Adan lézanné 1920, avan pap’an mwen é manman-mwen té mayé, yo vin konnèt lavérité. An fèt an 1939. Lèwvwè an té jenntiboug, nou té ka viv an Anglètè é an té k’ay réinyon èvè fanmi an mwen. É rivé on lè, an enskri-mwen Lékòl téokratik pou mwen té fè sijé. A pa ti enmé an té enmé fè sa ! Jousalè, an ka sonjé prèmyé sijé an mwen. Fò an té doubout anlè on bwèt pou yo té pé sa vwè-mwen dèyè pipit-la. An té ni 6 an é lè an vwè pakèt moun-la ki té douvan an mwen la, tchè an mwen mété-y ka bat a mil a lè.

Pou mwen té ay préché, pap’an mwen ékri on ti prézantasyon tou senp ban mwen anlè on kat. Prèmyé fwa an ay préché tousèl an mwen, an té ni 8 an. A pa ti kontan an té kontan lè mèt a kaz-la pran kat-la an ba-y la é lè i aksèpté liv-la « Que Dieu soit reconnu pour vrai ! ». An kouri an lari-la mwen té di papa sa ! Prédikasyon-la é sé réinyon-la mèt onlo jwa an tchè an mwen é sa ban-mwen anvi sèvi Jéova aplentan.

Papa fè ansòt mwen té rèsèvwa Tou dè Gad la chak mwa. É grasa sa, an vin enmé Labib plis ankò. Dépi an té ka rèsèvwa on Tou dè Gad, an té ka valé-y. Piti-a-piti, fwa an mwen vin pi fò, kifè, sa pousé-mwen ba Jéova vi an mwen.

An 1950, yo chwazi mwen é fanmi an mwen pou nou té ay adan on lasanblé ki fèt a Nouyòk. Tèm a lasanblé-lasa sé té « L’accroissement de la théocratie ». Jédi 3 out, tèm a jouné lasanblé-la sé té « Journée des missionnaires ». Jou-lasa sé frè Carey Barber ki fè diskou a batèm-la. Frè-lasa té an Komité santral la apré. An fen a diskou-la, frè-la pozé sé moun-la ki té k’ay pran batèm la 2 kèsyon. Lèwgadé an lévé é an di wi ! An té ni 11 an sèlman men an té sav byen ka an té ka fè. Men sèlman, an té pè rantré an dlo-la pas  an poto’o sav najé. Tonton an mwen menné-mwen jous owa pisin-la é i di-mwen pa enkyété-mwen pas tout biten ké pasé byen. Sa ay tèlman vit kè an pa menm santi pyé an mwen touché fon a pisin-la. An pasé an men a 2 frè. Ni yonn ki batizé-mwen é ni ondòt ki fan’an sòti an pisin-la. Dépi jouné enpòwtan lasa, Jéova toujou kontinyé fè santyé an mwen vin dwèt.

Lè an fin tout lanné lisé an mwen, an té anvi vin pyonyé. Men pwofésè an mwen ankourajé-mwen ay linivèwsité pou an pé sa kontinyé étid an mwen. An ay fè lèmalè dè kouté-yo é an ay linivèwsité. Men an pa tadé a rann-mwen kont kè an pa té’é pé fè sa Jéova ka mandé a san pou san é kontinyé fè gran étid anmenmtan. Kifè, an désidé arété zafè a linivèwsité la. An mèt pwoblèm-lasa an men a Jéova é an ékri on lèt ba pwofésè an mwen, mwen té pé sa woté kò an mwen la jantiman. É adan lèt-lasa, an té ka èspliké-yo kè apré prèmyé lanné-la, an pa té’é kontinyé vin linivèwsité ankò. An fè Jéova konfyans a san pou san é an mèt-mwen pyonyé tousuit.

An juiyé 1957, an koumansé préché aplentan adan on vil non a-y sé Wellingborough. Sé Bétèl-la ki té voyé-mwen la. An mandé sé frè a Bétèl-la si pa ni mwayen yo mèt-mwen èvè on frè ki ja si plas é ki ni èkspéryans. Frè Bert Vaisey aprann-mwen onlo biten toubònman. I té ka pòté bon mannèv é i édé-mwen òwganizé pwogram a prédikasyon an mwen byen osi. Adan lasanblé-la, nou té a 8 : 6 sè ki té ja ni on bèl laj, frè Vaisey é mwenmenm. An té ka préparé réinyon an mwen byen é an toujou té ni on pawtisipasyon. Kifè, sa édé-mwen ni plis konfyans an Jéova é sa édé-mwen montré kè an té ni fwa adan-y.

