1. Lè nou réinyon é kè nou ka bay dé ti komantè, adan ki òbjèktif nou ka fè sa ?

 POUKWA nou ka vin réinyon ? Dabò pou yonn, sé pou nou pé sa ba Jéova louwanj (Sòm 26:12 ; 111:1). Anplisdisa, nou ka vin réinyon pou yonn pé sa ankourajé lòt pannan épòk difisil la nou ka viv la (1 Tés. 5:11). Lèwvwè nou ka bay dé ti komantè pannan sé réinyon-la, nou ka fè sé 2 biten-lasa.

2. Nou ni plizyè lokazyon pou bay dé ti komantè adan réinyon an nou. Kilès ?

² Chak simenn, nou ni plizyè lokazyon pou bay dé ti komantè adan réinyon an nou. Pa ègzanp, nou pé fè sa lèwikenn, pannan Tou dè Gad la. Nou pé fè sa lasimenn osi, lèwvwè nou adan pawti-la Trézò èspirityèl, lè nou ka fè étid biblik a lasanblé-la, é adan dòt pawti a réinyon-la ki ka pèwmèt moun pawtisipé.

3. Ki difikilté nou pé rivé a jwenn, é kijan Ébré 10:24, 25 pé édé-nou pou nou pé sa andiré sé difikilté-lasa ?

³ Noutout vé ba Jéova louwanj é noutout vé ankourajé frè é sè an nou. Men délè, pou bay on ti komantè, a pa on ti afè. Lè nou ka sonjé kè fò nou ké lévé men an nou é kè fò nou ké palé douvan toutmoun, pétèt sa ja ka istrésé-nou. Ondòt biten ankò, sé kè nou pé byen anvi pawtisipé men yo pa oblijé ban-nou réponn. Kijan nou pé rivé about a sé difikilté-lasa ? Ében sa lapòt Pòl maké ba sé Ébré-la pé édé-nou touvé répons-la. Lèwvwè i té ka palé dè jan sé réinyon-la té ni valè, i di kè sa enpòwtan kè « yonn ankourajé lòt » (li Ébré 10:24, 25). Lèwvwè nou ka bay on komantè é kè komantè-lasa toukout, sa ka ankourajé lézòt é sa ka montré jan nou ni fwa adan Jéova. Si nou ka sonjé sa, sa ké trankilizé-nou é menmsi yo pa’a fè-nou  réponn kon nou té’é vé, nou ké kontan kanmenm pas frè é sè an nou ka pawtisipé adan réinyon-la (1 Pyè 3:8).

4. Nou ké palé dè 3 biten adan awtik-lasa. Ki biten ésa ?

⁴ Adan awtik-lasa, nou ké vwè kijan yonn pé ankourajé lòt lèwvwè nou adan on ti lasanblé (lèwvwè pa ni granzafè a moun ki ka réponn). Nou ké vwè osi kijan yonn pé ankourajé lòt lèwvwè nou adan on gwo lasanblé (lèwvwè ni onlo moun ka lévé lanmen). É nou ké vwè osi ka nou pé fè pou, lèwvwè nou ka bay on ti komantè, sa nou ka di pé sa ankourajé lézòt.

5. Kijan yonn pé ankourajé lòt lèwvwè pa ni granzafè a moun adan réinyon-la ?

⁵ Konm pa gè ni moun adan on ti lasanblé oben adan on gwoup, sa pé rivé kè frè-la ki ka fè ti kozé-la oblijé atann on ti moman avan on moun lévé men a-y. Lè sa ka rivé, nou pé ni lenprésyon kè réinyon-la pa’a fin menm é lè sé konsa sa pa ka ankourajé-nou. Men adan on sitiyasyon konsa, ka ou pé fè ? Fò ou toujou paré a lévé men a-w pou bay on ti komantè. Si ou fè sa, sa ké ba lézòt gou pou yo pé sa réponn pi souvan.

6-7. Ka nou pé fè pou nou pa lésé istrès an nou pran lanmen asi nou lè nou ka bay on ti komantè ?

⁶ Men vinvwè chakfwa ou ka sonjé kè fò ou bay on ti komantè, tchè a-w ka bat a 2000 a lè, ka pou-w fè ? Ében prèmyé biten pou ou sonjé sé kè a pa vou tousèl ki adan ka-lasa. Men konm sé ankourajé ou anvi ankourajé frè é sè a-w, pétèt kè ni mwayen ou fè dé biten pou trankilizé-w. Men ka ou pé fè ?

