1. Byensouvan, poukwa sèwten misyé ka mal aji èvè madanm a yo ?

LÈ OU ka tann lèmo « chèf », kijan ou ka konprann sa ? Lè ou ka vwè kijan sèwten misyé ka aji èvè madanm a yo é timoun a yo, ou ka rann-vou kont kè yo ka lésé kilti a yo, tradisyon a yo é jan-la yo lévé la aji asi yo. Gadé sa Yanita, on sè ki ka viv an Éwòp ka di : « La an ka rété la, an tèt a prèskè toutmoun, on madanm ni mwens valè ki on misyé é yo ka pran sé madanm-la pou bonich a yo. » Mi sa on frè non a-y sé Luke é ki ka viv o Zétazini ka di : « Ni sèwten papa ki ka fè gason a yo konprann kè sa on madanm ka di pa ni pon valè. Kifè, lè on madanm ka palé, yo pa menm oblijé kouté. » Men Jéova pa dakò èvè sé kalté konpòwtèman-lasa é a pa konsa i vé kè on mari aji èvè madanm a-y (gadé Mawk 7:13). Alò, si on mari anvi dirijé fanmi a-y byen, ka pou i fè ?

2. Ni on biten pou chak chèf a fanmi konnèt. Ki biten ésa é poukwa fò i konnèt sa ?

² Pou on misyé dirijé fanmi a-y byen, fò i koumansé pa konprann ka Jéova ka atann dè-y. Anplis, fò i byen konprann poukwa Jéova ba sèwten moun on otorité é kijan pou i imité ègzanp a Jéova é ta Jézi. Poukwa fò on nonm konnèt sé biten-lasa ? Pas Jéova ba sé chèf a fanmi-la on sèwten otorité é i vé kè yo sèvi èvè-y byen (Lik 12:48b).

3. Ka 1 Korentyen 11:3 ka aprann-nou anrapò èvè moun ki ni otorité ?

³ (Li 1 Korentyen 11:3.) Adan vèwsé-lasa, yo ka èspliké-nou ki wòl Jéova ba chakmoun an fanmi a-y, ki an syèl-la, ki asi latè. Lè ou chèf, ou ni on sèwten otorité men ou ni kont a rann osi. Pa ni ponmoun ki ni plis otorité ki Jéova é menmsi i ba sèwten moun on otorité, yo pa ni dwa fè sa yo vé èvè-y (Wom. 14:10 ; Éféz. 3:14, 15). Jéova ba Jézi okipé dè lasanblé-la men i pa ba-y dwa fè lasanblé-la  nenpòt ki biten (1 Kor. 15:27). Menmjan-la, Jéova mèt mari-la chèf a fanmi a-y. Men atansyon ! Jéova pa ba-y dwa fè fanmi a-y nenpòt ki biten (1 Pyè 3:7).

4. Ka Jéova é Jézi andwa fè ?

⁴ Konm sé Jéova ki kréyé toutmoun an syèl-la é asi latè, sé-y ki Pap’a-yo. Kifè, i andwa di tout timoun a-y kijan pou yo aji é i andwa vérifyé osi si yo ka fè sa i mandé (Iz. 33:22). Li Jézi, i sé chèf a lasanblé krétyèn la. Kifè, i andwa di sé krétyen-la kijan pou yo aji é i andwa vérifyé osi si yo ka fè sa i mandé (Gal. 6:2 ; Kol. 1:18-20).

5. Ki otorité Jéova ba sé chèf a fanmi-la, é ès sa vé di kè yo andwa fè nenpòt ki biten ?

⁵ Menmjan ki Jéova é Jézi, sé chèf a fanmi-la ki andwa pran désizyon pou fanmi a-y (Wom. 7:2 ; Éféz. 6:4). Men sa pa vé di kè i andwa fè tousa i vé. Pa ègzanp, lè i ka pran on désizyon, fò i annakò èvè sé prensip-la ki an Bib-la (Pwov. 3:5, 6). É si on moun pa’a fè pawti a fanmi a-y, i pa andwa di-y ka pou i fè (Wom. 14:4). Anplis, lè pitit a-y ka grandi é kè yo ka pran kaz a yo, fò yo kontinyé rèspèkté-y men yo pa anba otorité a-y ankò (Mat. 19:5).

