1-2. a) Kimoun ki té Énis é ki difikilté i jwenn pou i té pé sa aprann Timoté kimoun ki té Jéova é Jézi ? b) Èspliké sa ou ka vwè asi imaj-la ki anlè po a jounal-la.

 LABIB pa’a palé dè batèm a Timoté men nou pé imajiné jan manman-y Énis té kontan jou-lasa é sa i rèsanti (Pwov. 23:25). An-nou imajiné sa ki pasé jou-lasa. Énis ka gadé gason a-y é i fyèw dè tiboug a-y. Timoté doubout an dlo-la. Manman-la kontan. Loyis, granmèw a Timoté la osi, é i doubout owa Énis. Énis ka rèspiré é i ka tchenn souf a-y toupannan yo ka plonjé Timoté an dlo-la pou batizé-y. Lè Timoté ka sòti an dlo-la, i kontan toubònman é manman-la pé pa tchenn ankò, dlo ka sòti an zyé a-y. Menmsi sa pa té fasil, Énis rivé fè Timoté enmé Jéova é enmé gason a-y Jézikris. Men ki difikilté Énis jwenn ?

² Adan fanmi a Timoté, toutmoun pa té ni menm rèlijyon-la. Pap’a-y té grèk é manman-y é granmèw a-y té juif (Akt 16:1). Pétèt i té jenngason lèwvwè Énis é Loyis vin disip a Kris. Men malérèzman, pap’a-y pa jen vin krétyen. Ki rèlijyon Timoté té’é chwazi ? Pétèt i té ja asé gran pou i pran pwòp désizyon a-y. Dépi toupiti yo té aprann-li sé tradisyon juif la, ès i té’é kontinyé suiv-yo ? Oben ès i té’é vin disip a Jézi kon manman-y é granmèw a-y ?

3. Dapré Pwovèb 1:8, 9, ka Jéova ka pansé dè tout sé éfò-la sé manman-la ka fè la pou timoun a yo pé sa vin bon zanmi èvè-y ?

³ Jòdijou osi, sé manman-la ki adan lavérité enmé fanmi a yo. Sa yo té’é pi enmé sé édé timoun a yo vin bon zanmi èvè Jéova é Jéova ka ba sé éfò-la yo ka fè la onlo valè (li Pwovèb 1:8, 9). Jéova pé édé onlo manman pou yo pé sa aprann timoun a yo enmé lavérité.

4. Ki difikilté onlo manman ka jwenn jòdijou ?

 ⁴ Dépawfwa, sé manman-la ka mandé-yo si timoun a yo ké chwazi sèvi Jéova kon Timoté fè-y. É sa toutafè nòwmal kè yo pozé-yo kèsyon-lasa. Poukwa nou ka di sa ? Pas sé paran-la sav byen kè adan mond-lasa, Satan ka mèt bon présyon asi timoun a yo (1 Pyè 5:8). Anplisdisa, ni onlo manman ki ka lévé timoun a yo tousèl a yo oben mari a yo pa Témwen. Pa ègzanp, mi sa on sè, non a-y sé Christine b ka rakonté : « Mari an mwen sé té on bon papa é i té enmé fanmi an nou toubònman. Men i pa té dakò ditou-ditou pou an té palé dè lavérité èvè timoun an nou. Pannan plizyè lanné, an té ka pléré onlo. An té ka di-mwen konsa kè timoun an mwen pé’é jen pé vin Témwen a Jéova. »

5. Ka nou ké vwè adan awtik-lasa ?

⁵ Si ou ni timoun, vou osi ou pé aprann-yo enmé Jéova é sèvi-y kon Énis fè-y èvè Timoté. Adan awtik-lasa, nou ké ègzaminé ègzanp a Énis. Nou ké vwè osi kè sa ou ka di é kè sa ou ka fè ni onlo enpòwtans. É pou fin, nou ké vwè kijan Jéova pé édé-w.