⁷ Adan plizyè niméwo a Tou dè Gad la b ki ja sòti, sèten ou ké touvé plizyè lidé ki ké itil pou-w. Sa té’é byen si ou té ka wouvwè sé lidé-lasa. Pa ègzanp, préparé-w byen (Pwov. 21:5). Pi ou ké konnèt on sijé byen, pi ou ké santi-w alèz pou ou pé sa lévé men a-w. Anplisdisa, fè dé komantè ki toukout (Pwov. 15:23 ; 17:27). Lè ou ké sonjé kè sé on répons toukout ou kay bay, sa ké édé-w jéré istrès a-w pibyen. Si ou ka fè on komantè toukout lè yo ka ba-w réponn olyé ou palé onlo é kè ou palé dè plizyè biten anmenmtan, sé moun-la ki ka kouté-w la ké konprann pi fasilman. Pa ègzanp ou pé fè on fraz oben 2 fraz sèlman. Si ou pa’a li répons-la ki adan paragraf-la men kè ou ka èspliké-y èvè mo a-w ki ta-w é kè ou pa’a di twòp biten, sa ka montré kè ou byen préparé-w é kè ou ka konprann sé lidé-la byen osi.

8. Lèwvwè nou ka fè bon enpé éfò pou nou rivé fè on biten, kijan Jéova ka vwè sa ?

⁸ Imajiné ou ka éséyé suiv plizyè adan sé konsèy-la yo ba-w la adan sé piblikasyon-la. Ou ja bay 1 komantè, oben ou ja bay 2 komantè, men vin pou bay ondòt komantè ou ka swé kon kannari chatenn. Ka pou-w fè ? Ében sa pou ou mèt fon an tèt a-w, sé kè tout sé éfò-la ou ka fè la, Jéova ka vwè-yo é sa ka fè-y plézi (Lik 21:1-4). Jéova pé’é jen mandé-nou fè on biten ki ka fòsé kad an nou (Filip. 4:5). Alò, gadé pou vwè konmen komantè o maksimòm ou pé bay. Chwazi on òbjèktif ki ké édé-w fè sa é priyé Jéova pou i trankilizé-w. Pou koumansé, pétèt kè pou sèwten adan nou, òbjèktif-la yo ké chwazi la sé ké bay onsèl komantè ki ké toukout.

9. Ki difikilté nou té’é pé rivé a jwenn adan on gwo lasanblé ?

⁹ Si ni onlo pwoklamatè adan lasanblé a-w, ou pé rivé a jwenn ondòt difikilté. Pétèt kè  tèlman sé frè é sè la ka lévé men a yo pou réponn, ou pa menm ni lokazyon bay on ti komantè. An-nou palé dè Danielle c, on sè ki té toujou enmé réponn pannan sé réinyon-la. Pou-y, lè i ka fè sa, sé adoré i ka adoré Jéova, sa ka ba-y lokazyon ankourajé lézòt é sa ka édé-y mèt sé vérité-la ki an Bib-la fon an tèt a-y. Onlè, i chanjé lasanblé é té ni onlo pwoklamatè adan lasanblé-lasa. Kifè, yo té ka ba-y réponn mwen souvan é délè, yo pa té ka ba-y réponn pa menm onsèl fwa pannan tout réinyon-la. Mi sa i ka di : « An pa té kontan. Sé konsi yo té ka anpéché-mwen fè on biten ki té enpòwtan pou mwen. Lèwvwè sa ka fèt akontinyé, ou ka fin pa mandé-w si a pa pa èspré sé frè-la ka fè sa. »

