1. Ka ki pé mèt onlo jwa an tchè an nou ?

 JÉOVA vlé kè nou ni tchè-kontan. Nou sav sa paskè lajwa ka fè pawti a fwi a lèspri sen a-y (Gal. 5:22). Konm on moun ka pli kontan lè i ka ba-y ki lè i ka risivwè, lè nou ka pòté bon mannèv an prédikasyon é lè nou ka touvé diféran mannyè pou nou soutyenn frè é sè an nou, sa ka mèt onlo jwa an tchè an nou (Akt 20:35).

2-3. a) An Galat 6:4, Pòl ka ban-nou 2 konsèy ki ka édé-nou toujou ni jwa an tchè an nou lè nou ka sèvi Jéova. Ki konsèy ésa ? b) Ka nou ké vwè adan awtik-lasa ?

² An Galat 6:4, nou ka touvé 2 konsèy kè lapòt Pòl ka ban-nou é ki ka édé-nou pou nou toujou ni tchè-kontan (li-y). Prèmyèwman, sa ki dwètèt pli enpòwtan pou nou, sé ba Jéova sa nou ni dè méyè. É si nou ka fè tousa nou pé pou sèvi-y, sèten nou ké ni tchè-kontan (Mat. 22:36-38). Dézyèmman, nou pa dwètèt konparé-nou èvè lézòt. Si nou ka rivé fè onlo biten pou adoré Jéova, ki sé pas nou ni on bon santé, pas nou konnèt onlo biten oben pas nou ni onlo kapasité, nou dwètèt di Jéova mèsi pousa. An réyalité, tousa nou ni, sé Jéova ki ban-nou-y. Men si adan prédikasyon-la on moun pli filé ki nou adan on domenn, fò-nou kontan pou-y paskè i ka itilizé kapasité a-y pou ba Jéova louwanj olyé i sèvi èvè kapasité a-y pou fè moun pòté-y anlè oben pou chèché pwòp entéré a-y. Alò, olyé nou anripaj èvè-y, an-nou gadé jan i ka fè pou nou aprann fè menm biten ki-y.

³ Adan awtik-lasa nou ké vwè ka nou pé fè si nou dékourajé davwa nou pé pa fè sèwten biten akòz dè sitiyasyon an nou. Nou ké vwè osi kijan nou pé sèvi èvè sé kapasité-la nou ni la méyè mannyè ki tini é nou ké vwè kijan ègzanp a lézòt pé itil pou nou.

4. Ki sitiyasyon ki té’é pé dékourajé-nou ? Bay on ègzanp.

⁴ Ni sèwten sèwvitè a Jéova ki ja ni on bèl laj oben santé a yo pa two flanbo, kifè yo pé pa fè sa yo té ka fè avan é yo ni dimal a aksèpté sa. An-nou palé dè Carol. Pannan on tan, i té ka préché on koté ki té ka manké pwoklamatè. I étidyé Labib èvè 35 moun é plizyè adan yo pwogrésé é yo jous pran lèbatèm. Prédikasyon a-y té ka maché toubònman ! Men on jou, i tonbé malad é dépi sa i près pé pa sòti akaz a-y ankò. Mi sa i ka di : « An sav kè akòz dè santé an mwen an pé pa fè tousa lézòt ka fè, men lèwvwè an ka réfléchi asi sa, an ni lenprésyon kè yo ka sèvi Jéova plibyen ki mwen. Ni dé biten an té’é byen anvi fè men an réyalité an pé pa fè yo, alò sa ka kasé 2 bra an mwen. » Carol anvi ba Jéova sa i ni dè méyè é sé on bon biten. Sa sèten, bèl létadèspri a-y ka mèt jwa an tchè a Pap’an-nou Jéova ki ni onlo konpasyon.

5. a) Ka fò-nou sonjé si nou pé pa fè sa nou té ka fè avan ? b) Kijan frè-la nou ka vwè asi sé foto-la toujou ba Jéova sa i ni dè méyè ?

