1. Ka paradi èspirityèl la yé é ka nou byen désidé a fè ?

 JÒDILA ni on paradi ki ka ègzisté asi latè. Paradi-lasa ranpli èvè moun ki byen okipé pas yo ka fè onlo bon biten. Adan-y ni milyon é milyon moun ki ka viv anpé toubònman. Yo byen désidé a pa jen sòti adan paradi-lasa. É yo vlé kè on maksimòm dè moun vin jwenn-yo, pas pa ni pondòt koté konsa. Ki paradi ésa ? Sé Paradi èspirityèl la a !

2. Ki biten èstraòwdinè Jéova fè ?

² Jéova kréyé on koté pou pèp a-y pé sa viv anpé é i fè sa anmitan mond a Satan, on mond ki danjéré, on koté moun paré a manjé moun tèlman yonn hay lòt é tèlman ni méchansté. Ès ou pa’a touvé sa Bondyé fè la èstraòwdinè ? (1 Jan 5:19 ; Rév. 12:12). Bondyé an nou ki plen lanmou ka vwè tout sé mové biten-la ki ka fèt la alèla é sé pousa i ka fè ansòt pou nou santi-nou ansékirité é pou nou kontinyé sèvi-y èvè tchè-kontan. Adan Pawòl a-y, lè yo ka palé dè paradi èspirityèl la yo ka di kè sé on « abri » ki sèten é yo ka di osi kè sé on « jaden yo ka wouzé byen konm i fo » (Iz. 4:6 ; 58:11). Konm Jéova ka béni sé moun-la ki ka viv adan paradi èspirityèl la, yo ni tchè-kontan é yo ka santi-yo anpé magré yo ka viv adan sé dènyé jou-la, ki rèd toubònman (Iz. 54:14 ; 2 Tim. 3:1).

3. Kijan Izayi chapit 65 réyalizé an tan lontan ?

³ Jéova voyé lèspri sen a-y asi pwofèt Izayi pou i èspliké kijan lavi té’é yé adan paradi èspirityèl la. Nou ka touvé sa i di  an Izayi chapit 65. Sé pawòl-lasa ja réyalizé on prèmyé fwa an 537 avan épòk an nou. An tan-lasa, onlo Juif ki rèpanti-yo viré adan péyi a yo. Tibwen tan avan, yo té chayé-yo pa fòs Babilòn é pa té ni lontan yo té lagé-yo. Jéova béni pèp a-y. Kijan i fè sa ? Konm Jérizalèm té détwi, Jéova édé pèp a-y woukonstwi-y é fè-y wouvin bèl. I édé-yo fè ansòt osi pou Tanp-la wouvin koté pi enpòwtan la pou adoré Jéova an Izrayèl (Iz. 51:11 ; Zak. 8:3).

4. Kijan Izayi chapit 65 ka réyalizé jòdijou ?

⁴ Sa Izayi anonsé réyalizé on dézyèm fwa an 1919, lèwvwè sèwvitè a Jéova ki té ka viv a épòk-lasa sòti anba men a Gran Babilòn-la. Aprésa, paradi èspirityèl la koumansé grandi asi toutlatè. Sèwvitè a Jéova té ka préché Wayòm-la èvè onlo balan é yo fòwmé onlo lasanblé. Ondòt biten ankò sé kè sèwvitè a Bondyé té ka montré kè yo ni sé bèl kalité-la ki adan fwi a lèspri. Avan, sèwten adan yo té ka aji èvè vyolans èvè lézòt é yo té ka aji kon zannimo, men konnyéla yo « mèt nouvo pèwsonalité-la asi [yo], on pèwsonalité kè Bondyé kréyé sèlon volonté a-y » (Éféz. 4:24). Sa sèten, onlo adan sé bénédisyon-la Izayi palé la ké réyalizé adan nouvo mond-la. Men dépi konnyéla nou pé bénéfisyé dè onlo byenfé. An-nou vwè sèwten adan yo é an-nou vwè poukwa fò pa nou jen sòti adan paradi èspirityèl la.

