Non, a pa sa David té vlé di. Poutan sé pawòl-la i di la té vré.

Gadé sa i maké adan pasaj-lasa é adan dòt pasaj ki ka sanm sila : « An ké chanté louwanj pou non a-w pou touttan, é touléjou an ké rèspèkté pwomès kè an fè-w. » « O Jéova, Bondyé an mwen, an ka ba-w louwanj èvè tout tchè an mwen, é an vé ba non a-w glwa pou touttan ». « An vlé louwé non a-w pou toujou é pou touttan » (Sòm 61:8 ; 86:12 ; 145:1, 2).

Lè David di sé pawòl-lasa, i pa té ka pansé kè i pa té’é jen mò. I té sav kè Jéova té di konsa kè, siwvwè on moun té péché, i té’é mò é limenm té ka rèkonnèt kè i té ka fè péché (Jén. 3:3, 17-19 ; Sòm 51:4, 5). Anplisdisa i té sav kè menm sèwten moun kon Abraam, Izaak é Jakòb ki té ni favè a Bondyé, té mò. Donk i té sav byen kè limenm a-y té’é mò on jou (Sòm 37:25 ; 39:4). Men an réyalité, lèwvwè i di sé pawòl-la nou ka touvé an Sòm 61:8, David té ka di jan i té anvi ba Jéova louwanj é jan i té byen désidé a fè sa pou touttan, kivédi i té paré a fè sa tout vi a-y (2 Sam. 7:12).

Délè, David maké adan sé Sòm-la sa limenm a-y ni lokazyon viv. Dayè, sé sa nou ka vwè lè nou ka gadé sa yo ka di an koumansman a sé Sòm 18 la, 51 la, é 52 la. Adan Sòm 23 la, David ka palé dè Jéova é i ka di kè sé on Bèwjé ki ka gidonné sèwvitè a-y, ki ka konsolé-yo é ki ka pwotéjé-yo. David limenm a-y sé té on bèwjé é sé konsa i té ka aji. É i té anvi sèvi Bondyé ‘chakjou a vi a-y’ (Sòm 23:6).

Men fò pa nou oubliyé kè sé Jéova ki voyé lèspri sen a-y asi David pou i té maké tousa i maké la. Dépawfwa, David maké sèwten pwofési é sé pwofési-lasa té ké réyalizé lontan apré i té maké-yo. Pa ègzanp, adan Sòm 110 la, David maké kè, rivé on lè, Ségnè a-y té’é sizé adwat a Bondyé adan syèl-la é kè i té’é rèsèvwa on gran pouvwa. Bondyé té’é ba-y pouvwa-lasa pou mèt lènmi a Bondyé anba pyé a-y é pou jijé sé nasyon-la ki si latè la. David, sé té zansèt a Mési-la, kivédi sila ki té’é gouvèné an syèl-la é ki té’é vin « prèt pou touttan » (Sòm 110:1-6). Jézi di kè pwofési-la nou ka touvé adan Sòm 110 la té ka palé dè-y é kè i té’é réyalizé plita (Mat. 22:41-45).

Kifè, Jéova pousé David maké dé biten ki té ka konsèwné épòk a-y é i pousé-y maké osi dé biten ki té’é fèt plita, lèwvwè Jéova té’é résisité-y é kè i té’é pé ba Jéova louwanj pou touttan. Sa ka édé-nou konprann kè sa ki maké adan Sòm 37:10, 11 é 29 pé ka konsèwné épòk-la David maké sé pawòl-lasa, men sé vèwsé-lasa pé konsèwné osi ondòt épòk ki ké vin plita. Sé vèwsé-lasa réyalizé an tan lontan an péyi a Izrayèl é yo ké réyalizé talè osi, lèwvwè Bondyé ké réyalizé tout sé pwomès-la i fè la (gadé paragraf 8 a awtik-la « Ou ké èvè mwen adan paradi-la » ki adan Tou dè Gad lasa).

Alò, sa Sòm 61:8 ka di é sa dòt pasaj ki ka sanm tala ka di ka montré kijan David té anvi ba Jéova louwanj joustan i mò é kijan i ké pé kontinyé fè sa lèwvwè Jéova ké résisité-y.