1. Rakonté sa ki pasé lèwvwè Jézi fè prèmyé mirak a-y.

 ÉSÉYÉ imajiné sa ki pasé jou-lasa : Nou an lan 29 é nou rivé an bout a lanné-la. Pa ni lontan dè sa, Jézi koumansé préché. Jòdila, Jézi, manman-y, é déotwa adan disip a-y envité adan on mayé ki ka fèt Kana. Vilaj-lasa ka touvé-y o nò a Nazarèt é sé Nazarèt Jézi grandi. Mari sé on bon moun a fanmi a sé moun-la ki ka mayé la, é i ka sanm sa i ka fè pawti a sé moun-la ki ka okipé dè moun ki envité. Men pannan moun ka manjé, ni on biten ki ka fèt é siwvwè moun vin sav sa, sé moun-la ki ka mayé la é fanmi a yo ké byen wont : pa ni diven ankò b. Pétèt ni plis moun ki sa yo té prévwa odépa. Onfwamenm, Mari k’ay vwè gason a-y é i ka di-y konsa : « Yo pa ni diven ankò » (Jan 2:1-3). Alò, ka Jézi ka fè ? I ka fè on biten ki èstraòwdinè toubònman : i ka fè dlo touné an diven, é sé té « méyè diven-la » (Jan 2:9, 10).

2-3. a) Grasa pouvwa-la i té ni la, Jézi té pé fè mirak. Kijan i sèvi èvè pouvwa-lasa ? b) Lè nou ké pran tan ègzaminé sé mirak-la Jézi fè la, ka sa ké pòté dè bon pou nou ?

² Jézi fè onlo dòt mirak lèwvwè i koumansé fè travay-la Pap’a-y voyé-y fè la asi latè c. I sèvi èvè pouvwa-la Bondyé ba-y la pou fè mirak pou édé milyé é milyé moun. Pa ègzanp, onlè,  i ba 5 000 misyé manjé, é ondòt lè i ba 4 000 misyé manjé. Enki èvè sé 2 mirak-lasa, si nou ka konté sé madanm-la é sé timoun-la ki té la osi, pétèt Jézi ba plis ki 27 000 moun manjé (Mat. 14:15-21 ; 15:32-38). Jou-la Jézi fè chak sé mirak-lasa, i géri onlo moun ki té malad osi (Mat. 14:14 ; 15:30, 31). Imajiné jan tout sé misyé-lasa é tout sé madanm-lasa rété èstèbèkwè lè yo vwè mirak Jézi fè pou géri-yo é pou ba-yo manjé !

³ Sé mirak-la Jézi fè la pé aprann-nou onlo biten. Adan awtik-lasa, nou ké vwè déotwa adan yo é sa ké fè fwa an nou vin pi fò. Aprésa, nou ké vwè kijan nou pé imité imilité a Jézi é konpasyon a-y lèwvwè i té ka fè mirak.

4. Sé mirak-la Jézi fè la ka aprann-nou dé biten asi 2 moun. Kimoun ésa ?

⁴ Sé mirak-la Jézi fè la ka aprann-nou onlo biten asi Jézi limenm é asi Pap’a-y osi. Sé biten-lasa ka fè fwa an nou vin pi fò. Sa nòwmal piskè sé Jéova ki té dèyè do a tout sé mirak-lasa. Mi sa Akt 10:38 ka èspliké-nou : « Bondyé [...] voyé lèsprisen a-y asi [Jézi] pou i vin wen é [...] i ba-y puisans a-y é toupannan i té ka travèsé péyi-la, i té ka fè sa ki byen é i té ka géri tout moun Dyab-la té ka malmenné, pas Bondyé té èvè-y. » Anplisdisa, on biten pou nou pa jen oubliyé sé kè lèwvwè Jézi té ka di on biten oben lèwvwè i té ka fè on biten, i té ka imité Pap’a-y on mannyè ki pawfè. Pa ègzanp, nou ka vwè sa byen adan sé mirak-la i fè la. I té ni menm mantalité ki Pap’a-y é sa i té ka rèsanti, sé sa Pap’a-y té ka rèsanti osi (Jan 14:9). An-nou vwè 3 biten sé mirak-lasa ka aprann-nou.

