Jézi di-yo : « Mouton an mwen [...] ka suiv-mwen. An ka ba-yo lavi étèwnèl » (Jan 10:24-29). On jou Jézi té ka palé èvè Nikodèm. Sé té on misyé ki té adan sannédren-la é sa Jézi té ka anségné té ka entérésé-y. Mi sa Jézi di-y : ‘Tout moun ki ka montré kè yo ni lafwa adan mwen ké ni lavi étèwnèl’ (Jan 3:16). Nou ka montré kè nou ni fwa adan Jézi lè nou ka mèt sa i anségné an pratik é lè nou ka aji menmjan ki-y. Si nou fè sa, nou ké pé viv pou touttan (Mat. 7:14).
KA POU NOU FÈ POU SUIV JÉZI ALATRAS ?
10. Ka pou nou fè pou nou konnèt Jézi pibyen ? (Jan 17:3).
10 Si on moun vé suiv Jézi alatras, fò i aprann konnèt-li (li Jan 17:3). ‘Aprann konnèt Jézi’, sé on biten pou nou fè akontinyé. Fò-nou toujou chèché a konnèt Jézi pibyen, kivédi fò-nou chèché a sav kijan dè moun i yé, ki mantalité i ni, ka i enmé é ka i pa enmé. Kèlkèswa kantité tan nou adan lavérité, fò nou kontinyé fè éfò pou nou ‘aprann konnèt’ Jéova é Gason a-y pibyen.
11. Ka nou ka touvé adan sé 4 Évanjil-la ?
11 Konm Jéova enmé-nou é kè i vé kè nou konnèt Gason a-y, i fè déotwa sèwvitè a-y maké sé 4 Évanjil-la ki an Bib-la. Adan sé Évanjil-lasa, yo ka rakonté-nou vi a Jézi é ministè a-y. Yo ka di-nou ka i fè, ka i di é ka i rèsanti lèwvwè i té asi latè. Grasa sé liv-lasa, nou pé pran on tan pou réfléchi asi ègzanp-la Jézi lésé ban nou la (Ébr. 12:3). Lè nou ka li sé 4 Évanjil-lasa, nou ka touvé sé tras-la Jézi lésé dèyè do a-y la. Sé pousa, si nou vé aprann konnèt Jézi pibyen, fò-nou ègzaminé sé 4 liv-lasa. É sé konsa nou ké pé suiv Jézi alatras.
12. Pou sé Évanjil-la vréman itil pou nou, ka pou nou fè ?
12 Pou sé Évanjil-la vréman itil pou nou, a pa enki li pou nou li-yo. Fò-nou pran on tan pou nou étidyé-yo byen é fò-nou pran tan pou nou réfléchi asi sa nou li. É fò pa nou fè sa a dèmi ! (Gadé Joziyé 1:8, nòt). Konnyéla, an-nou palé dè 2 biten ki pé édé-nou réfléchi asi sé Évanjil-la é ki pé édé-nou mèt sa nou ka li an pratik.
13. Lè ou ka li on istwa adan on Évanjil, kijan pou ou fè imajinasyon a-w travay ?
13 1) Lè ou ka li sé Évanjil-la, fè imajinasyon a-w travay. Fè konsi ou té la lèwvwè istwa-la té ka déwoulé. Ka ou ka vwè ? Ka ou ka tann ? Ka ou ka rèsanti ? Pou ou rivé fè sa, pran on ti tan pou chèché déotwa détay adan sé piblikasyon-la Lòwganizasyon ka ban-nou la. Éséyé vwè ka ki fèt avan é ka ki fèt apré évènman-la ou ka étidyé la. Chèché a konnèt plis détay asi sé moun-la ki adan istwa-lasa é asi koté-la i ka fèt la. Lè ou ka étidyé on istwa adan on Évanjil, chèché a vwè ki détay yo ka bay asi istwa-lasa adan ondòt Évanjil. Pas délè, ou ka touvé on détay entérésan adan on Évanjil, é pétèt kè adan Évanjil-la ou ka étidyé la, ou pé’é touvé-y.
14-15. Adan sé Évanjil-la, nou ka aprann onlo biten enpòwtan. Ka nou pé fè pou nou mèt sé biten-lasa an pratik ?
14 2) Sa ou ka aprann adan sé Évanjil-la, mété-y an pratik an vi a-w (Jan 13:17). Apré ou fin étidyé on pasaj adan sé Évanjil-la, pozé-w sé kèsyon-lasa : « Ès ni on biten an aprann an istwa-lasa kè an pé mèt an pratik adan vi an mwen ? Kijan an pé sèvi èvè istwa-lasa pou édé ondòt moun ? » Pétèt kè istwa-lasa pé édé on moun ou konnèt. Alò éséyé vwè kijan ou té’é pé palé-y dè sa ou aprann èvè onlo lanmou é san bouskilé-y.