⁵ Si délè ou dékourajé akòz dè on biten kè ou pé pa fè ankò, pozé-w kèsyon-lasa : « Ka Jéova ka atann dè mwen ? » Sa Jéova vlé sé kè ou ba-y sa ou ni dè méyè sèlon sitiyasyon-la ou ka viv la alèla. Imajiné sitiyasyon-lasa : On sè ki ni 80 an dékourajé pas i pé pa préché kon i té ka fè-y lèwvwè i té ni 40 an. I ka fè tousa i pé men pou-y, i pa ka fè asé pou fè Jéova plézi. Men ès sé konsa pou i vwè sa ? An-nou réfléchi asi sa. Lèwvwè i té ni 40 an, sè-lasa té ka ba Jéova sa i té ni dè méyè. É alèla i ni 80 lanné, i ka kontinyé ba-y sa i ni dè méyè ; kifè an réyalité i toujou ba Jéova sa i ni dè méyè. Si nou ka mèt an tèt an nou kè sa nou ka fè pa ka fè Jéova plézi pas pou-y nou pa’a fè asé, an-nou mèt pli fon an tèt an nou ankò kè sé enki Jéova ki ka désidé si sa nou ka fè ba-y ka fè-y plézi. Si nou ka ba-y sa nou ni dè méyè Jéova ké kontan-nou toubònman ! (gadé Matyé 25:20-23).

6. Ka ègzanp a Maria ka aprann-nou ?

⁶ Si nou ka konsantré-nou asi sa nou pé fè olyé nou konsantré-nou asi sa nou pé pa fè ankò, nou ké rivé ni tchè-kontan pli fasilman. An-nou palé dè on sè non a-y sé Maria. I tonbé malad é i pé pa préché onlo ankò. Odépa sa té ka kasé 2 bra a-y é i té ni lenprésyon kè i té initil. Men aprésa, i sonjé on sè adan lasanblé a-y ki kouché é ki pé pa lévé ankò é i désidé édé sè-lasa. Mi sa i ka di : « An òwganizé-mwen pou mwen té pé sa préché èvè-y akaz a-y. Nou té ka téléfoné moun é nou té ka voyé lèt pou yo. A chakfwa an té ka rantré akaz an mwen, a pa ti kontan an té kontan pas an té ka ba sè an mwen on pal ». Si nou osi nou ka konsantré-nou asi sa nou kapab fè olyé nou konsantré-nou asi sa nou pé pa fè ankò, sa ké mèt plis jwa an tchè an nou. Men vinvwè nou ka rivé fè onlo biten an prédikasyon, oben pétèt kè lè nou ka préché an lari, lè nou ka fè prézantwa oben lè nou ka étidyé Labib èvè on moun pa ègzanp, kò an nou bon toubònman, kijan nou ka aji ?

7. Ki konsèy Pyè ba sé frè é sè la ?

⁷ Adan prèmyé lèt-la i maké la, lapòt Pyè mandé sé frè é sè la sèvi èvè sé kapasité-la Bondyé ba-yo la pou yo ankourajé lasanblé-la. Mi sa i maké : « Si nouchak rèsèvwa on don, fò-nou itilizé don-lasa pou yonn fè lòt dibyen, kon moun ki ka byen jéré favè-la Bondyé ban-nou la é kè nou pa  menm mérité » (1 Pyè 4:10). Si Bondyé ban-nou on don, fò pa nou pè sèvi èvè-y pas nou ka di kè lézòt pé jalou-nou oben kè nou ka di kè sa pé rivé a dékourajé-yo. Si nou ka lésé sa frenné-nou, nou pé’é pé di kè nou ka ba Jéova sa nou ni dè méyè.