10. Ni plizyè biten ou pé fè pou ou pé sa pawtisipé plis adan sé réinyon-la. Ki biten ésa ?

¹⁰ Ès ou ja rèsanti sa Danielle ka rèsanti ? Si sé sa, pétèt kè ou ka di kè ou pé ké réponn ankò é kè ou préféré kouté réinyon-la. Men pa lagé. Ka ou pé fè ? Pétèt kè sa ki pé édé-w, sé si ou ka préparé plizyè komantè pou chak réinyon. Konsa si yo pa ba-w réponn an koumansman a réinyon-la, ou ké ni tout rèstan a réinyon-la pou ou pé sa réponn. Lèwvwè ou ka préparé Tou dè Gad a-w, gadé pou vwè kijan sé paragraf-la lyanné èvè tèm a awtik-la. Konsa, toutolon a Tou dè Gad la, ou ké toujou ni on ti biten entérésan a di. Men délè, adan sèwten paragraf yo pé palé dè sèwten ansègnman a Labib ki pi rèd a konprann é pou èspliké sa, sa pa senp. Pétèt kè ou té’é pé préparé on ti komantè asi sa (1 Kor. 2:10). Poukwa sa entérésan dè fè sa ? Pas pétèt kè a moman-lasa, pé’é ni granzafè a moun ki ké lévé lanmen. Men imajiné ou ja fè tousa é magrésa pannan plizyè réinyon yo pa ba-w réponn, ka pou-w fè ? Pétèt kè avan réinyon-la koumansé, ou té’é pé ay owa frè-la ki kay fè pawti-la ou vé réponn la pou ou di-y a ki kèsyon ou té’é vé réponn.

11. Ka Filipyen 2:4 ka ankourajé-nou fè ?

¹¹ (Li Filipyen 2:4.) Jéova pousé lapòt Pòl maké on lèt ba sé krétyen-la é i ankourajé-yo a chèché entéré a lézòt. Kijan nou pé suiv konsèy-lasa adan lasanblé an nou ? Sé lè nou ka sonjé kè lézòt anvi bay on ti komantè osi menmjan ki nou.

12. Lè nou k’ay réinyon, nou vé ankourajé lézòt. Bay on mannyè nou pé fè sa (gadé imaj-la osi).

 ¹² An-nou fè on ti réfléchi : lèwvwè ou ka fè on ti kozé èvè zanmi a-w, ès sé enki vou ki ka palé é sélézòt-la pa ni lokazyon di sa yo ka pansé ? Non, sèten ou pa’a fè sa ! Ou anvi sav sa yo ka pansé osi. Menmjan-la, lè nou k’ay réinyon, nou vé kè on maksimòm dè moun pawtisipé. An réyalité, si nou vé ankourajé frè é sè an nou, fò nou lésé-yo réponn osi pou yo montré jan yo ni fwa adan Jéova (1 Kor. 10:24). An-nou vwè kijan nou pé fè sa.

13. Ka nou pé fè pou on maksimòm dè moun pé sa pawtisipé ?

¹³ Pou koumansé, fò-nou pran labitid fè dé komantè ki toukout. Konsa, on maksimòm dè moun ké pé réponn. Sé ansyen-la é frè é sè ki byen doubout adan lavérité pé bay on bèl ègzanp adan domenn-lasa. É menm lèwvwè nou ka bay on répons ki kout, fò pa nou palé dè twòp lidé. Si lè ou ka bay on répons, ou ka palé dè tousa ki adan on paragraf, lézòt pé’é ni granzafè a di. An-nou pran ègzanp a paragraf-lasa. Yo ka palé-nou dè 2 ti konsèy : bay on komantè ki toukout é pa palé dè plizyè biten alafwa. Si sé vou yo ka bay réponn an prèmyé, ka ou ka di si ou té ka bay onsèl adan sé lidé-lasa ?

14. Ka ki ké édé-nou sav konmen fwa nou ké lévé men an nou ? (gadé imaj-la osi).

¹⁴ Lè nou ka gadé pou vwè konmen fwa nou ké lévé men an nou, fò-nou ni bon jijman. Si nou ka lévé men an nou two souvan, sa pé mèt présyon asi frè-la ki ka dirijé pawti-la nou ka étidyé la. Pétèt i ké santi kè i oblijé ban-nou réponn a plizyè rèpriz alòskè ni dòt moun ki po’o pawtisipé. Akòz dè sa, ni sèwten moun ki pé rivé a di kè yo pa’a lévé men a yo ankò (Ékl. 3:7).

15. a) Lèwvwè yo pa fè-nou réponn, kijan pou nou réyaji ? b) Kijan on frè ki ka dirijé on pawti a réinyon-la ké « voyé zyé » asi sé moun-la ki la la ? (gadé ti karé-la «  Si sé-w ki ka dirijé ti kozé-la »).