6. Dapré 2 Timoté 3:14, 15, kijan Timoté vin krétyen ?

⁶ Lè Timoté té piti, manman-y fè tousa i té pé pou édé-y konnèt sa ki té maké adan « sé liv sakré la » é i anségné Timoté sa sé juif-la té anségné-y. Sé vré, i pa té konnèt tousa ki adan Lézékriti piskè i pa té konnèt ayen asi Jézikris. Men sa yo té aprann-li la té ka sifi pou édé-y vin on krétyen. Anplisdisa, i té ja asé gran pou chwazi si i té’é vin krétyen. Alò, ka i fè ? Ében, i vin krétyen pas i té sèten kè sa yo té aprann-li la asi Jézi sé té lavérité é manman-y jouwé on gran wòl adan sa (li 2 Timoté 3:14, 15). Menmsi sa pa té fasil, Énis rivé édé Timoté aprann konnèt Jéova é Jézi. Sèten i té kontan toubònman ! Non a Énis ka vin dè on mo ki vlé di « rivé about » é i té ka pòté non a-y byen paskè i rivé about a onlo difikilté pou i té pé sa édé Timoté enmé Jéova é sèvi-y.

7. Kijan Énis kontinyé édé Timoté pwogrésé menm lèwvwè i pran lèbatèm ?

⁷ Lèwvwè Timoté pran lèbatèm, i fè on biten enpòwtan an vi a-y men apapousa Énis pa té’é kontinyé enkyété-y pou gason a-y. Pétèt kè Énis té ka mandé-y : Kijan Timoté té’é menné vi a-y ? Ès i pa té’é ni mové frékantasyon ki té’é détenn asi-y ? Ès i pa té’é ay Atèn pou fè étid a-y é ès i pa té’é koumansé kwè sa sé filozòf-la ki pa té ka adoré Jéova té ka anségné la ? Oben ès i pa té’é pèd tan a-y, dépansé énèwji a-y é pasé tout jénès a-y ka travay rèd pou vin rich ? Énis pa té pé pran sé désizyon-lasa an plas a Timoté men i té pé édé-y pran dé bon désizyon. Kijan i té pé fè sa ? I té pé kontinyé travay rèd pou édé gason a-y enmé Jéova plis ankò é pou édé-y ni rèkonésans pou tousa Jéova é Jézi fè ba yo. Men pa enki frè é sè ki ni madanm a yo oben mari a yo ki pa Témwen ki ka enkyété-yo pou timoun a yo. Menm lèwvwè papa-la é manman-la adan lavérité, yo pé ni dimal a édé timoun a yo sèvi Jéova. Alò, kijan ègzanp a Énis pé édé-yo ?

8. Kijan on manman pé édé mari a-y lèwvwè mari-la ka anségné timoun a yo lavérité ?

⁸ Fò ou étidyé Labib èvè timoun a-w. Si ou sé on manman é kè mari a-w Témwen, Jéova vé kè ou édé mari a-w pou zò pé sa aprann timoun a zòt konnèt-li.  Pa ègzanp, ou pé fè sa lèwvwè ou ka soutyenn-li pou fè étid familyal la. Lè ou ka palé dè étid-lasa, fò ou montré kè ou kontan. Réfléchi pou vwè ka ou pé fè pou toutmoun santi-yo byen lèwvwè zò ka fè étid familyal la. Anplisdisa, ou pé édé mari a-w vwè ki tèm i pé chwazi pou étid-la oben ki aktivité zò pé fè ansanm pannan étid-la. É si timoun a-w ja asé gran pou étidyé Labib adan liv-la Ou pé ni tchè-kontan pou touttan ! ou pé édé mari a-w a fè étid a yo.

9. Lèwvwè fò on manman fè étid a timoun a-y tousèl a-y, ka i pé fè ?

⁹ Ni sèwten manman ki ka lévé timoun a yo tousèl a yo é ni dòt aprézan mari a yo pa Témwen. Kifè, sé yo ki oblijé étidyé Labib èvè sé timoun-la. Si sé ka a-w, pa chaléré kò a-w, Jéova ké édé-w. Ou pé sèvi èvè zouti kè lòwganizasyon ka mèt a dispozisyon an nou pou anségné sé timoun-la. É pétèt kè ou té’é pé mandé sèwten paran ki ni èkspéryans kijan yo ka sèvi èvè sé zouti-lasa lèwvwè yo ka fè étid familyal a yo c (Pwov. 11:14). Jéova pé édé-w vwè kijan ou pé palé èvè timoun a-w. Mandé Jéova ba-w lèspri sen a-y pou i édé-w touvé dé ti kèsyon pou ou sav ka timoun a-w ka rèsanti é ka i ka pansé (Pwov. 20:5). Pétèt kè si ou pozé timoun-la on kèsyon kon : « Lè ou lékòl, ka ki pi rèd pou-w ? » sa ké édé-w koumansé on ti kozé èvè timoun-la ki ké aprann-vou onlo biten.

