1. Jéova pwomèt-nou kè nou ké viv pou touttan. Lèwvwè nou ka pran tan réfléchi asi sa, ka nou ka rèsanti ?

 JÉOVA ka pwomèt moun ki ka kouté-y « lavi étèwnèl » (Wom. 6:23). Lèwvwè nou ka pran tan réfléchi asi bèl pwomès-lasa, nou ka vin enmé Jéova pli fò. Ou ka imajiné : tèlman Pap’an nou ki an syèl-la enmé-nou, i pran on dispozisyon pou ayen pa jen séparé-nou dè-y !

2. Jéova pwomèt-nou kè nou ké pé viv pou touttan. Kijan pwomès-lasa ka édé-nou ?

² Jéova pwomèt-nou kè nou ké pé viv pou touttan é sa ka édé-nou andiré touléjou a vi an nou. Menmsi lènmi an nou ka mennasé-nou é ka di-nou kè yo ké tchouyé-nou, nou pa ka arété sèvi Jéova. Poukisa ? Nou pé di sa pas nou sav kè si nou rété fidèl a Jéova é kè nou mò, i ké résisité-nou é i ké ban-nou laposibilité dè viv pou touttan (Jan 5:28, 29 ; 1 Kor. 15:55-58 ; Ébr. 2:15). Poukwa nou pé sèten kè nou ké pé viv pou touttan ? An-nou ègzaminé déotwa biten ki ka pèwmèt-nou di sa.

3. Poukwa nou pé sèten kè Jéova pé fè-nou viv pou touttan ? (Sòm 102:12, 24, 27).

³ Nou sav kè Jéova pé fè-nou viv pou touttan paskè sé-y ki sé Sous a lavi é paskè anplisdisa limenm ka viv pou touttan (Sòm 36:9). Ni déotwa pasaj a Labib ki ka di kè Jéova toujou ègzisté é kè i ké la pou touttan. É pawmi sé vèwsé-lasa, nou ka touvé Sòm 90:2 ki ka di konsa kè Jéova la « dépi touttan é pou touttan ». Nou ni Sòm 102 la osi ki ka di-nou menm biten-la (li Sòm 102:12, 24, 27). Lè pwofèt Abakik palé dè Pap’an nou ki an syèl-la, mi sa i di : « O Jéova, ès a pa dépi touttan ou ka ègzisté ? O Bondyé an mwen, Sen an mwen, ou pa ka mò » (Abak. 1:12).

4. Si nou pa’a rivé konprann kè Jéova toujou ègzisté, ès fò sa chouboulé-nou ? Bay on ti èsplikasyon.

 ⁴ Jéova toujou ègzisté (Iz. 40:28). Ès ou ka rivé konprann sa ? Si ou ka réponn non, pa enkyété-w, ni onlo moun ki ni dimal a konprann sa osi. Dayè, mi sa Éliyou ni lokazyon di asi Bondyé : « Ponmoun pé pa di konmen lanné i ni » (Jòb 36:26). Men a pa paskè nou pa’a rivé konprann on biten, kè sa vlé di kè biten-lasa pa vré. Pétèt ou ja gadé kijan limyè-la ka fonksyonné é pétèt kè ni dé biten kè ou pa’a rivé konprann. Men a pa paskè ou pa’a rivé konprann tout biten-la kè ou ké di kè limyè pa’a ègzisté. Menmjan-la, pétèt kè nou pé ni dimal a konprann kè Jéova té toujou la é kè i ké toujou la. Men sa vlé pa di kè i pa’a viv pou touttan, kè i pa’a viv dépi touttan. A pa paskè nou pa’a konprann on biten nou aprann asi Kréyatè-la kè a pa on vérité (Wom. 11:33-36). Avan menm linivè té fèt, èvè solèy-la é sé zétwal-la, Jéova té ja ka ègzisté, i té ja la. Nou sèten kè sé Jéova ki « fè tè-la grasa fòs a-y ». Wi, i té ja la avan menm i té « wouvè syèl-la kon dra » (Jér. 51:15 ; Akt 17:24). Men pou ki rézon ankò nou pé sèten kè nou ké pé viv pou touttan ?