Konm an rèfizé fè lawmé, an fè on koud-lajòl. Men aprésa, an rankontré Barbara. Sé on sè ki té pyonyé èspésyal. Nou mayé an 1959 é kèlkèswa koté-la yo té ka voyé-nou la, nou té paré a alé. Prèmyé koté yo voyé-nou sé adan on réjyon non a-y sé Lancashire. Réjyon-lasa ka touvé-y o nò a Langlètè a lwès. An Janvyé 1961, yo fè-mwen vin an Bétèl-la pou an té suiv on fòwmasyon ki té ka diré on mwa. Fòwmasyon-lasa sé té on lékòl ki té fèt pou sé ansyen-la. Lè lékòl-lasa fin, yo nonmé-mwen rèsponsab a siwkonskripsyon. An pa té ka atann-mwen a sa menm menm menm ! Pannan 15 jou, on rèsponsab a siwkonskripsyon ki té ni onlo èkspéryans fòwmé-mwen adan on vil non a-y sé Birmingham. Yo di Barbara kè i té pé vin èvè mwen. Aprésa, nou ay la yo té désidé voyé-nou la apré lékòl-la. Nou ay vizité sé lasanblé-la ki ka touvé-yo o Lancashire é o Cheshire.

An out 1962, pannan nou té an vakans, Bétèl-la voyé on lèt ban nou. Adan anvlòp-la té ni 2 papyé pou nou té ranpli pou nou té pé ay fè Lékòl a Galaad. Nou priyé Jéova anrapò èvè sa é aprésa, nou ranpli sé dèmann-la é nou voyé-yo tousuit ba Bétèl-la. 5 mwa apré nou ay Bwouklin, a Nouyòk, pou nou té fè Lékòl a Galaad. Nou té adan 38^èm klas-la é fòwmasyon-la diré 10 mwa.

 Pannan lékòl-lasa, nou aprann onlo biten asi Labib, asi òwganizasyon a Jéova é asi frè é sè an nou ki ka rété toupatou si latè. Barbara é mwen, nou té jenn toujou ; Barbara té ni 23 an é mwen an té ni 24 an. Kifè, sé zélèv-la ki té èvè nou la aprann-nou onlo biten menm. Anplisdisa, pannan lékòl-lasa, yo té ban-mwen on travay a fè é sa pèwmèt-mwen kolaboré èvè frè Fred Rusk. Sé té yonn adan sé fòwmatè-la. Souvantfwa, mi sa i té ka di-nou : « Pou ba on moun on bon konsèy, fò i bazé asi Labib ». Pannan lékòl-la, plizyè frè ki ni onlo èkspéryans fè diskou ban nou. Nou ni lokazyon kouté Nathan Knorr, Frederick Franz é Karl Klein. É frè Alexander Macmillan èspliké-nou kijan Jéova gidé pèp a-y antrè 1914 é 1919. A pa ti imilité frè-lasa té ni ! Nou pa jen oubliyé sa !

Lè fòwmasyon-la té toupré fin, frè Knorr di-nou kè yo ka voyé-nou an Afrik, o Bouwoundi. I poto’o fin di-nou sa, nou kouri an bibliyotèk a Bétèl-la pou nou gadé adan Annuaire-la konmen pwoklamatè ki té ni adan péyi-lasa. Sé la nou rann-nou kont kè yo pa té ka palé dè péyi-la ponkoté adan Annuaire-la. An réyalité, yo té ka voyé-nou adan on téritwa pa té ni pon pwoklamatè é nou pa té konnèt granzafè asi Lafrik nonplis. A pa ti istrésé nou té istrésé ! Men nou priyé Jéova èvè tout tchè an nou é i trankilizé lèspri an nou.

Lè nou rivé anbala, fò nou té abityé-nou èvè dé biten nou pa té konnèt : tanpérati-la, kilti-la, lang-la. Fò nou té aprann palé fransé é anplisdisa, fò nou té touvé on koté pou nou rété. 2 jou apré nou rivé, Harry Arnott, on frè ki té fè Galaad èvè nou, vin vwè-nou. I té k’ay an Zanbi. Sé la yo té voyé-y apré lékòl-la. I édé-nou touvé on kaz. Men on ti moman apré nou rivé, nou touvé-nou an pwoblèm èvè gouvènman-la pas yo pa té konnèt Témwen a Jéova. Nou poto’o menm koumansé abityé-nou èvè nouvo téritwa an nou, é gouvènman-la fè-nou sav kè nou pé’é pé rété an péyi-la si nou pa ni on otorizasyon pou nou travay. Kifè, nou té oblijé pati pou ay adan ondòt péyi. Nou atéri an Ouganda.

