An fèt o Kanada, adan on vil yo ka kriyé Kébèk, ki limenm ka touvé-y adan on réjyon non a-y sé Kébèk. Sé fransé, yo ka palé la. Pap’an mwen é manman-mwen, Louis é Zélia, ban-mwen onlo lanmou lèwvwè an té piti. Pap’an mwen té timid é i té enmé li. Mwen atou an mwen, an té enmé ékri é an té vlé vin jounalis.

An té ni apépré 12 an, lè Rodolphe Soucy, on kolèg-travay a papa vin vwè-nou akaz èvè on zanmi a-y. Yo té Témwen a Jéova. An pa té konnèt granzafè asi Témwen a Jéova é rèlijyon a yo pa té ka di-mwen ayen. Men an té byen enmé jan yo té ka réponn a kèsyon an nou. Sa té toujou lojik é yo té ka fè sa èvè onlo jantiyès. Anplisdisa, yo toujou té ka sèvi èvè Labib pou réponn. Fanmi an mwen osi té ka aprésyé sa onlo, kifè nou aksèpté étidyé Labib.

A lépòk, an té k’ay adan on lékòl katolik. Délè, an té ka palé èvè kanmarad-lékòl an mwen dè sa an té ka aprann adan étid biblik an mwen. On jou, sé pwofésè-la, ki té labé, vin aprann sa. Olyé yo té itilizé Labib pou montré kè sa an té ka di la pa té vré, ni yonn adan yo ki di douvan tout klas-la kè an sé on rèbèl. Sitiyasyon-lasa té ka istrésé-mwen, men anmenmtan, sé té on bon biten pas sa édé-mwen vwè kè sa lékòl-lasa té ka aprann-mwen pa té annakò èvè sa Labib ka di. An fin pa konprann kè an pa té ni ayen a fè la. Èvè akò a fanmi an mwen, an chanjé lékòl.

An kontinyé étidyé Labib, men an pa té ka pwogrésé pas an té pè ay préché dè kaz an kaz. Légliz katolik té ni on gran pouvwa a épòk-lasa é i té ka aji èvè onlo vyolans pou anpéché-nou préché. Maurice Duplessis, prèmyé minis a Kébèk, té ka soutyenn légliz onlo. Ni onpakèt moun ki pa té ka las chèché sé Témwen-la tren é yo té ka jous ba-yo kou. É Duplessis té ka  ankourajé-yo fè sa. A moman-lasa, sé Témwen-la té bizwen onlo kouraj pou yo té ay préché.

John Rae, on frè ki té an névyèm klas a Galaad, édé-mwen vin about a sa ki té ka fè-mwen pè. I té ni onlo èkspéryans, i té dous, i té ni imilité é i té moun a toutmoun. I pa ban-mwen onlo konsèy men an aprann onlo biten grasa bèl ègzanp a-y. An té k’ay préché èvè-y souvan, pas fransé a-y pa té ka monté mòn. An pasé onlo tan èvè-y é sé sa ki édé-mwen vin Témwen a Jéova. Lè 26 mé 1951, an pran batèm. Sa té ja ka fè 10 an kè an té jwenn Témwen a Jéova pou prèmyé fwa-la.

Lasanblé-la nou té adan-y la a Kébèk té toupiti é sé près yenki pyonyé ki té adan-y. Sé pyonyé-lasa ban-mwen on bèl ègzanp é sa ban-mwen anvi vin pyonyé osi. A épòk-lasa, lè nou té ka préché dè kaz an kaz, sé yenki èvè Labib nou té ka sèvi. Konm nou pa té ka itilizé piblikasyon, fò-nou té sèvi èvè Labib on mannyè ki té éfikas. Alò, an fè onlo éfò pou konnèt sèwten vèwsé a Labib pibyen pou an té pé défann lavérité. Men, lè nou té ka pwopozé sé moun-la li on pasaj adan on Bib kè légliz katolik pa té ka aksèpté, yo té ka rèfizé.