5. Ki bèl èspwa prèmyé misyé-la é prèmyé madanm-la té ni ?

⁵ Lè Jéova kréyé lézimen, i ba-yo on bèl èspwa : yo té’é viv pou touttan. Men tout sélézòt biten-la ki ka viv asi latè té’é mò on jou. Pawkont, Jéova té avèti Adan. I té di-y konsa : « Ou pa ni dwa manjé adan fwi a pyébwa a konésans a sa ki byen é a sa ki mal, pas jou-la ou ké manjé adan-y la, ou ké mò » (Jén. 2:17). Si Adan é Èv té obéyi, yo pa té’é mò é pétèt kè Jéova té’é ba-yo dwa manjé adan pyébwa-la ki ka bay lavi. A moman-lasa yo té’é ni on garanti, yo té’é viv pou touttan b (Jén. 3:22).

6-7. a) Ki dòt biten ki ka montré kè lézimen pa té fèt pou yo té mò ? b) Bay déotwa biten ou présé fè adan nouvo mond-la (gadé imaj-la).

⁶ Sèwten syantifik touvé dé biten ki vréman entérésan. Yo touvé prèv ki té ka montré kè sèwvo an nou pé pran lontan plis enfòwmasyon ki sa nou pé aprann pannan tout vi an nou. Pa  ègzanp an 2010, on jounal di konsa kè sèwvo an nou pé anrèjistré 3 milyon lè a vidéo apépré. Pou nou té’é gadé tout sé vidéo-lasa, sa té’é pran plis ki 300 lanné. É pétèt menm kè sèwvo an nou té’é pé pran plis enfòwmasyon ki sa. Sa ka montré kè sèwvo-la Jéova fè la ka pran lontan plis enfòwmasyon ki sa nou pé aprann an 70 oben 80 lanné sèlman (Sòm 90:10).

⁷ Lè Jéova kréyé-nou, i mèt on biten andidan an nou pou nou anvi viv pou touttan. É a pa ti anvi nou anvi viv. Labib menm ka di kè Bondyé « ba lézòm anvi viv pou touttan » adan tchè a yo (Ékl. 3:11). Sé pousa, pou nou lanmò sé on lènmi (1 Kor. 15:26). Dayè pou yonn, si nou malad bon malad la, ès nou ké rété la é lésé kò an nou alé ? Awa. Nou ké pòté mannèv pou nou ay aka on mèdsen é nou ké chèché ki rimèd pou nou pran pou kò an nou pé sa goumé èvè maladi-la. An réyalité, nou ké fè tousa nou pé pou nou pa mò. É lèwvwè nou ka pèd on moun nou enmé, ki moun-lasa jenn, ki moun-lasa ja ni on bèl laj, tchè an nou ka sengné é nou ka pran penn a moun-lasa pannan on bon moman délè (Jan 11:32, 33). Tousa ka montré kè si Kréyatè an nou ki enmé-nou mèt on biten andidan nou pou nou pé sa anvi viv pou touttan, sé kè adan pwojé a-y, i té fè lézimen pou yo té viv pou touttan. Men nou pé sèten kè nou ké viv pou touttan pas ni dòt rézon ankò ki ka fè-nou di sa. An-nou vwè déotwa biten Jéova fè an tan a Labib é déotwa biten i ka fè aprézan ki ka montré kè i pa chanjé pwojé-la i té ni la odépa.

8. Izayi 55:11 ka ban-nou on garanti anrapò èvè pwojé a Jéova. Ki garanti ésa ?

⁸ Menmsi Adan é Èv péché é kè yo mèt tout timoun a yo anba jouk a lanmò, Jéova pa chanjé pwojé a-y (li Izayi 55:11). I vé kè moun ki fidèl viv pou touttan kon i té prévwa odépa. Nou sav sa pas lè nou ka gadé sa Jéova di é sa i fè pou pwojé a-y réyalizé, nou ka vwè sa on mannyè ki klè.