5. Ka ki té ka pousé Jézi fè mirak ? (Matyé 20:30-34).

⁵ Prèmyèwman, Jézi é Pap’a-y enmé-nou onlo toubònman. Jéova ba Jézi pouvwa pou fè mirak. É lèwvwè Jézi vin si latè, i sèvi èvè pouvwa-lasa pou soulajé moun ki té ka soufè. Konsa i montré lézimen jan i té enmé-yo. On jou, 2 moun-avèg vin sipliyé Jézi pou i té édé-yo (li Matyé 20:30-34). Si nou ka byen gadé, yo ka di-nou adan Bib-la kè Jézi « pran penn a yo » lèwvwè i vwè-yo, é aprésa i géri-yo. An grèk, yo ka sèvi èvè mo-la yo tradui la é ki bay « pran penn a » pou montré jan on moun ni konpasyon pou ondòt moun é jan sa i ka rèsanti la ka sòti an zantray a-y. Konm Jézi té enmé sé moun-la, sa pousé-y aji épi konpasyon èvè yo. Kifè i ba-yo manjé pou yo manjé é i géri on moun ki té ni lalèp (Mat. 15:32 ; Mawk 1:41). Nou pé sèten osi kè Jéova, on Bondyé ki ni on ‘konpasyon ki plen tandrès’, é Gason a-y enmé-nou onlo toubònman é sa ka fè-yo lapenn lèwvwè yo ka vwè-nou ka soufè (Lik 1:78 ; 1 Pyè 5:7). Mésyé, a pa ti présé yo dwèt présé pou woté tousa ki ka fè-nou soufè !

6. Ki pouvwa Jéova ba Jézi ?

⁶ Dézyèmman Jéova ba Jézi pouvwa pou i pé sa réglé tout pwoblèm lézimen ka jwenn. Nou pé pa rivé about a pwoblèm nou ka jwenn, men li Jézi ni pouvwa-lasa. I montré sa grasa sé mirak-la i fè la. Pa ègzanp, grasa pouvwa-la Jézi ni la, i pé fè ansòt pou nou pa trapé pon pwoblèm ankò. Konm sé akòz dè péché-la Adan fè la noutout péchè é kè sé akòz dè sa osi nou ka tonbé malad é nou ka mò, lè Jézi ké woté péché-la pé ké ni tout sé biten-lasa ankò (Mat. 9:1-6 ; Wom. 5:12, 18, 19). Sé mirak-la Jézi fè la montré kè i kapab géri tout kalté maladi é kè i jous kapab résisité moun ki mò (Mat. 4:23 ; Jan 11:43, 44). Anplisdisa, grasa pouvwa-la i ni la, sé gwo manman tanpèt-la pa ayen douvan a-y é i pi fò ki sé démon-la (Mawk 4:37-39 ; Lik 8:2). A pa ti rasiré sa ka rasiré-nou dè sav kè Jéova ba Gason a-y on pouvwa konsa !

7-8. a) Dè ki biten nou pé sèten grasa sé mirak-la Jézi fè la ? b) Ki mirak ou présé vwè adan nouvo mond-la ?

 ⁷ Twazyèmman, nou pé sèten kè lè Wayòm-la ké dirijé tout latè, tout sé bon biten-la Jéova pwomèt-nou la ké réyalizé. Sé mirak-la Jézi fè la lè i té asi latè ka ban-nou on ti lidé asi sa Jézi ké fè asi tout latè, konm sé-y ki Wa a wayòm a Bondyé. An-nou pran on ti tan pou sonjé sa ki ké fèt talè : Lè nou ké anba dominasyon a Wa an nou Jézi, nou ké ni on santé ki pawfè, pas i ké fè ansòt pou ponmoun pa malad ankò é pou ponmoun pa enfim ankò (Iz. 33:24 ; 35:5, 6 ; Rév. 21:3, 4). Ponmoun pé’é mò fen ankò (Iz. 25:6). Pon katastwòf pé’é fè déga ankò (Mawk 4:41). É a pa ti kontan nou ké kontan akéyi moun nou té enmé é ki adan sé tonm-la konnyéla la (Jan 5:28, 29). Adan nouvo mond-la, ki mirak ou présé vwè réyalizé ?