An 1952, an mayé èvè Simone Patry, on sè fidèl ki té an menm lasanblé ki mwen. Nou ay viv a Monréal, nou vin ni on fi é nou ba-y non Lise. Nou po’o menm té ni on lanné mayé. On ti moman avan nou té mayé, an arété sèwvis-la, men magrésa, Simone é mwen kontinyé menné on vi senp. Nou fè sa pou fanmi an nou té kontinyé pòté bon mannèv an prédikasyon é pou nou té toujou an réinyon.

10 an apré, an pran on tan pou vwè ka an té pé fè pou préché plis ankò. An 1962, an ay adan on lékòl ki fèt pou sé ansyen-la an Bétèl a Kanada. Sa diré on mwa. An té adan menm chanm ki on frè non a-y sé Camille Ouellette. I té ni on fanmi é poutan i té ka pòté bon mannèv an prédikasyon. Sa étoné-mwen toubònman ! A épòk-lasa, pa gè ni moun ki té ka pran sèwvis pyonyé toupannan yo té ka lévé on timoun piti. Men li Camille, sé sa i té vlé fè. Pannan tout tan-la nou té ansanm la, i ankourajé-mwen réfléchi asi sitiyasyon an mwen. Kèlkè mwa apré, an rann-mwen kont kè an té’é pé wouvin pyonyé pèwmanan. Ni sèwten moun ki té ka pansé kè sa pa té rézonab, men an woupran sèwvis-la pas an té sèten kè Jéova té’é béni tout éfò kè an té’é fè pou préché plis.

An 1964, yo voyé Simone é mwen o Kébèk antankè pyonyé èspésyal. Sé adan vil-lasa nou grandi. Nou rété la pannan plizyè lanné. Sé vré kè yo pa té ka pèwsékité-nou kon avan men toujou té ni déotwa ki té vé anpéché-nou préché.

On sanmdi aprémidi, yo arété-mwen a Sentmari, on vil ki pa lwen vil a Kébèk. On polisyé menné-mwen lapolis é aprésa i mèt-mwen lajòl pas an té ka préché dè kaz an kaz alòskè an pa té ni pon otorizasyon. Tibwen plita, yo menné-mwen douvan on jij. Non a-y sé té Baillargeon ; sé té on kòlòs a boug ! I mandé-mwen kimoun ki té avoka an mwen. Lè an di-y kè sé té Glen How *, on avoka témwen kè onlo moun té konnèt, i tranblé é i di : « É non ! Pa di-mwen sa, misyé ankò ! » Glen How té ka plédé afè a sé Témwen-la douvan tribinal é yo té sav byen èvè kimoun yo té annafè. Tribinal-la pa tadé a di-mwen kè yo lésé tout biten tonbé.

Konm lamajorité a moun té kont nou o Kébèk, nou té ni dimal a touvé on bon koté pou nou té fè réinyon an nou. Ti lasanblé an nou pa touvé ayen pou i té louwé sòf on vyé garaj ki pa té chofé. Lèwvwè té ni bon fwadi an zo a moun, sé frè-la té ka sèvi èvè on ti aparèy ki té ka maché èvè pétwòl pou chofé pyès-la pou nou té ni tibwen chalè. Byensouvan, avan sé réinyon-la koumansé, yo té ka rété ka palé pannan on bon enpé tan alantou a aparèy-lasa. Yo té ka palé dè biten ankourajan.

Sa vréman èstraòwdinè dè vwè tout bon rézilta nou té ka jwenn an prédikasyon lanné apré lanné ! Adan lézanné 60, anlè téritwa a Kébèk é ta sé vil-la ki alantou a-y la, sé yenki déotwa piti lasanblé ki té ni. Sé té menm biten pou téritwa a Kòt-Nò é ta Gaspézi. Konnyéla la, ni onpakèt frè é sè adan sé réjyon-lasa é yo ka réini-yo adan dé bèl Sal di Wayòm.

