1. Akòz dè lajalouzi, ka ki pasé an fanmi a Jozèf ?

JAKÒB té enmé tout gason a-y, men sila i té pi enmé la sé té Jozèf. Kijan frè a Jozèf pran sa ? Yo vin jalou Jozèf é yo koumansé hay-li osi. Poutan, Jozèf pa té fè ayen pou mérité sa. É lè Jozèf trapé 17 an a-y, frè a-y vann-li pou i vin èsklav, é yo manti ba pap’a yo : yo di-y kè sé on bèt ki tchouyé gason-la i té pi enmé la. Konm yo té jalou, pa té ni lapé an fanmi-la ankò é yo rann pap’a yo tris toubònman (Jén. 37:3, 4, 27-34).

2. Sèlon sa Galat 5:19-21 ka di, poukwa lajalouzi sé on biten ki danjéré ?

² Adan Labib, nou ka touvé lajalouzi * pawmi sa yo ka kriyé « sa lachè ka pwodui ». Sé biten-lasa pé anpéché on moun érité dè wayòm a Bondyé é pé menné-y a lanmò (li Galat 5:19-21). Lajalouzi sé on santiman ki ka aji kon pwazon, é pli souvan ki rarman, sé akòz dè-y moun ka pran gwo babyé, ka fè kòlè san métrizé-yo é ka montré kè yo hay moun.

3. Ka nou ké vwè adan awtik-lasa ?

³ Ègzanp a sé frè a Jozèf la, ka montré kè lajalouzi pé mèt on mové anbyans adan on fanmi é fè lapé disparèt. Menmsi nou pé’é jen aji menmjan ki sé frè a Jozèf la, fò-nou sonjé kè tchè an nou enpawfè é kè i trèt (Jér. 17:9). Alò, fò pa sa étoné-nou si déparfwa nou ka jalou lézòt. Adan awtik-lasa, nou ké pran déotwa ègzanp ki an Bib-la pou édé-nou konprann poukisa lajalouzi pé rantré an  tchè an nou. Aprésa, nou ké vwè ka nou pé fè pou lajalouzi pa pran lanmen asi nou é ki travay nou pé fè dè koté an nou pou ni lapé alantou an nou.

4. Poukwa sé filisten-la té jalou David ?

⁴ Larichès. Izaak sé on nonm ki té rich, é sé filisten-la té jalou-y (Jén. 26:12-14). Yo jous bouché sé pui-la i té ka itilizé la pou fè bèt a-y bwè (Jén. 26:15, 16, 27). Alèkilé ni moun ki menm biten ki sé filisten-la. Yo jalou dòt moun pas sé moun-lasa ni plis byen ki yo. Non sèlman yo vé ni sa sé moun-lasa ni, men anplisdisa, si yo té pé fè sé moun-lasa pèd sa yo ni la, yo té’é pi kontan ankò.

5. Poukwa sé chèf a rèlijyon juif la té jalou Jézi ?

⁵ Lè on moun sé moun a toutmoun. Moun ki té antèt a rèlijyon juif la té jalou Jézi pas ni onpakèt moun ki té enmé-y onlo (Mat. 7:28, 29). Sé Bondyé Jézi té ka rèprézanté, é i té ka anségné lavérité. Men magrésa, sé chèf a rèlijyon juif la té ka simé manti asi Jézi pou sali bèl répitasyon-la i té ni la (Mawk 15:10 ; Jan 11:47, 48 ; 12:12, 13, 19). Ka sa ka aprann-nou ? Si ni on moun an lasanblé-la kè toutmoun enmé pas i ni bèl kalité, fò-nou fè gwo éfò pou nou pa jalou-y. Olyé nou jalou-y, pisimé nou imité-y pou nou aji èvè menm lanmou ki-y (1 Kor. 11:1 ; 3 Jan 11).

6. Ka Diotréfès fè davwa i té jalou ?

⁶ Lè on moun ni rèsponsabilité adan òwganizasyon a Jéova. O 1^é syèk, Diotréfès té jalou séla ki té ka dirijé lasanblé krétyèn la. I té vlé « ni prèmyé plas-la » adan lasanblé-la. Sé pousa i té ka di onpakèt mové biten asi lapòt Jan é asi dòt frè ki té ni rèsponsabilité. I té vé sali répitasyon a yo (3 Jan 9, 10). Menmsi nou pé’é jen aji kon Diotréfès, nou pé rivé a jalou on frè ki vin ni on rèsponsabilité kè nou té’é byen anvi ni, siwtou si nou ka santi kè nou té’é pé fè travay-la myé ki-y ankò.

7. Kijan lajalouzi pé aji asi nou ?

⁷ Jalouzi ka touvé-y kon on plant ki plen pwazon. Dépi ou vwè plant-lasa koumansé fè rasin an tchè an nou, sé on bab pou woté-y. Kanta siwvwè ou ni òwgèy é ou égoyis ou ka vin pi jalou ankò. Menmjan on vyé zèb ka anpéché on bèl ti flè pousé, sé menmjan-la osi lajalouzi pé anpéché-nou kiltivé dé kalité kon lanmou, konpasyon é bonté. Dépi nou vwè lajalouzi bizwen boujonné an tchè an nou, sé raché-y ! Ka nou pé fè pou lajalouzi pa pran lanmen asi nou ?

