1. Kijan Jéova té òwganizé pèp a-y o 1^é syèk ?

 LÈWVWÈ Jéova ka ba sèwvitè a-y on travay a fè, i vé kè travay-la fèt kon pou i fèt (1 Kor. 14:33). Pa ègzanp, i ba Jézi okipé dè travay a prédikasyon-la pas i anvi toutmoun asi latè tann palé dè bon nouvèl a Wayòm-la (Mat. 24:14). É Jézi ka fè ansòt pou tout biten byen annòd. O 1^é syèk, yo té ka fòwmé lasanblé diféran koté é lèwvwè yo té ka fè sa, yo té ka nonmé ansyen pou okipé dè yo (Akt 14:23). A Jérizalèm, yo mèt komité santral la anplas é i té ni sé apòt-la é frè ki té ni èkspéryans adan. Yo té ka pran désizyon é sé lasanblé-la té ka suiv sa sé frè-la té ka di-yo fè (Akt 15:2 ; 16:4). É davwa yo té ka fè sa, « sé lasanblé-la té ka kontinyé vin pli solid adan lafwa é jou apré jou yo té ka kontinyé gwosi » (Akt 16:5).

2. Dépi 1919, Jéova ka gidé pèp a-y é i ka ba-yo enstriksyon ki ka vin dè Pawòl a-y a bon moman-la. Kijan i ka fè sa ?

² Jòdla ankò, Jéova ka fè ansòt pou travay-la i ba sèwvitè a-y fèt annòd. Dépi 1919, Jézi ka sèvi èvè on ti gwoup nonm ki wen pou òwganizé travay a prédikasyon-la é pou ba pèp a Bondyé enstriksyon ki ka vin dè Pawòl a-y a bon moman-la a (Lik 12:42). On biten ki klè, sé kè Jéova ka béni travay-la sé nonm-lasa ka fè (Iz. 60:22 ; 65:13, 14).

3-4. a) Bay on ègzanp ki ka montré kè lè nou òwganizé, sa ka pwokiré-nou onlo byenfé. b) Dè ki biten nou ké palé adan awtik-lasa ?

³ Siwvwè nou pa té òwganizé, nou pa té’é pé fè travay-la Jézi ban-nou fè la (Mat. 28:19, 20). Imajiné ka sa té’é bay,  siwvwè tout frè é sè a on lasanblé té pé préché la yo vlé olyé yo té ba-yochak on téritwa pou yo préché. Pétèt kè toutlè yo té ay préché sé menm koté-la, men ni sèwten koté yo pa té’é janmé ay préché. Ès ou ka vwè ki dòt bon biten sa ka pwokiré-nou davwa nou byen òwganizé ?

⁴ Jòdijou, Jézi ka kontinyé òwganizé pèp a Bondyé menmjan i fè-y pou disip a-y lè i té asi latè. Adan awtik-lasa, nou ké vwè ki ègzanp i lésé ban nou é kijan òwganizasyon an nou ka suiv ègzanp a-y. Nou ké vwè osi kijan nou pé montré kè nou ka fè òwganizasyon a Jéova konfyans.

ÒWGANIZASYON-LA NOU ADAN-Y LA KA SUIV ÈGZANP A JÉZI

5. Nou pé di kè òwganizasyon a Jéova ka suiv ègzanp a Jézi pou plizyè rézon. Bay yonn adan yo (Jan 8:28).

⁵ Jéova aprann Gason a-y, Jézi, ka pou i té di é ka pou i té fè. Òwganizasyon a Jéova ka suiv ègzanp a Jézi lèwvwè i ka sèvi èvè Pawòl a Bondyé pou édé-nou sav ka ki byen é ka ki mal é pou gidé-nou adan vi an nou (li Jan 8:28 ; 2 Tim. 3:16, 17). Toutlè, i ka fè-nou sonjé kè sa enpòwtan kè nou li Pawòl a Bondyé é kè nou apliké-y. Ki bon biten sa ka pwokiré-nou lèwvwè nou ka suiv konsèy-lasa ?

