1. Ka on moun ki té bizwen palé ba wa a Lapèws té oblijé fè ?

IMAJINÉ kè ou ka viv an Pèws ni 2 500 lanné dè sa. Konm ou ni on biten pou palé èvè wa a péyi-la, ou k’ay la i ka rété la adan on vil non a-y sé Siz. Men sèten ou pé’é jen ay douvan wa-la alòskè ou po’o ni otorizasyon a-y. Pas ou sav byen kè ou pé rivé a pèd vi a-w si ou fè sa ! (Èstè 4:11).

2. Kijan Jéova vlé nou santi-nou lè nou ka palé ba-y ?

² Nou kontan toubònman Jéova pa kon wa Pèws lasa ! Jéova lontan pli fò é lontan pli enpòwtan ki nenpòt ki moun ki ka dirijé adan mond-lasa, é poutan, i toujou paré a kouté-nou a nenpòt ki moman. I vlé nou santi-nou lib dè palé ba-y. Pa ègzanp, pou onoré Jéova nou ka kriyé-y Gran Kréyatè, Toupuisan, é Gran Mèt é Ségnè, men magrésa i vé nou kriyé-y « Papa », on ti mo ki ni onlo tandrès adan-y (Mat. 6:9). Jéova vé nou vin bon bon zanmi èvè-y. Sa ka touché-nou toubònman !

3. Poukwa nou pé kriyé Jéova « Papa », é ka nou ké vwè adan awtik-lasa ?

³ Sa toutafè nòwmal kè nou kriyé Jéova « Papa » pas sé li ki Sous a vi an nou (Sòm 36:9). Konm Jéova sé Pap’an nou, fò-nou obéyi-y. Si nou ka fè sa i ka mandé-nou, i ké béni-nou onlo menm (Ébr. 12:9). Pa ègzanp, i ké ban-nou lavi étèwnèl, ki sé an syèl-la ki sé asi latè. É dépi konnyéla, i ka ban-nou onlo bénédisyon ki èstraòwdinè toubònman. Adan awtik-lasa, nou ké vwè ka ki ka montré kè Jéova sé on Papa ki enmé-nou onlo. É nou ké vwè osi poukwa nou pé sèten kè i pé’é jen lagé-nou. Men pou koumansé, an-nou vwè poukisa nou pé sèten kè Pap’an nou ki an syèl-la enmé-nou onlo é kè i ka sousyé-y dè nou.

4. Poukwa sèwten moun ni dimal a di kè Jéova sé Pap’a yo ?

⁴ Ès ou ni dimal a di kè Jéova sé Pap’a-w ? Pétèt kè pou sèwten moun Jéova two gran pou i mélé-y adan yo. Yo ni dimal a kwè kè Bondyé Toupuisan la ka sousyé-y dè yo pèwsonèlman. Men, Pap’an nou ki enmé-nou onlo pa vé nou vwè sa konsa. Sé li ki ban-nou lavi é i vé kè nou bon bon zanmi èvè-y. Apré lapòt Pòl palé dè sé biten-lasa a Atèn, i èspliké sé moun-la ki té ka kouté-y la kè Jéova « pa lwen a ponyonn adan nou » (Akt 17:24-29). Bondyé vé nou palé ba-y menmjan on timoun ka palé tou natirèlman pou pap’a-y oben manman-y pas yo enmé-y onlo é yo ka pran swen a-y.

5. Ka sa ki rivé on sè ka aprann-nou ?

⁵ Pétèt ni dòt moun ki ni dimal a di kè Jéova sé Pap’a yo pas pwòp pap’a yo pa ba-yo granzafè a lanmou oben pa ba-yo lanmou ditou. Kanta tandrès, pa menm palé ! On sè ka di : « Pap’an mwen té ka palé rèd pou mwen toubònman. Alò, lè an koumansé étidyé Labib, an té ni dimal a konsidéré Papa-la ki anhola kon on bon bon zanmi. Men lèwvwè an aprann konnèt-li plibyen, tout biten chanjé. » Ès sé sa ou ka rèsanti osi ? Si sé sa, pa dékourajé ! Onlè, vou osi ou ké rann-vou kont kè Jéova sé méyè Papa on moun pé ni.