6. Poukwa Jéova ba sèwten moun on otorité ?

⁶ Si Jéova ba sèwten moun on otorité sé pas i enmé fanmi a-y. Sé on bèl kado i fè-nou. Si Jéova pran dispozisyon-lasa, sé pou tout biten fèt byen konm i fo é pou toutmoun antann-yo byen (1 Kor. 14:33, 40). Si nou pa té sav kimoun ki ka dirijé adan fanmi a Jéova, tout biten té’é fèt anpangal é onlo moun té’é soufè akòz dè sa. Pa ègzanp, nou pa té’é sav kimoun ki dwètèt pran sé désizyon-la é kimoun ki dwètèt fè ansòt pou yo apliké-yo.

7. Dapré sa Éfézyen 5:25, 28 ka di, ès Jéova vé kè on mari menné madanm a-y alabagèt ?

⁷ Adan on fanmi, Jéova désidé kè chèf-la sé mari-la. Si sé on bon biten, alò poukwa ni tousa madanm ki ni lenprésyon kè mari a yo ka maltrété-yo é kè i ka menné-yo alabagèt ? Sé paskè ni onlo mari ki pa’a tchenn kont dè prensip a Jéova pou yo pé sa dirijé fanmi a yo. É pi souvan ki rarman, yo ka fè kon lamajorité a moun ka fè an péyi a yo. Défwa menm, pou sèwten mari santi-yo byen, fò yo fè madanm a yo bon méchansté. Pa ègzanp, on mari pé ka menné madanm a-y alabagèt pou limenm a-y santi kè i sé on malnonm oben pou i fè moun vwè kè sé li ki nonm an kaz-la. I pé ka mèt an tèt a-y kè menmsi pa ni mwayen i oblijé madanm a-y enmé-y, i pé fè madanm-la pè-y. É dépi madanm-la ké pè-y, i ké pé fè-y fè tousa i vé *. Lè on misyé ka rézonné konsa, oben lè i ka aji konsa, i pa ka ba madanm a-y lonnè-la é rèspé-la i mérité la. É Jéova pa dakò èvè sa menm menm menm ! (li Éfézyen 5:25, 28).

8. Si on misyé vé dirijé fanmi a-y byen, ka pou i fè ?

⁸ Si on misyé vé dirijé fanmi a-y byen, lè i ka sèvi èvè otorité-la i ni la, fò i imité Jéova é Jézi. Konnyéla, an-nou palé dè 2 kalité kè Jéova é Jézi tini, é an-nou vwè kijan on mari pé montré kè i ni sé 2 kalité-lasa lè i ka dirijé fanmi a-y.

9. Kijan Jéova ka montré kè i ni onlo imilité ?

 ⁹ Imilité. Pa ni ponmoun ki ni plis sajès ki Jéova, é poutan, i ka pran tan kouté sa sèwvitè a-y ni a di (Jén. 18:23, 24, 32). Sa ja rivé kè Jéova mandé sèwten moun ki anba otorité a-y ka yo té’é fè pou rézoud on pwoblèm (1 Wa 22:19-22). Jéova sé on moun ki pawfè, men i sav byen kè alèkilé nou pé’é jen pé fè tout biten on mannyè ki pawfè. É jistèman, konm i sav toutmoun enpawfè, i ka édé sèwvitè a-y pou yo rivé fè volonté a-y (Sòm 113:6, 7). An réyalité, adan Labib, yo jous ka di kè Jéova sé « sèkou » an nou (Sòm 27:9 ; Ébr. 13:6). Wa David di kè si i rivé fè tousa Jéova té ba-y fè, sé pas Jéova ni onlo imilité é pas i édé-y (2 Sam. 22:36).