6. Lèwvwè nou ka sèvi èvè piblikasyon pou étidyé Labib, sa ka pwokiré-nou onlo byenfé. Bay yonn adan yo.

⁶ Lèwvwè nou ka sèvi èvè piblikasyon pou étidyé Labib, sa ka pwokiré-nou onlo byenfé toubònman. Pa ègzanp, sa ka pèwmèt-nou konparé sa òwganizasyon an nou ka mandé-nou fè èvè sa Labib ka anségné. Lè nou ka vwè kè sa yo ka di-nou bazé asi Labib, nou ka fè òwganizasyon a Jéova plis konfyans ankò (Wom. 12:2).

7. Ki biten Jézi té ka préché é kijan òwganizasyon a Jéova ka suiv ègzanp a-y ?

⁷ Jézi préché « bon nouvèl a Wayòm a Bondyé » (Lik 4:43, 44). É i mandé disip a-y préché mésaj a Wayòm-la (Lik 9:1, 2 ; 10:8, 9). Jòdijou, toutmoun ki ka fè pawti a òwganizasyon a Jéova ka préché mésaj a Wayòm-la kèlkèswa koté-la yo ka viv la é kèlkèswa rèsponsabilité yo ni adan lasanblé-la.

8. Ki bèl lonnè nou ni ?

⁸ Nou pé palé lézòt dè wayòm a Bondyé. Sé on bèl lonnè nou ni toubònman ! A pa toutmoun ki ni bèl lonnè-lasa. Pa ègzanp, lè Jézi té asi latè, i pa lésé sé démon-la palé dè-y (Lik 4:41). Jòdijou, pou on moun koumansé préché é pou i palé dè Wayòm-la, sa pa’a enn fèt konsa. Fò moun-lasa montré kè i ka viv on mannyè ki ka fè Jéova plézi. Nou ka montré kè bèl lonnè-la nou ni la ni onlo valè pou nou si chakfwa sa posib, nou ka palé moun dè Wayòm a Bondyé kèlkèswa koté-la nou yé la. Kon Jézi, nou vlé fè tousa nou pé pou nou préché é pou nou anségné lézòt lavérité (Mat. 13:3, 23 ; 1 Kor. 3:6).

9. Kijan òwganizasyon a Jéova ka fè-moun konnèt non a Bondyé ?

⁹ Jézi fè moun konnèt non a Bondyé. Mi sa i di Pap’a-y adan on priyè : « An fè-yo konnèt non a-w » (Jan 17:26). Òwganizasyon a Jéova ka suiv ègzanp a Jézi. I ka fè tousa i pé pou fè moun konnèt non a Bondyé. Sé pousa osi i ka sèvi èvè Bib-la La Bible. Traduction du monde nouveau, pas Bib-lasa ka woumèt non a Bondyé sé koté-la i té maké la odépa lèwvwè yo té ka ékri Labib. Jòdila, ou ka touvé on pawti a Bib-lasa oben ou ka touvé-y annantyé adan pliski 270 lang. Adan sé apendis A4 é A5 la ki adan Bib-lasa, nou ka touvé déotwa èsplikasyon anrapò èvè  sé koté-la yo woumèt non a Bondyé adan Labib. É adan apendis C la ki adan Bib-la ki fèt pou étidyé la, yo ka ban-nou plizyè prèv ki ka montré kè fò non-lasa parèt 237 fwa adan Lézékriti grèk.

10. Ka ègzanp a madanm-la ki ka viv an Biwmani ka aprann-vou ?

¹⁰ Kon Jézi, nou anvi édé on maksimòm dè moun aprann konnèt non a Bondyé. On sè té ka étidyé Labib èvè on madanm ki té ni 67 an é ki té ka rété an Biwmani. Lèwvwè madanm-la aprann kè Bondyé té ni on non, madanm-la mèt pléré atè tèlman sa touché-y é mi sa i di sè-la : « Sé 1^é fwa adan vi an mwen kè an ka tann kè non a Bondyé sé Jéova. […] Ou sav, an ja aprann onlo biten, men non a Bondyé sé biten-la ki pi enpòwtan la. » Ègzanp-lasa ka montré-nou kè lè on moun ki sensè ka vin konnèt ki non a Bondyé, sa pé chanjé vi a-y.