6. Dapré sa Matyé 11:27 ka di, ka Jéova fè pou nou konsidéré-y kon on Papa ki plen lanmou ?

⁶ Pou nou rivé rann-nou kont kè i sé on Papa ki plen lanmou, Jéova fè ansòt pou yo mèt an Bib-la sa Jézi di é sa i fè (li Matyé 11:27). Jézi imité kalité a pap’a-y on mannyè ki pawfè, sé pousa limenm di : « Sila ki vwè-mwen la vwè Papa-la osi » (Jan 14:9). Byensouvan, lè Jézi té ka palé dè Jéova, i té ka kriyé-y « Papa ». Yenki adan lézévanjil, i sèvi èvè mo-lasa 165 fwa ! Poukwa ? On rézon ki fè si i fè sa, sé pas i té vé montré moun kè Jéova sé on Papa ki enmé-yo onlo menm. Konsa yo pa té’é jen douté dè sa (Jan 17:25, 26).

7. Lè nou ka gadé jan Jéova té ka aji èvè Jézi, ka sa ka aprann-nou ?

⁷ Lè nou ka gadé jan Jéova té ka aji èvè gason a-y Jézi, sa ka aprann-nou onlo biten. Pa ègzanp, i toujou té ka pran tan kouté priyè a-y. É a pa kouté i té ka kouté sèlman, men i té ka réponn osi (Jan 11:41, 42). Kèlkanswa éprèv kè i jwenn, Jézi toujou santi kè Pap’a-y té enmé-y é kè i té ka soutyenn-li (Lik 22:42, 43).

8. Kijan Jéova pran swen a Jézi ?

⁸ Jézi té ka rèkonnèt kè sé Pap’a-y ki té Sous a vi a-y é kè sé Li osi ki té ka pran swen a-y. Sé pousa i di : « Sé grasa Pap’an mwen an ka viv » (Jan 6:57). Jézi té ka konté asi Pap’a-y a san pou san, é Jéova toujou ba-y sa i té bizwen pou viv. Men sa ki pli enpòwtan ankò, sé kè Jéova édé-y rété fidèl (Mat. 4:4).

9. Kijan Jéova montré kè i sé on Papa ki plen lanmou pou Jézi ?

⁹ Konm Jéova sé on Papa ki plen lanmou, i fè ansòt pou Jézi té sav kè i té ka soutyenn-li (Mat. 26:53 ; Jan 8:16). Menmsi a pa toutlè Jéova anpéché Jézi soufè, i toujou édé-y andiré éprèv i té ka jwenn. É Jézi té sav kè kèlkanswa éprèv i té’é jwenn, sé té ké pou on tan (Ébr. 12:2). Jéova montré kè i té enmé Jézi pas i pran tan kouté-y, i pran swen a-y, i fòwmé-y é i soutyenn-li (Jan 5:20 ; 8:28). Jéova ka pran swen an nou menmjan-la. Konnyéla, an-nou gadé kijan i ka fè sa.

10. Dapré sa Sòm 66:19, 20 ka di, kijan Jéova ka montré kè i enmé-nou ?

¹⁰ Jéova ka kouté priyè an nou (li Sòm 66:19, 20). I vé pa kè nou santi-nou jenné lè nou ka priyé-y kivédi nou pé palé-y dè tout biten, nou pé priyé-y souvan, é nou pé rété ka palé ba-y tout tan-la nou vlé la. Dayè, i ka mandé-nou ‘priyé-y toutlè’ (1 Tés. 5:17). Nou pé palé ba-y a nenpòt ki moman é kèlkèswa koté-la nou yé la. I pa jen two okipé pou i kouté-nou ; i toujou a dispozisyon an nou é i toujou ka pran tan kouté-nou. Lè nou ka pran konsyans kè Jéova ka kouté priyè an nou, nou ka enmé-y plis ankò. Adan on Sòm, mi sa on sèwvitè a Bondyé ka di : « An enmé Jéova, pas i ka tann vwa an mwen » (Sòm 116:1).

