1. On ti moman avan Jézi mò, ka i di yonn adan sé kriminèl-la ki té a koté a-y la ? (Lik 23:39-43).

 ALOSKÈ yo té kay rann dènyé souf a yo, Jézi é sé 2 kriminèl-la ki té a koté a-y la té ka soufè bon soufè la (Lik 23:32, 33). Konm sé moun-lasa té ja di Jézi bétiz, sa té ka montré on mannyè ki klè kè a pa té disip a-y (Mat. 27:44 ; Mawk 15:32). Men ni yonn adan yo ki chanjé mantalité a-y. Mi sa i di Jézi : « Jézi, sonjé-mwen lè ou ké vin adan wayòm a-w. » Alò Jézi réponn-li : « Vréman, an ka di-w sa jòdla, ou ké èvè mwen adan paradi-la » (li Lik 23:39-43). Jézi préché mésaj a Wayòm-la ki an syèl-la. Men nou pa ni pon prèv ki ka montré kè kriminèl-la aksèpté mésaj-lasa. É Jézi pa jen di nonplis kè boug-lasa té’é rantré adan wayòm a-y (Mat. 4:17). I té ka palé plito dè paradi-la ki asi latè-la é ki ké la talè. Poukwa nou pé di sa ?

2. Kriminèl-la ki rèpanti-y la sé té on Juif. Ka ki ka fè-nou di sa ?

² Pétèt kè kriminèl-la ki rèpanti-y la sé té on Juif. Mi sa i di lòt kriminèl-la : « Ou pa’a krenn Bondyé menm, alòskè yo ka pini-w menmjan-la ? » (Lik 23:40). Sé Juif-la té ka adoré onsèl Dyé alòskè sé moun-la ki pa té juif la té ka kwè adan onlo dyé (Ègz. 20:2, 3 ; 1 Kor. 8:5, 6). Si sé 2 kriminèl-la sé té dé moun ki pa té juif, kriminèl-la té’é mandé lòt la plito : « Ou pa’a krenn sé Bondyé-la menm, alòskè yo ka pini-w menmjan-la ? » Anplisdisa, Jéova pa té voyé Jézi préché ba moun ki pa té juif. Men i té voyé-y préché ba « mouton a Izrayèl ki pèd chimen » (Mat. 15:24). É Bondyé té di sé Izraélit-la kè i té’é résisité moun ki mò. Kriminèl-la té dwèt okouran a sa é kon sé pawòl-la Jézi di la ka fè-nou konprann, pétèt i té ka pansé kè Jéova té’é résisité Jézi é kè i té’é mété-y Wa  a wayòm a-y. Nou ka tou konprann kè kriminèl-la té ka èspéré kè li osi, Bondyé té’é résisité-y.

3. Lè Jézi palé dè paradi-la èvè kriminèl-la, pétèt kijan i imajiné sa an lèspri a-y ? Bay on ti èsplikasyon (Jénèz 2:15).

³ Si kriminèl-la ki té rèpanti-y la té on Juif, sèten i dwèt té konnèt istwa a Adan é Èv é i té tann palé osi dè paradi-la Jéova té ba-yo la. Kifè lèwvwè Jézi palé-y dè paradi-la, an lèspri a-y, kriminèl-la té ka vwè on ti jaden ki bèl toubònman asi latè (li Jénèz 2:15).

4. Sa Jézi di kriminèl-la dwètèt ankourajé-nou fè on biten. Ki biten ésa ?

⁴ Sa Jézi di kriminèl-la dwètèt pousé-nou imajiné kijan lavi ké yé adan paradi-la. An réyalité, lèwvwè Salomon té ka gouvèné, té ni lapé adan wayòm a-y é sa pé aprann-nou onlo biten asi paradi-la ki pou vin la. Labib ka di kè Jézi pli gran ki Salomon. Nou pé èspéré kè Jézi ké travay èvè séla ki ké dirijé èvè-y la pou fè latè vin on bèl paradi toubònman (Mat. 12:42). Anplisdisa, nou ka tou konprann kè fò ‘sélézòt mouton-la’ chèché a sav ka yo dwètèt fè pou viv adan paradi-lasa pou touttan (Jan 10:16).

