1. Sonjé yo ka sonjé kè fò yo ay préché ba moun yo pa konnèt, ka sèwten frè é sè ka rèsanti ? (gadé imaj-la osi).

 KONM nou ka fè pawti a pèp a Bondyé, nou ka préché ba dòt moun pas nou enmé Pap’an nou ki an syèl-la é pas nou anvi édé-yo konnèt-li. Ni onlo moun ki kontan lèwvwè yo ka préché, men a pa toutmoun ki konsa. Poukwa nou ka di sa ? Paskè ni sèwten adan nou ki on ti jan pè é ki pa sèten dè yo. Ni moun osi ki pa’a santi-yo alèz pou ay douvan pòt a on moun alòskè moun-lasa pa envité-yo. Ni sa osi ki pè yo voyé-yo alé. É ni dòt ankò ki pè yo trapé bab èvè moun, pas a pa konsa yo lévé-yo. Tout sé frè é sè lasa enmé Jéova, men pou yo ay douvan pòt a moun yo pa konnèt pou palé-yo dè lavérité, a pa on biten ki fasil. Konm yo sav kè sé on biten ki enpòwtan toubònman, yo ka fè éfò pou yo ay préché chak simenn. A pa ti fyèw Jéova dwèt fyèw dè yo !

2. Si délè ou k’ay préché men ou pa ni pon gou pou fè sa, poukwa fò pa ou lésé sa dékourajé-w ?

² Ès délè ou k’ay préché men sa pa ka mèt pon jwa an tchè a-w ? Pétèt sé pou yonn adan sé rézon-la nou sòti palé la. Si sé ka a-w, pa dékourajé-w pou sa. Lèfètkè ou pa two sèten dè-w, sa pé vé di kè ou sé on moun ki ni imilité é kè ou pa enmé fè biten pou fè moun vwè-w. Sa pé vé di osi kè ou pa anvi fè moun fè kòlè èvè-w. Ponmoun pa enmé yo voyé-y ponmlé, siwtou lèwvwè ou ka éséyé fè lézòt dibyen. Pap’a-w ki an syèl-la sav ègzaktèman sa ou ka rèsanti é i anvi soutyenn-vou (Iz. 41:13). Adan awtik-lasa, nou ké palé dè 5 biten nou pé fè pou nou pa lésé lafrous pran lanmen asi nou é pou nou pi kontan lè nou ka préché.

 LÉSÉ PAWÒL A BONDYÉ BA-W FÒS

3. Ka ki ba Jérémi fòs pou i té pé sa ay préché ?

³ Kèlkèswa épòk-la, chakfwa Jéova té ka ba on sèwvitè a-y anonsé on mésaj, menmsi sa pa té fasil, mésaj-la té ka ba sèwvitè-lasa fòs. An-nou vwè ègzanp a pwofèt Jérémi. Jéova mandé-y ay préché men i pa té ka santi-y alahotè. Mi sa i di Jéova : « An pa konnèt palé, pas an sé enki on timoun » (Jér. 1:6). Ka ki édé-y ni kouraj pou i té pé sa ay préché ? Ében i pran fòs adan Pawòl a Jéova, kivédi adan mésaj-la Jéova té ba-y pòté ba sé moun-la. Mi sa i ka di ankò : « I té kon on gwo flanm-difé andidan zo an mwen, é an pa té pé tchenbé-y ankò » (Jér. 20:8, 9). Lè Jérémi té ka préché ba sé moun-la, a pa granzafè a moun ki té ka lévé-y digad. Men mésaj-la Jérémi té ka préché la té ka ba-y fòs pou i kontinyé fè travay-la Jéova té ba-y fè la.

4. Ka ki ka pasé lèwvwè nou ka li Pawòl a Bondyé é kè nou ka pran tan médité anlè-y ? (Kolosyen 1:9, 10).

⁴ Sé krétyen-la ka pran fòs adan Pawòl a Jéova. Adan lèt-la i maké ba sé Kolosyen-la, lapòt Pòl di konsa kè lèwvwè on moun ka vin ni on konésans ki ègzak, sa ka ba-y fòs pou i « maché on mannyè ki ka onoré Jéova » toupannan i ka « kontinyé pòté fwi adan tout bon biten [i] ka fè » (li Kolosyen 1:9, 10). Asiré sèten, prédikasyon-la ka fè pawti a sé bon biten-la nou ka fè la. Alò lè nou ka li Pawòl a Bondyé é kè nou ka pran tan médité anlè-y, fwa an nou ka vin pi fò é nou ka konprann pibyen poukwa sa enpòwtan kè nou préché mésaj a Wayòm-la.

