Adan on sitiyasyon konsa, 1^é mayé-la bout lèwvwè misyé-la woumayé é 2^èm mayé-la valab. Mi sé konsa lasanblé-la dwètèt vwè sa. Pou nou konprann poukwa sé konsa pou nou vwè sa aprézan, an-nou vwè sa Jézi di anrapò èvè moun ki ka divòsé é moun ki ka woumayé.

An Matyé 19:9, Jézi èspliké kè ni onsèl rézon ki ka pèwmèt 2 moun-mayé divòsé. Mi sa i di : « Kèlkanswa moun-la ki ka divòsé èvè madanm a-y, si a pa pou on péché sèksyèl, é ki ka mayé èvè ondòt, sé on adiltè i ka fè. » Sa Jézi di la ka aprann-nou 2 biten : 1) sèlon Labib, si pa ni péché sèksyèl, on moun pa ni dwa divòsé é 2) si on nonm ka divòsé èvè madanm a-y alòskè pa ni péché sèksyèl é kè i ka mayé èvè ondòt madanm, i ka fè on adiltè a.

Ès pawòl a Jézi vlé di kè lè on misyé fè on péchè sèksyèl é kè i divòsé èvè madanm a-y, Labib ka ba-y dwa woumayé ? Pa oblijé. Lè on nonm-mayé ka fè on péché sèksyèl, madanm a-y ki inosan pé désidé si i ké padonné-y oben si i pé ké padonné-y. Si i pa padonné-y é kè yo divòsé douvan lalwa, yo toulédé pé woumayé si yo vlé, lè yo ké fin réglé divòs a yo.

Men mi sa ki pé fèt osi : madanm-la ki inosan la pé vréman anvi sové mayé a-y é i pé di mari a-y kè i ka padonné-y. Men vinvwè misyé-la ki fè péché sèksyèl la pa dakò pou rété èvè madanm a-y menmsi i ka padonné-y é kè misyé-la ka divòsé èvè-y douvan lalwa alòskè madanm-la pa té vlé divòsé. Ka ki ka pasé a moman-lasa ? Dapré Labib, i pa ni dwa woumayé paskè madanm a-y dakò pou padonné-y é pou rété èvè-y. Si mari-la pa ka démòd é kè i ka mayé èvè ondòt madanm kanmenm alòskè Labib pa ka ba-y dwa woumayé, i ka fè on adiltè ankò. A moman-lasa, sé ansyen-la ki adan lasanblé a-y la ké fè on komité a disiplin pou okipé dè afè-lasa (1 Kor. 5:1, 2 ; 6:9, 10).

Lèwvwè Labib pa ka otorizé on misyé woumayé é kè i ka fè-y kanmenm, kijan lasanblé-la ka vwè 1^é mayé-la é kijan i ka vwè 2^èm mayé-la ? Dapré Labib, ès 1^é mayé-la valab toujou ? Ès 1^é madanm-la ki inosan la pé désidé padonné misyé-la toujou oben pa padonné-y ankò ? Ès pou lasanblé-la lè misyé-la ka woumayé, li é nouvo madanm a-y ka viv dan lèpéché pas yo ka fè adiltè ?

Avan, pou lasanblé-la, lè on misyé té ka woumayé alòskè, dapré Labib, i pa té ni dwa fè sa, ki li, ki nouvo madanm a-y té ka fè adiltè toutotan madanm-la ki inosan la té vivan toujou, toutotan i pa té ka woumayé é toutotan i pa té ka fè on péché sèksyèl. Men lè Jézi palé dè moun ki ka divòsé é ki ka woumayé, i pa palé dè moun-la ki inosan la. Okontrè, i èspliké kè lè on nonm ka divòsé alòskè Labib pa ka ba-y dwa fè sa é kè i ka mayé èvè ondòt moun, i ka fè on adiltè. Adan ka-lasa, lè moun-la ka divòsé é kè i ka woumayé, i ka fè on adiltè kon Jézi èspliké é sé sa ki ka tchouyé 1^é mayé-la.