An 1970, yo mandé Simone é mwen okipé dè on siwkonskripsyon. Aprésa, an 1973, yo mandé-nou okipé dè on distrik. Pannan péryòd-lasa, an frékanté onlo frè ki té ni bon èkspéryans é yo aprann-mwen onlo biten. Pawmi sé frè-lasa té ni Laurier Saumur * é David Splane *. Yo toulédé té ka fè menm travay ki mwen. Apré chak lasanblé, David té ka ban-mwen konsèy pou édé-mwen anségné pibyen é mwen osi an té ka ba-y konsèy pou kò a-y té vin pibon an domenn-lasa. An ka sonjé sa David di-mwen on jou. I rété i di-mwen : « Léonce, franchman, an aprésyé dènyé diskou a-w. I té bon, men èvè tout sé lidé-la ou mété adan-y la, an té’é pé fè twa diskou ! » An té ka mèt twòp lidé é twòp détay initil adan diskou an mwen. Fò an té travay sa.

Fò sé rèsponsab a distrik la té ankourajé sé rèsponsab a siwkonskripsyon la. Men o Kébèk, té ni onlo pwoklamatè ki té konnèt-mwen byen. É byensouvan, lè an té ka vizité siwkonskripsyon  a yo, yo té ka vlé préché èvè mwen. An té enmé préché èvè yo toubònman, men an pa té ka pasé asé tan èvè rèsponsab a siwkonskripsyon la. On jou, on rèsponsab a siwkonskripsyon ki té vréman janti di-mwen : « Ou ka pasé tan èvè sé frè é sè la, sé on bon biten. Men pa oubliyé kè sé simenn an mwen ! Mwen osi, an bizwen ankourajman ! » Ti konsèy-lasa té bon toubònman é sa édé-mwen pran on tan pou rèsponsab a siwkonskripsyon la é on tan pou sé frè é sè la.

Malérèzman, an 1976 ni on gwo malè ki rivé. Ti doudou an mwen, Simone, trapé on maladi grav é i mò. Sé té on bon ti madanm toubònman é a pa ti enmé i té enmé Jéova ! I té toujou paré a fè sakrifis ! Konm an té ka préché onlo, sa édé-mwen sipòté doulè-la. An ka di Jéova mèsi pas i soutyenn-mwen èvè onlo lanmou pannan sé moman difisil lasa. Plita, an mayé èvè Carolyn Elliott, on sè ki té pyonyé, ki té ka palé anglé é ki té ka pòté bon mannèv an prédikasyon. I té vin o Kébèk pou préché pas pa té ni asé pwoklamatè. Carolyn sé té moun a toutmoun é i té janti siwtou èvè moun ki té timid é ki té ka santi-yo tousèl. I té ka vizité sé siwkonskripsyon-la èvè mwen é i té ka ban-mwen on bèl pal adan travay an mwen.

An Janvyé 78, yo mandé-mwen fòwmé zélèv a prèmyé lékòl ki fèt o Kébèk pou sé pyonyé-la. Mésyé ! A pa ti istrésé an té istrésé ! Mwenmenm poto’o jen fè lékòl-lasa é an potoko jen vwè liv-la yo té ka étidyé la. Érèzman, adan prèmyé klas-lasa, té ni onpakèt pyonyé ki té plen èkspéryans. Sé mwen ki té fòwmatè, men yo aprann-mwen onlo biten menm !

Plita, an menm lanné-la, ni on lasanblé entèwnasyonal ki fèt adan istad olenpik a Monréal. Tèm a-y sé té « La foi victorieuse ». Sé prèmyé fwa té ka ni on gran lasanblé konsa o Kébèk : té ni plis ki 80 000 moun ! Yo chwazi-mwen mwen té palé ba sé jounalis-la. An palé èvè onlo jounalis, é yo di onlo bon biten anlè nou an télé-la é an radyo-la. Sa fè-mwen plézi toubònman ! Yo maké onlo awtik anlè nou. Yo entérojé-nou alatélé é alaradyo.  É lè nou gadé kantité tan nou pasé alaradyo é alatélé sa té ka fè plis ki 20 èdtan. Kifè, onlo moun vin konnèt Jéova é pèp a-y pibyen !