11. Kijan Jéova ka réponn a priyè an nou ?

¹¹ Pap’an nou ka pran tan kouté priyè an nou, men a pa yenki sa i ka fè ; i ka réponn-nou osi. Lapòt Jan ka ban-nou garanti-lasa : ‘kèlkèswa sa nou mandé Bondyé, dépi sa annakò èvè volonté a-y, i ka kouté-nou’ (1 Jan 5:14, 15). Sé vré, sa pé rivé kè Jéova pa réponn a priyè an nou jan-la nou té ka èspéré la. Défwa, répons a-y sé non oben défwa Jéova vé kè nou atann. Poukisa ? Pas i sav sa ki pibon pou nou (2 Kor. 12:7-9).

12-13. Kijan Jéova ka ban-nou sa nou bizwen pou viv ?

¹² Jéova ka ban-nou sa nou bizwen pou viv. Limenm a-y ka fè sa i ka mandé tout papa fè (1 Tim. 5:8). I ka ba timoun a-y tousa yo bizwen pou yo viv byen. I vé pa nou pran tèt an nou pou zafè a kaz, manjé oben lenj nou ké mèt asi nou (Mat. 6:32, 33 ; 7:11). Konm sé on Papa ki plen lanmou, i ja jous òwganizé-y pou ban-nou sa nou ké bizwen pou viv plita.

¹³ É on biten ki pli enpòwtan ankò, sé kè Jéova ka ban-nou sa nou bizwen pou nou vin bon bon zanmi èvè-y. Grasa Labib, Jéova ka di-nou kimoun i yé, ka i ni lentansyon fè, poukwa i kréyé-nou é ka ki ké fèt dèmen. Pou Jéova montré-nou kè i ka entérésé-y a nouchak pèwsonèlman, i itilizé fanmi an nou oben ondòt moun pou aprann-nou konnèt-li. É jousalè, i ka kontinyé ban-nou on èd ki plen lanmou grasa ansyen ki adan lasanblé an nou é grasa dòt frè é sè ki mi. Anplisdisa, grasa réinyon an nou, Jéova ka anségné-nou ansanm èvè frè é sè an nou. Sé on mannyè pou-y dè montré-nou kè i ka entérésé-y a nouchak pèwsonèlman, kon on papa dwèt fè-y (Sòm 32:8).

14. Poukwa Jéova ka fòwmé-nou é kijan i ka fè sa ?

¹⁴ Jéova ka fòwmé-nou. Nou pa kon Jézi, nou enpawfè. Alò pou fòwmé-nou, Pap’an nou ki plen lanmou ka korijé-nou lè nou ka mérité-y. Bib-la ka fè-nou sonjé kè : « Jéova ka korijé séla i enmé la » (Ébr. 12:6, 7). I ni diféran mannyè i ka korijé-nou. Sé pé grasa on biten nou ké li adan Pawòl a-y oben on biten nou ké tann an réinyon, é ki ké édé-nou konprann kè fò-nou chanjé mannyè nou ka aji oben mannyè nou ka pansé. Sé pé osi grasa sé ansyen-la, ki ké ban-nou èd-la nou bizwen la. Kèlkèswa jan-la Jéova ka korijé-nou la, i toujou ka fè-y pas i enmé-nou (Jér. 30:11).

15. Kijan Jéova ka pwotéjé-nou ?

¹⁵ Jéova ka soutyenn-nou lè nou ka jwenn éprèv. Lè on papa plen lanmou, i ka soutyenn timoun a-y lè yo ka jwenn  pwoblèm. Menmjan-la, Pap’an nou ki an syèl-la ka édé-nou andiré lè nou ka jwenn éprèv. Jéova ka ban-nou lèspri sen a-y ki ka pwotéjé-nou pou ayen pa fè-nou pèd lanmityé an nou èvè-y (Lik 11:13). Jéova ka édé-nou osi lè nou dékourajé oben lè nou enkyèt. Pa ègzanp, i ka ban-nou on bèl èspwa toubònman ! Èspwa-lasa ka édé-nou andiré lè nou ka jwenn pwoblèm. An-nou réfléchi si sa : Kèlkèswa malè ki té’é pé rivé-nou, Pap’an nou ki plen lanmou ké réparé tout déga yo fè an vi an nou. Dayè pou yonn, tout éprèv nou pé ka jwenn sé pou on moman, men bénédisyon a Jéova sé pou touttan (2 Kor. 4:16-18).