8. Ki kalité ki pé édé-nou goumé èvè lajalouzi ?

⁸ Nou pé goumé èvè lajalouzi si nou ka aji èvè imilité é si nou ka kontanté-nou dè sa nou ni. Si nou ni sé bèl kalité-lasa, lajalouzi pé’é pran plas an tchè an nou. Imilité ké anpéché-nou akwè-nou. On moun ki ni imilité pa’a kwè kè i mérité yo aji pibyen èvè-y ki èvè lézòt (Gal. 6:3, 4). É lè on moun ka kontanté-y dè sa i ni, i ni tchè-kontan é i pa’a konparé-y èvè lézòt (1 Tim. 6:7, 8). Lè on moun ni sé 2 kalité-lasa, si i vin sav kè zafè a ondòt ka maché, i ka kontan ba-y.

9. Sèlon sa Galat 5:16 é Filipyen 2:3, 4 ka di, ka lèspri sen ké édé-nou fè ?

⁹ Pou nou pa jalou, pou nou ni imilité é pou nou kontanté-nou dè sa nou ni, nou bizwen Bondyé ban-nou lèspri sen a-y  (li Galat 5:16 ; Filipyen 2:3, 4). Lèspri sen a Jéova pé édé-nou analizé sa nou ni an fon a tchè an nou é sa ki ka pousé-nou aji. Èvè èd a Bondyé, nou ké pé woté vyé santiman ki an tchè an nou é nou ké mété santiman ki pozitif an plas a yo (Sòm 26:2 ; 51:10). An-nou ègzaminé ègzanp a Moyiz é ègzanp a Pòl, 2 nonm ki rivé about a lajalouzi.

10. Ki sitiyasyon ki té’é pé fè Moyiz mal aji ? (gadé imaj-la ki anlè po a jounal-la).

¹⁰ Moyiz té ni on gran otorité asi pèp a Bondyé men i pa fè ayen pou anpéché dòt moun ni otorité-lasa. Pa ègzanp, on jou, Jéova woté tibwen lèspri sen a-y asi-y pou mété-y asi on gwoup a ansyen ki té owa tant a réinyon-la. Tibwen tan apré, Moyiz tann di kè 2 ansyen ki pa té owa tant a réinyon-la té risivwè lèspri sen a Bondyé osi é kè yo té mété-yo ka aji kon pwofèt. Kijan Moyiz réyaji lèwvwè Joziyé di-y anpéché sé 2 ansyen-la fè sa ? I pa touvé-y jalou pas Jéova pèwmèt sé boug-la fè sa osi. Okontrè, i té byen kontan pou yo davwa Jéova té ba-yo bèl lonnè-lasa (Nonb 11:24-29). Ka ègzanp a Moyiz ka aprann-nou ?

11. Kijan sé ansyen-la pé imité Moyiz ?

¹¹ Si ou sé on ansyen, ès yo ja mandé-w fòwmé on moun pou i pé sa ni on rèsponsabilité kè ou byen enmé adan lasanblé-la ? Pa ègzanp, pétèt kè ou enmé dirijé étid a Tou dè Gad la chak simenn. Men vinvwè yo mandé-w fòwmé on frè pou kè onlè, i rivé dirijé étid-lasa osi. Si ou ni imilité kon Moyiz, sa pé’é jenné-w. Okontrè, ou ké byen kontan édé frè a-w.

12. Jòdijou, kijan onlo krétyen ka montré kè yo ni imilité é kè yo ka kontanté-yo dè sa yo ni ?

¹² An-nou palé dè ondòt sitiyasyon, kè onlo frè ki ja ni on bèl laj ka jwenn. Pannan plizyè lanné, sèwten adan yo té ka sèvi antankè koòwdinatè a komité a sé ansyen-la. Men lè yo pran 80 lanné, yo aksèpté volontyé kè yo ba ondòt moun rèsponsabilité-lasa. Sé rèsponsab a siwkonskripsyon-la plen imilité osi, piskè, lèwvwè yo ka trapé 70 an a yo, yo dakò pou arété sèwvis a siwkonskripsyon-la pou fè ondòt travay. Anplisdisa, pa ni lontan dè sa, toupatou si latè yo mandé onlo bétélit vin pyonyé. Sé frè é sè fidèl lasa pa ni pon rankin an tchè a yo pou séla ki ka fè travay-la yo té ka fè la an Bétèl-la.