10. Kijan Jézi montré kè i té ni imilité ?

¹⁰ An-nou ègzaminé ègzanp a Jézi. Disip a Jézi té ka kriyé-y « Ségnè » é yo té ka admèt kè sé-y ki té Mèt a yo. Men magrésa, i lavé pyé a yo ! Poukwa Jéova fè-yo maké istwa-lasa an Bib-la ? Sé pétèt pas i té vé ba sé mari-la on ègzanp pou yo suiv. Mi sa Jézi limenm a-y di : « An montré-zòt kijan pou zò fè, pou zòt osi zò fè kon an fè pou zòt » (Jan 13:12-17). Sé vré, Jéova té ba Jézi on gran otorité, men a pa pousa i té ka pran moun pou bonich a-y ! Okontrè, Jézi té ka sèvi lézòt (Mat. 20:28).

11. Jézi é Jéova montré kè yo ni onlo imilité. Kijan sé mari-la pé imité ègzanp a yo ?

¹¹ Ka sa ka aprann-nou ? On mari pé montre kè i ni imilité plizyè fason diféran. Pa ègzanp, i sav byen kè madanm a-y é timoun a-y pé pa aji on mannyè ki pawfè. I ka pran tan kouté sa madanm a-y é timoun a-y ka di-y, menm lè yo pa dakò èvè-y. Marley ka viv o Zétazini. Mi sa i ka di : « Défwa, mwen é mari an mwen, nou pa’a tonbé dakò. Men an sav kè mari an mwen enmé-mwen é kè i ka rèspèkté-mwen pas, avan i pran on désizyon, i toujou ka mandé-mwen ka an ka pansé é i ka pran tan réfléchi asi sa an di-y la. » Anplisdisa, on mari ki ni imilité toujou paré a fè on ti biten an kaz-la, menmsi, la i ka rété la, yo ka di kè sé yenki sé madanm-la ki dwèt fè sé kalté travay-lasa. Sa pé rèd pou-y toubònman ! Poukwa nou ka di sa ? Mi sa on sè non a-y sé  Rachel ka di : « Adan péyi an mwen, si on misyé ka édé madanm a-y fè vésèl oben nétwayé kaz-la, fanmi a-y é vwazen a-y pé di kè sé madanm-la ki ka pòté pantalon-la. É yo ké di kè misyé pa ni pon otorité asi madanm a-y ! » Si la ou ka rété la, sé mantalité-lasa ki tini, pa oubliyé kè Jézi lavé pyé a disip a-y, menmsi sé èsklav ki té ka fè sé kalté travay-lasa. On bon mari pa’a chèché a fè moun vwè kè sé-y ki chèf an kaz-la ; men sa i vé, sé kè madanm a-y é timoun a-y santi-yo alèz a yo. Kon nou byen konprann, pou on mari dirijé fanmi a-y byen, fò i ni imilité. Men fò i ni ondòt kalité ankò. Ki kalité ésa ?

12. Konm Jéova é Jézi enmé-nou, ka sa ka pousé-yo a fè ?

¹² Lanmou. Tousa Jéova ka fè, sé lanmou ki ka pousé-y fè-y (1 Jan 4:7, 8). Pou i montré-nou kè i enmé-nou é kè i vé nou rété bon bon zanmi èvè-y, i ban-nou Pawòl a-y é òwganizasyon a-y. Pou nou santi-nou ansékirité, Jéova ka fè-nou sav kè nou ni onlo valè pou-y. É si sé pou palé dè sa nou bizwen pou viv ? Nou pé di kè Jéova « ka ban-nou onpakèt biten pou nou pé sa pwofité dè yo » (1 Tim. 6:17). Lè nou ka fè on érè, i ka korijé-nou. Men sa vé pa di kè i pa enmé-nou ankò ! Konm Jéova enmé-nou fò, i sakrifyé gason a-y pou nou. É Jézi aprézan ? Tèlman i enmé-nou fò, i bay vi a-y pou nou (Jan 3:16 ; 15:13). Pa ni ayen ki pé anpéché Jéova é Jézi enmé moun ki fidèl (Jan 13:1 ; Wom. 8:35, 38, 39).