5. Kijan ou ka imajiné lavi adan paradi-la ?

⁵ Lè ou ka sonjé paradi-la é kè ou ka fè imajinasyon a-w travay, ka ki ka vin an lèspri a-w ? Pétèt kè ou ka vwè on bèl ti jaden toubònman ki kon tala Jéova té fè la an Éden (Jén. 2:7-9). Pétèt kè ou ka sonjé osi pwofési-la Jéova té fè Miché maké la ki té ka di kè tout sèwvitè a Bondyé « ké sizé anba pyé-rézen a yo é anba pyé-fig a yo » (Mich. 4:3, 4). Oben pétèt ou ka sonjé dòt vèwsé a Labib ki ka di kè ké ni manjé pou tann-é-konprann adan paradi-la (Sòm 72:16 ; Iz. 65:21, 22). Alò ou ka imajiné jan jaden-lasa ké bèl é jan ou ké sizé owa on tab ki ké plen èvè tout kalité biten pou-w manjé é ki ké fè bouch a-w fè sòs. Lèw-la ou ké ka rèspiré la ké pwòp é ou ké pran bon ti lodè a sé plant-la é a sé flè-la. Pétèt kè ou ka imajiné jan ou ké tann zanmi a-w é fanmi a-w ka ri tout fòs a yo pas yo kontan pasé on bèl ti moman ansanm. É pétèt kè pawmi yo, ni sa ki ké toufré résisité. Lè nou ka sonjé tout sé biten-lasa, a pa révé nou ka révé. Nou pé sèten kè sé dé biten ki ké fèt adan paradi-la. Men lavi adan paradi-la a pa enki sa pas nou ké ni lokazyon travay osi é travay-lasa ké fè tchè an nou kontan toubònman.

6. Ka nou ké fè adan paradi-la ? (gadé imaj-la).

⁶ Lè Jéova kréyé-nou, i té vlé kè travay an nou fè-nou plézi. I mèt sa andidan an nou (Ékl. 2:24). Lèwvwè Jézi ké ka gouvèné pannan sé 1000 an-la, nou ké ni onlo biten a fè. Sé moun-la ki ké rété vivan la apré gwo tribilasyon-la é sé milyon moun-la ki  ké résisité la ké bizwen lenj pou yo mèt asi yo, manjé pou yo manjé é on koté pou yo rété. Pou yo pé sa ni tout sé biten-lasa, sa ké mandé onlo travay. Men sa ké tèlman entérésan ! Adan é Èv té adan on jaden é sé té kaz a yo, kifè, fò-yo té okipé dè jaden-lasa. Menmjan-la osi, fò-nou ké travay pou nou fè tout latè vin on bèl paradi. A pa ti kontan nou ké kontan fè sa ! Pran tan imajiné lèwvwè ou ké ka anségné sé milyon é milyon résisité-la ki pa té konnèt Jéova é ki pa té konnèt pwojé a-y é lèwvwè ou ké édé tout sé moun-la ki té fidèl la é ki viv avan Jézi vin asi latè aprann konnèt tousa ki pasé dépi yo mò. Mésyé, sa ké bèl !

7. Dè ki biten nou pé sèten é poukwa nou pé sèten dè sa ?

⁷ Nou pé sèten kè lèwvwè nou ké adan paradi-la nou ké viv adan lapé, nou ké ni tousa nou bizwen é tout biten ké byen òwganizé. Pou montré-nou kijan lavi ké yé anba dominasyon a Gason a-y, Jéova ja ban-nou on ègzanp. É jistèman, an-nou vwè ègzanp-lasa. Nou ké vwè kijan lavi té yé lèwvwè wa Salomon té ka gouvèné.

8. Kijan sé pawòl-la nou ka touvé an Sòm 37:10, 11, 29 réyalizé antan lontan ? (gadé awtik-la « Zò té vlé sav... » ki adan niméwo-lasa).