13. Poukwa Pòl té’é pé rivé a jalou sé 12 apòt-la ?

¹³ Lapòt Pòl osi lésé on bèl ègzanp ban nou. I té ni onlo imilité é i té ka kontanté-y dè sa i té ni. I pa lésé lajalouzi rantré an tchè a-y. I té ka pòté bon mannèv an prédikasyon, men konm i té ni onlo imilité, mi sa i rèkonnèt : « pawmi sé apòt-la, sé mwen ki pli piti, é an pa menm mérité kè yo kriyé-mwen apòt » (1 Kor. 15:9, 10). Sé 12 apòt-la té èvè Jézi pannan tout ministè a-y asi latè. Men li Pòl, sé yenki apré Jézi mò é résisité, kè i vin krétyen. Menmsi apré, yo nonmé-y « apòt a sé nasyon-la », i pa jen fè pawti a sé 12 apòt-la (Wom. 11:13 ; Akt 1:21-26). Anplisdisa, sé 12 nonm-lasa té bon bon zanmi èvè Jézi, men apapousa i té jalou-yo. Okontrè, i kontanté-y dè sa i té ni.

14. Kijan nou ké aji si nou ni imilité é si nou ka kontanté-nou dè sa nou ni ?

¹⁴ Si nou ni imilité é kè nou ka kontanté-nou dè sa nou ni, nou ké fè kon Pòl : lè Jéova ké ba ondòt moun on otorité, nou ké rèspèkté sa (Akt 21:20-26). Bondyé fè ansòt pou ni ansyen pou dirijé lasanblé krétyèn la. Menmsi yo enpawfè, pou Jéova sé nonm-lasa sé dé « kado » (Éféz. 4:8, 11). Si nou ka rèspèkté sé  frè-lasa kè lèspri sen nonmé é si nou ka suiv enstriksyon kè yo ka ban-nou, nou ké rété bon bon zanmi èvè Jéova é nou ké antann-nou byen épi frè é sè an nou.

15. Ki biten pou nou fè ?

¹⁵ Si sé lajalouzi ki ka menné, pé pa ni lapé. Fò nou woté lajalouzi an tchè an nou é fò nou fè atansyon osi pou nou pa fè-y pousé an tchè a dòt moun nonplis. Sa vréman enpòwtan si nou vé suiv komandman a Jéova. I mandé-nou « kouri dèyè biten ki ka mété lapé é dèyè biten ki ka fè yonn fòwtifyé lòt » (Wom. 14:19). Ki biten itil nou pé fè pou édé lézòt goumé èvè lajalouzi é édé-yo travay pou lapé ?

16. Kijan nou pé édé lézòt a goumé èvè lajalouzi ?

¹⁶ Konpòwtèman an nou é mantalité an nou pé aji asi lézòt. Sa mond-la vé sé kè nou ‘fè moun vwè tousa nou ni’ (1 Jan 2:16). Men si sé konsa nou ka aji, sa pé rann moun jalou. Alò, ka nou pé fè pou sa pa rivé ? A pa yenki dè sa nou achté ou dè sa nou ni lentansyon achté pou nou palé toutlè. É si nou ni on rèsponsabilité adan lasanblé-la, fò pa nou blagé sa. Lè nou ka fè moun vwè kè nou ni rèsponsabilité, sé konsi sé fimyé nou ka mèt adan on tè pou fè lajalouzi pousé. Men okontrè, fò-nou pran on tan pou aprann konnèt lézòt é fò-nou rèkonnèt kè yo ka fè onlo bon biten. Si nou ka fè sa, nou ké édé-yo kontan sa yo ni men  anmenmditan, nou ké fè ansòt pou sé frè é sè-la vin pi soudé é nou ké travay pou ni lapé adan lasanblé-la.

17. Ka frè a Jozèf rivé fè, é poukwa ?

¹⁷ Ni mwayen nou rivé about a lajalouzi ! An-nou viré palé dè frè a Jozèf. Plizyè lanné apré yo fè-y bon méchansté, yo touvé-yo douvan-y an Éjipt. Avan i di-yo kimoun i té yé vréman, Jozèf mèt-yo a léprèv pou vwè si yo té chanjé. I fè on gran manjé akaz a-y é i ba Benjamen plis manjé ki sélézòt-la (Jén. 43:33, 34). Men an Bib-la, pa ni ayen ki ka montré kè yo té jalou Benjamen. Okontrè, yo montré kè yo té ni lanmou ki pou frè a yo ki pou pap’a yo, Jakòb (Jén. 44:30-34). Konm yo pa té jalou ankò, fanmi a yo té ka viv byen kon avan (Jén. 45:4, 15). Menmjan-la, si nou ka raché tout ti grenn jalouzi ki an tchè an nou, pé’é ni zizanni an fanmi an nou é toutmoun an lasanblé-la ké antann-yo byen.

18. Sèlon Jak 3:17, 18, ka ki ké rivé si nou ka fè ansòt pou ni lapé alantou an nou ?

¹⁸ Jéova vlé kè nou goumé èvè lajalouzi é kè nou kouri dèyè lapé. Men pou nou rivé fè sa, fò-nou fè gwo éfò. Kon nou ni lokazyon vwè pi ho, noutout pé vin jalou (Jak 4:5). É mond-la nou ka viv adan-y la ka pousé-nou a vin konsa osi. Men si nou ka fè éfò pou nou ni imilité é rèkonésans, é si nou ka kontanté-nou dè sa nou ni, nou pé’é jalou ponmoun. Okontrè, nou ké fè ansòt pou ni lapé alantou an nou é nou ké kiltivé bèl kalité pi fasilman (li Jak 3:17, 18).