¹⁵ Lè on frè ka dirijé on pawti a réinyon-la é  kè ni onlo pwoklamatè ki ka lévé men a yo, pétèt i pé’é pé fè-nou réponn chakfwa nou ka lévé men an nou. É pétèt kè délè, i pé’é pé ban-nou réponn ditou-ditou. Sa pé rivé a désèvwa-nou. Men lèwvwè sa ka rivé, fò pa nou mèt an tèt an nou kè frè-la ka fè sa pa èspré (Ékl. 7:9).

16. Kijan nou pé ankourajé moun ki bay on komantè ?

¹⁶ Siwvwè ou pa ni lokazyon bay tout sé komantè-la ou té vlé la, lèwvwè frè é sè a-w ka réponn, sa té’é byen si ou té ka kouté-yo byen pou ou ay félisité-yo lèwvwè réinyon-la fin. Sé vré kè lè nou ka bay on ti komantè, sa ka ankourajé frè é sè an nou. Men lèwvwè nou k’ay félisité-yo, sa ka fè menm travay-la osi (Pwov. 10:21). Ni plizyè mwayen pou yonn ankourajé lòt é lè yonn ka félisité lòt, sé ankourajé i ka ankourajé-y osi.

17. a) Kijan sé paran-la pé édé timoun a yo préparé dé ti komantè ki k’ay èvè laj a yo ? b) Dapré vidéo-la, fò-nou fè 4 biten pou préparé on répons. Ki biten ésa ? (gadé nòt-la osi).

¹⁷ Ni dòt biten yonn pé fè pou ankourajé lòt. Ki biten ésa ? Si ou ni timoun, ou pé édé-yo préparé dé ti komantè ki k’ay èvè laj a yo (Mat. 21:16). Délè nou ka ègzaminé on awtik é adan-y yo ka palé dè sèwten ki vréman sèryé, kon lè dé moun-mayé ka jwenn difikilté oben dè tousa ki anrapò èvè péché sèksyèl.  Men pétèt zò ké pé touvé yonndé paragraf ki ké pèwmèt sé timoun-la réponn. Anplisdisa, pran on ti tan pou èspliké sé timoun-la poukwa yo pé ké ba-yo réponn chaklè yo ké lévé men a yo. Konsa, sa pé’é désèvwa-yo lèwvwè dòt moun ké réponn alòskè yo osi yo té lévé men a yo d (1 Tim. 6:18).

18. Ka ki ké édé-nou pou nou pa palé dè nou twòp lè nou ka bay dé ti komantè ? (Pwovèb 27:2).

¹⁸ Noutout nou pé préparé dé bèl ti komantè ki ka ba Jéova glwa é ki ka ankourajé frè é sè an nou (Pwov. 25:11). Menmsi délè nou pé palé dè on èkspéryans nou ja viv, nou ké fè atansyon pou nou pa palé dè nou twòp (li Pwovèb 27:2 ; 2 Kor. 10:18). An-nou fè éfò pou nou rété konsantré asi Jéova, asi Pawòl a-y é asi pèp a-y (Rév. 4:11). Men, nou ka tou konprann kè si kèsyon a on paragraf ka mandé-nou palé dè sa nou ja viv oben dè sa nou ka rèsanti, sé ké on bon biten toubònman si nou ka palé dè nou a moman-lasa. Dayè, adan paragraf-la ki ka vin la, yo ké pozé-nou on kèsyon konsa.

19. a) Siwvwè ‘yonn ka voyé zyé asi lòt’, ka ki ké pasé adan sé réinyon-la ? (Women 1:11, 12). b) Nou pé bay déotwa ti komantè an réinyon. Ka ou byen enmé adan sa ?

¹⁹ Òwganizasyon a Jéova pa’a di-nou ègzaktèman kijan nou pé bay on komantè. Men sa nou pé fè, sé fè ansòt pou chakfwa nou ka pawtisipé sa ankourajé lézòt. Pou nou pé sa fè sa, pétèt kè fò-nou ké pawtisipé tibwen pi souvan. Oben pétèt kè menmsi nou pé pa pawtisipé kon nou té’é vé, nou ké kontan sé komantè-la nou rivé fè la é nou ké kontan kè frè é sè an nou ka pawtisipé osi. Si lè nou an réinyon sa ki pi enpòwtan pou nou sé entéré a sé moun-la ki la la, ében nou ké kontan toubònman pas ‘yonn ké pé ankourajé lòt’ (li Women 1:11, 12).