⁸ Jéova pousé David maké kè té’é ni on wa ki té’é ni onlo sajès é ki té’é fidèl a Jéova a san pou san é i pousé-y palé osi dè jan lavi té’é yé anba dominasyon a wa-lasa (li Sòm 37:10, 11, 29). Lè nou ka préché, souvantfwa, nou ka sèvi èvè Sòm 37:11 pou palé dè paradi-la ki pou vin la. Nou ni rézon dè fè sa pas Jézi limenm ni lokazyon palé dè sa adan Sèwmon-la i fè la anlè montangn-la. Sa té ka montré kè pasaj-lasa té’é réyalizé plita (Mat. 5:5). Men sé pawòl-la David té di la té ka montré osi kijan lavi té’é yé anba dominasyon a wa Salomon. Lè Salomon té ka gouvèné, pèp a Bondyé té ka viv anpé é sa yo té ka fè té ka réyisi. Yo té adoumanman adan on péyi lèt é siwo myèl té ka koulé. Mi sa Bondyé té di : « Si zò kontinyé suiv lwa an mwen [...] an ké mèt lapé adan péyi-la é lèwvwè zò ké adan kabann  a zòt, ponmoun pé’é fè-zòt pè » (Lév. 20:24 ; 26:3, 6). Sé pwomès-lasa réyalizé lèwvwè Salomon té ka gouvèné (1 Kron. 22:9 ; 29:26-28). Anplisdisa, yo té ni lèspwa kè sé méchan-la ‘pa té’é la ankò’ (Sòm 37:10). Kifè, sé pawòl-la nou ka touvé adan Sòm 37:10, 11, 29 réyalizé antan lontan é yo ké réyalizé plita osi.

9. Lèwvwè Salomon té ka gouvèné, ka Rèn a Saba di ?

⁹ Lè Rèn a Saba tann jan péyi a Izrayèl té ka viv anpé é jan péyi-la té rich lèwvwè Salomon té wa, i vin vwè sa. Madanm-la sòti jous an péyi a-y pou vin a Jérizalèm pou vwè sa an 2 zyé a-y (1 Wa 10:1). Lèwvwè i rann-li kont kè sé té sa menm, mi sa i di Salomon : « Yo pa menm té rakonté-mwen lanmwatyé [...]. Tchè-kontan pou nonm ki adan pèp a-w é tchè-kontan pou sèwvitè a-w ki toujou la èvè-w é ki ka tann pawòl ou ka di ki plen sajès ! » (1 Wa 10:6-8). Men sa ki té ka pasé an tan a Salomon, sé té on ti ayen owa sa Jéova ké fè lèwvwè toutmoun ké anba dominasyon a Gason a-y Jézikris.

10. Adan ki domenn Jézi pli fò ki Salomon ?

¹⁰ Adan tout domenn Jézi pli fò ki Salomon. Salomon pa té pawfè é i fè bon enpé érè ki té grav toubònman é ki fè pèp a Bondyé soufè. Pawkont Jézi, li, i ka gouvèné on mannyè ki pawfè é i pa’a fè pon érè (Lik 1:32 ; Ébr. 4:14, 15). Satan mèt Jézi a léprèv a plizyè rèpriz. Men Jézi toujou rété fidèl a Bondyé. I montré kè i pé’é jen péché é kè i pé’é jen fè ayen ki ké fè moun fidèl ki anba dominasyon a-y ditò. Sé méyè Wa nou pé ni. Nou pa ni pon dout asi sa !

11. Kimoun ki ké édé Jézi lèwvwè i ké ka gouvèné ?

¹¹ Jézi ké gouvèné èvè sé 144 000 la é yo ké fè ansòt pou tout moun asi latè trapé tousa yo bizwen é pou pwojé a Jéova réyalizé asi latè (Rév. 14:1-3). Lèwvwè sé 144 000 la té asi latè, yo jwenn onlo éprèv é onlo biten ki fè-yo soufè. Kifè, yo ké pé aji èvè onlo konpasyon èvè nou. Men ki biten yo ké ni a fè ègzaktèman ?