16. Ka ki pasé lè Adan désidé dè pa kouté Pap’a-y ki an syèl-la ?

¹⁶ Lè nou ka gadé jan Jéova réyaji lèwvwè Adan dézobéyi, nou ka rann-nou kont kè i enmé-nou. Sé vré, pas lè Adan désidé dè pa kouté Pap’a-y ki an syèl-la, non sèlman i arété fè pawti a fanmi a Jéova men anplisdisa, i anpéché désandan a-y bénéfisyé dè privilèj-lasa osi (Wom. 5:12 ; 7:14). Érèzman, Jéova vin a sèkou an nou.

17. Lè Adan ba Jéova do, ka Jéova fè tousuit apré ?

¹⁷ Jéova pini Adan, men i pa abandoné désandan a-y. I pa lésé-yo san pon èspwa. Onfwa-onfwa i ba-yo on garanti. I pwomèt kè tout misyé é tout madanm ki té ké obéyi-y té ké viré rantré an fanmi a-y ankò (Jén. 3:15 ; Wom. 8:20, 21). Sé on biten ki posib grasa ranson-la Jéova péyé la èvè sakrifis a Jézi, gason-la i té pli enmé la. Lè Jéova bay gason a-y pou nou, i montré kè i enmé-nou onlo menm (Jan 3:16).

18. Poukwa nou pé sèten kè Jéova vé kè nou fè pawti a fanmi a-y, menmsi nou kité-y pannan on tan ?

 ¹⁸ Magré nou enpawfè, Jéova vé kè nou fè pawti a fanmi a-y. Lè sé pou édé-nou, sa pa jen ka fòsé-y. Sa pé rivé kè nou désèvwa-y oben kè nou kité-y pannan on tan. Men i toujou ka èspéré kè nou ké wouviré an dé bra a-y. Jézi rakonté on istwa ki ka montré kijan Jéova enmé timoun a-y onlo : istwa a gason-la ki té « pèd » la (Lik 15:11-32). Adan istwa-lasa, Papa-la pa jen arété èspéré kè gason a-y té’é wouviré. Lè i rantré akaz a-y, pap’a-y akéyi-y bra gran wouvè. Si noumenm osi, nou kité Jéova men kè nou ka rèpanti-nou, nou pé sèten kè Pap’an nou ki plen lanmou paré a akéyi-nou.

19. Kijan Jéova ké réparé sé déga-la Adan fè la ?

¹⁹ Pap’an nou ké réparé tout sé déga-la Adan fè la. Apré Adan é Èv ba Jéova do, Jéova désidé kè i té ké adòpté 144 000 moun pou yo vin wa é prèt an syèl-la èvè gason a-y. Adan mond nouvo la, Jézi é séla ki ké dirijé èvè-y la ké édé toutmoun ki ka obéyi a vin pawfè. Aprésa, Bondyé ké fè-yo pasé on dènyé tès, é si yo rété obéyisan i ké ba-yo lavi étèwnèl. A pa ti kontan Bondyé ké kontan lè i ké vwè kè asi tout latè tout timoun a-y pawfè, gason kon fi ! Épòk-lasa ké bèl toubònman !

20. Kijan Jéova ka montré kè i enmé-nou onlo menm, é ka nou ké vwè adan pwochen awtik-la ?

²⁰ Ni plizyè fason Jéova ka montré kè i enmé-nou fò toubònman. Sé méyè Papa nou pé ni. I ka kouté priyè an nou, i ka ban-nou tousa nou bizwen pou viv é i ka fè sa ki fo pou nou rété bon bon zanmi èvè-y. I ka fòwmé-nou é i ka soutyenn-nou. É anplisdisa, plita i ké fè dé biten èstraòwdinè pou nou. Pap’an nou enmé-nou é i ka sousyé-y dè nou ! Sa ka touché-nou onlo menm ! Adan pwochen awtik-la, nou ké vwè kijan, nou ki sé timoun a Jéova, nou pé montré kè nou ni rèkonésans pou tout lanmou-la i ni pou nou la.