9. Ki biten Jéova pwomèt ? (Danyèl 12:2, 13).

⁹ Jéova pwomèt kè i ké résisité moun ki mò é kè i ké ba-yo laposibilité dè viv asi latè pou touttan (Akt 24:15 ; Tit 1:1, 2). Jòb, on sèwvitè a Jéova ki té fidèl, ni lokazyon di kè a pa ti anvi Jéova anvi résisité moun ki mò. É limenm, Jòb, té sèten dè sa (Jòb 14:14, 15). Pwofèt Danyèl té sav osi kè lézimen té’é résisité é kè yo té’é ni laposibilité dè viv pou touttan (Sòm 37:29 ; li Danyèl 12:2, 13). An tan a Jézi, sé Juif-la té sav kè Jéova té pé ba moun ki fidèl « lavi étèwnèl » (Lik 10:25 ; 18:18). Jézi menm ni lokazyon palé dè pwomès-lasa a plizyè rèpriz é limenm, Pap’a-y résisité-y (Mat. 19:29 ; 22:31, 32 ; Lik 18:30 ; Jan 11:25).

10. An tan a Labib yo résisité déotwa moun. Ka sé rézirèksyon-lasa ka montré ? (gadé imaj-la).

¹⁰ Sé Jéova ki ka bay lavi é i pé résisité moun ki mò pas i ni pouvwa-lasa. Pa ègzanp, i ba pwofèt Éli pouvwa-lasa pou i té pé sa résisité gason a vèv a Sarèpta (1 Wa 17:21-23). Kèlkètan apré, i ba pwofèt Élizé pouvwa pou i té pé sa résisité gason a on madanm sinamit (2 Wa 4:18-20, 34-37). Sé rézirèksyon-lasa é dòt rézirèksyon ankò ka montré kè Jéova ni pouvwa pou i pé sa résisité moun ki mò. Lèwvwè Jézi té asi latè, i montré kè Pap’a-y té bay pouvwa-lasa (Jan 11:23-25, 43, 44). Jéova pwomèt kè touséla ki adan sé tonm-la ké résisité é ké ni laposibilité dè viv pou touttan é konnyéla la Jézi an syèl-la é yo ba-y « tout pouvwa an syèl-la é asi latè ». Alò sa vlé di kè Jézi ké pé réyalizé pwomès-lasa (Mat. 28:18 ; Jan 5:25-29).

11. Grasa ranson-la nou pé ni lavi étèwnèl. Kijansa ?

¹¹ Poukwa Jéova lésé Gason a-y soufè konsa alòskè i té enmé-y toubònman ? Ében mi sa Jézi limenm èspliké : « Tèlman Bondyé té enmé lèmond, i bay sèl Gason a-y, pou tout moun ki ka montré yo ni lafwa adan-y pa détwi men ni lavi étèwnèl » (Jan 3:16). Sa vlé di kè lèwvwè Bondyé bay vi a Gason a-y an ranson pou kouvè péché an nou, Bondyé ban-nou laposibilité dè viv pou touttan (Mat. 20:28). Sé on biten ki enpòwtan adan pwojé a-y é mi kijan lapòt Pòl ka èspliké sa : « Pas menmjan sé on nonm ki menné lanmò, menmjan osi, sé grasa on nonm rézirèksyon a moun-mò ké fèt. É wi, menmjan akòz dè Adan toutmoun ka mò, menmjan-la osi, grasa Kris, toutmoun ké wouviv » (1 Kor. 15:21, 22).

12. Kijan Jéova ké réyalizé pwojé a-y ?

¹² Jézi aprann disip a-y priyé pou wayòm a Bondyé vin é pou volonté a Bondyé fèt asi latè (Mat. 6:9, 10). Men on biten Bondyé prévwa adan pwojé a-y, sé kè lézimen viv pou touttan asi latè é sé pousa i chwazi Gason a-y, Mési-la, pou vin Wa a wayòm a-y. Anplisdisa, Bondyé ka sanblé 144 000 moun ki k’ay viv an syèl-la pou yo pé sa travay èvè Jézi é pou yo é Jézi fè ansòt pou volonté a-y fèt (Rév. 5:9, 10).