10. Ka on manman pé fè ankò pou édé timoun a-y konnèt Jéova ?

¹⁰ Fò ou pwofité dè tout lokazyon kè ou ni pou palé dè Jéova èvè timoun a-w. Fò ou fè tousa ou pé pou édé-yo konnèt kijan dè moun Jéova yé é fò ou rakonté-yo tout bon biten Jéova ja fè ba-w (Dét. 6:6, 7 ; Iz. 63:7). Sa enpòwtan toubònman kè ou fè sa si ou pé pa étidyé Labib èvè timoun a-w chak simenn kon ou té’é vé. Talè la nou palé dè Christine. Mi sa i ka èspliké : « An té vé palé sé timoun-la dè Jéova men souvantfwa an pa té pé fè-y. Alò, dépi an té ni lokazyon, an té ka fè-y. Pa ègzanp, lèwvwè nou té k’ay ponmlé oben lèwvwè nou té k’ay fè kanoé, an té ka pwofité pou palé èvè yo dè sa Jéova kréyé oben dè dòt biten pou édé-yo vin bon bon zanmi èvè Jéova. Lèwvwè timoun an mwen vin asé gran, an ankourajé-yo étidyé Labib tousèl a yo. » Ondòt biten ou pé fè, sé palé on mannyè ki pozitif dè òwganizasyon a Jéova é dè frè é sè a-w. Fò pa ou kritiké sé ansyen-la. Si ou ka di bon biten asi sé ansyen-la, pétèt sa ké ankourajé timoun a-w ay vwè sé ansyen-la si yo ka jwenn difikilté on jou.

11. Dapré Jak 3:18, poukwa sa enpòwtan kè on manman fè tousa i pé pou toutmoun viv anpé an kaz-la ?

¹¹ Fò ou fè ansòt pou toutmoun antann-yo byen an kaz-la. Pran labitid di mari a-w é timoun a-w kè ou enmé-yo. Lè ou ka palé dè mari a-w, toujou di dé biten pozitif anlè a-y é montré kè ou ka rèspèkté-y. Aprann timoun a-w fè menm biten osi. Si ou fè sa, ou ké pé palé èvè timoun a-w dè Jéova pi fasilman (li Jak 3:18). An-nou palé dè Jozsef, on pyonyé èspésyal ki ka viv an Woumani. Lèwvwè i té piti, pap’a-y té ka fè tousa i té pé pou anpéché ki li, ki manman-y, ki frè é sè a-y sèvi Jéova. Mi sa i ka rakonté : « Manman toujou té ka fè ansòt pou nou viv anpé an kaz-la. Pi papa té mové, pi manman té janti.  Lèwvwè manman té ka rann-li kont kè nou té ni dimal a obéyi é a rèspèkté papa, i té ka fè-nou réfléchi asi Éfézyen 6:1-3. Aprésa, i té ka fè-nou sonjé tout bèl kalité a papa é i té ka édé-nou konprann poukwa fò-nou enmé-y. Sa édé fanmi an nou viv anpé. »

12. Dapré 2 Timoté 1:5, kijan ègzanp a Énis aji asi Timoté ?

¹² (Li 2 Timoté 1:5.) Énis ba gason a-y on bèl ègzanp toubònman. Sèten i aprann Timoté kè lè on moun ni fwa an Bondyé vréman, i ka montré sa lèwvwè i ka aji (Jak 2:26). Sèten Timoté dwèt vwè kè manman-y té enmé Jéova fò é kè sé lanmou-lasa ki té ka pousé manman-y aji. Pétèt, i vwè osi kè manman-y té ni tchè-kontan pas i té ka sèvi Jéova. Ki bon biten ègzanp a Énis pòté ba Timoté ? Pòl di kè Timoté té ni on fwa solid kon manman-y men Timoté pa enn ni on fwa solid konsa. I té ni lokazyon vwè jan manman-y té ni on fwa solid é sa ba-y anvi imité-y. Menmjan-la jòdijou, onlo manman ka rivé touché tchè a timoun a yo ‘san menm yo palé’ (1 Pyè 3:1, 2). Vou osi, ou pé rivé fè sa. Kijansa ?