⁸ Lèwvwè Jézi té ka fè mirak, i té ni onlo imilité é i té ni onlo konpasyon. Nou osi, fò-nou ni sé 2 kalité-lasa. An-nou pran 2 ègzanp ki ka montré sa. Dabò pou yonn, nou ké vwè sa ki pasé adan on mayé ki fèt Kana.

9. Poukwa Jézi fè on mirak adan on mayé ki fèt Kana ? (Jan 2:6-10).

⁹ (Li Jan 2:6-10.) Lèwvwè pa té ni diven ankò adan mayé-la, ès Jézi té oblijé fè on biten ? Awa. Pa ni pon pwofési ki té ka anonsé kè Mési-la té’é fè on mirak pou fè diven. Men sonjé sa ou té’é rèsanti si sé té adan mayé a-w pa té ni ayen a bwè ankò. Sèten Jézi té ni konpasyon  pou fanmi-la, é siwtou pou sé moun-la ki té sòti mayé la. I té sav kè yo té’é wont toubònman é i pa té vlé sa rivé-yo. Sé pousa, kon nou di-y an koumansman a awtik-la, i fè on mirak : i fè 390 lit dlo touné adan on bon kalité diven. Poukwa Jézi fè tousa diven ? Pétèt i fè sa pou sé moun-la ki té sòti mayé la té touvé diven-lasa pou apré, oben pou yo té pé sa vann rèstan a diven-lasa é lajan-lasa yo té’é touvé-y pou koumansé vi a yo. A pa ti kontan yo dwèt té kontan dè sa Jézi fè ba yo la !

10. Bay déotwa détay entérésan nou ka touvé adan Jan chapit 2 (gadé imaj-la osi).

¹⁰ Adan Jan chapit 2, nou ka touvé déotwa détay ki vréman entérésan. An-nou gadé sa. Ès ou konstaté ké a pa Jézi ki plen sé ja-la èvè dlo ? Olyé Jézi té fè moun vwè-y, i té préféré mandé sé sèwvitè-la mèt dlo adan sé ja-la (vèwsé 6, 7). É lèwvwè Jézi fè dlo-la touné an diven, a pa li ki menné tibwen diven pou moun-la ki té ka òwganizé fèt-la. Kou-lasa osi, i mandé sé sèwvitè-la fè sa (vèwsé 8). Ès ou ka imajiné Jézi ka pran on koup diven é kè i ka lévé vè-la anlè douvan sé envité-la, toupannan i ka di : « Vin gouté diven-lasa, sé mwen ki sòti fè-y ! » ? Awa, i pa té’é jen fè sa !

11. Ka mirak-la Jézi fè la lèwvwè i té Kana ka aprann-nou ?

¹¹ Ka mirak-la Jézi fè la lèwvwè i té Kana ka aprann-nou ? Ében, on bèl lèson asi limilité. Lèwvwè Jézi té ka fè on mirak, i pa té ka blagé sa. An réyalité, i pa jen té ka fè sa. Okontrè, i té ka aji èvè imilité. Lè i té ka fè on biten, i toujou té ka ba Pap’a-y glwa é i toujou té ka di kè sé té grasa Pap’a-y si i té ka rivé fè sa (Jan 5:19, 30 ; 8:28). Si nou ka imité Jézi é kè nou ka aji èvè imilité lèwvwè nou ka fè on biten, nou pé’é ay blagé sa ba dòt moun. Kèlkèswa sa nou ka fè pou Jéova, nou pa’a bat lèstonmak an nou. Olyé nou fè sa, an-nou ba Bondyé louwanj pas sé on Bondyé ki èstraòwdinè é nou kontan adoré-y toubònman (Jér. 9:23, 24). An-nou ba-y lonnè-la i mérité la, pas si nou ka rivé fè tout sé bon biten-la nou ka fè la, sé enki pas i ka édé-nou. Pa vré ? (1 Kor. 1:26-31).