13. Fò on mari montré madanm a-y é timoun a-y kè i enmé-yo. Poukwa sa enpòwtan ? (gadé ti karé-la «  Kijan on misyé ki sòti mayé pé fè ansòt pou madanm a-y rèspèkté-y ? »).

¹³ Ka sa ka aprann-nou ? Tousa on mari ka fè, sé lanmou ki dwètèt pousé-y fè-y é sa vréman enpòwtan. Poukwa ? Mi sa lapòt Jan ka di : « On moun ki pa enmé frè a-y [oben fanmi a-y], kè i ka vwè, pé pa enmé Bondyé, kè i pa ka vwè » (1 Jan 4:11, 20). On mari ki enmé fanmi a-y, é ki vé imité Jéova é Jézi, ké édé madanm a-y  é timoun a-y rété bon zanmi èvè Jéova. I ké fè tousa i pé pou yo santi-yo ansékirité, é i ké ba-yo sa yo bizwen pou viv (1 Tim. 5:8). I ké fòwmé timoun a-y é i ké korijé-yo. Anplis, i ké kontinyé pran désizyon ki ka onoré Jéova é ki ké fè tout fanmi a-y dibyen. An-nou vwè kijan on mari pé imité Jéova é Jézi adan tout sé domenn-lasa.

14. Ka on mari ka fè pou i édé madanm a-y é timoun a-y vin pibon zanmi èvè Jéova ?

¹⁴ Fò i édé madanm a-y é timoun a-y vin bon zanmi èvè Jéova. Jézi montré kè i té menm biten ki Pap’a-y pas i fè tousa ki fo pou disip a-y té ni on fwa ki solid (Mat. 5:3, 6 ; Mawk 6:34). Menmjan-la, pou on mari, sa ki ké pi enpòwtan, sé kè madanm a-y é timoun a-y rété bon zanmi èvè Jéova (Dét. 6:6-9). Kijan i ké rivé fè sa ? I ka òwganizé-y pou li é fanmi a-y li Labib é pou yo étidyé-y. I ka fè ansòt pou yo ay réinyon é pou yo préché bon nouvèl-la. É i ka fè tousa i pé pou yo rété bon bon zanmi èvè Jéova.

15. Ka on mari pé fè pou i montré madanm a-y é timoun a-y kè i enmé-yo fò ?

¹⁵ Fò i montré madanm a-y é timoun a-y kè i enmé-yo fò. Menmsi té ni moun la, Jéova té ka di Jézi kè i enmé-y (Mat. 3:17). Jézi ni lokazyon di disip a-y kè i enmé-yo, men i montré-yo sa osi. É sé disip-la osi di Jézi kè yo té enmé-y (Jan 15:9, 12, 13 ; 21:16). Sa on mari ka fè pé montré madanm a-y é timoun a-y kè i enmé-yo. Pa ègzanp, i pé étidyé Labib èvè yo. Fò i di madanm a-y é timoun a-y kè i enmé-yo, kè yo ni onlo valè pou-y, é fò i félisité-yo osi. É fò pa i pè di-yo sa douvan toutmoun (Pwov. 31:28, 29).

16. Ki kòt biten pou on chèf a fanmi fè, men a ki biten fò i fè atansyon ?

¹⁶ Fò i ba madanm a-y é timoun a-y sa yo bizwen pou viv. Jéova té ka ba sé Izraélit-la sa yo té bizwen pou viv menm lè yo pa té ka kouté-y (Dét. 2:7 ; 29:5). Jòdijou osi, i ka ban-nou sa nou bizwen (Mat. 6:31-33 ; 7:11). Lè i té asi latè, Jézi osi té ka ba moun ki té ka suiv-li manjé (Mat. 14:17-20). I ni lokazyon géri onlo moun ki té malad (Mat. 4:24). Pou on mari fè Jéova plézi, fò i ba fanmi a-y sa i bizwen pou viv. Men, fò i fè atansyon : fò pa travay-la i ka fè la pou gangné sou a pen a-y pran tout tan a-y. Fò pa i oubliyé kè fò i pran on tan pou édé madanm a-y é timoun a-y vin bon bon zanmi èvè Jéova, é pou montré-yo kè i enmé-yo fò osi.