Nou té on ti jan pè pas lè nou rivé an Ouganda nou pa té ni papyé. Men nou fè Jéova konfyans.  On frè kanadyen ki té vin viv an péyi-lasa pou préché èspliké on fonksyonè ki té ka ba moun papyé adan ki pwoblèm nou té ka touvé-nou. Misyé-la ban-nou on favè é i di-nou kè i ka ban-nou déotwa mwa pou nou pé sa fè papyé an nou. Sa montré-nou kè Jéova té la èvè nou.

An Ouganda, biten-la pa té menm biten ki o Bouwoundi pas yo té ja ka préché bon nouvèl a Wayòm-la. É poutan, té ni yenki 28 Témwen an péyi-lasa. Adan téritwa-lasa té ni onlo moun ki té sav palé anglé men a pa adan lang-lasa yo té pi alèz. Kifè, nou rann-nou kont kè pou édé sé moun-la konprann lavérité, fò-nou té aprann palé yonn adan sé lang-la yo té ka palé adan péyi-lasa. Lè nou koumansé préché, nou té adan on réjyon non a-y sé Kampala é sé moun-la té ka palé luganda. Sé pousa, nou désidé aprann lang-lasa. Sa pran plizyè lanné pou nou té aprann palé lang-lasa byen, men sa té itil, paskè sa pèwmèt-nou palé lang-la on mannyè ki éfikas. Nou koumansé konprann ka ki té nésésè pou édé étidyan an nou pwogrésé. Lè sé étidyan-la vwè jan nou té enmé-yo, yo wouvè tchè a yo ban nou é yo di-nou sa yo té ka rèsanti pou sé vérité-la nou té ka aprann-yo la.

A pa ti kontan nou té ka kontan lèwvwè nou té ka montré sé moun-la sé vérité-la ki an Bib-la ! Men lè yo di-nou kè yo ka voyé-nou vizité plizyè téritwa diféran, nou té pli kontan ankò ! Filyal a Kénya voyé-nou gadé kijan biten-la té yé an Ouganda. Nou bat tout péyi-la pou nou té vwè ki koté sé pyonyé èspésyal la té’é pi itil. Ni onlo moun ki akéyi-nou byen akaz a yo alòskè yo po’o té jen tann palé dè Témwen a Jéova. É a pa onsèl fwa sa fèt ! Yo akéyi-nou bra gran wouvè é yo jous préparé manjé ban nou.

Aprésa, yo pwopozé-mwen ay ondòt koté. An pran on tren a Kampala mwen té ay o Kénya adan on vil non a-y sé Mombasa. Vwayaj-la diré 2 jou. An pran on bato pou an té ay vizité onpakèt ti lilèt ki ka touvé-yo adan loséan Endyen. Yo ka kriyé sé lilèt-lasa Léséchèl. Aprésa, dè 1965 a 1972, chakfwa an té k’ay o Séchèl, Barbara té ka vin èvè mwen. Odépa, té ni yenki 2 pwoklamatè, men aprésa, yo fè on gwoup é gwoup-lasa vin on lasanblé lokal. An fè dòt vwayaj kon sila mwen té ay an Éritré, an Étyopi é o Soudan é sa pèwmèt-mwen ankourajé sé frè-la.

An Ouganda, sitiyasyon-la enn chanjé onsèl kou ! Ni déotwa sòlda ki chalviré gouvènman-la pou yo té pé sa dirijé péyi-la. Pannan plizyè lanné biten-la té rèd é toutmoun té pè. Sa fè-mwen sonjé kè lè ou ka « ba Séza sa ki ta Séza » sé on bon biten toubònman (Mawk 12:17). On jou, yo mandé tout sé étranjé-la ay lapolis pou yo pé sa fè-yo mèt non a yo asi on rèjis. Nou pa pèd tan é nou alé. Déotwa jou apré, mwen èvè ondòt misyonè nou té ka woulé ti woulé an nou a Kampala, é lèwgadé, déotwa polisyé fè-nou sign arété-nou é yo vin owa an nou. A pa ti pè nou té pè ! Yo di-nou kè nou sé 2 èspyon é yo menné-nou èvè yo lapolis. Nou di-yo kè nou sé 2 misyonè é kè nou pa’a fè ponmoun ayen. Nou di-yo osi kè non an nou té ja maké anlè on rèjis men sé mésyé pa té vé tann ayen menm ! Sé pousa, on polisyé menné-nou adan on biwo yo té ni toupré kaz an nou. Sé la nou té ay pou yo té maké non an nou anlè on rèjis. É érèzman, polisyé-la ki té la la rèkonnèt-nou pas i té la lè nou té pasé an biwo-la. Kifè, i mandé lòt polisyé-la libéré-nou.