12. Ki travay Jéova ké ba sé 144 000 la fè ?

¹² Jézi é sé moun-la ki ké dirijé èvè-y la ké ni lontan plis travay a fè ki Salomon. Salomon okipé-y dè plizyè milyon moun. Men tout sé moun-lasa té ka viv adan onsèl péyi, alòskè sé moun-la ki ké ka gouvèné wayòm a Bondyé la ké okipé-yo dè plizyè milya moun ki ké rété toupatou asi latè. Jéova ka ba sé 144 000 la on bèl lonnè toubònman !

13. Sé 144 000 la ké ni on rèsponsabilité ki enpòwtan toubònman. Ki rèsponsabilité ésa ?

¹³ Menmjan ki Jézi, sé 144 000 la ké wa é prèt (Rév. 5:10). Lèwvwè sé Izraélit-la té anba Lwa a Moyiz, sé sé prèt-la an prèmyé ki té dwèt édé pèp-la pran swen a santé a yo é fè ansòt pou yo rété bon bon zanmi èvè Jéova. Men lwa-lasa sé té « on lonbraj a bon biten ki ka vin dèyè » (Ébr. 10:1). Donk nou pé pansé kè Jézi é sé 144 000 la ké fè menm travay-lasa. Yo ké pran swen a santé a tout moun ki asi latè é yo ké édé-yo pou yo kontinyé rété bon bon zanmi èvè Jéova. Alèla, nou po’o sav kijan yo ké palé èvè moun ki ké viv asi latè anba dominasyon a Wayòm-la. Men on biten ki sèten, sé kè kèlkèswa dispozisyon Jéova ké pran, tout moun asi latè ké sav ki biten pou yo fè (Rév. 21:3, 4).

14. ‘Sélézòt mouton-la’ é ‘piti twoupo-la’ soudé yonn èvè lòt. Kijansa ?

¹⁴ Lè Jézi palé dè sé moun-la ki ké gouvèné èvè-y la i di kè sé on ‘piti twoupo’ (Lik 12:32). Anplisdisa, i palé dè on dézyèm gwoup-moun é i kriyé-yo ‘sélézòt mouton-la’. Sé 2 gwoup-lasa soudé é yo ka fòwmé onsèl twoupo (Jan 10:16). Yo  ja ka travay men-dan-lamen é yo ké kontinyé kolaboré ansanm lèwvwè Jéova ké mèt paradi-la anplas asi latè. Asiré sèten, a moman-lasa ‘piti twoupo-la’ ké an syèl-la é ‘sélézòt mouton-la’ ké asi latè é yo ké ni lèspwa dè viv asi latè pou touttan. Men pou ‘sélézòt mouton-la’ viv adan paradi-la, yo ni sèwten biten a fè dépi konnyéla.

15. a) Kijan ‘sélézòt mouton-la’ ka kolaboré èvè frè a Kris ? b) Kijan ou pé suiv ègzanp a frè-la ki adan fawmasi-la ? (gadé imaj-la).

¹⁵ Kriminèl-la ki rèpanti-y la ni tan mò avan i montré Jézi jan i té ni rèkonésans pou-y. Men jòdijou, nou ki ka fè pawti a ‘sélézòt mouton-la’, nou ni on bèl lokazyon pou nou montré Jézi sa nou ka rèsanti pou-y. Pa ègzanp nou pé montré-y sa adan jan-la nou ka aji èvè frè a-y ki wen. Dayè, Jézi di kè lè i ké jijé ‘sélézòt mouton-la’, sé sa i ké gadé (Mat. 25:31-40). Lèwvwè nou ka pòté bon mannèv adan travay a prédikasyon-la é lèwvwè nou ka édé moun vin disip a Jézi, sé soutyenn nou ka soutyenn frè a Kris (Mat. 28:18-20). É jistèman, pou nou fè sa, an-nou fè tousa nou pé pou nou byen sèvi èvè tout zouti lòwganizasyon ka ban-nou pou étidyé èvè moun. Pawmi sé zouti-lasa, ni liv-la Ou pé ni tchè-kontan pou touttan ! Si ou po’o ka étidyé èvè ponmoun, pétèt kè ou té’é pé pwopozé on maksimòm dè moun étidyé Labib èvè-w. Sé on bèl òbjèktif ou pé fiksé-w.