17. Jéova é Jézi ka fòwmé-nou é yo ka korijé-nou. Kijan yo ka fè sa ?

¹⁷ Fò i fòwmé madanm a-y é timoun a-y. Jéova ka fòwmé-nou é i ka korijé-nou pas i vé édé-nou (Ébr. 12:7-9). Jézi ka fè kon Pap’a-y : i ka fòwmé moun ki anba otorité  a-y, é i ka fè sa èvè onlo lanmou (Jan 15:14, 15). Lè i ka ban-nou on konsèy, i ka palé franchman ban nou, men i ka fè sa jantiman (Mat. 20:24-28). I sav kè nou sé dé moun enpawfè é kè souvantfwa, nou ka fè érè (Mat. 26:41).

18. Si on mari vé dirijé fanmi a-y byen, ka pou i pa jen oubliyé ?

¹⁸ On mari ki ka imité Jéova é Jézi pa jen ka oubliyé kè madanm a-y é timoun a-y ka fè érè. Sé pousa i pa ‘rèd èvè madanm a-y é timoun a-y’ (Kol. 3:19). Olyé dè sa, i ka apliké prensip-la nou ka touvé an Galat 6:1. I ka édé-yo chanjé, é i ka fè sa ‘èvè onlo dousè’. É i pa jen ka oubliyé kè limenm a-y enpawfè. Menmjan ki Jézi, i sav kè pou anségné madanm a-y é timoun a-y, méyè biten ki ni a fè sé ba-yo lègzanp (1 Pyè 2:21).

19-20. Lè on chèf a fanmi ni on désizyon a pran, kijan i pé imité Jéova é Jézi ?

¹⁹ Lè i ka pran on désizyon, fò pa i sonjé yenki li. Lè Jéova ka pran on désizyon sé pou toutmoun santi-yo byen. Pa ègzanp, lè i désidé kréyé-nou, a pa té pou pwòp entéré a-y ; men sé pas i té vé nou pwofité dè lavi ansanm èvè-y. A pa ponmoun ki fòsé-y ban-nou Gason a-y pou i té woté-nou anba jouk a péché-la. Men i fè-y pas i té vé édé-nou. Jézi osi pran sèwten désizyon pou i té pé sa fè lézòt dibyen (Wom. 15:3). Pa ègzanp, ni on jou i té las bon las la, men olyé i té pozé kò a-y, i désidé fè on éfò pou i té pé sa anségné on gran foulmoun (Mawk 6:31-34).

²⁰ On mari ki vé dirijé fanmi a-y byen, sav kè pou on moun pé sa pran on bon désizyon an favè a madanm a-y é timoun a-y, a pa on biten ki fasil. Men i ka pran sa oséryé. Avan i pran on désizyon, i ka éséyé vwè si sa ké bon pou madanm a-y é timoun a-y. I pa’a tchenn kont yenki dè sa i ka rèsanti. Olyé dè sa, i ka lésé Jéova fòwmé-y (Pwov. 2:6, 7). Konsa, i pé’é chèché yenki pwòp entéré a-y, men i ké chèché ta lézòt osi * (Filip. 2:4).

21. Ka nou ké vwè adan awtik-la ki ka vin la ?

²¹ Jéova ba chak mari on misyon ki difisil, men i vé kè yo fè tousa yo pé pou akonpli misyon-lasa byen. Si on mari ka fè éfò pou imité Jéova é Jézi, i ké dirijé fanmi a-y byen. É si madanm-la ka jouwé wòl a-y byen, toutmoun ké kontan an kaz-la. Alò kon nou vwè, sé mari-la ki chèf. Men kijan pou madanm-la vwè sa ? Ki difikilté i pé ka jwenn ? Adan awtik-la ki ka vin la, nou ké réponn a sé kèsyon-lasa.