5. Lèwvwè nou ka li Labib é kè nou ka étidyé-y, ka nou pé fè pou sa fè-nou dibyen ?

⁵ Pou Pawòl a Bondyé pé sa fè-nou dibyen, fò-nou li-y atètipo é lè nou ka étidyé-y é lè nou ka médité asi-y, fò pa nou fè sa alakous. Alò pran tan a-w ! Si ou ka tonbé asi on pasaj é kè ou pa’a byen konprann pasaj-lasa, olyé ou kontinyé li, arété-w on ti moman. Sèvi èvè zouti kon Index des publications des Témoins de Jéhovah oben èvè Guide de recherche pour les Témoins de Jéhovah pou ou pé sa konprann pasaj-lasa. Si ou ka pran tan fè sa lè ou ka étidyé, ou ké pi sèten ankò kè sa Labib ka di sé lavérité (1 Tés. 5:21). É pi ou ké sèten dè sa, pi ou ké anvi palé moun dè sa ou aprann.

PRÉPARÉ-W BYEN POU PRÉDIKASYON-LA

6. Poukwa fò-nou préparé-nou byen avan nou ay préché ?

⁶ Si ou ka préparé-w byen avan ou ay préché, sèten ou ké santi-w pi alèz lè ou ké ka  palé èvè sé moun-la. Avan Jézi té voyé disip a-y préché, i édé-yo préparé-yo (Lik 10:1-11). É konm yo mèt sa Jézi té aprann-yo an pratik, yo réyisi fè dé biten èstraòwdinè é yo té kontan toubònman (Lik 10:17).

7. Kijan nou pé préparé-nou pou nou ay préché ? (gadé imaj-la osi).

⁷ Kijan nou pé préparé-nou pou nou ay préché ? On biten nou té’é pé fè, sé réfléchi asi sa nou kay di sé moun-la, é gadé pou vwè kijan nou té’é di sa èvè mo an nou ki tan nou. Sa té’é byen osi si nou té ka réfléchi asi 2 ou 3 biten sé moun-la pé rivé a di-nou é chèché a vwè kijan nou té’é réponn-yo. É lèwvwè ou ké douvan pòt a on moun, éséyé fè dé biten pou-w santi-w pi alèz, souri ba moun-la é palé ba-y jantiman.

8. An ki sans sé krétyen-la kon sé ja an tè la lapòt Pòl palé la ?

⁸ Lapòt Pòl palé dè wòl-la nou ka jouwé la adan travay a prédikasyon-la. Mi sa i di : « Nou ni trézò-lasa adan ja ki fèt an tè » (2 Kor. 4:7). Dè ki trézò i té ka palé ? Sé prédikasyon a bon nouvèl a Wayòm-la é sa pé sové vi a moun (2 Kor. 4:1). É sé ja-la ki fèt an tè la, ka yo ka rèprézanté ? Yo ka rèprézanté sèwvitè a Bondyé ki ka pòté mésaj a Wayòm-la pou lézòt. An tan a Pòl, sé machann-la té ka chayé manjé, diven, lajan oben dòt biten ankò ki té ni valè adan ja ki té fèt an tè. Menmjan-la, Jéova ban-nou mésaj a bon nouvèl-la é mésaj-lasa ni onlo valè toubònman. Anplisdisa, konm Jéova ka soutyenn-nou, nou pé ni fòs-la nou bizwen la pou kontinyé pòté mésaj-lasa ba dòt moun.

PRIYÉ POU-W PÉ SA NI KOURAJ

9. Si nou pè kè sé moun-la voyé-nou alé oben kè yo vougaré-nou, ka nou pé fè pou nou rivé about a sa ? (gadé imaj-la osi).

⁹ Délè, lè nou ka sonjé kè sé moun-la pé rivé a vougaré-nou, oben kè yo pé rivé a voyé-nou alé, sa pé fè-nou pè. Men kijan nou pé rivé about a sa ? Ében pran on ti tan pou sonjé priyè-la sé apòt-la fè la lèwvwè yo té di-yo kè fò-yo arété préché. Yo pa lésé lapè pran lanmen asi yo é yo pa arété préché. Okontrè, yo mandé Jéova ba-yo kouraj é édé-yo pou yo « kontinyé montré-yo brav pou anonsé pawòl a-[y] ». É tousuit apré Jéova réponn-yo (Akt 4:18, 29, 31). Alò vou osi, lèwvwè ou ka santi kè lapè bizwen pran lanmen asi-w, priyé Jéova. Mandé-y édé-w pou-w enmé sé moun-la pi  fò ankò, konsa ou pé’é pè palé-yo dè bon nouvèl-la.