8. Dapré 1 Korentyen 4:6, 7, si Jéova ban-nou on don, poukwa fò pa nou blagé sa ?

⁸ Si Bondyé ban-nou on don, fò-nou sèvi èvè-y a san pou san men fò-nou fè atansyon pou nou pa blagé sa (li 1 Korentyen 4:6, 7). Imajiné kè kò a-w bon pou koumansé étid biblik. Fò pa ou pè sèvi èvè don-lasa ! Men sèvi èvè sé kapasité-la ou ni la é fè moun vwè sa ou kapab fè, a pa menm biten-la. Vinvwè ou sòti fè on bèl ti kozé èvè on moun é kè ou koumansé on étid èvè-y. Sèten ou présé rakonté toutmoun an gwoup a prédikasyon a-w sa. Men lèwvwè ou ka rètouvé-w èvè yo, ni on sè ki ka rakonté jan i fè pou ba on moun on jounal. Alò, li i ba on moun on jounal é vou, ou koumansé étidyé Labib èvè on moun. A moman-lasa, ka ou ké fè ? Ou sav kè lè ou ké rakonté gwoup a prédikasyon a-w sa ki rivé-w sa ké ankourajé-yo. Men pétèt ou ké préféré atann ondòt moman pou di-yo sa pas ou vé pa kè sè-la ki ba moun-la jounal-la pèd jwa a-y. Sa té’é janti toubònman si ou té ka fè sa. Men antouka, pa jan arété pwopozé moun étidyé Labib èvè-w. Jéova ba-w on don, alò sèvi èvè-y !

9. Kijan nou dwètèt sèvi èvè sé don-la nou ni la ?

⁹ Fò pa nou jen oubliyé kè sé Bondyé ki ban-nou tout sé kapasité-la nou ni la. Alò, fò-nou sèvi èvè yo pou fè frè é sè an nou dibyen olyé nou fè piblisité pou fè toutmoun sav sa nou sav fè (Filip. 2:3). Si nou ka sèvi èvè fòs an nou é èvè kapasité an nou pou fè volonté a Bondyé, nou ké pé ni tchè-kontan pou on bon rézon. Nou pé’é ni tchè-kontan pas nou ka fè plis biten ki lézòt oben pas nou pli fò ki yo men nou ké kontan pas nou ka ba Jéova glwa.

10. Si nou ka konparé-nou èvè lézòt, ka ki pé rivé-nou ?

¹⁰ Si i pa’a fè atansyon, on moun pé rivé a konparé-y èvè ondòt moun pas kò a-y bon adan on domenn alòskè kò a lòt moun-la pa gè bon adan domenn-lasa. Pa ègzanp, pétèt kè on frè ka fè bèl diskou. Kò a-y bon adan domenn-lasa toubònman. É an fon a tchè a-y, i pé rivé a pansé kè i ni plis valè ki ondòt frè ki ni mwens kapasité ki-y adan domenn-lasa. Men pétèt kè frè-lasa, sé on frè ki ka akéyi lézòt byen, ki ka lévé timoun a-y byen é pétèt kè i ka pòté bon mannèv an prédikasyon. A pa ti kontan nou kontan  davwa nou ni tousa frè é sè ki ka itilizé don a yo pou sèvi Jéova é pou édé lézòt !

11. Poukwa fò-nou fè tousa nou pé pou imité Jézi ?

¹¹ Sé vré, fò pa nou konparé-nou èvè lézòt, men lè nou ka gadé jan yo ka fè, nou pé aprann onlo biten. Pli bèl ègzanp nou pé ni sé ta Jézi. Menmsi i té pawfè nou pé pran ègzanp asi-y (1 Pyè 2:21). Si nou ka fè tousa nou pé pou imité sé kalité-la i té ni la é jan i té ka aji, nou ké vin on plibon moun é nou ké vin pli filé adan domenn a prédikasyon-la.

12-13. Ka ègzanp a David pé aprann-nou ?

¹² Adan Pawòl a Bondyé, nou ni onlo ègzanp a misyé é madanm ki té ni onlo fwa. É menmsi yo té enpawfè nou pé imité-yo (Ébr. 6:12). Pa ègzanp, lè Jéova palé dè David, i di kè sé ‘on nonm ki ka fè ègzaktèman sa ki ka fè-y plézi’ (Akt 13:22). Men David a pa té on moun ki té pawfè. I fè plizyè érè ki té grav toubònman, men magrésa sé on bèl ègzanp pou nou. Poukwa nou ka di sa ? Pas lèwvwè Jéova korijé David, David pa chèché èskiz, okontrè i aksèpté kè Jéova korijé-y é i rèpanti-y èvè tout tchè a-y. Sé pousa Jéova padonné-y (Sòm 51:3, 4, 10-12).