13. Rété bon bon zanmi èvè Jéova, sé sa ki dwètèt pi enpòwtan pou on manman. Poukwa ?

¹³ Rété bon bon zanmi èvè Jéova, sé sa ki dwètèt pi enpòwtan pou-w (Dét. 6:5, 6). Kon lamajorité a sé manman-la, ou ka fè onlo sakrifis. Pa ègzanp, pou ou pran swen a timoun a-w, ou ka pran onlo adan tan a-w, ou ka dépansé onlo lajan, défwa ou pa ka dòmi lannuit é ou ka fè dòt biten ankò. Men sa toutafè nòwmal pou-w. Menmsi ou ni onlo biten a fè, fò pa sa anpéché-w vin pibon zanmi èvè Jéova. Fò ou òwganizé-w pou ou touvé tan pou ou pé sa priyé, pou ou pé sa étidyé tousèl a-w é pou ou pé sa vin an réinyon. Konsa, ou ké vin pibon zanmi èvè Jéova é ou ké ba fanmi a-w é moun ki adan lasanblé a-w on bèl ègzanp.

14-15. Ka ègzanp a Leanne, Maria, é João ka aprann-nou ?

¹⁴ An-nou vwè ègzanp a déotwa jenn ki aprann a enmé Jéova é a fè-y konfyans grasa bèl ègzanp a manman-yo. Mi sa Leanne, fi a Christine ka rakonté : « Akaz, fò-nou té kaché-nou pou nou té étidyé Labib. Men lè nou té ka vwè bèl ègzanp a manman é jan i té byen désidé pou i pa jen raté pon réinyon, sa édé-nou toubònman menmsi nou pa té konnèt granzafè asi Labib. Nou té sav kè sé té lavérité avan menm nou té koumansé ay réinyon. »

¹⁵ An-nou palé dè on sè, non a-y sé Maria. Lèwvwè li, manman-y é frè é sè a-y té ka sòti an réinyon, dépawfwa, papa-la té ka vougaré-yo é i té ka aji èvè onlo vyolans épi yo. Mi sa Maria ka di : « A pa ti kouraj manman ni kouraj ! An pa konnèt ponmoun ki ni kouraj konsa. Lè an té timoun, dépawfwa, an pa té dakò pou fè sèwten biten pas an té ka sonjé ka lézòt ké di. Men, lè an té ka vwè jan manman té ni kouraj, menmsi an té pè, an pa té ka lésé sa pran lanmen asi mwen ankò. I toujou té ka mèt Jéova prèmyé douvan adan vi a-y. » Aprézan, an-nou palé dè on frè non a-y sé João. Pap’a-y pa té vé kè yo palé ni dè Jéova ni dè Labib akaz a-y. Mi sa João ka rakonté : « Pétèt sa ki ankourajé-mwen plis, sé lè an té ka vwè kè pou fè papa plézi, manman té paré a fè tout kalté sakrifis men pawkont, ayen pa té’é fè-y lagé Jéova. »

16. Kijan ègzanp a on manman pé ankourajé frè é sè a-y adan lasanblé-la ?

 ¹⁶ Sé manman-la, fò pa zò jen oubliyé kè bèl ègzanp a zòt pé aji asi frè é sè a zòt adan lasanblé-la. Pa ègzanp, lapòt Pòl rèmawké bèl ègzanp a Énis. Sé pousa, Pòl té ni lokazyon maké kè Timoté té ni ‘on fwa ki pa ipokrit é kè sé Énis ki té ni fwa-lasa an prèmyé’ (2 Tim. 1:5). Men kijan Pòl fè pou vwè kè Énis té ni on fwa solid konsa ? Pétèt i vwè sa lè i fè prèmyé vwayaj a-y a Lis antankè misyonè pas sé pé a moman-lasa kè i jwenn Énis é Loyis. É pétèt menm kè sé Pòl ki édé-yo pou yo té pé sa vin disip a Kris (Akt 14:4-18). Ou ka imajiné-w, Pòl maké on lèt ba Timoté 15 lanné apré, é poutan i té ka sonjé fwa a Énis, manman Timoté toujou. É i jous di kè madanm-lasa, sé on ègzanp. Nou ka tou konprann kè ègzanp a Énis ankourajé lapòt Pòl toubònman é pétèt i ankourajé onlo krétyen ki té ka viv a épòk-lasa osi. Si ou ka lévé timoun a-w tousèl a-w oben si mari a-w pa Témwen, ou pé sèten kè konm ou fidèl, ègzanp a-w ka ankourajé frè é sè a-w.