An 1996, ni on gwo chanjman ki fèt an vi an nou. Dépi an té batizé, an toujou sèvi o Kébèk adan on téritwa moun ka palé fransé. Men lanné-lasa, yo mandé-mwen ay okipé dè on distrik ki té ka touvé-y a Toronto. É koté-lasa, sé anglé yo té ka palé. Pou mwen, an pa té’é rivé fè sa. Konm anglé an mwen pa gè té ka monté mòn, lè an té ka sonjé kè fò an té fè diskou an lang-lasa, sa té ka rann-mwen malad. Sé pousa, fò an té priyé Jéova pli souvan é fò an té konté asi-y plis ankò.

An té vréman istrésé lè yo di-mwen kè fò an té ay sèvi adan distrik-lasa, men konnyéla, an pé di kè an kontan toubònman an sèvi Jéova a Toronto. Carolyn pran onlo pasyans èvè mwen pou édé-mwen palé anglé pibyen. Sé frè-la osi té ka soutyenn-mwen é yo ankourajé-mwen onlo. Nou pa tadé a ni onpakèt zanmi.

Lèwvwè nou té ni lasanblé lèwikenn, magré an té ka ni plis travay é plis biten a préparé, byensouvan an té ka pasé inèdtan ka préché dè kaz an kaz lèvandrèdi swa. Pétèt zò ké di-mwen : « Poukwa ou té k’ay préché alòskè ou té sav kè ou té’é ni onpakèt biten a fè an wikenn-la ? ». Ében zò sav, sa té ka pèwmèt-mwen woupran fòs lè an té ka fè on bèl ti kozé èvè sé moun-la an té ka jwenn la. Jousalè, an ka kontan toubònman apré on bon ti prédikasyon.

An 1998, Carolyn é mwen vin pyonyé èspésyal a Monréal. Yo mandé-mwen òwganizé témwagnaj piblik la. Pa ègzanp, nou té ka préché adan aéwopò a Monréal. É anplisdisa, yo mandé-mwen fè moun sav lavérité asi nou grasa sé chenn a télé la é sé radyo-la. Konsa, sé moun-la té’é arété ni mové lidé asi Témwen a Jéova. Carolyn é mwen, nou enmé préché ba moun ki sòti vin rété Kanada, siwtou kè byensouvan, yo anvi konnèt plis biten asi Labib.

Ka fè 68 an an batizé antankè Témwen a Jéova. É lè an ka viré gadé tout sé lanné-lasa, an ka rèkonnèt kè i béni-mwen onlo toubònman. An vin enmé préché, an édé onlo moun konnèt lavérité é tousa mété onlo jwa an tchè an mwen. Lè timoun a Lise, fi an mwen, vin gran, li é mari a-y pran sèwvis pyonyé pèwmanan. Jousalè, i toujou ka pòté bon mannèv an prédikasyon. É an pé di-zòt kè sa i ka fè la ka fan’an plézi toubònman ! An ni onlo rèkonésans pou tout frè é sè ki ban-mwen on bèl ègzanp é ki ban-mwen dé bon ti konsèy. Tousa édé-mwen vin pibon zanmi èvè Jéova é sa édé-mwen fè tout travay kè òwganizasyon a Jéova té ka ban-mwen fè. An konstaté kè pou kontinyé fè travay-la lòwganizasyon ba-w fè la, fò ou toujou konté asi lèspri sen a Jéova, ki sé on fòs ki puisan toubònman (Sòm 51:11). An toujou ka di Jéova mèsi pas i ka pèwmèt-mwen louwé non a-y. Sa sé on gran lonnè toubònman ! (Sòm 54:6).