12. Ki dòt mannyè nou pé imité imilité a Jézi ? Bay on ègzanp.

¹² Nou pé imité imilité a Jézi ondòt mannyè ankò. Imajiné sitiyasyon-lasa : On ansyen ka pasé onlo tan ka édé on jenn asistan pou i préparé prèmyé diskou a-y. Grasa sé konsèy-la ansyen-la ka ba-y la, jenn frè-la ka fè on diskou ki ka ankourajé toutmoun é toutmoun an lasanblé-la kontan toubònman. Apré réinyon-la, on moun k’ay vwè ansyen-la é i ka di-y konsa : « Diskou-la frè entèl fè la té bèl menm. Ou pa’a di sa ? » Ès ansyen-la ké réponn : « Sé vré, men an pasé onlo tan ka édé-y ! » ? Oben ès i ké réponn èvè imilité é i ké di : « Ou pé di sa ! Diskou a-y té bèl toubònman. » Lèwvwè nou ka fè moun alantou an nou dibyen, fò pa nou chèché a fè lézòt pòté-nou anlè pou sa, men okontrè, fò-nou aji èvè imilité. Jéova ka vwè sa nou ka fè é sa ni onlo valè pou-y. Nou pa bizwen plis ki sa (gadé osi Matyé 6:2-4 ; Ébr. 13:16). Nou pé sèten kè si nou ka imité Jézi é nou ka montré kè nou ni imilité, nou ké fè Jéova plézi (1 Pyè 5:6).

13. Lè Jézi rivé Nayin, ka i vwè é ka i fè ? (Lik 7:11-15).

¹³ (Li Lik 7:11-15.) Sa nou ka li adan sé vèwsé-lasa pasé 2 lanné apré Jézi koumansé travay-la Pap’a-y té ba-y fè la asi latè. Imajiné sa : Jézi k’ay Nayin, on ti vil Galilé ki ka touvé-y toupré Chounèm. 900 an avan sa, sé Chounèm pwofèt Élizé té résisité gason a on madanm (2 Wa 4:32-37). Lèwvwè Jézi ka rivé toupré pòt a vil-la, i ka vwè on foulmoun ki ka sòti an vil-la pou ay téré on moun. A pa ti tris  sa tris ! On madanm pèd sèl timoun-la i té ni la. Men manman-lasa pa tousèl, alantou a-y ni on foulmoun. Jézi ka arété sé moun-la ki té ka pòté kò a tigason-la é i ka fè on biten èstraòwdinè toubònman : i ka résisité gason a madanm-la ! Pawmi sé 3 rézirèksyon-la Jézi fè la é kè nou ka touvé adan Lézévanjil, tala sé prèmyé-la.

14. Ki détay entérésan nou ka touvé adan Lik chapit 7 ? (gadé imaj-la osi).

¹⁴ Si ou gadé byen adan Lik chapit 7, ou ké vwè dé ti détay ki vréman entérésan. Pa ègzanp, Jézi « vwè » manman-la ka pléré é aprésa « sa fè-y lapenn pou-y » (vèwsé 13). Sa vé di kè i pran on ti tan pou gadé, i vwè on manman ka pléré toupannan i ka maché, é dèyè do a-y yo ka pòté kò a pitit a-y. Lè i vwè sa, i rèsanti onlo onlo konpasyon pou-y. Men a pa rèsanti i rèsanti sa tousèl, i montré madanm-la jan i té ni konpasyon pou-y. Nou ka imajiné kè i té anvi rasiré madanm-la. Alò mi sa i di-y : « Arété pléré. » É aprésa, i fè on biten ba-y. I résisité gason-la é i « ba manman-y li » (vèwsé 14, 15).