17. Si ou ka lévé timoun a-w adan lavérité é kè ou ni lenprésyon kè i pa’a pwogrésé. Ka ou pé fè ?

¹⁷ Pétèt kè ou ka fè tousa ou pé pou lévé timoun a-w adan lavérité men kè ou ka vwè kè timoun-la pa’a fè ni kim ni bouyon. Ka ou pé fè ? On biten pou ou sonjé sé kè pou lévé on timoun, sa ka pran tan. Kon nou ka vwè-y asi imaj-la ki k’ay èvè paragraf-lasa, lè ou ka simé grenn, i pé ba-w on pyébwa men ou pa sav si pyébwa-lasa  ké pòté on jou. Men pawkont, ou ké kontinyé ba-y dlo pas si ou fè sa konsa, ou pi sèten kè i ké pousé (Mawk 4:26-29). Menmjan-la osi, dépawfwa pétèt ou ka mandé-w si sa ou ka di timoun a-w ka touché tchè a-y. Ou pé pa désidé si timoun-la ké sèvi Jéova oben si i pé’é sèvi-y. Sé-y ki ka pran désizyon a-y men si ou ka kontinyé fè tousa ou pé pou aprann-li sé prensip-la ki an Bib-la, ou ka wouvè on pòt ba-y pou i pé sa vin zanmi èvè Bondyé (Pwov. 22:6).

18. Kijan Jéova pé édé timoun a-w vin bon zanmi èvè-y ?

¹⁸ Dépi an tan a Labib, Jéova ja édé onlo jenn vin zanmi a-y (Sòm 22:9, 10). I pé édé timoun a-w vin zanmi a-y si sé sa yo vé (1 Kor. 3:6, 7). Menmsi timoun a-w pa ka sèvi-y èvè tout tchè a yo, ou pé sèten kè i ké kontinyé enmé-yo (Sòm 11:4). É lèwvwè i ké vwè kè yo anvi fè-y plézi, menmsi sé adan on toupiti biten, i ké toujou la pou édé-yo vin zanmi a-y (Akt 13:48 ; 2 Kron. 16:9). I pé édé-w di sé timoun-la on biten é sé ègzaktèman sa yo bizwen tann a moman-lasa (Pwov. 15:23). I pé sèvi osi èvè on frè oben on sè pou montré timoun a-w kè i ka sousyé-y dè yo é kè i enmé-yo. Men a pa yenki lèwvwè sé timoun-la piti kè Jéova ka fè sa. Menm lèwvwè sé timoun-la ja gran, i pé fè-yo sonjé on vèwsé kè ou té montré-yo (Jan 14:26). Si ou ka fè atansyon a sa ou ka di é si ou ka ba timoun a-w on bèl ègzanp, ou ké kontinyé fòwmé-yo é Jéova ké béni-w.

19. Poukwa ou pé sèten kè ou ka fè Jéova plézi ?

¹⁹ Lanmou-la Jéova ni pou-w la pa ka dépann dè sa timoun a-w désidé fè adan lavi. An réyalité, Jéova enmé-w pas vou ou enmé-y. Si ou ka lévé timoun a-w tousèl a-w, Jéova ka pwomèt-vou kè i ké on papa pou yo é kè i ké pwotéjé-w (Sòm 68:5). Ou pé pa désidé si timoun a-w ké sèvi Jéova oben si yo pé’é sèvi-y. Men si ou ka kontinyé fè fon asi Jéova, é si ou ka kontinyé lévé-yo adan lavérité, ou pé sèten kè i kontan-w.