¹³ Lè nou ka réfléchi asi ègzanp-la David lésé ban nou la, mi sa pou nou mandé-nou : « Kijan an ka réyaji lèwvwè yo ka ban-mwen on konsèy ? Lè an fè on érè, ès an ni dimal a rèkonnèt sa ? Oben ès an ka chèché èskiz ? Ès an ni labitid di kè si sa rivé-mwen sé fòt a ondòt moun ? Ès an ka fè tousa an pé pou an pa woufè menm érè-la ? » Ou pé pozé-w déotwa kèsyon kon séla lèwvwè ou ka li istwa a dòt sèwvitè a Jéova ki té fidèl. Ès yo jwenn difikilté ki ka sanm ta-w ? Ki kalité yo montré kè yo té ni adan sitiyasyon-lasa ? Mi sa pou-w mandé-w a chakfwa : « Kijan an pé fè menm biten ki moun-lasa ? »

14. Ka ègzanp a frè é sè an nou pé aprann-nou ?

¹⁴ Lè nou ka gadé frè é sè an nou, ki yo jenn ki yo ja ni on bèl laj, yo pé aprann-nou onlo biten. Pa ègzanp, ès adan lasanblé a-w ni on frè oben on sè ki fidèl é ki ka andiré on éprèv ? Pétèt kè yo ka mèt présyon asi-y pou i fè kon toutmoun, pétèt kè fanmi a-y kont li pas i ka sèvi Jéova oben pétèt kè santé a-y pa two flanbo. Ès ou ka vwè déotwa kalité kè moun-lasa ni kè ou té’é byen enmé ni osi ? Lè ou ké réfléchi asi ègzanp a-y, pétèt sa ké montré-w ka ou pé fè pou  rivé about a sé difikilté-la ou ka jwenn la. Alantou an nou, nou ni plizyè frè é sè ki ni onlo fwa. A pa ti kontan nou kontan-yo ! (Ébr. 13:7 ; Jak 1:2, 3).

15. Ki konsèy Pòl ba sé frè é sè la é si nou ka suiv konsèy-lasa poukwa sa ké mèt plis jwa an tchè an nou ?

¹⁵ Fò chakmoun adan lasanblé-la fè tousa i pé pou lasanblé-la rété soudé é pou chakmoun antann-yo byen yonn èvè lòt. Bondyé té ba sé prèmyé krétyen-la diféran don é yotout pa té ka fè menm travay-la (1 Kor. 12:4, 7-11). Men apapousa yonn té anripaj èvè lòt. Okontrè, yotout té ka rété soudé. Pòl di sé frè é sè la kè fò yochak fè on éfò pou « konstwi kò a Kris ». Mi sa i maké ba sé Éfézyen-la : « Lè chak pati ka fonksyonné konm i fo, sa ka édé kò-la pou i kontinyé dévlopé é pou limenm grandi adan lanmou » (Éféz. 4:1-3, 11, 12, 16). Séla ki té kouté sa Pòl té di-yo la fè tousa yo té pé pou yo té pé sa antann-yo byen yonn èvè lòt é pou lasanblé-la té pé sa rété soudé. É jòdla, adan lasanblé an nou sé konsa sa ka pasé osi.

16. Ka pou nou byen désidé a fè ? (Ébré 6:10).

¹⁶ Fò ou byen désidé a pa jan konparé-w èvè lézòt. Ègzanp a Jézi pé aprann-vou onlo biten, alò pran tan gadé ègzanp a-y é fè tousa ou pé pou imité kalité a-y. Adan Bib-la nou ka touvé ègzanp a moun ki té ni onlo fwa é adan lasanblé an nou ni onlo frè é sè ki ni onlo fwa osi. Si ou ka pran tan réfléchi asi ègzanp a yo sa ké pòté onlo bon biten ba-w. Fè tousa ou pé pou ba Jéova sa ou ni dè méyè é ou pé sèten kè Jéova ‘pa enjis pou oubliyé sa ou fè’ (li Ébré 6:10). Wi, Jéova kontan tout sé éfò-la ou ka fè la pou ou pé sa fè-y plézi, alò kontinyé ni tchè-kontan toupannan ou ka sèvi-y !