MONTRÉ OU KA FÈ ÒWGANIZASYON A JÉOVA KONFYANS

11. Kijan sé ansyen-la pé montré kè yo ka fè òwganizasyon a Jéova konfyans ? (gadé imaj-la osi).

¹¹ Kijan sé ansyen-la pé montré kè yo ka fè òwganizasyon a Jéova konfyans ? Ében lèwvwè lòwganizasyon ka voyé enstriksyon ba yo, sé ansyen-la ka pran tan li sé enstriksyon-lasa byen é yo ka fè tousa yo pé pou apliké-yo. Pa ègzanp, grasa sé enstriksyon-lasa, yo ka pé sav kijan pou yo fè on diskou é kijan pou yo priyé pou lasanblé-la. Sa ka édé-yo sav osi kijan pou yo pran swen a ti mouton a Kris. Lè sé ansyen-la ka suiv sé enstriksyon-la lòwganizasyon ka voyé ba yo la, frè é sè a lasanblé-la ka santi kè Jéova enmé-yo é kè i ka pwotéjé-yo.

12. a) Poukwa fò nou kolaboré èvè séla ki ka dirijé-nou la ? (Ébré 13:7, 17). b) Poukwa fò nou konsantré-nou asi bèl kalité a séla ki ka dirijé nou la ?

¹² Lèwvwè sé ansyen-la ka ban-nou on enstriksyon, fò nou fè sa yo ka di-nou volontyé. Si nou ka fè sa, yo ké rivé fè travay a yo pi fasilman. Labib ka ankourajé-nou a obéyi é a soumèt-nou a séla ki ka dirijé nou la (li Ébré 13:7, 17). Men délè sa pé rèd a fè. Poukwa nou ka di sa ? Pas sé nonm-lasa enpawfè. Siwvwè nou ka arété-nou enki asi défo a yo olyé nou tchenn kont dè bèl kalité a yo, an réyalité, nou ka fè ègzaktèman sa lènmi an nou vé nou fè. Kijansa ? Ében sa lènmi an nou vé, sé kè nou koumansé mandé-nou ès Bondyé ka sèvi èvè òwganizasyon-la pou gidonné-nou vréman. Alò, ka nou pé fè pou nou rivé rèkonnèt sé manti-la lènmi an nou ka simé la é pou nou ba sé kalté manti-lasa gran lè a yo ?

PA LÉSÉ PONMOUN FÈ-W PÈD KONFYANS A-W ADAN LÒWGANIZASYON

13. Kijan moun ki kont Bondyé ka éséyé sali répitasyon a lòwganizasyon ?

¹³ Lòwganizasyon ka fè dé bon biten, men moun ki kont Bondyé ka éséyé fè sé biten-lasa pasé pou dé mové biten. An-nou pran on ègzanp. Jéova vé kè sèwvitè a-y rété pwòp, kè yo maché dwèt é kè yo adoré-y kon i ka mandé. É i ka di kè siwvwè on moun fè on biten ki grav é kè moun-lasa vé pa chanjé, i pé pa rété adan lasanblé-la ankò (1 Kor. 5:11-13 ; 6:9, 10). Nou ka obéyi komandman-lasa ki an Bib-la. É pas nou ka fè sa, sé moun-la ki kont nou la ka di kè nou pa enmé moun, kè nou ka jijé moun rèd menm é kè lè on moun pa menm biten ki nou, nou ka mété-y akoté.

14. Kimoun ki dèyè sé manti-la yo ka fè monté é désann la asi lòwganizasyon ?

 ¹⁴ Lè yo ka ataké òwganizasyon-la, sonjé kimoun ki dèyè do a sa. Sé Satan ki dèyè do a sé manti-la yo ka fè monté é désann asi lòwganizasyon. I sé « papa a mansonj-la » (Jan 8:44 ; Jén. 3:1-5). Kifè, sa pa ka siwprann-nou si i ka sèvi èvè bannélo a-y pou simé manti asi lòwganizasyon. Dayè, sé sa i té ja ka fè o 1^é syèk.

