On sèwman, sé on biten ki séryé toubònman. Sé pé on biten on moun ka di oben on biten on moun ka pwomèt. Pli souvan ki rarman, lè on moun ka fè on sèwman, i ka fè sa douvan Bondyé. I pé fè sa èvè pawòl a-y oben i pé fè sa asi papyé.

Ni sèwten moun ki té’é pé pansé kè fò pa yo fè on sèwman pas Jézi di konsa : « Fò pa zò fè sèwman ditou [...]. Fò “wi” a zòt vlé di wi, é “non” a zòt, non ; pas tousa zò ka di anplis ka vin dè méchan-la » (Mat. 5:33-37). Jézi té sav byen kè délè Lwa a Moyiz té ka mandé sé Izraélit-la fè sèwman é kè plizyè sèwvitè a Jéova ki té fidèl té ni lokazyon fè sèwman osi (Jén. 14:22, 23 ; Ègz. 22:10, 11). Anplisdisa, adan sèwten sitiyasyon, Jéova limen a-y té ni lokazyon fè sèwman (Ébr. 6:13-17). Alò, nou ka tou konprann kè Jézi pa té vé di kè fò pa nou jen fè on sèwman. Men sa Jézi té vé, sé té avèti sé moun-la pou yo pa té fè sèwman pou biten initil. Lè nou ka fè on sèwman, Bondyé ka tann. Alò, fò-nou tchenn pwomès an nou pas sé sa i vé kè nou fè.

Men si yo ka mandé-w fè on sèwman, ka pou ou fè ? Prèmyé biten pou ou fè, sé mandé-w si ou ké pé rèspèkté pwomès a-w. Si ou pa sèten dè sa, pisimé ou pa fè sèwman. Mi konsèy-la Labib ka ban-nou la : « Vométan ou pa fè pon vé, olyé ou fè yonn é ou pa’a tchenn a mo a-w » (Ékl. 5:5). Aprésa, réfléchi asi sé prensip-la ki an Bib-la anrapò èvè sèwman-la ou k’ay fè la é aji annakò èvè konsyans a-w ki byen réglé asi Pawòl a Bondyé. Dè ki prensip fò-nou tchenn kont ? An-nou vwè déotwa.

Ni sèwten sèwman ki annakò èvè volonté a Bondyé. Pa ègzanp, lè 2 Témwen a Jéova ka mayé, jou-lasa, yochak ka fè on vé. Lè yo ka fè sa, sé konsi yo ka fè on sèwman douvan Bondyé é douvan sé moun-la ki la la. A moman-lasa, mari-la é madanm-la ka pwomèt kè yonn ké enmé lòt, kè yonn ké chéri lòt é kè yonn ké rèspèkté lòt ‘toutottan yo ké vivan’. (A pa toutmoun ki ka mayé ki ka di sa ègzaktèman konsa, men kanmenmsa sé on vé yo ka fè douvan Bondyé.) Kifè, a moman-lasa, yo mayé douvan lalwa é nòwmalman mayé a yo dwètèt diré tout vi a yo (Jén. 2:24 ; 1 Kor. 7:39). On moun pé fè on sèwman lè i ka mayé pas sa annakò èvè volonté a Bondyé é pas sé on biten ki séryé toubònman.

Ni sèwten sèwman ki pa annakò èvè volonté a Bondyé. Pa ègzanp, si yo ka mandé sé krétyen-la fè on sèwman pou défann péyi a yo èvè zàm oben si yo ka mandé-yo arété sèvi Bondyé, yo pé’é fè-y. Poukwa nou ka di sa ? Pas siwvwè yo té ka fè sa, sé té ké konsi yo pa té’é ka kouté komandman a Bondyé. Fò pa sé krétyen-la mélé-yo adan zafè a mond-la. Alò, yo pé pa mélanjé-yo adan pwoblèm a mond-lasa oben adan pon lagè (Jan 15:19 ; Iz. 2:4 ; Jak 1:27).

 Ni sèwten sèwman ki ka dépann dè konsyans a chakmoun. Délè, avan nou fè on sèwman, fò-nou pran tan ègzaminé konsèy-la Jézi ban-nou la byen. Mi sa i di : « Ba Séza sa ki ta Séza, men ba Bondyé sa ki ta Bondyé» (Lik 20:25).

Imajiné kè on krétyen vé fè on paspò oben kè i vé ni nasyonalité a péyi-la i ka viv adan-y la é kè i ka aprann kè yo ké mandé-y fè on sèwman pou i pwomèt kè i ké obéyi é kè i ké fidèl a péyi-lasa. Siwvwè sèwman-lasa ka mandé-y fè on biten ki pa annakò èvè lwa a Bondyé, konsyans a-y ki byen réglé asi Pawòl a Bondyé ké anpéché-y fè sa. Men pétèt kè gouvènman-la kè pèwmèt-li fè dé ti chanjman adan sèwman-la pou konsyans a-y rété nèt.

Lè on moun ka fè déotwa ti chanjman adan on sèwman i ka fè douvan on péyi, sa pé annakò èvè prensip-la nou ka touvé an Women 13:1 ki ka di : « Fò toutmoun soumèt-yo douvan sa ki ni otorité-la. » Kifè, on krétyen pé di kè pou-y, pa ni ayen dè mal adan sa pas lè i ka fè on sèwman konsa, i ka fè on biten Bondyé ka mandé-nou fè.

Sa enpòwtan osi kè nou tchenn kont dè konsyans an nou si yo ka mandé-nou sèvi èvè on biten oben si yo ka mandé-nou fè on jès lè nou ka fè on sèwman. An tan lontan, sé Women-la é sé Sit-la té ka fè sèwman asi épé a yo. Pou yo, sé konsi yo té ka kriyé dyé a lagè a yo pou sèvi-yo témwen. Yo té ka fè sa pou montré jan yo té sensè. Sé Grèk-la kanta yo té ka lévé men an syèl lè yo té ka fè on sèwman. Sa ka montré kè yo té ka rèkonnèt kè tin on puisans ki anhola ki ka gadé sa toutmoun asi latè ka di é ka fè é kè yochak ké ni kont a rann-li.

Nou sav byen kè pa ni pon sèwvitè a Jéova ki ké fè on sèwman asi on senbòl ki ka rèprézanté on nasyon si senbòl-lasa ni on rapò èvè fo-rèlijyon-la. Men vinvwè adan on tribinal, yo ka mandé-w mèt men a-w asi Labib é fè on sèwman pou di kè ou ké di yenki lavérité, ka pou ou fè ? Adan ka-lasa, ou pé désidé fè sa pas adan Labib yo ka palé dè moun ki té fidèl é ki fè on jès lèwvwè yo té ka fè on sèwman (Jén. 24:2, 3, 9 ; 47:29-31). Fò pa ou jen oubliyé kè lè ou ka fè on sèwman kon sila, sé douvan Bondyé kè ou ka pwomèt kè ou ké di yenki lavérité. Alò, fò ou paré a di lavérité kèlkanswa kèsyon-la yo pozé-w la.

Lanmityé an nou èvè Jéova ni onlo valè pou nou. Kifè, avan nou fè pon sèwman, nou ké pran tan priyé Jéova é nou ké pran tan gadé pou vwè si sèwman-la nou k’ay fè la ké pèwmèt-nou toujou ni on konsyans ki nèt. Anplisdisa, nou ké gadé si sèwman-lasa annakò èvè prensip a Labib. É siwvwè nou désidé fè on sèwman, fò-nou tchenn a mo an nou ! (1 Pyè 2:12).