10. Jéova chwazi-nou pou nou vin témwen a-y. Kijan i ka édé-nou pou nou fè travay-lasa ? (Izayi 43:10-12).

¹⁰ Jéova chwazi-nou pou nou vin témwen a-y, é i ka pwomèt kè i ké ban-nou kouraj (li Izayi 43:10-12). I ka sèvi èvè diféran biten pou ban-nou kouraj, men an-nou palé dè 4 adan yo. Prèmyèwman, chakfwa nou ka préché bon nouvèl-la, Jézi èvè nou (Mat. 28:18-20). Dézyèmman, Jéova mandé sé zanj-la édé-nou (Rév. 14:6). Twazyèmman, Jéova ka ban-nou lèspri sen a-y pou édé-nou sonjé tousa nou aprann (Jan 14:25, 26). Katriyèmman, Jéova ka sèvi èvè frè é sè an nou pou soutyenn-nou. Grasa Jéova é grasa frè é sè an nou ki plen lanmou, nou ni tousa nou bizwen pou nou kontinyé préché èvè kouraj.

ADAPTÉ-W A SÉ MOUN-LA É RÉTÉ POZITIF

11. Ka ou pé fè pou-w touvé plis moun lè ou ka préché ? (gadé imaj-la osi).

¹¹ Lè ou k’ay préché é kè ou pa’a touvé granzafè a moun, ès sa ka dékourajé-w ? Si sé sa, ében mi sa pou mandé-w : « A lè-lasa, ola sé moun-la yé ? (Akt 16:13). Ès yo ka travay ? Ès yo ka fè kous a yo ? » Si sé sa, ès ou ka di ou ké jwenn plis moun si ou ka préché an lari-la ? Mi sa on frè non a-y sé Joshua ka di : « Lèwvwè an k’ay ponmlé adan sé gran magazen-la oben lèwvwè an adan on pawking, an ka rivé jwenn moun pou mwen pé sa préché ba yo. » Li é madanm a-y, Bridget, ka rivé touvé plis moun akaz a yo osi lèwvwè yo k’ay préché lèswa oben lèwvwè yo ka préché lèdimanch aprémidi (Éféz. 5:15, 16).

12. Kijan nou pé sav adan ki biten on moun ka kwè oben ka ki ka entérésé-y ?

¹² Si mésaj-la pa gè ka entérésé moun-la ou ka palé èvè-y la, chèché a sav adan ki biten i ka kwè oben ka ki ka entérésé-y. Joshua é Bridget ka sèvi èvè kèsyon-la ki asi prèmyé paj a sé trak-la pou koumansé on ti kozé èvè on moun. Pa ègzanp, lè yo ka sèvi èvè trak-la Kijan ou ka konsidéré Labib ?, mi sa yo ka di : « Sèwten moun ka di kè Labib sé on liv ki ka vin dè Bondyé, é ni dòt ki ka di kè yo pa two sèten dè sa. É vou, ka ou ka pansé ? » Pli souvan ki rarman, yo ka ni on bèl ti kozé èvè sé moun-la apré.

13. Lèwvwè nou k’ay préché é kè sé moun-la pa’a kouté-nou, poukwa nou pé di kè nou atenn òbjèktif an nou kanmenm ? (Pwovèb 27:11).

 ¹³ Menmsi ponmoun pa’a kouté-nou lèwvwè nou ka préché, nou atenn òbjèktif an nou kanmenm. Poukwa nou ka di sa ? Pas lè nou ka préché, nou ka fè sa Jéova é Gason a-y ka mandé-nou fè : nou ka fè travay an nou antankè témwen (Akt 10:42). Alò menmsi nou pa’a touvé ponmoun lèwvwè nou k’ay préché oben kè sé moun-la ka voyé-nou alé, nou pé ni tchè-kontan pas nou sav kè nou ka fè Pap’an nou ki an syèl-la plézi (li Pwovèb 27:11).

14. Lèwvwè sé ondòt pwoklamatè ki touvé on moun adan téritwa-la é kè lavérité ka entérésé-y, poukwa nou pé ni tchè-kontan ?