15. Kijan sé chèf a rèlijyon la aji èvè Jézi é disip a-y ?

¹⁵ O 1^é syèk, moun ki té èvè Satan simé onpakèt manti asi Gason a Bondyé alòskè Jézi té pawfè é kè i té ka fè mirak. Pa ègzanp, sé chèf a rèlijyon juif la té ka di pèp-la kè si Jézi té ka rivé woté démon asi moun sé pas chèf a sé démon-la ba-y pouvwa-lasa (Mawk 3:22). É jou-la yo té ka jijé Jézi la, sé chèf a rèlijyon la di kè Jézi dérèspèkté non a Bondyé é yo monté tèt a sé moun-la ki té adan foul-la pou yo té mandé mò a Jézi (Mat. 27:20). Plita, pannan disip a Jézikris té ka préché bon nouvèl-la, sé moun-la ki té kont yo la « monté tèt a moun a sé nasyon-la » pou yo té pèwsékité sé disip-la (Akt 14:2, 19). Niméwo a 1^é désanm 1998 a Tou dè Gad la bay on ti èsplikasyon asi Akt 14:2. I di konsa kè non sèlman sé moun-la ki té pou Satan la pa té vé tann mésaj-la, men anplisdisa, yo té ka di onpakèt mové biten asi sé krétyen-la pou fè moun hay-yo é pou ponmoun pa té kouté-yo.

16. Si nou ka tann manti asi lòwganizasyon, ka pou nou sonjé ?

¹⁶ Satan pa ka las manti. Menmjan i té ka manti o 1^é syèk, sé konsa i ka manti jòdijou ankò. Labib ka di kè i « ka kouyonné lèmondantyé » (Rév. 12:9). Si ou ka tann ti pawòl  ka monté é désann asi do a frè an nou ki an tèt a lòwganizasyon, sonjé kijan lènmi a Bondyé aji èvè Jézi é disip a-y. Jézi té ja di kè moun té’é pèwsékité sèwvitè a Bondyé é kè yo té’é manti asi yo é sé ègzaktèman sa nou ka vwè alèla (Mat. 5:11, 12). Menmsi nou ka tann ti pawòl ka monté é désann asi do a lòwganizasyon, nou pé’é pran sa yo ka rakonté la pou lajan-kontan pas nou sav kimoun ki dèyè do a sa. Okontrè, tousuit nou ké chèché a pwotéjé-nou pou sa pa aji asi nou. Kijan nou ké fè sa ?

17. Sé enfòwmasyon-la ki pa vré la danjéré toubònman. Ka nou pé fè pou ba-yo gran lè a yo ? (2 Timoté 1:3 ; gadé osi ti karé-la «  Ka pou nou fè lè nou ka tann enfòwmasyon ki pa vré ? »).

¹⁷ Pa kouté enfòwmasyon ki pa vré. Lapòt Pòl montré ka pou nou fè lèwvwè nou ka tann dé biten ki pa vré. I mandé Timoté « di sèwten moun défandi […] pran tan kouté istwa ki pa vré » é kè fò yo « rèfizé kouté istwa ki pa vré ki ka dérèspèkté Bondyé » (1 Tim. 1:3, 4 ; 4:7). Souvantfwa, sé bébé-la ka ranmasé tousa yo ka touvé atè-la é yo ka mèt sa an bouch a yo. Men on granmoun pé’é jen fè sa, pas i sav kè sa pé rann-li malad. Menmjan-la, nou pa ka kouté enfòwmasyon ki pa vré pas nou sav kimoun ki dèyè do a sa. Nou ka kouté enki « bon pawòl » a vérité-la (li 2 Timoté 1:13).

18. Kijan nou pé montré kè nou ka aprésyé òwganizasyon a Jéova ?

¹⁸ Nou ègzaminé kijan òwganizasyon a Bondyé ka imité Jézi adan 3 domenn, men i ka fè sa adan onlo dòt domenn ankò. Lè ou ka étidyé Labib tousèl a-w, éséyé vwè adan ki dòt domenn i ka fè sa. Édé frè é sè a lasanblé a-w a fè òwganizasyon-la konfyans plis ankò. É kontinyé montré kè ou ka fè òwganizasyon a Jéova konfyans. Pousa, kontinyé sèvi Jéova fidèlman é kontinyé soutyenn òwganizasyon-la i ka itilizé la pou fè volonté a-y (Sòm 37:28). An-nou montré jan nou ka aprésyé bèl lonnè-la nou ni la davwa nou ka fè pawti a pèp a Jéova, on pèp ki plen lanmou é ki fidèl.