15 An-nou pran on ègzanp pou nou mèt sé 2 konsèy-la nou sòti vwè la an pratik. On jou, pannan Jézi té an tanp-la, i pran tan gadé sa on madanm té ka fè. Madanm-lasa té pèd mari a-y é i pa té ni granzafè.
ON VÈV KI MALÉRÉ
16. Rakonté-nou istwa-la nou ka touvé an Mawk 12:41.
16 Fè imajinasyon a-w travay (li Mawk 12:41). An-nou imajiné istwa-lasa. Nou an lan 33 a épòk an nou é nou lè 11 nizan. Jézi pa lwen pran mò a-y é i pasé près tout jouné a-y ka anségné an tanp-la. Men konm sé chèf a rèlijyon juif la pa té an favè a-y, i pran bon gaz jou-lasa. Tibwen tan avan, jous ni déotwa adan yo ki mandé-y kimoun ki ba-y dwa fè sa i ka fè la. Ni dòt ki pozé-y enpé kèsyon difisil pou pyéjé-y (Mawk 11:27-33 ; 12:13-34). Men konnyéla, Jézi déplasé é i ay mété-y ondòt koté an tanp-la. La i yé la, i ka rivé vwè sé bwèt a lajan-la. Kifè, pétèt kè i ka touvé-y on koté yo ka kriyé lakou a sé madanm-la. Aprésa i ka sizé é i ka pran tan gadé sé moun-la ki ka mèt lajan a yo adan sé bwèt-la. I ka vwè onlo richa ki ka mèt onpakèt lajan adan sé bwèt-la. Pétèt kè la i yé la, i ka tann bri-la sé pyès-la ka fè la lè sé richa-la ka mèt-yo adan sé bwèt-la.
17. An Mawk 12:42, Jézi ka pran tan gadé on biten. Ki biten ésa ?
17 Li Mawk 12:42. On ti moman apré, Jézi ka vwè on madanm ka pasé é i ka pran tan gadé ka i ka fè. Sé on ti malérèz é mari a-y ja mò (Lik 21:2). Biten-la rèd pou-y toubònman é pétèt kè i pa menm ni asé lajan pou i pé sa achté sa i bizwen pou viv. Magrésa, i k’ay owa sé bwèt a lajan-la, i ka lagé dé ti pyès adan yonn é i ka fè tibiten a-y pou ponmoun pa vwè-y. Lè nou ka réfléchi, nou ka tou konprann kè sé 2 ti pyès-monné-lasa pa fè granzafè a bri lè yo tonbé an bwèt-la. Jézi sav kè madanm-la mèt 2 lèpta an bwèt-la. Sé sé pyès-monné-lasa ki ni mwens valè a épòk-lasa. Èvè sa madanm-la mèt la, pa menm ni asé lajan pou achté onsèl mwano. É poutan, sé mwano-la té ka fè pawti a sé zozyo-la ki té ka kouté mwen chè la.
18. Sèlon Mawk 12:43, 44, ka Jézi di anrapò èvè sa madanm-la mèt adan bwèt a ofrann-la ?
18 Li Mawk 12:43, 44. Lè Jézi ka vwè éfò-la madanm-la ka fè la, sa ka touché-y toubònman. Jézi ka kriyé disip a-y, i ka montré-yo malérèz-la é i ka di-yo : « Vèv maléré lasa mèt plis ki toutmoun ». É aprésa, mi sa i ka èspliké-yo : « Yotout [kivédi sé richa-la] mèt sa yo té ni an plis men li, menmsi i maléré, i mèt tousa i té ni, tousa i té ni pou viv. » Madanm fidèl lasa ba Jéova tousa ki té ka rété-y pou viv. Jou-lasa, i montré kè i té ka fè Jéova konfyans é kè i té sèten kè Jéova té’é pran swen a-y (Sòm 26:3).
Lè on moun ka ba Jéova sa i ni dè méyè, félisité-y. Konsa, ou ké imité Jézi * (gadé sé paragraf 19 é 20 la).
