Non. Vèwsé-la ka palé dè on moun ki ka jwenn bon pwoblèm, men ki toujou ka andiré.

An-nou pran Pwovèb 24:15-17 pou nou konprann vèwsé 16 la pibyen. Mi sa nou ka li : « Ou méchan méchan a-w, men penga ou ay mété-w owa kaz a jis-la pou fè-y pon atrosité ; penga ou krazé la i ka rété la. Pas on moun ki jis pé tonbé sèt fwa, men i ké woupran doubout a-y ; men méchan-la ké pran on gwo so pas malè ké rivé-y. Lèwvwè lènmi a-w ka tonbé, pa ri, é lèwvwè i ka pran on bon so, pa soté anlè. »

Ni moun ka pansé kè adan vèwsé 16 la yo ka palé dè on moun ki ka péché a plizyè rèpriz, ki ka rèpanti-y é ki ka wouvin bon zanmi èvè Jéova. An Anglètè, ni 2 chèf a légliz ki maké kè ni onlo prédikatè, ki sé an tan lontan ki sé aprézan, ki té ka èspliké vèwsé-lasa konsa. Sé 2 boug-lasa ajouté kè si nou ka bazé-nou asi èsplikasyon-lasa, sa té’é vlé di kè on moun ki bon pé péché péché a-y men dépi i ka mandé Bondyé padon, i ké rété bon zanmi èvè-y é Bondyé ké béni-y *. Nou ka tou konprann kè on moun ki vé pa arété bétizé ké kontan tann sa, é i pé mèt an tèt a-y kè i pé péché kantité fwa i vé, piskè Bondyé ké toujou padonné-y.

Men a pa sa vèwsé 16 la vé di.

Adan sé vèwsé 16 é 17 la, yo ka sèvi èvè on mo ébré ki vé di « tonbé », men yo pé sèvi èvè mo-lasa pou di plizyè biten diféran. Pa ègzanp, ou pé sèvi èvè mo-lasa si ou bizwen di kè on bèf tonbé an chimen-la, oben kè on moun té asi on twa é kè i tonbé, oben ankò kè on wòch tonbé atè-la (Dét. 22:4,8 ; Amòs 9:9). Men mo-lasa pé ni ondòt sans ankò. Gadé kijan yo ka sèvi èvè-y adan pasaj-lasa : « Lè Jéova kontan on moun, i ka di-y la pou i ay. Menmsi i tribiché, i pé’é tonbé atè, pas Jéova ka tchenn men a-y » (Sòm 37:23, 24 ; Pwov. 11:5 ; 13:17).

Men mi sa pwofésè Edward Plumptre di anrapò èvè sa : « Mo ébré-la ki vé di [“tonbé”], yo pa jen ka sèvi èvè-y pou palé dè on moun ki ka fè péché *. » Pou ondòt èspésyalis, mi sa Pwovèb 24:16 vé di : « Sa pa’a sèvi ayen kè yo maltrété pèp a Bondyé piskè i ké rété vivan. Men sé méchan-la, sé mò yo kay mò * ! »

Kifè, an Pwovèb 24:16, yo pa’a palé-nou dè péché on moun ka fè, men dè penn é péripési i pé jwenn adan lavi. Adan mond méchan la nou ka viv la, on moun ki jis pé jwenn onpakèt difikilté. Pa ègzanp, i pé tonbé malad, pétèt osi kè la i ka rété la, gouvènman-la pé ka pèwsékité-y. Men i pé sèten kè Bondyé ké toujou soutyenn-li. I ké édé-y andiré é i ké édé-y rivé about a tout difikilté i ka jwenn. Sèten ou ja rèmawké kè menmsi sèwvitè a Bondyé ka jwenn difikilté, yo toujou ka touvé on mwayen pou woté pyé a yo adan vyé soulyé. Kijan yo ka rivé fè sa ? Nou pé sèten kè « dépi on moun k’ay tonbé, Jéova ka soutyenn-li é dépi 2 bra a on moun kasé, i ka lévé-y » (Sòm 41:1-3 ; 145:14-19).

« On moun ki jis » pa’a hélé woulo bravo lè i ka tann kè dòt moun ni pwoblèm. Okontrè, i sav kè « tout biten ké pasé byen pou moun ki pè fè vré Bondyé la lapenn, pas yo pè fè-y lapenn. » É pasaj-lasa ka ankourajé-y toubònman (Ékl. 8:11-13 ; Jòb 31:3-6 ; Sòm 27:5, 6).