16. Ka nou pé fè pou nou préparé-nou pou viv anba dominasyon a wayòm a Bondyé ?

¹⁶ Nou pa bizwen atann kè nou rivé adan paradi-la pou nou vin on moun Jéova vlé vwè adan paradi a-y. Dépi konnyéla, fò nou fè éfò pou nou réglo lè nou ka palé èvè lézòt é lè nou ka aji èvè-yo osi. Fò nou fè éfò pou nou pa two radikal adan labitid an nou. Anplisdisa, fò nou fè tousa nou pé pou nou rété fidèl a Jéova, pou nou rété fidèl a moun-la nou mayé èvè-y la é pou nou rété fidèl a frè é sè an nou. Pli nou ké rivé rèspèkté prensip a Bondyé adan mond méchan lasa, pli nou ké rivé rèspèkté-yo osi lèwvwè nou ké adan paradi-la. Fò nou fè tousa nou pé osi pou nou pé sa ni sé kalité-la é sé kapasité-la pou montré kè nou ka préparé-nou pou viv adan paradi-la (gadé awtik-la « Ès ou paré pou latè vin ta-w ? » ki adan niméwo-lasa).

17. Ès fò-nou santi-nou dékourajé parapòt a péché nou fè avan ? Bay on ti èsplikasyon.

 ¹⁷ Anplisdisa, siwvwè nou ka santi-nou koupab akòz dè péché nou fè avan, fò-nou fè tousa nou pé pou nou mèt sa dèyè do an nou. Nou ka tou konprann kè nou pé’é mèt an tèt an nou kè konm ni ranson-la nou pé péché ti péché an nou (Ébr. 10:26-31). Nou pé sèten kè siwvwè nou fè on péché ki grav, men kè nou rèpanti-nou poudèbon, kè nou mandé Jéova é sé ansyen-la édé-nou é kè nou ranjé kò an nou osi, Jéova ja padonné-nou é i ja mèt sa dèyè do a-y (Iz. 55:7 ; Akt 3:19). Sonjé sa Jézi ni lokazyon di sé farizyen-la : « An pa vin kriyé moun ki jis men an vin kriyé moun ki ka fè péché » (Mat. 9:13). Alò ou pé sèten kè ranson-la asé gran pou kouvè tout péché an nou.

18. Dè ki biten ou té’é enmé palé èvè kriminèl-la ki mò owa Jézi ?

¹⁸ Éséyé imajiné-w adan paradi-la ka diskité èvè kriminèl-la ki té ka palé èvè Jézi la. Sèten zòchak ké pé di kijan zò ni rèkonésans pou ranson-la. Pétèt kè vou, ou ké mandé-y rakonté-w kijan sé dènyé moman-la Jézi pasé asi latè-la té yé oben ka i rèsanti lè i tann Jézi di-y kè i ké an paradi-la. É pétèt kè li, i ké mandé-w rakonté-y kijan sa té yé lè ou té ka viv adan mond a Satan pannan sé dènyé jou-la. A pa ti kontan nou ké kontan anségné dé moun konsa ! Sé ké on bèl lonnè toubònman ! (Éféz. 4:22-24).

19. Nou pé’é jen annuiyé-nou adan paradi-la. Poukwa nou ka di sa ? (gadé imaj-la ki anlè po a jounal-la).

¹⁹ Adan paradi-la, nou pé’é jan annuiyé-nou pas toujou ké ni on moun pou nou aprann konnèt oben toujou ké ni on biten a fè. É nou ké touvé sa entérésan toubònman. Men pli bèl la, sé kè chak jou nou ké pé aprann konnèt Pap’an nou ki an syèl-la tibwen plibyen. É nou ké pé pwofité dè tout sé bèl kado-la i fè-nou la a san pou san. Nou pé’é jen fin dékouvè dé biten asi-y é nou ké ni onlo biten a dékouvè asi kréyasyon-la osi. Pli tan ké ka pasé é pli nou ké vin enmé Pap’an nou ki an syèl-la fò toubònman. Jéova é Jézi pwomèt-nou kè nou ké viv adan paradi-la pou touttan. Alò a pa ti rèkonésans nou ni pou yo !