An tan-lasa, yo té ka baré chimen-la souvan é lè nou té ka rivé owa sé baraj-lasa, a pa ti pè nou  té ka pè ! Kanta lèwvwè sé sòlda-la té ja sou sou a yo é té ka mandé-nou arété-nou, mésyé ! Men a chakfwa, nou té ka priyé Jéova é sa té ka trankilizé-nou. Kifè, nou toujou rivé pasé sé baraj-la san ayen rivé-nou. Malérèzman, an 1973, yo mandé tout sé misyonè étranjé la kité péyi-la.

Alò, sé frè-la voyé-nou ondòt koté ; yo voyé-nou an Kòt Divwa. La ankò, sé té on gwo chanjman pou nou. Fò nou té fè kò èvè on nouvo kilti é fò nou té viré palé fransé. É an kaz-la nou té ka rété la, fò nou té viv èvè déotwa misyonè ki té sòti adan plizyè péyi diféran. Men fwa-lasa ankò, nou vwè men a Jéova pas ni onlo moun ki té ni imilité é ki té sensè ki aksèpté bon nouvèl-la. É yo pa tadé pou fè sa ! Konm nou té ka fè Jéova konfyans, mwen é Barbara, nou vwè kijan Jéova fè santyé an nou vin dwèt.

Yo aprann-nou on mové nouvèl : Barbara té ni on kansè. A plizyè rèpriz, nou ay an Éwòp pou Barbara té pé sa swagné-y. Men an 1983, nou rann-nou kont kè nou pa té’é pé sèvi Jéova la nou té yé la. Sa rann-nou tris toubònman !

Nou té an Bétèl-la an Anglètè men sa vin pi mové pou Barbara. É malérèzman, i mò. An pé di-zòt kè sé frè é sè a Bétèl-la soutyenn-mwen onlo menm. Ni on frè é madanm a-y, an pawtikilyé, ki édé-mwen fè kò èvè nouvo sitiyasyon-lasa é ki édé-mwen kontinyé fè Jéova konfyans. Plita, an fè konésans a Ann. Sé on sè ki té ni labitid vin travay an Bétèl-la é ki té pyonyé èspésyal avan. I té enmé Jéova fò menm. Nou mayé an 1989 é dépi sa, nou ka travay an Bétèl-la.

Dè 1995 a 2018, an rèprézanté biwo mondyal la. A pa ti kontan an té kontan travay-lasa ! An ay adan prèskè 60 péyi diféran. Chakfwa an té k’ay vizité sé frè-la, an té ka vwè jan Jéova ka pran swen a sèwvitè a-y kèlkèswa difikilté yo té ka jwenn.

An 2017, yo voyé-mwen an Afrik pou vizité sé frè-la. A pa ti kontan an té kontan fè Ann dékouvè Lèbouwoundi ! É nou té kontan toubònman lè nou vwè konmen moun ki aksèpté lavérité an péyi-lasa ! An 1964, an ka sonjé nou té ka préché adan on lari é konnyéla, an lari-lasa, ni on bèl ti Bétèl. É jòdijou, an péyi-lasa, ni plis ki 15 500 pwoklamatè.

An 2018, lè yo ban-mwen pwogram an mwen pou an sav adan ki péyi an té k’ay pou vizité sé lasanblé-la, an té kontan toubònman pas pawmi sé péyi-lasa té ni Lakòt Divwa ! Lè nou rivé a Abidjan, kapital a péyi-la, an té ni lenprésyon kè sé akaz an té yé. Lè nou rivé an Bétèl-la, yo mèt-nou adan on chanm ki fèt pou sé envité-la. An voyé on koudzyé asi sé niméwo téléfòn-la mwen té vwè kimoun ki té akoté an nou. Ni on non an rèkonnèt tousuit : sé ta frè Soussou. Lè an té a Abidjan, sé-y Bétèl-la té nonmé rèsponsab a vil-la. Men an réyalité, a pa moun-la an té ka konprann la. Sé té ondòt moun. Sé té gason a Soussou.

Jéova tchenn a mo a-y. An jwenn onlo difikilté men a chakfwa, an konstaté kè lèwvwè an té ka fè Jéova konfyans, i té ka fè santyé an mwen vin dwèt. An vé kontinyé maché asi « chimen a moun ki jis » pas chimen-lasa ké menné-mwen an mond nouvo la é an ké ni tchè-kontan pou touttan (Pwov. 4:18).