Lè on misyé ka divòsé èvè madanm a-y é ka woumayé, madanm-la ki inosan la pé pa désidé  kè i ka padonné misyé-la pou i kontinyé viv èvè-y oben kè i vé pa viv èvè-y ankò. I pa ni a pran gwo désizyon-lasa ankò. Anplisdisa, ki madanm-la ki inosan la mò, ki i woumayé, oben ki i fè on péché sèksyèl, sa pa ka chanjé ayen adan mannyè-la lasanblé-la ka vwè 2^ém mayé-la b.

Adan ègzanp-la nou pran la, mari-la ka fè on adiltè é i ka divòsé èvè madanm a-y. Men vinvwè mari-la ka divòsé alòskè i pa fè adiltè é i ka woumayé apré ? Oben vinvwè i pa fè pon péché sèksyèl avan i té divòsé men i ka fè yonn oben plizyè apré divòs-la é kè aprésa ankò i ka mayé èvè ondòt madanm alòskè 1^é madanm a-y té paré a padonné-y ? Kijan sa ka pasé a moman-lasa ? Adan tout sé sitiyasyon-lasa, lèfètkè i divòsé é kè i woumayé (sa sé on adiltè) sa ka tchouyé 1^é mayé-la. Kanta 2^èm mayé-la, kivédi nouvo mayé-la, i valab douvan lalwa. « Konm i woumayé aprézan, i pé pa viré adan sitiyasyon-la i té yé avan la ; 1^é mayé-la bout lèwvwè i divòsé, lèwvwè i fè on adiltè é lèwvwè i woumayé », kon niméwo a 15 févriyé 1980 a Tou dè Gad la té ka di adan sé paj 31 é 32 la.

Sé vré, sa ka chanjé jan nou té ka vwè sitiyasyon-lasa avan, men sa pa vlé di kè pou on krétyen, mayé a pa on biten ki sakré ankò oben kè lè on moun ka fè on adiltè sa pa si grav ki sa. Lè on moun ka divòsé èvè madanm a-y, alòskè Labib pa ka ba-y dwa divòsé, é kè i ka mayé èvè ondòt madanm, alòskè Labib pa ka ba-y dwa woumayé, sé ansyen-la ké désidé fè on komité a disiplin pou-y pas i fè on adiltè (si 2^èm madanm-la i mayé èvè-y la sé on Témwen a Jéova, sé ansyen-la ké désidé fè on komité a disiplin pou-y osi pas i fè on adiltè). Menmsi nou pa’a di kè sé 2 moun-mayé-lasa ka viv dan lèpéché pas yo ka fè adiltè, misyé-la pé’é pé ni rèsponsabilité adan lasanblé-la pannan bon enpé lanné. É toutotan ni moun ki choké akòz dè sa i fè la oben toutotan ni moun ki ka èstimé kè i pò’ò ni on bon répitasyon, i pé’é pé ni rèsponsabilité adan lasanblé-la nonplis. Avan sé ansyen-la ba-y pon rèsponsabilité adan lasanblé-la, fò-yo ké tchenn kont dè sitiyasyon a madanm-la i té mayé èvè-y la é dè sa madanm-lasa ka rèsanti osi. Pétèt misyé-la aji anbafèy pou kouyonné-y. É siwvwè yo té ni timoun ki pò’ò té majè lèwvwè misyé-la bétizé, fò sé ansyen-la ké ay vwè-yo osi pou sav ka yo ka rèsanti. Pétèt kè misyé-la enki lagé-yo (Mal. 2:14-16).

Lè nou ka vwè tousa pwoblèm sa ka menné lèwvwè on moun ka divòsé é kè i ka woumayé alòskè Labib pa ka pèwmèt-li fè sa, sé krétyen-la ka fè tousa yo pé pou vwè mayé-la kon Jéova ka vwè-y, kivédi kon on biten ki sakré (Ékl. 5:4, 5 ; Ébr. 13:4).