KIJAN SÉ MOUN-LA KI ADAN PARADI ÈSPIRITYÈL LA KA SANTI-YO

5. Dapré Izayi 65:13, kijan sé moun-la ki adan paradi èspirityèl la ka viv ?

⁵ Yo ka manjé byen é yo byen pòtan. Pwofési a Izayi ka montré kè jan-la sé moun-la ki adan paradi èspirityèl la té’é viv pa té’é ni ayen a vwè èvè jan-la sé moun-la ki pa adan-y la té’é viv (li Izayi 65:13). A pa ti biten Jéova ka ba sèwvitè a-y pou yo rété bon bon zanmi èvè-y. I ka ban-nou lèspri sen a-y, Pawòl a-y, é onlo piblikasyon ki bazé asi Pawòl a-y. Grasa sa, nou ka « manjé », nou ka « bwè » é nou « kontan » (konparé èvè sa ki maké adan Révélasyon 22:17). Pawkont, sé moun-la ki pa adan paradi èspirityèl la ka « mo-fen », yo ka « mò-swèf » é yo « hont ». Yo pa zanmi èvè Bondyé (Amòs 8:11).

6. Joèl 2:21-24 ka palé dè sèwten kado Jéova ka ban-nou. Kijan sé vèwsé-lasa ka palé dè sa é ki byenfé sa ka pòté ban nou ?

⁶ Adan pwofési-la Joèl anonsé la, i palé dè diféran biten yo ka sèvi èvè-y pou fè manjé kon séréal, diven é luil doliv. Joèl pran ègzanp a sé biten-lasa pou montré kè Jéova ka ba sèwvitè a-y tousa yo bizwen annabondans, siwtou sa ki ka édé-yo rété bon bon zanmi èvè-y (Joèl 2:21-24). Pa ègzanp, i ka sèvi èvè Labib, piblikasyon an nou, sit Entèwnèt an nou, réinyon an nou é lasanblé an nou pou fè sa. Chakjou nou pé pwofité dè sé dispozisyon-lasa é konsa nou ka pi anfòm é nou ka woupran fòs.

7. Ka ki ka ban-nou ‘tchè-kontan’ ? (Izayi 65:14).

⁷ Yo ké ni tchè-kontan é yo ké santi-yo byen. Sèwvitè a Bondyé ka « soté anlè » tèlman tchè a yo plen èvè rèkonésans pou Bondyé (li Izayi 65:14). Sé vérité-la é sé pwomès-la ki an Bib-la ki ka ban-nou fòs é ki ka rékonfòwté-nou, èvè èspérans-la nou ni la ki bazé asi ranson-la, ka ban-nou ‘tchè-kontan’. Lèwvwè nou ka palé dè sé biten-lasa èvè frè é sè an nou, a pa ti kontan nou kontan ! (Sòm 34:8 ; 133:1-3).

8. Adan paradi èspirityèl la, nou ka touvé 2 biten ki enpòwtan toubònman. Ki biten ésa ?

⁸ Adan paradi èspirityèl la, nou ka touvé 2 biten ki enpòwtan toubònman : lanmou é linité. Sa ka ban-nou on lidé asi kijan nou  ké viv adan nouvo mond-la. Lanmou é linité ké lyanné sèwvitè a Jéova kon sa po’o jan fèt (Kol. 3:14). On sè ka rakonté sa i vwè lè i koumansé vin owa sé Témwen a Jéova la. Mi sa i ka di : « An pa té sav ka pou mwen té fè pou ni tchè-kontan, menm lè an té èvè fanmi an mwen. Prèmyé fwa an vwè moun ka montré lézòt kè yo enmé-yo vréman, sé owa sé Témwen a Jéova la. » Si on moun vé santi-y byen é ni tchè-kontan, fò i rantré adan paradi èspirityèl an nou. Kèlkèswa sa mond-la ka pansé dè sèwvitè a Jéova, non an nou ni valè, kivédi nou ni on bon répitasyon an zyé a Jéova é an zyé a tout sèwvitè a-y (Iz. 65:15).