15. Ka mirak-la Jézi fè la ka aprann-nou ?

¹⁵ Ka mirak-la Jézi fè la ka aprann-nou ? Sa ka montré-nou kè fò-nou aji épi konpasyon èvè moun ki pèd on moun yo té enmé. Sé vré, nou pé pa résisité moun ki mò kon Jézi té ka fè-y, men kon li, nou pé rété véyatif é aji èvè konpasyon épi moun ki pèd on moun yo té enmé. Pa ègzanp, nou pé di oben nou pé fè on biten ki ké édé-yo é ki ké konsolé-yo d (Pwov. 17:17 ; 2 Kor. 1:3, 4 ; 1 Pyè 3:8). Menmsi sé dé ti pawòl tousenp nou ka di-yo é kè nou ka fè dé ti biten tousenp pou yo, sèten sa ké fè-yo dibyen toubònman.

16. Kijan yo konsolé on manman ki pèd tifi a-y é ka sa ka aprann-vou ? (gadé sa yo rèprézanté asi imaj-la).

¹⁶ An-nou vwè on ègzanp. Ni kèlkè lanné dè sa, pannan on réinyon, ni on sè ki konstaté kè on manman ki té toupré a-y té ka pléré. Sa rivé lèwvwè yo té ka chanté on kantik. Kantik-lasa té ka palé dè larézirèksyon é sè-la té sav  kè manman-la té sòti pèd tifi a-y. Alò ka sè-la fè ? I ay owa manman-la tousuit, i mèt men a-y asi zépòl a-y é i chanté rèstan kantik-la èvè-y. Kèlkètan apré, mi sa manman-la di : « An té ja enmé frè é sè an mwen men lè an vwè sa, an touvé-mwen enmé frè é sè an mwen pi fò ankò. » I té ni rézon vin réinyon jou-lasa. Mi sa i ka èspliké : « Sé lè nou k’ay an sal di Wayòm la kè nou ka touvé èd-la nou bizwen la. » Lèwvwè nou ka montré moun ki pèd on moun yo té enmé é « ki dékourajé » kè nou ni konpasyon pou yo, Jéova ka vwè sa é sa ni onlo valè pou-y menmsi sé on toupiti biten nou ka fè. Nou pé sèten dè sa (Sòm 34:18).

17. Ka nou vwè adan awtik-lasa ?

¹⁷ Adan Labib, nou ka touvé plizyè istwa asi sé mirak-la Jézi fè la é lè nou ka étidyé-yo, sa pé ankourajé-nou onlo toubònman. Sé istwa-lasa ka montré-nou jan Jéova é Jézi enmé-nou onlo é kè Jézi pé rézoud tout pwoblèm an nou grasa pouvwa a-y. Anplisdisa, talè wayòm a Bondyé ké réyalizé tout sé pwomès-la Jéova fè-nou la, é sé istwa-lasa ka édé-nou fè sé pwomès-lasa plis konfyans ankò. Pétèt nou pé chwazi on mirak kè Jézi fè é nou pé étidyé-y lè nou ka étidyé tousèl an nou, oben lè nou ka fè étid familyal an nou. Toupannan nou ka fè sa, nou pé mandé-nou ka istwa-lasa ka aprann-nou é nou pé gadé pou vwè kijan nou pé imité kalité a Jézi. Aprésa, an-nou palé dè sa èvè lézòt. Konsa nou ké pé ni dé bèl ti kozé ki ké ankourajé-noutout (Wom. 1:11, 12).

18. A ki kèsyon nou ké réponn adan awtik-la ki ka vin la ?

¹⁸ Labib ka palé dè 3 rézirèksyon Jézi fè, é adan awtik-la ki ka vin la, nou ké palé dè dènyé rézirèksyon-la i ka rakonté la. Rézirèksyon-lasa fèt lèwvwè Jézi té kay fin travay-la i té vin fè la asi latè. Poukwa rézirèksyon-lasa diféran dè sélézòt-la ? Pas kou-lasa, sé on bon bon zanmi a-y Jézi résisité é sitiyasyon-lasa té vréman èspésyal. Ka mirak-lasa pé aprann-nou ? Nou sav kè on jou, moun ki mò ké résisité é nou ni fwa adan sa. Men ka nou pé fè pou nou kwè pi fò adan larézirèksyon ? Nou ké réponn a sé kèsyon-lasa adan awtik-la ki ka vin la.