19. Sa Jézi di anrapò èvè vèv-la ki té maléré la ka aprann-nou on biten enpòwtan. Ki biten ésa ?
19 Apliké sa istwa-lasa aprann-vou adan vi a-w. Pozé-w kèsyon-lasa : « Lè an ka pran tan réfléchi asi sa Jézi di anrapò èvè vèv-lasa, ka sa ka aprann-mwen ? » Éséyé mété-w an plas a madanm-lasa. Sèten i té anvi ba Jéova plis. Men i ba Jéova sa i té ni dè méyè piskè i ba-y tousa i té ni. É Jézi té sav kè ofrann-la vèv-la fè la té ni onlo valè pou Jéova. Sa ka aprann-nou on biten enpòwtan : lè nou ka ba Jéova sa nou ni dè méyè, kivédi lè nou ka sèvi-y èvè tout tchè an nou é èvè tout nanm an nou, a pa ti kontan i kontan ! (Mat. 22:37; Kol. 3:23). Jéova ka kontan lè i ka vwè kè nou ka fè tousa nou pé pou fè-y plézi. Noutout pa ni menm fòs-la é noutout pé pa ba Jéova menm kantité tan-la. Men nou ka tou konprann kè dépi nou ka fè tousa nou pé pou adoré Jéova, i ka aprésyé sa toubònman. Pa ègzanp, lè nou ka préché é lè nou ka pran réinyon an nou, sa ka mèt onlo jwa adan tchè a Jéova.
20. Kijan ou pé sèvi èvè sa istwa a vèv-la ka aprann-vou ? Bay on ègzanp.
20 Istwa a vèv-la ka aprann-nou onlo biten enpòwtan. Kijan ou pé sèvi èvè sa ou aprann ? Éséyé vwè kimoun ki té’é byen mérité ou fè-yo sonjé kè Jéova ka aprésyé sa yo ka fè. Sèten si ou di-yo sa, sa ké ankourajé-yo toubònman. Ès ou konnèt on sè ki ja ni on bèl laj, ki pa ni on bon santé é ki pa ni onlo fòs ankò ? Pétèt kè konsyans a-y ka bat-li oben kè i ka santi kè i sé on manb initil pas i pé pa fè tousa i té ka fè avan. Oben ès ou konnèt on frè ki ni on maladi ki pa’a géri, ki ka fè-y soufè é i dékourajé pas i pé pa vin réinyon toutlè akòz dè sa ? Si ou pran tan palé èvè yo é kè ou di-yo dé bèl ti pawòl, sèten sa ké ba-yo fòs é sa ké édé-yo (Éféz. 4:29). Fè-yo sonjé sa istwa a ti vèv-la ka aprann-nou. Sèten sa ké konsolé-yo, é sa ké fè-yo sonjé kè Jéova ka ni tchè-kontan lè nou ka ba-y sa nou ni dè méyè (Pwov. 15:23 ; 1 Tés. 5:11). Si nou ka félisité frè é sè an nou pas yo ka ba Jéova sa yo pé, menmsi yo ni lenprésyon kè a pa granzafè yo ka fè, nou ké suiv Jézi alatras.
21. Ka ou byen désidé a fè ?
21 Sé Évanjil-la ka ban-nou onlo détay asi vi a Jézi, é grasa sa, nou pé imité-y é nou pé suiv-li alatras. Nou ni onlo rèkonésans pou bèl kado-lasa. Alò pétèt nou té’é pé étidyé sé Évanjil-la adan étid familyal an nou oben tousèl an nou. Pa oubliyé kè pou sa ou aprann adan sé Évanjil-la pé itil ba-w, fò ou fè imajinasyon a-w travay pannan ou ka étidyé, é fò ou mèt sa ou ka aprann an pratik. Nou sòti vwè kè fò-nou suiv Jézi alatras. Adan awtik-la ki ka vin la, nou ké vwè kè fò-nou kouté sa i ka di osi. Nou ké ègzaminé sé dènyé pawòl-la Jézi di la avan i té mò é nou ké vwè ka sa ka aprann-nou.
KANTIK 15 Vive le Premier né de Jéhovah !
^ par. 5 Antankè krétyen, fò-nou ‘suiv Jézi alatras’. Men ki tras Jézi lésé ? Awtik-lasa ké réponn a kèsyon-lasa. Anplisdisa, nou ké vwè poukwa fò-nou suiv-li alatras é kijan pou nou fè sa.
^ par. 60 SA NOU KA VWÈ ASI SÉ IMAJ-LA : On sè ka étidyé istwa a ti vèv maléré la é i ka pran tan réfléchi asi sa Jézi di anrapò èvè madanm-lasa. Aprésa i ka félisité on sè ki ja ni on bèl laj pas i ka sèvi Jéova èvè tout tchè a-y.