¹⁴ Lèwvwè on pwoklamatè ki adan lasanblé an nou ka tonbé asi on moun adan téritwa-la é kè lavérité ka entérésé-y, nou pé ni tchè-kontan osi. Tou dè Gad la té ka di kè lè nou ka préché, sé menm biten ki lè yo ka chèché on timoun ki pèd. Ni onlo onlo moun ki ka chèché timoun-la é chak ti koté yo ka pasé, yo ka gadé si yo pa’a vwè-y. Lèwvwè yo touvé timoun-la, a pa moun-la ki touvé-y la tousèl ki kontan men sé tout sé moun-la ki kontan. Menmjan-la, fè disip, sé on travay noutout ka fè ansanm. Noutout ni on wòl a jouwé pou travay téritwa-la afon, é lèwvwè on moun ka koumansé vin réinyon, noutout ka kontan.

SA KI PLI ENPÒWTAN SÉ KÈ OU ENMÉ JÉOVA É KÈ OU ENMÉ SÉ MOUN-LA

15. Kijan Matyé 22:37-39 pé édé-nou ni tchè-kontan plis ankò lèwvwè nou ka préché ? (gadé imaj-la osi).

¹⁵ Nou ké ni plis balan pou nou ay préché é nou ké pi kontan osi siwvwè nou ka sonjé kè sa ki pi enpòwtan, sè kè nou enmé Jéova é kè nou enmé sé moun-la (li Matyé 22:37-39). Pran on ti tan pou imajiné jan Jéova ni tchè-kontan lè i ka vwè-nou ka fè travay-la i ban-nou fè la é kijan sé moun-la ké kontan lèwvwè yo ké koumansé étidyé Labib ! On biten pou ou sonjé osi, sé kè moun ki ka kouté mésaj-la é ki ka désidé sèvi Jéova ké sové (Jan 6:40 ; 1 Tim. 4:16).

16. Ka nou pé fè pou nou ni tchè-kontan lè nou ka préché siwvwè nou adan on sitiyasyon ki ka fè kè nou oblijé rété akaz an nou ? Bay déotwa ègzanp.

¹⁶ Ès ou adan on sitiyasyon ki ka fè kè ou oblijé rété akaz a-w ? Si sé ka a-w, konsantré-w asi sa ou pé fè pou montré jan ou enmé Jéova é pwochen a-w. Pannan pandémi  a Covid-19 la, Samuel é Dania rété fèmé akaz a yo. Toutolon a péryòd difisil lasa, yo pran labitid préché pa téléfòn é pa lèt, é yo té ka fè étid a moun osi asi Zoom. Samuel pwofité pou palé dè Labib èvè moun i té ka jwenn lè i té k’ay adan on klinik pou yo té swangné kansè a-y. Mi sa i ka èspliké : « Lè nou ka jwenn bout-rèd nou pé rivé a santi-nou angwasé, nou pé las é sa pé aji asi fwa an nou. A moman-lasa, fò-nou chèché a ni tchè-kontan grasa sèwvis an nou pou Jéova. » Kanta Dania, i pran on mové so é akòz dè sa i té oblijé rété kouché pannan 3 mwa. Aprésa, i rété 6 mwa adan on chèz-woulant. Mi sa i ka di : « An éséyé fè tousa sitiyasyon an mwen té ka pèwmèt-mwen fè. An rivé préché ba on enfiwmyèz ki té ka vin akaz é ba diféran moun ki té vin livré déotwa biten ban mwen. An fè dé bèl ti kozé osi pa téléfòn èvè on madanm ki ka travay adan on antrèpriz ki ka vann matéryèl médikal. » Sitiyasyon a Samuel é Dania té ka anpéché-yo fè sèwten biten, men yo fè sa yo té pé é sa pwokiré-yo onlo jwa.

17. Pou sé ti konsèy-la nou vwè adan awtik-lasa fè-nou dibyen, ka pou nou fè ?

¹⁷ Awtik-lasa ké fè-nou dibyen siwvwè nou ka chèché a mèt sé 5 konsèy-la nou vwè la an pratik. An-nou pran on ègzanp pou nou konprann sa. Lè nou ka suiv on rèsèt pou fè on gato, si nou vlé gato-la bon, fò-nou mèt chak sé biten-la yo ka di-nou la adan-y. Ében sé menm biten pou sé ti konsèy-la nou vwè la. Sé siwvwè nou ka mèt tout sé ti konsèy-lasa an pratik, nou ké rivé rété pozitif pli fasilman é nou ké ni tchè-kontan lèwvwè nou ké ay préché.