9. Ka Izayi 65:16, 17 ka pwomèt-nou anrapò èvè difikilté nou ka jwenn ?

⁹ Lèspri a yo trankil é yo kalm. Izayi 65:14 ka di kè séla ki chwazi dè pa rantré adan paradi èspirityèl la ka ‘hélé pas tchè a yo plen tristès’ é yo ka ‘plenn-yo pas lèspri a yo anpenn’. É sèwvitè a Bondyé alò ? Labib ka di kè anfinaldikont, yo ‘pé’é sonjé’ sé biten-la ki ka fè-yo soufè la ankò é sé biten-lasa ‘pé’é parèt douvan zyé a Bondyé’ ankò (li Izayi 65:16, 17). Jéova ké fè tout pwoblèm an nou disparèt é piti-a-piti nou pé’é sonjé sa ki ka fè-nou soufè ankò.

10. Poukwa pou vou sé on lonnè lè ou èvè frè é sè a-w adan lasanblé-la ? (gadé imaj-la osi).

¹⁰ Dépi alèla, lè nou k’ay adan réinyon an nou, nou ka santi-nou anpé. Sé réinyon-la ka trankilizé lèspri an nou é sa ka édé-nou oubliyé sé biten-la ki ka istrésé-nou adan mond méchan lasa. Nou osi nou pé édé frè é sè an nou santi-yo anpé lè nou ka fè ansòt pou ni lanmou, lajwa, lapé, bonté é dousè adan lasanblé-la. Nou ka touvé tout sé kalité-lasa adan fwi a lèspri sen (Gal. 5:22, 23). A pa ti kontan nou kontan nou ka fè pawti a òwganizasyon a Bondyé ! Anplisdisa, touséla ki ka rété adan paradi èspirityèl la ké vwè Bondyé réyalizé pwomès-la i fè-nou la anplen. I pwomèt-nou kè i ké fè « on nouvo syèl é on nouvo tè ».

11. Dapré Izayi 65:18, 19, lè nou ka sonjé bèl paradi-la Jéova kréyé la, ka nou dwèt rèsanti ?

¹¹ Yo ni rèkonésans é yo ni onlo balan. Aprésa, Izayi ka èspliké poukwa nou dwètèt « ni on jwa ki ka débòdé » é poukwa paradi èspirityèl la dwètèt ‘ban-nou tchè kontan’. Sé Jéova ki kréyé paradi-lasa (li Izayi 65:18, 19). Kifè, sa pa ka siwprann-nou si Jéova ka sèvi èvè nou pou fè moun sòti adan sé òwganizasyon-la ki adan mond-lasa é ki pa ka aprann moun lavérité asi Bondyé, pou fè sé  moun-lasa rantré adan bèl paradi èspirityèl la nou adan-y la ! Davwa nou adan lavérité, nou ka jwenn onlo bèl bénédisyon, kifè sa ka ban-nou tchè-kontan é sa ka ban-nou onlo balan pou nou palé dòt moun dè sé bénédisyon-lasa (Jér. 31:12).