13. Ka Jéova ka fè konnyéla la, é vou dè koté a-w, ka pou-w fè ?

 ¹³ Konnyéla la Jéova ka sanblé « on gran-foulmoun » é i ka préparé-yo pou yo pé sa viv anba dominasyon a wayòm a-y (Rév. 7:9, 10 ; Jak 2:8). Menmsi ni divizyon toupatou asi latè, pas yonn hay lòt oben pas ni lagè asi latè, sé moun-la ki ka fè pawti a gran foulmoun-la ka travay rèd pou yo woté tout kalté henn yo té’é pé ni an tchè a yo. Sé konkidiré yo ja ka fè épé a yo vin kouto a chari (Mich. 4:3). Olyé yo tchouyé onpakèt moun adan lagè, yo ka édé moun ki alantou a yo touvé « vré vi-la » lèwvwè yo ka fè-yo konnèt Bondyé é lèwvwè yo ka fè-yo konnèt ki pwojé i ni (1 Tim. 6:19). Lèfètkè yo ka soutyenn wayòm a Bondyé, ni moun an fanmi a yo ki kont yo é ki ka éséyé mèt baton an wou a yo é yo pé touvé-yo osi èvè pwoblèm a lajan. Men Jéova toujou ka fè ansòt pou yo ni tousa yo bizwen pou viv (Mat. 6:25, 30-33 ; Lik 18:29, 30). Tousa ka montré-nou kè wayòm a Bondyé ka ègzisté poubon é kè i ké fè ansòt pou pwojé a Jéova réyalizé.

14-15. Ki dispozisyon Jéova ké pran pou lanmò disparèt pou touttan ?

¹⁴ Konnyéla, Jézi Wa a wayòm a Bondyé an syèl-la é i ké réyalizé tout sé  pwomès-la Jéova fè-nou la (2 Kor. 1:20). Dépi 1914, Jézi ka dominé asi lènmi a-y (Sòm 110:1, 2). É talè, Jézi é sé moun-la ki ka dirijé èvè-y la ké détwi tout sé méchan-la (Rév. 6:2).

¹⁵ Aprésa, pannan i ké ka gouvèné pannan sé 1000 an-la, i ké résisité sé mò-la é i ké édé moun ki ka obéyi Bondyé vin pawfè. Apré dènyé éprèv-la, sé moun-la Jéova di kè yo jis la « latè sé ké ta yo, é yo ké viv anlè-y pou touttan » (Sòm 37:10, 11, 29). É anfinaldikont, « dènyé lènmi-la, lanmò, ké détwi » (1 Kor. 15:26).

16. Ki prèmyé biten ki dwètèt ban-nou anvi sèvi Jéova ?

¹⁶ Kon nou vwè adan awtik-lasa, nou ni lèspwa dè viv pou touttan é lèspwa-lasa byen sizé adan Pawòl a Bondyé. Bèl èspwa-lasa pé édé-nou kenbé, siwtou kè nou ka viv pannan sé dènyé jou-la ki rèd toubònman. Men si nou vlé fè Jéova plézi, nou pé’é rété fidèl a-y yenki paskè nou sav kè nou ké rété an vi. Men prèmyé biten ki ké fè si nou ka rété fidèl a Jéova é a Jézi sé pas nou enmé-yo onlo toubònman (2 Kor. 5:14, 15). Lanmou-lasa ka ban-nou anvi imité-yo é fè toutmoun sav ki bèl èspwa nou ni (Wom. 10:13-15). Pli nou ké donan é kè nou ké anvi fè lézòt dibyen, pli Jéova ké vlé kè nou vin zanmi a-y é kè nou rété zanmi a-y pou touttan (Ébr. 13:16).

17. Ki rèsponsabilité nouchak ni ? (Matyé 7:13, 14).

¹⁷ Ès ou ké fè pawti a moun ki ké viv asi latè pou touttan ? Jéova ba toutmoun posibilité-lasa. Sé nou aprézan ki dwètèt fè ansòt pou nou rété asi chimen-la ki ka menné a lavi (li Matyé 7:13, 14). Men kijan lavi ké yé lèwvwè nou ké ka viv pou touttan ? Ében sé sa nou ké vwè adan awtik-la ki ka vin la.