12. Lè ou ka vwè sa Jéova pwomèt an Izayi 65:20-24, ka sa ka fè-w é poukwa ou ka rèsanti sa ?

¹² Nou ni onlo rèkonésans é nou ni onlo balan pou ondòt rézon ankò : konm nou ka viv adan paradi èspirityèl la, nou ni on bèl èspérans toubònman. Sonjé tout sé biten-la nou ké vwè la é tout sé biten-la nou ké fè la adan nouvo mond-la ! Mi sa Labib ka pwomèt : « Pé’é jen ni pon piti timoun […] ki ka viv déotwa jou tousèl, ni pon moun ki vyé ki pa’a rivé an bout a vyéyès a-y. » Nou ké ‘fè kaz é nou ké rété adan, nou ké planté chan-rézen é nou ké manjé rézen’. ‘Nou pé ké travay rèd pou ayen’ pas nou ké fè pawti a « moun kè Jéova béni ». Bondyé an nou ka pwomèt-nou kè nou ké viv ansékirité, kè nou ké adoumanman é kè vi an nou ké ni on sans. « Avan menm [nou] kriyé », i ké ja sav ka nouchak bizwen é i ké « rasazyé anvi a tousa ki ka viv » (Iz. 65:20-24 ; Sòm 145:16).

13. Kijan Izayi 65:25 ka palé dè sé chanjman-la sèwten moun ka fè adan pèwsonalité a yo lè yo ka koumansé sèvi Jéova ?

¹³ Yo ka travay pou lapé é yo ka viv ansékirité. Grasa lèspri sen a Bondyé, onlo moun ki té ka konpòwté-yo kon zannimo avan fè onlo chanjman adan pèwsonalité a yo (li Izayi 65:25). Yo travay rèd pou yo té rivé about a défo a yo (Wom. 12:2 ; Éféz. 4:22-24). Sé vré, menmsi nou ka sèvi Bondyé nou enpawfè toujou, kifè nou ka fè érè. Men, sa pa ka anpéché Jéova sanblé « tout kalité moun » é sa pa ka anpéché-y lyanné-yo ansanm èvè lanmou é lapé. Pa ni ayen ki pé détwi lyannaj-lasa (Tit 2:11). Sèl moun ki té pé fè on mirak konsa sé Jéova, Bondyé an nou ki toupuisan !

14. Kijan Izayi 65:25 réyalizé adan vi a on frè ?

¹⁴ Ès on moun pé chanjé pèwsonalité a-y vréman ? An-nou pran on ègzanp pou réponn a kèsyon-lasa. An-nou palé dè on jennboug ki té ka aji èvè onlo vyolans toubònman é ki té ni on vyé vi menm. Lèwvwè i té ni 20 an i té ja fè lajòl plizyè fwa pas i té volé vwati, i té volé aka moun é i té fè dòt ka ankò. I pa té ka raté on lokazyon pou goumé. Prèmyé fwa i tann sé vérité-la ki an Bib-la é kè i koumansé vin réinyon, i té sèten kè i té touvé ka ki té pé ba vi a-y on sans. Fò i té adoré Jéova adan paradi èspirityèl la. Apré batèm a-y, souvantfwa i té ka di kè sa ki maké an Izayi 65:25 réyalizé adan vi a-y. Avan, i té on moun ki té ka aji èvè onlo vyolans toubònman, ki té anrajé kon liyon, men alè i vin on moun ki ka travay pou lapé é ki dous kon on timouton.

15. Poukwa nou vé envité on maksimòm dè moun a vin jwenn-nou adan paradi èspirityèl la, é kijan nou pé fè sa ?

¹⁵ Mi konsa Izayi 65:13 ka koumansé : « Mi sa Jéova, Pli Gran Ségnè-la, ka di. » É mi konsa vèwsé 25 la ka fin : « Mi sé sa Jéova ka di ». Pawòl a-y toujou ka réyalizé (Iz. 55:10, 11). Paradi èspirityèl la ja ka ègzisté dépi konnyéla. Jéova kréyé on fanmi ki plen èvè moun ki ka adoré-y é ou pa’a touvé on fanmi konsa pondòt koté. Sé vré nou po’o anpé a san pou san, men konm nou ka fè pawti a fanmi-lasa, nou ja ka santi-nou anpé é ansékirité magré nou ka viv adan on mond ki plen vyolans (Sòm 72:7). Pou tout sé rézon-lasa, nou vé envité on maksimòm dè moun pou yo fè pawti a fanmi-lasa. Nou pé fè sa lèwvwè nou ka fè tousa nou pé pou préché é anségné (Mat. 28:19, 20).

 KIJAN NOU PÉ BA MOUN ANVI RANTRÉ ADAN PARADI ÈSPIRITYÈL LA

16. Ka ki pé ba on moun anvi rantré adan paradi èspirityèl la ?

¹⁶ Pou ba on moun anvi rantré adan paradi èspirityèl la, ni on biten enpòwtan noutout pé fè. Fò-nou imité Jéova. Jéova pa ka fòsé ponmoun vin adan òwganizasyon a-y. I plito ka « atiré » chakmoun owa a-y èvè dousè (Jan 6:44 ; Jér. 31:3). Lè sé moun-la ki ni on tchè ki sensè ka vin sav kè Jéova sé on Bondyé ki plen lanmou é kè i ni onlo bèl kalité, yo ka vin owa-y tou natirèlman. Anplisdisa, lè yo ka vwè bèl kalité an nou é jan nou ka konpòwté-nou byen, sa ka ba-yo anvi dékouvè paradi èspirityèl la. An-nou vwè kijan.

17. Kijan nou pé ba moun anvi rantré adan paradi èspirityèl la ?

¹⁷ Nou pé ba moun anvi vin adan paradi èspirityèl la osi, lè nou ka aji èvè lanmou é bonté èvè frè é sè an nou. Lè on moun ka vin adan réinyon an nou pou prèmyé fwa, nou vlé kè i di menm biten ki sé moun-la ki té k’ay réinyon èvè lasanblé a Korent é ki té ka di : « Bondyé vréman anmitan a zòt » ! (1 Kor. 14:24, 25 ; Zak. 8:23). Alò, an-nou kontinyé suiv konsèy-lasa : « Fò i ni lapé antré zòt » (1 Tés. 5:13).

18. Ki biten ki té’é pé ba sé moun-la anvi fè pawti a òwganizasyon an nou ?

¹⁸ An-nou fè ansòt pou nou toujou vwè frè é sè an nou kon Jéova ka vwè-yo. Nou ké rivé fè sa siwvwè nou ka konsantré-nou asi bèl kalité a yo olyé nou gadé sé défo-la yo ni la konnyéla é ki ké fin pa disparèt. Kèlkèswa pwoblèm nou té’é pé trapé èvè on frè oben on sè an nou, nou pé réglé sa èvè lanmou siwvwè nou toujou ka « aji èvè bonté yonn èvè lòt, èvè on konpasyon ki plen tandrès, toupannan yonn ka padonné lòt volontyé » (Éféz. 4:32). Ni sèwten moun ki anvi yo aji konsa  èvè yo, kifè sa ké ba-yo gou pou vin adan paradi èspirityèl la b.

RÉTÉ ADAN PARADI ÈSPIRITYÈL LA

19. a) Ka sèwten frè é sè di lèwvwè yo viré adan paradi èspirityèl la ? (gadé ti karé-la «  Yo pati, é yo wouviré »). b) Ka pou nou byen désidé a fè ? (gadé imaj-la osi).

¹⁹ A pa ti enmé nou enmé paradi èspirityèl la ! Nou po’o jen té touvé-y bèl konsa é po’o janmé té ni tousa moun ki ka adoré Jéova adan-y. Nou vlé kontinyé di Jéova mèsi pou bèl paradi-la i kréyé ban nou la. Si on moun vé ni on bon santé é santi-y byen, si i vé santi-y anpé é ansékirité, fò i vin adan paradi èspirityèl la é fò pa i jen sòti adan ! Men fò-nou fè atansyon, pas Satan ka éséyé pri-nou adan tout kalté zatrap pou i chayé-nou lwen a paradi èspirityèl la (1 Pyè 5:8 ; Rév. 12:9). Panga nou lésé-y trapé-nou. An-nou fè bon éfò pou nou pwotéjé paradi èspirityèl an nou pou i rété bèl, pou i pwòp é pou yonn toujou anpé èvè lòt.